IPL 2025 ਵਿਚਾਲੇ ਵੱਡਾ ਹਾਦਸਾ, ਅੱਗ ਵਿਚਾਲੇ ਘਿਰ ਗਈ SRH ਦੀ ਟੀਮ ਤੇ ਫਿਰ...

ਨੈਸ਼ਨਲ ਡੈਸਕ: ਹੈਦਰਾਬਾਦ ਦੇ ਬੰਜਾਰਾ ਹਿਲਜ਼ ਇਲਾਕੇ 'ਚ ਉਸ ਸਮੇਂ ਹੜਕੰਪ ਮਚ ਗਿਆ ਜਦੋਂ ਇੱਕ ਪੰਜ ਤਾਰਾ ਹੋਟਲ 'ਚ ਅੱਗ ਲੱਗਣ ਦੀ ਖ਼ਬਰ ਸਾਹਮਣੇ ਆਈ ਅਤੇ ਹੈਰਾਨੀ ਵਾਲੀ ਗੱਲ ਇਹ ਸੀ ਕਿ ਆਈਪੀਐਲ ਟੀਮ ਸਨਰਾਈਜ਼ਰਜ਼ ਹੈਦਰਾਬਾਦ (SRH) ਉਸੇ ਹੋਟਲ 'ਚ ਠਹਿਰੀ ਹੋਈ ਸੀ। ਅੱਗ ਲੱਗਣ ਦੀ ਸੂਚਨਾ ਮਿਲਦੇ ਹੀ ਪੁਲਸ ਅਤੇ ਫਾਇਰ ਵਿਭਾਗ ਦੀਆਂ ਟੀਮਾਂ ਤੁਰੰਤ ਮੌਕੇ 'ਤੇ ਪਹੁੰਚ ਗਈਆਂ ਅਤੇ ਬਚਾਅ ਕਾਰਜ ਸ਼ੁਰੂ ਕਰ ਦਿੱਤਾ। ਘਟਨਾ ਦੇ ਸਮੇਂ ਸਨਰਾਈਜ਼ਰਜ਼ ਹੈਦਰਾਬਾਦ ਟੀਮ ਦੇ ਮੈਂਬਰ ਹੋਟਲ ਦੀ ਛੇਵੀਂ ਮੰਜ਼ਿਲ 'ਤੇ ਸਨ ਪਰ ਉਹ ਤੁਰੰਤ ਹੋਟਲ ਖਾਲੀ ਕਰਕੇ ਚਲੇ ਗਏ।  ਹੋਟਲ 'ਚ ਠਹਿਰੇ ਸਾਰੇ ਮਹਿਮਾਨਾਂ ਨੂੰ ਸੁਰੱਖਿਅਤ ਬਾਹਰ ਕੱਢ ਲਿਆ ਗਿਆ। ਅੱਗ 'ਤੇ ਵੀ ਥੋੜ੍ਹੇ ਸਮੇਂ ਵਿੱਚ ਕਾਬੂ ਪਾ ਲਿਆ ਗਿਆ।

ਹਾਦਸਾ ਆਲੀਸ਼ਾਨ ਇਲਾਕੇ ਵਿੱਚ ਵਾਪਰਿਆ
ਇਹ ਘਟਨਾ ਹੈਦਰਾਬਾਦ ਦੇ ਹਾਈ-ਪ੍ਰੋਫਾਈਲ ਬੰਜਾਰਾ ਹਿਲਜ਼ ਇਲਾਕੇ 'ਚ ਵਾਪਰੀ, ਜਿਸਨੂੰ ਸ਼ਹਿਰ ਦੇ ਸਭ ਤੋਂ ਵਿਅਸਤ ਅਤੇ ਅਮੀਰ ਇਲਾਕਿਆਂ 'ਚੋਂ ਇੱਕ ਮੰਨਿਆ ਜਾਂਦਾ ਹੈ। ਕਿਹਾ ਜਾ ਰਿਹਾ ਹੈ ਕਿ ਅੱਗ ਸ਼ਾਰਟ ਸਰਕਟ ਕਾਰਨ ਲੱਗੀ, ਹਾਲਾਂਕਿ ਅਜੇ ਤੱਕ ਇਸਦੀ ਪੁਸ਼ਟੀ ਨਹੀਂ ਹੋਈ ਹੈ। ਜਾਂਚ ਜਾਰੀ ਹੈ।

ਮੈਚ ਤੋਂ ਪਹਿਲਾਂ ਤਣਾਅ ਵਧ ਗਿਆ
ਸਨਰਾਈਜ਼ਰਜ਼ ਹੈਦਰਾਬਾਦ ਟੀਮ ਇਸ ਸਮੇਂ ਆਈਪੀਐਲ 'ਚ ਸਰਗਰਮ ਹੈ ਅਤੇ ਅਗਲੇ ਮੈਚ ਦੀ ਤਿਆਰੀ 'ਚ ਰੁੱਝੀ ਹੋਈ ਹੈ। ਇਸ ਅੱਗ ਦੀ ਘਟਨਾ ਨੇ ਪ੍ਰਸ਼ੰਸਕਾਂ ਨੂੰ ਕੁਝ ਸਮੇਂ ਲਈ ਚਿੰਤਤ ਵੀ ਕਰ ਦਿੱਤਾ, ਪਰ ਰਾਹਤ ਦੀ ਗੱਲ ਇਹ ਸੀ ਕਿ ਸਾਰੇ ਖਿਡਾਰੀ ਪੂਰੀ ਤਰ੍ਹਾਂ ਸੁਰੱਖਿਅਤ ਹਨ।