ਮੁੰਬਈ ਓਪਨ ਟੈਨਿਸ ''ਚ ਮਾਇਆ ਰਾਜੇਸ਼ਵਰਨ ਦੀ ਵਾਈਲਡ ਕਾਰਡ ਰਾਹੀਂ ਮੁੱਖ ਡਰਾਅ ''ਚ ਐਂਟਰੀ

ਮੁੰਬਈ : ਭਾਰਤ ਦੀ 16 ਸਾਲਾ ਉੱਭਰਦੀ ਟੈਨਿਸ ਸਟਾਰ ਮਾਇਆ ਰਾਜੇਸ਼ਵਰਨ ਰੇਵਤੀ ਇੱਕ ਵਾਰ ਫਿਰ ਸੁਰਖੀਆਂ ਵਿੱਚ ਹੈ। ਮਾਇਆ ਨੂੰ 'ਐਲ ਐਂਡ ਟੀ ਮੁੰਬਈ ਓਪਨ ਡਬਲਯੂ.ਟੀ.ਏ. 125ਕੇ ਸੀਰੀਜ਼' ਦੇ ਮੁੱਖ ਡਰਾਅ ਵਿੱਚ ਵਾਈਲਡ ਕਾਰਡ ਰਾਹੀਂ ਪ੍ਰਵੇਸ਼ ਮਿਲ ਗਿਆ ਹੈ। ਇਹ ਵੱਕਾਰੀ ਟੂਰਨਾਮੈਂਟ 2 ਤੋਂ 8 ਫਰਵਰੀ, 2026 ਤੱਕ ਮੁੰਬਈ ਦੇ ਮਹਾਰਾਸ਼ਟਰ ਸਟੇਟ ਲਾਅਨ ਟੈਨਿਸ ਐਸੋਸੀਏਸ਼ਨ ਵਿੱਚ ਖੇਡਿਆ ਜਾਵੇਗਾ। 

ਮਾਇਆ ਨੇ ਪਿਛਲੇ ਸੀਜ਼ਨ ਵਿੱਚ ਆਪਣੇ ਸ਼ਾਨਦਾਰ ਪ੍ਰਦਰਸ਼ਨ ਨਾਲ ਸਭ ਨੂੰ ਹੈਰਾਨ ਕਰ ਦਿੱਤਾ ਸੀ, ਜਦੋਂ ਉਸ ਨੇ ਕੁਆਲੀਫਾਇਰ ਤੋਂ ਸਫਰ ਸ਼ੁਰੂ ਕਰਕੇ ਮੁੱਖ ਡਰਾਅ ਦੇ ਸੈਮੀਫਾਈਨਲ ਤੱਕ ਪਹੁੰਚਣ ਦਾ ਮਾਅਰਕਾ ਮਾਰਿਆ ਸੀ। ਉਸ ਦੌਰਾਨ ਉਸ ਨੇ ਕਈ ਉੱਚ ਦਰਜਾ ਪ੍ਰਾਪਤ ਅੰਤਰਰਾਸ਼ਟਰੀ ਖਿਡਾਰਨਾਂ ਨੂੰ ਹਰਾਇਆ ਸੀ, ਪਰ ਅੰਤ ਵਿੱਚ ਚੈਂਪੀਅਨ ਜਿਲ ਟੀਚਮੈਨ ਹੱਥੋਂ ਉਸ ਨੂੰ ਹਾਰ ਦਾ ਸਾਹਮਣਾ ਕਰਨਾ ਪਿਆ ਸੀ।

ਇਸ ਸਾਲ ਮਾਇਆ ਆਪਣੇ ਅਭਿਆਨ ਦੀ ਸ਼ੁਰੂਆਤ ਥਾਈਲੈਂਡ ਦੀ ਪੰਜਵੀਂ ਸੀਡ ਖਿਡਾਰਨ ਲਾਨਲਾਨਾ ਤਾਰਾਰੂਡੀ ਵਿਰੁੱਧ ਕਰੇਗੀ। ਪਿਛਲੇ ਸਾਲ ਦੇ ਸ਼ਾਨਦਾਰ ਪ੍ਰਦਰਸ਼ਨ ਕਾਰਨ ਮਾਇਆ ਤੋਂ ਉਮੀਦਾਂ ਕਾਫ਼ੀ ਵੱਧ ਗਈਆਂ ਹਨ, ਪਰ ਉਹ ਇਸ ਨੂੰ ਦਬਾਅ ਵਜੋਂ ਨਹੀਂ ਦੇਖ ਰਹੀ। ਮਾਇਆ ਅਨੁਸਾਰ, "ਇਹ ਮੇਰੇ ਲਈ ਸੌਭਾਗ ਅਤੇ ਸਨਮਾਨ ਦੀ ਗੱਲ ਹੈ ਕਿ ਮੈਨੂੰ ਆਪਣੇ ਦੇਸ਼ ਦੀ ਪ੍ਰਤੀਨਿਧਤਾ ਕਰਨ ਅਤੇ ਆਪਣੀ ਪੂਰੀ ਸਮਰੱਥਾ ਨਾਲ ਖੇਡਣ ਦਾ ਮੌਕਾ ਮਿਲ ਰਿਹਾ ਹੈ"। ਉਸ ਨੇ ਕਿਹਾ ਕਿ ਉਸਦੀ ਤਿਆਰੀ ਵਿਰੋਧੀ ਖਿਡਾਰੀ ਦੀ ਬਜਾਏ ਆਪਣੇ ਖੁਦ ਦੇ ਖੇਡ ਅਤੇ ਹੁਨਰ ਨੂੰ ਸੁਧਾਰਨ 'ਤੇ ਕੇਂਦਰਿਤ ਹੈ।