''ਵੈਭਵ ਸੂਰਿਆਵੰਸ਼ੀ ਪੇਸ਼ੇਵਰ ਨਹੀਂ ਹੈ''; RCB ਦੇ ਸਟਾਰ ਖਿਡਾਰੀ ਜੀਤੇਸ਼ ਸ਼ਰਮਾ ਦੱਸਿਆ ਕਿਉਂ ਕਹੀ ਇਹ ਗੱਲ

ਸਪੋਰਟਸ ਡੈਸਕ : ਆਈ.ਪੀ.ਐੱਲ. 2026 ਵਿੱਚ ਆਪਣੇ ਬੱਲੇ ਨਾਲ ਤਹਿਲਕਾ ਮਚਾਉਣ ਵਾਲੇ ਰਾਜਸਥਾਨ ਰਾਇਲਜ਼ ਦੇ 15 ਸਾਲਾ ਬੱਲੇਬਾਜ਼ ਵੈਭਵ ਸੂਰਿਆਵੰਸ਼ੀ ਨੂੰ ਲੈ ਕੇ ਆਰ.ਸੀ.ਬੀ. (RCB) ਦੇ ਸਟਾਰ ਖਿਡਾਰੀ ਜੀਤੇਸ਼ ਸ਼ਰਮਾ ਦਾ ਇੱਕ ਪੁਰਾਣਾ ਬਿਆਨ ਚਰਚਾ ਦਾ ਵਿਸ਼ਾ ਬਣਿਆ ਹੋਇਆ ਹੈ। ਜੀਤੇਸ਼ ਨੇ ਵੈਭਵ ਨੂੰ "ਗੈਰ-ਪੇਸ਼ੇਵਰ" (Unprofessional) ਕਿਹਾ ਸੀ, ਜਿਸ 'ਤੇ ਹੁਣ ਉਨ੍ਹਾਂ ਨੇ ਖੁਦ ਸਫਾਈ ਦਿੰਦਿਆਂ ਇਸ ਦੇ ਪਿੱਛੇ ਦਾ ਅਸਲੀ ਕਾਰਨ ਦੱਸਿਆ ਹੈ।

ਕੀ ਸੀ ਪੂਰਾ ਵਿਵਾਦ? 
ਜੀਤੇਸ਼ ਸ਼ਰਮਾ ਨੇ ਆਈ.ਪੀ.ਐੱਲ. 2026 ਸ਼ੁਰੂ ਹੋਣ ਤੋਂ ਪਹਿਲਾਂ ਆਪਣੇ ਯੂਟਿਊਬ ਚੈਨਲ 'ਤੇ ਦੱਖਣੀ ਅਫਰੀਕਾ ਦੇ ਦਿੱਗਜ ਖਿਡਾਰੀ ਏ.ਬੀ. ਡਿਵਿਲੀਅਰਜ਼ ਨਾਲ ਗੱਲਬਾਤ ਦੌਰਾਨ ਵੈਭਵ ਬਾਰੇ ਇਹ ਟਿੱਪਣੀ ਕੀਤੀ ਸੀ। ਜਦੋਂ ਡਿਵਿਲੀਅਰਜ਼ ਨੇ ਵੈਭਵ ਦੀ ਤਾਰੀਫ਼ ਕੀਤੀ, ਤਾਂ ਜੀਤੇਸ਼ ਨੇ ਕਿਹਾ ਸੀ, "ਉਹ ਪੇਸ਼ੇਵਰ ਨਹੀਂ ਹੈ। ਮੈਂ ਤੁਹਾਨੂੰ ਇਹ ਦੱਸ ਸਕਦਾ ਹਾਂ। ਉਹ ਮੈਦਾਨ 'ਤੇ ਪੇਸ਼ੇਵਰ ਹੋ ਸਕਦਾ ਹੈ, ਪਰ ਮੈਦਾਨ ਦੇ ਬਾਹਰ ਨਹੀਂ। ਮੈਂ ਉਸ ਨੂੰ ਰਾਤ ਨੂੰ ਆਈਸਕ੍ਰੀਮ ਨਾ ਖਾਣ ਲਈ ਕਹਿੰਦਾ ਹਾਂ"। ਇਹ ਬਿਆਨ ਉਸ ਸਮੇਂ ਹੋਰ ਵਾਇਰਲ ਹੋ ਗਿਆ ਜਦੋਂ ਵੈਭਵ ਨੇ ਇਸ ਸੀਜ਼ਨ ਵਿੱਚ RCB ਵਿਰੁੱਧ ਹੀ 26 ਗੇਂਦਾਂ ਵਿੱਚ 78 ਦੌੜਾਂ ਦੀ ਤੂਫਾਨੀ ਪਾਰੀ ਖੇਡੀ ਸੀ।

ਜੀਤੇਸ਼ ਦੀ ਸਫਾਈ : "ਉਹ ਅਜੇ ਬੱਚਾ ਹੈ" 
ਹਾਲ ਹੀ ਵਿੱਚ ਜੀਤੇਸ਼ ਸ਼ਰਮਾ ਨੇ ਸਪੱਸ਼ਟ ਕੀਤਾ ਕਿ ਉਨ੍ਹਾਂ ਦੇ ਬਿਆਨ ਨੂੰ ਗਲਤ ਸੰਦਰਭ ਵਿੱਚ ਪੇਸ਼ ਕੀਤਾ ਗਿਆ ਹੈ। ਉਨ੍ਹਾਂ ਕਿਹਾ, "ਉਹ ਪੇਸ਼ੇਵਰ ਨਹੀਂ ਹੈ ਕਿਉਂਕਿ ਉਹ ਅਜੇ ਸਿਰਫ਼ 15 ਸਾਲਾਂ ਦਾ ਬੱਚਾ ਹੈ। ਉਸ ਨੂੰ ਆਈਸਕ੍ਰੀਮ ਬਹੁਤ ਪਸੰਦ ਹੈ"। ਜੀਤੇਸ਼ ਅਨੁਸਾਰ, ਵੈਭਵ ਉਨ੍ਹਾਂ ਦੇ ਬਹੁਤ ਕਰੀਬੀ ਦੋਸਤ ਅਤੇ ਛੋਟੇ ਭਰਾ ਵਾਂਗ ਹੈ। ਜੀਤੇਸ਼ ਨੇ ਦੱਸਿਆ ਕਿ ਜਦੋਂ ਉਹ ਉਨ੍ਹਾਂ ਦੇ ਘਰ ਆਉਂਦਾ ਹੈ, ਤਾਂ ਉਹ ਬਿਲਕੁਲ ਬੱਚਿਆਂ ਵਾਂਗ ਵਿਵਹਾਰ ਕਰਦਾ ਹੈ, ਪਰ ਮੈਦਾਨ 'ਤੇ ਉਸ ਦੀ ਮਿਹਨਤ ਅਤੇ ਤਕਨੀਕ ਬੇਮਿਸਾਲ ਹੈ।

ਵੈਭਵ ਦੀ ਕਾਬਲੀਅਤ 'ਤੇ ਪੂਰਾ ਭਰੋਸਾ 
ਆਪਣੇ ਬਿਆਨ 'ਤੇ ਕਾਇਮ ਰਹਿੰਦਿਆਂ ਜੀਤੇਸ਼ ਨੇ ਵੈਭਵ ਦੀ ਪ੍ਰਤਿਭਾ ਦੀ ਜੰਮ ਕੇ ਤਾਰੀਫ਼ ਵੀ ਕੀਤੀ। ਉਨ੍ਹਾਂ ਡਿਵਿਲੀਅਰਜ਼ ਨੂੰ ਕਿਹਾ ਕਿ ਵੈਭਵ ਸੂਰਿਆਵੰਸ਼ੀ ਭਾਰਤੀ ਕ੍ਰਿਕਟ ਦਾ ਅਗਲਾ ਵੱਡਾ ਸਟਾਰ ਬਣ ਸਕਦਾ ਹੈ ਅਤੇ ਉਹ ਤਿੰਨੋਂ ਫਾਰਮੈਟਾਂ ਵਿੱਚ ਆਪਣਾ ਦਬਦਬਾ ਬਣਾਉਣ ਦੀ ਸਮਰੱਥਾ ਰੱਖਦਾ ਹੈ।

ਸੀਜ਼ਨ ਦਾ ਸ਼ਾਨਦਾਰ ਪ੍ਰਦਰਸ਼ਨ 
ਵੈਭਵ ਸੂਰਿਆਵੰਸ਼ੀ ਇਸ ਆਈ.ਪੀ.ਐੱਲ. ਸੀਜ਼ਨ ਵਿੱਚ ਸ਼ਾਨਦਾਰ ਫਾਰਮ ਵਿੱਚ ਹਨ। ਉਨ੍ਹਾਂ ਨੇ ਹੁਣ ਤੱਕ 10 ਪਾਰੀਆਂ ਵਿੱਚ 237.65 ਦੇ ਸ਼ਾਨਦਾਰ ਸਟ੍ਰਾਈਕ ਰੇਟ ਨਾਲ 404 ਦੌੜਾਂ ਬਣਾਈਆਂ ਹਨ, ਜਿਸ ਵਿੱਚ ਇੱਕ ਸੈਂਕੜਾ ਅਤੇ ਦੋ ਅਰਧ ਸੈਂਕੜੇ ਸ਼ਾਮਲ ਹਨ। ਜਸਪ੍ਰੀਤ ਬੁਮਰਾਹ ਵਰਗੇ ਦਿੱਗਜ ਗੇਂਦਬਾਜ਼ਾਂ ਵਿਰੁੱਧ ਉਨ੍ਹਾਂ ਦੀ ਬੱਲੇਬਾਜ਼ੀ ਨੇ ਸਾਰਿਆਂ ਨੂੰ ਹੈਰਾਨ ਕਰ ਦਿੱਤਾ ਹੈ।