ਕੋਹਲੀ ਜਾਂ ਸੂਰਿਆਵੰਸ਼ੀ ਨਹੀਂ, ਅਸ਼ਵਿਨ ਨੇ ਇਸ ਧਾਕੜ ਖਿਡਾਰੀ ਨੂੰ ਦੱਸਿਆ ਦੋਵਾਂ ਐਵਾਰਡਾਂ ਦਾ ਅਸਲੀ ਹੱਕਦਾਰ

ਸਪੋਰਟਸ ਡੈਸਕ- ਇੰਡੀਅਨ ਪ੍ਰੀਮੀਅਰ ਲੀਗ 2026 ਦੇ ਫਾਈਨਲ ਵਿੱਚ ਰਾਇਲ ਚੈਲੰਜਰਜ਼ ਬੈਂਗਲੁਰੂ ਨੇ ਲਗਾਤਾਰ ਦੂਜੀ ਵਾਰ ਖ਼ਿਤਾਬ ਜਿੱਤ ਕੇ ਇਤਿਹਾਸ ਰਚ ਦਿੱਤਾ ਹੈ। ਜਿੱਥੇ ਇੱਕ ਪਾਸੇ ਵਿਰਾਟ ਕੋਹਲੀ ਦੀ ਮੈਚ ਜਿਤਾਊ ਪਾਰੀ ਅਤੇ ਵੈਭਵ ਸੂਰਿਆਵੰਸ਼ੀ ਦੇ ਵਿਸਫੋਟਕ ਪ੍ਰਦਰਸ਼ਨ ਦੀ ਚਰਚਾ ਹੋ ਰਹੀ ਹੈ, ਉੱਥੇ ਹੀ ਭਾਰਤ ਦੇ ਦਿੱਗਜ ਸਪਿਨਰ ਰਵੀਚੰਦਰਨ ਅਸ਼ਵਿਨ ਨੇ ਇੱਕ ਹੈਰਾਨੀਜਨਕ ਬਿਆਨ ਦਿੱਤਾ ਹੈ। ਅਸ਼ਵਿਨ ਦਾ ਮੰਨਣਾ ਹੈ ਕਿ RCB ਦੇ ਅਨੁਭਵੀ ਤੇਜ਼ ਗੇਂਦਬਾਜ਼ ਭੁਵਨੇਸ਼ਵਰ ਕੁਮਾਰ ਨੂੰ 'ਪਲੇਅਰ ਆਫ ਦ ਮੈਚ' ਅਤੇ 'ਪਲੇਅਰ ਆਫ ਦ ਟੂਰਨਾਮੈਂਟ' ਦੋਵੇਂ ਪੁਰਸਕਾਰ ਮਿਲਣੇ ਚਾਹੀਦੇ ਸਨ।

ਅਸ਼ਵਿਨ ਨੇ ਭੁਵਨੇਸ਼ਵਰ ਨੂੰ ਦੱਸਿਆ ਸਭ ਤੋਂ ਬਿਹਤਰ

ਆਪਣੇ ਯੂਟਿਊਬ ਚੈਨਲ 'ਤੇ ਗੱਲ ਕਰਦਿਆਂ ਅਸ਼ਵਿਨ ਨੇ ਕਿਹਾ ਕਿ ਭੁਵਨੇਸ਼ਵਰ ਕੁਮਾਰ ਨੇ ਪੂਰੇ ਟੂਰਨਾਮੈਂਟ ਦੌਰਾਨ ਸ਼ਾਨਦਾਰ ਪ੍ਰਦਰਸ਼ਨ ਕੀਤਾ ਅਤੇ ਫਾਈਨਲ ਵਿੱਚ ਵੀ ਗੁਜਰਾਤ ਟਾਈਟਨਸ ਦੇ ਬੱਲੇਬਾਜ਼ਾਂ 'ਤੇ ਦਬਾਅ ਬਣਾਈ ਰੱਖਿਆ। ਅਸ਼ਵਿਨ ਅਨੁਸਾਰ, "ਭੁਵਨੇਸ਼ਵਰ ਪੂਰੇ ਟੂਰਨਾਮੈਂਟ ਵਿੱਚ ਲਾਜਵਾਬ ਰਹੇ। ਮੇਰੇ ਹਿਸਾਬ ਨਾਲ ਉਹ ਦੋਵਾਂ ਐਵਾਰਡਾਂ ਦੇ ਹੱਕਦਾਰ ਸਨ"।

ਅਹਿਮਦਾਬਾਦ ਦੇ ਨਰਿੰਦਰ ਮੋਦੀ ਸਟੇਡੀਅਮ ਵਿੱਚ ਖੇਡੇ ਗਏ ਫਾਈਨਲ ਮੈਚ ਵਿੱਚ ਭੁਵਨੇਸ਼ਵਰ ਕੁਮਾਰ ਨੇ 4 ਓਵਰਾਂ ਵਿੱਚ ਮਹਿਜ਼ 29 ਰਨ ਦੇ ਕੇ 2 ਮਹੱਤਵਪੂਰਨ ਵਿਕਟਾਂ ਹਾਸਲ ਕੀਤੀਆਂ। ਉਨ੍ਹਾਂ ਨੇ ਖਤਰਨਾਕ ਬੱਲੇਬਾਜ਼ ਸਾਈ ਸੁਦਰਸ਼ਨ ਅਤੇ ਡੈੱਥ ਓਵਰਾਂ ਵਿੱਚ ਜੇਸਨ ਹੋਲਡਰ ਨੂੰ ਆਊਟ ਕਰਕੇ ਗੁਜਰਾਤ ਦੀਆਂ ਉਮੀਦਾਂ ਨੂੰ ਖ਼ਤਮ ਕਰ ਦਿੱਤਾ।

ਵੈਭਵ ਸੂਰਿਆਵੰਸ਼ੀ ਅਤੇ ਵਿਰਾਟ ਕੋਹਲੀ ਨੂੰ ਮਿਲੇ ਸਨਮਾਨ
   
ਵੈਭਵ ਸੂਰਿਆਵੰਸ਼ੀ : ਰਾਜਸਥਾਨ ਰਾਇਲਜ਼ ਦੇ ਇਸ 15 ਸਾਲਾ ਨੌਜਵਾਨ ਨੇ 16 ਮੈਚਾਂ ਵਿੱਚ 776 ਰਨ ਬਣਾ ਕੇ ਆਰੇਂਜ ਕੈਪ ਹਾਸਲ ਕੀਤੀ ਅਤੇ ਉਨ੍ਹਾਂ ਨੂੰ 'ਪਲੇਅਰ ਆਫ ਦ ਟੂਰਨਾਮੈਂਟ' ਚੁਣਿਆ ਗਿਆ। ਉਨ੍ਹਾਂ ਦਾ ਸਟ੍ਰਾਈਕ ਰੇਟ 237.30 ਰਿਹਾ।

ਵਿਰਾਟ ਕੋਹਲੀ : ਫਾਈਨਲ ਵਿੱਚ 156 ਰਨਾਂ ਦੇ ਟੀਚੇ ਦਾ ਪਿੱਛਾ ਕਰਦਿਆਂ ਕੋਹਲੀ ਨੇ 42 ਗੇਂਦਾਂ ਵਿੱਚ ਅਜੇਤੂ 75 ਰਨ ਬਣਾਏ ਅਤੇ ਉਨ੍ਹਾਂ ਨੂੰ 'ਪਲੇਅਰ ਆਫ ਦ ਮੈਚ' ਐਲਾਨਿਆ ਗਿਆ।

ਭੁਵਨੇਸ਼ਵਰ ਕੁਮਾਰ ਇਸ ਸੀਜ਼ਨ ਵਿੱਚ ਪਰਪਲ ਕੈਪ ਜਿੱਤਣ ਦੇ ਬਹੁਤ ਕਰੀਬ ਸਨ। ਉਨ੍ਹਾਂ ਨੇ 16 ਮੈਚਾਂ ਵਿੱਚ 28 ਵਿਕਟਾਂ ਲਈਆਂ। ਜੇਕਰ ਉਹ ਫਾਈਨਲ ਵਿੱਚ ਇੱਕ ਹੋਰ ਵਿਕਟ ਲੈ ਲੈਂਦੇ, ਤਾਂ ਉਹ ਸਭ ਤੋਂ ਵੱਧ ਵਿਕਟਾਂ ਲੈਣ ਵਾਲੇ ਗੇਂਦਬਾਜ਼ ਬਣ ਜਾਂਦੇ। ਹਾਲਾਂਕਿ, ਗੁਜਰਾਤ ਟਾਈਟਨਸ ਦੇ ਕਗਿਸੋ ਰਬਾਡਾ 29 ਵਿਕਟਾਂ ਨਾਲ ਪਰਪਲ ਕੈਪ ਜਿੱਤਣ ਵਿੱਚ ਸਫਲ ਰਹੇ।

ਅਸ਼ਵਿਨ ਦੇ ਇਸ ਬਿਆਨ ਤੋਂ ਬਾਅਦ ਕ੍ਰਿਕਟ ਜਗਤ ਵਿੱਚ ਇਹ ਬਹਿਸ ਛਿੜ ਗਈ ਹੈ ਕਿ ਕੀ ਗੇਂਦਬਾਜ਼ਾਂ ਦੇ ਪ੍ਰਦਰਸ਼ਨ ਨੂੰ ਬੱਲੇਬਾਜ਼ਾਂ ਦੇ ਮੁਕਾਬਲੇ ਘੱਟ ਅਹਿਮੀਅਤ ਦਿੱਤੀ ਜਾਂਦੀ ਹੈ।