IPL 2025 ਦਾ ਖਿਤਾਬ ਜਿੱਤਣ ਲਈ ਅੱਜ ਭਿੜਨਗੇ ਪੰਜਾਬ ਕਿੰਗਜ਼ ਤੇ RCB

ਅਹਿਮਦਾਬਾਦ– ਰਾਇਲ ਚੈਲੰਜਰਜ਼ ਬੈਂਗਲੁਰੂ (ਆਰ. ਸੀ. ਬੀ.) ਤੇ ਪੰਜਾਬ ਕਿੰਗਜ਼ ਦੀ ਟੀਮ ਮੰਗਲਵਾਰ ਨੂੰ ਇੱਥੇ ਜਦੋਂ ਇੰਡੀਅਨ ਪ੍ਰੀਮੀਅਰ ਲੀਗ (ਆਈ. ਪੀ.ਐੱਲ.) ਦੇ ਫਾਈਨਲ ਵਿਚ ਆਹਮੋ-ਸਾਹਮਣੇ ਹੋਣਗੇ ਤਾਂ ਉਨ੍ਹਾਂ ਦਾ ਟੀਚਾ ਇਹ ਵੱਕਾਰੀ ਟਰਾਫੀ ਜਿੱਤਣ ਦਾ 18 ਸਾਲ ਦਾ ਇੰਤਜ਼ਾਰ ਖਤਮ ਕਰਨਾ ਹੋਵੇਗਾ। ਸਾਰਿਆਂ ਦੀਆਂ ਨਜ਼ਰਾਂ ਹਾਲਾਂਕਿ ਹਾਲ ਹੀ ਵਿਚ ਟੈਸਟ ਕ੍ਰਿਕਟ ਤੋਂ ਸੰਨਿਆਸ ਲੈਣ ਵਾਲੇ ਵਿਰਾਟ ਕੋਹਲੀ ’ਤੇ ਟਿਕੀਆਂ ਰਹਿਣਗੀਆਂ, ਜਿਹੜਾ ਸ਼ੁਰੂ ਵਿਚ ਆਰ. ਸੀ. ਬੀ. ਨਾਲ ਜੁੜੇ ਹੋਣ ਦੇ ਬਾਵਜੂਦ ਅਜੇ ਤੱਕ ਆਪਣੀ ਟੀਮ ਨੂੰ ਆਈ. ਪੀ. ਐੱਲ. ਦਾ ਚੈਂਪੀਅਨ ਨਹੀਂ ਬਣਾ ਸਕਿਆ ਹੈ। ਆਰ. ਸੀ. ਬੀ. ਤੇ ਕੋਹਲੀ ਦਾ ਇਹ ਚੌਥਾ ਫਾਈਨਲ ਹੋਵੇਗਾ।

ਨਰਿੰਦਰ ਮੋਦੀ ਸਟੇਡੀਅਮ ਵਿਚ ਹੋਣ ਵਾਲੇ ਫਾਈਨਲ ਮੁਕਾਬਲੇ ਵਿਚ ਕੋਹਲੀ ਦਾ ਸਮਰਥਨ ਕਰਨ ਲਈ 18 ਨੰਬਰ ਦੀ ਜਰਸੀ ਪਹਿਨੇ ਹਜ਼ਾਰਾਂ ਪ੍ਰਸ਼ੰਸਕ ਨਜ਼ਰ ਆ ਸਕਦੇ ਹਨ। ਆਰ. ਸੀ. ਬੀ. ਨੇ ਆਪਣੀਆਂ ਪਿਛਲੀਆਂ ਸਮੱਸਿਆਵਾਂ ਨੂੰ ਛੱਡ ਕੇ ਇਸ ਵਾਰ ਸ਼ੁਰੂ ਤੋਂ ਲੈ ਕੇ ਅੰਤ ਤੱਕ ਚੰਗਾ ਪ੍ਰਦਰਸ਼ਨ ਕੀਤਾ ਹੈ। ਉਸ ਨੇ ਪਹਿਲੇ ਕੁਆਲੀਫਾਇਰ ਵਿਚ ਪੰਜਾਬ ਨੂੰ 8 ਵਿਕਟਾਂ ਨਾਲ ਹਰਾ ਕੇ ਫਾਈਨਲ ਵਿਚ ਪ੍ਰਵੇਸ਼ ਕੀਤਾ ਤੇ ਉਸਦੀ ਟੀਮ ਆਪਣੇ ਇਸ ਪ੍ਰਦਰਸ਼ਨ ਨੂੰ ਦੁਹਰਾਉਣ ਲਈ ਪ੍ਰਤੀਬੱਧ ਹੋਵੇਗੀ।

ਕੋਹਲੀ (614 ਦੌੜਾਂ) ਨੇ ਹਰ ਸਾਲ ਦੀ ਤਰ੍ਹਾਂ ਇਸ ਵਾਰ ਵੀ ਚੰਗਾ ਪ੍ਰਦਰਸ਼ਨ ਕੀਤਾ ਹੈ। ਉਹ ਇਸ ਸਾਲ ਵੀ ਆਰ. ਸੀ. ਬੀ. ਦੀ ਬੱਲੇਬਾਜ਼ੀ ਦਾ ਮੁੱਖ ਬਿੰਦੂ ਰਿਹਾ। ਇਸ ਵਾਰ ਉਸ ਨੂੰ ਹੋਰਨਾਂ ਖਿਡਾਰੀਆਂ ਦਾ ਵੀ ਚੰਗਾ ਸਹਿਯੋਗ ਮਿਲਿਆ, ਜਿਸ ਨੇ ਮੁੱਖ ਫਰਕ ਪੈਦਾ ਕੀਤਾ। ਇਸ ਸਾਲ ਕੋਹਲੀ ਇਕੱਲਾ ਅਜਿਹਾ ਖਿਡਾਰੀ ਨਹੀਂ ਰਿਹਾ ਹੈ, ਜਿਸ ’ਤੇ ਸਾਰਿਆਂ ਦਾ ਧਿਆਨ ਕੇਂਦ੍ਰਿਤ ਰਿਹਾ ਹੈ ਸਗੋਂ ਉਸ ਨੇ ਚੁੱਪਚਾਪ ਆਰ. ਸੀ.ਬੀ. ਨੂੰ ਮਜ਼ਬੂਤ ਕਰਨ ਦਾ ਕੰਮ ਕੀਤਾ ਹੈ। ਫਿਲ ਸਾਲਟ ਨੇ ਭਾਰਤੀ ਸੁਪਰ ਸਟਾਰ ਦਾ ਚੰਗਾ ਸਾਥ ਦੇ ਕੇ ਆਰ.ਸੀ. ਬੀ. ਨੂੰ ਚੰਗੀ ਸ਼ੁਰੂਆਤੀ ਦਿਵਾਈ ਜਦਕਿ ਮਯੰਕ ਅਗਰਵਾਲ, ਕਪਤਾਨ ਰਜਤ ਪਾਟੀਦਾਰ ਤੇ ਜਿਤੇਸ਼ ਸ਼ਰਮਾ ਬੱਲੇਬਾਜ਼ੀ ਕ੍ਰਮ ਦੇ ਭਰੋਸੇਮੰਦ ਖਿਡਾਰੀ ਹਨ। ਟਿਮ ਡੇਵਿਡ ਜ਼ਖ਼ਮੀ ਹੋਣ ਕਾਰਨ ਆਰ. ਸੀ. ਬੀ. ਦੇ ਪਿਛਲੇ ਦੋ ਮੈਚਾਂ ਵਿਚ ਨਹੀਂ ਖੇਡ ਸਕਿਆ, ਇਸ ਲਈ ਇਹ ਦੇਖਣਾ ਬਾਕੀ ਹੈ ਕਿ ਉਹ ਇਸ ਮੁਕਾਬਲੇ ਲਈ ਫਿੱਟ ਹੈ ਜਾਂ ਨਹੀਂ। ਉਸ ਨੇ ਰੋਮਾਰੀਓ ਸ਼ੈਫਰਡ ਦੇ ਨਾਲ ਮਿਲ ਕੇ ਡੈੱਥ ਓਵਰਾਂ ਵਿਚ ਮਹੱਤਵਪੂਰਨ ਭੂਮਿਕਾ ਨਿਭਾਈ ਹੈ।

ਗੇਂਦਬਾਜ਼ੀ ਵਿਚ ਸ਼ਾਂਤ ਤੇ ਧੀਰਜਵਾਨ ਜੋਸ਼ ਹੇਜ਼ਲਵੁੱਡ (21 ਵਿਕਟਾਂ) ਨੇ ਆਰ. ਸੀ. ਬੀ. ਲਈ ਮਹੱਤਵਪੂਰਨ ਯੋਗਦਾਨ ਦਿੱਤਾ ਹੈ। ਉਹ ਆਈ. ਪੀ. ਐੱਲ. ਦੇ ਮੌਜੂਦਾ ਸੈਸ਼ਨ ਵਿਚ ਸਭ ਤੋਂ ਵੱਧ ਵਿਕਟਾਂ ਲੈਣ ਵਾਲੇ ਗੇਂਦਬਾਜ਼ਾਂ ਦੀ ਸੂਚੀ ਵਿਚ ਅਜੇ ਚੌਥੇ ਸਥਾਨ ’ਤੇ ਹੈ। ਮੁੱਲਾਂਪੁਰ ਵਿਚ ਆਪਣੇ ਘਰੇਲੂ ਮੈਦਾਨ ’ਤੇ ਪਹਿਲੇ ਕੁਆਲੀਫਾਇਰ ਵਿਚ ਆਰ. ਸੀ. ਬੀ. ਹੱਥੋਂ ਮਿਲੀ ਕਰਾਰੀ ਹਾਰ ਦੇ ਬਾਵਜੂਦ ਸ਼੍ਰੇਅਸ ਅਈਅਰ ਦੀ ਅਗਵਾਈ ਵਾਲੀ ਪੰਜਾਬ ਕਿੰਗਜ਼ ਦੀ ਟੀਮ ਨੇ ਮੁੰਬਈ ਇੰਡੀਅਨਜ਼ ਵਿਰੁੱਧ ਦੂਜੇ ਕੁਆਲੀਫਾਇਰ ਵਿਚ ਸ਼ਾਨਦਾਰ ਪ੍ਰਦਰਸ਼ਨ ਕੀਤਾ। ਉਸ ਨੇ 5 ਵਾਰ ਦੀ ਜੇਤੂ ਮੁੰਬਈ ਇੰਡੀਅਨਜ਼ ਨੂੰ ਹਰਾ ਕੇ 11 ਸਾਲਾਂ ਬਾਅਦ ਪਹਿਲੀ ਵਾਰ ਫਾਈਨਲ ਵਿਚ ਪ੍ਰਵੇਸ਼ ਕੀਤਾ।

ਕਿੰਗਜ਼ ਦੇ ਕਪਤਾਨ ਅਈਅਰ ਤੇ ਕੋਚ ਰਿਕੀ ਪੋਂਟਿੰਗ ਦੀ ਦੇਖ-ਰੇਖ ਵਿਚ ਮਹੱਤਵਪੂਰਨ ਤਰੱਕੀ ਕੀਤੀ ਹੈ। ਅਈਅਰ (603 ਦੌੜਾਂ) ਦੀ ਅਗਵਾਈ ਵਿਚ ਪਿਛਲੇ ਸਾਲ ਕੋਲਕਾਤਾ ਨਾਈਟ ਰਾਈਡਰਜ਼ ਚੈਂਪੀਅਨ ਬਣਿਆ ਸੀ। ਇਸ ਤਰ੍ਹਾਂ ਨਾਲ ਲਗਾਤਾਰ ਦੂਜੀ ਵਾਰ ਆਈ. ਪੀ. ਐੱਲ. ਫਾਈਨਲ ਵਿਚ ਪਹੁੰਚਣਾ ਇਕ ਅਜਿਹੇ ਅਗਵਾਈਕਾਰ ਦੇ ਰੂਪ ਵਿਚ ਉਸਦੀਆਂ ਸਮਰੱਥਾਵਾਂ ਦੇ ਬਾਰੇ ਵਿਚ ਬਹੁਤ ਕੁਝ ਕਹਿੰਦਾ ਹੈ ਜਿਹੜਾ ਇਸ ਰੂਪ ਵਿਚ ਕਿਸੇ ਵੀ ਹੋਰਨਾਂ ਦੀ ਤਰ੍ਹਾਂ ਹੀ ਆਪਣੇ ਖਿਡਾਰੀਆਂ ਨੂੰ ਚੰਗੀ ਤਰ੍ਹਾਂ ਨਾਲ ਸੰਗਠਿਤ ਕਰਦਾ ਹੈ। ਇਸ ਲਈ ਇਹ ਹੈਰਾਨੀ ਦੀ ਗੱਲ ਨਹੀਂ ਹੈ ਕਿ ਅਈਅਰ ਟੂਰਨਾਮੈਂਟ ਦੇ 18 ਸਾਲਾਂ ਦੇ ਇਤਿਹਾਸ ਵਿਚ ਇਕਲੌਤਾ ਕ੍ਰਿਕਟਰ ਹੈ, ਜਿਸ ਨੇ ਆਈ. ਪੀ. ਐੱਲ. ਫਾਈਨਲ ਵਿਚ 3 ਵੱਖ-ਵੱਖ ਟੀਮਾਂ ਦੀ ਅਗਵਾਈ ਕੀਤੀ ਹੈ, ਜਿਸ ਵਿਚ ਦਿੱਲੀ ਕੈਪੀਟਲਸ ਤੀਜੀ ਟੀਮ ਹੈ। ਪ੍ਰਭਸਿਮਰਨ ਸਿੰਘ, ਜੋਸ਼ ਇੰਗਲਿਸ, ਪ੍ਰਿਆਂਸ਼ ਆਰੀਆ ਤੇ ਸ਼ਸ਼ਾਂਕ ਸਿੰਘ ਦੇ ਰੂਪ ਵਿਚ ਅਈਅਰ ਦਾ ਸਾਥ ਦੇਣ ਲਈ ਪੰਜਾਬ ਕਿੰਗਜ਼ ਕੋਲ ਚੰਗੇ ਬੱਲੇਬਾਜ਼ ਹਨ, ਜਿਸ ਵਿਚ ਉਹ ਆਪਣੀ ਸਥਿਤੀ ਨੂੰ ਮਜ਼ਬੂਤੀ ਨਾਲ ਬਣਾਈ ਰੱਖ ਸਕਦਾ ਹੈ ਤੇ ਵਿਰੋਧੀ ਖੇਮੇ ’ਤੇ ਹਮਲਾਵਰ ਹਮਲੇ ਵੀ ਕਰ ਸਕਦਾ ਹੈ।

ਮਾਰਕੋ ਜਾਨਸੇਨ ਦੇ ਬਿਨਾਂ ਪੰਜਾਬ ਦੀ ਗੇਂਦਬਾਜ਼ੀ ਥੋੜ੍ਹੀ ਕਮਜ਼ੋਰ ਦਿਸੀ ਪਰ ਬੱਲੇਬਾਜ਼ੀ ਦੇ ਅਨੁਕੂਲ ਵਿਕਟ ’ਤੇ ਮੁੰਬਈ ਇੰਡੀਅਨਜ਼ ਨੂੰ ਪੂਰੀ ਪਾਰੀ ਵਿਚ ਰੋਕ ਕੇ ਰੱਖਣ ਤੋਂ ਪਤਾ ਲੱਗਦਾ ਹੈ ਕਿ ਉਸਦਾ ਹਮਲਾ ਜ਼ਿਆਦਾ ਕਮਜ਼ੋਰ ਨਹੀਂ ਹੈ। ਯੁਜਵੇਂਦਰ ਚਾਹਲ ਅਜੇ ਵੀ ਹੱਥ ਦੀ ਸੱਟ ਨਾਲ ਜੂਝ ਰਿਹਾ ਹੈ ਤੇ ਦੂਜੇ ਕੁਆਲੀਫਾਇਰ ਵਿਚ ਉਹ ਆਪਣੀ ਸਰਵੋਤਮ ਫਾਰਮ ਵਿਚ ਨਹੀਂ ਸੀ ਪਰ ਪੰਜਾਬ ਨੂੰ ਉਸ ਤੋਂ ਆਪਣੀ ਸਾਬਕਾ ਫ੍ਰੈਂਚਾਈਜ਼ੀ ਵਿਰੁੱਧ ਚੰਗਾ ਪ੍ਰਦਰਸ਼ਨ ਕਰਨ ਦੀ ਉਮੀਦ ਹੋਵੇਗੀ। ਪੰਜਾਬ ਤੇ ਮੁੰਬਈ ਵਿਚਾਲੇ ਦੂਜਾ ਕੁਆਲੀਫਾਇਰ ਮੀਂਹ ਨਾਲ ਪ੍ਰਭਾਵਿਤ ਰਿਹਾ ਸੀ ਪਰ ਫਾਈਨਲ ਦੇ ਦਿਨ ਮੀਂਹ ਦੀ ਕੋਈ ਭਵਿੱਖਬਾਣੀ ਨਹੀਂ ਹੈ ਪਰ ਖੇਡ ਸਮੇਂ ਵਿਚ ਇਕ ਵਾਧੂ ਘੰਟਾ ਜੋੜ ਕੇ ਮਿਆਦ ਨੂੰ 120 ਮਿੰਟ ਤੱਕ ਵਧਾਇਆ ਗਿਆ ਹੈ ਤੇ ਫਾਈਨਲ ਵਿਚ ਇਕ ਰਿਜ਼ਰਵ ਦਿਨ ਰੱਖਿਆ ਗਿਆ ਹੈ।

ਜਗਬਾਣੀ ਈ-ਪੇਪਰ ਨੂੰ ਪੜ੍ਹਨ ਅਤੇ ਐਪ ਨੂੰ ਡਾਊਨਲੋਡ ਕਰਨ ਲਈ ਇੱਥੇ ਕਲਿੱਕ ਕਰੋ 

For Android:-  https://play.google.com/store/apps/details?id=com.jagbani&hl=en 

For IOS:-  https://itunes.apple.com/in/app/id538323711?mt=8