IPL 2026 : 7ਵੇਂ ਨੰਬਰ ''ਤੇ ਆ ਕੇ ਧਮਾਕਾ ਕਰ ਗਿਆ LSG ਦਾ ਧਾਕੜ ਖਿਡਾਰੀ ! ਹਾਰਿਆ ਮੈਚ ਜਿੱਤਾ ਕੇ ਬਣਿਆ ''ਹੀਰੋ''

ਸਪੋਰਟਸ ਡੈਸਕ : ਇੰਡੀਅਨ ਪ੍ਰੀਮੀਅਰ ਲੀਗ (IPL) 2026 ਦੇ 15ਵੇਂ ਮੁਕਾਬਲੇ 'ਚ ਲਖਨਊ ਸੁਪਰ ਜਾਇੰਟਸ (LSG) ਨੇ ਕੋਲਕਾਤਾ ਨਾਈਟ ਰਾਈਡਰਜ਼ (KKR) ਨੂੰ ਇੱਕ ਬੇਹੱਦ ਰੋਮਾਂਚਕ ਮੈਚ ਵਿੱਚ 3 ਵਿਕਟਾਂ ਨਾਲ ਹਰਾ ਕੇ ਸੀਜ਼ਨ ਦੀ ਯਾਦਗਾਰ ਜਿੱਤ ਦਰਜ ਕੀਤੀ ਹੈ। ਇਸ ਜਿੱਤ ਦਾ ਹੀਰੋ 21 ਸਾਲਾ ਨੌਜਵਾਨ ਵਿਕਟਕੀਪਰ-ਬੱਲੇਬਾਜ਼ ਮੁਕੁਲ ਚੌਧਰੀ ਰਿਹਾ, ਜਿਸ ਨੇ ਆਪਣੀ ਧਮਾਕੇਦਾਰ ਬੱਲੇਬਾਜ਼ੀ ਨਾਲ ਈਡਨ ਗਾਰਡਨਜ਼ ਵਿੱਚ ਮੌਜੂਦ ਸਾਰੇ ਦਰਸ਼ਕਾਂ ਦਾ ਦਿਲ ਜਿੱਤ ਲਿਆ।

ਕੋਲਕਾਤਾ ਨਾਈਟ ਰਾਈਡਰਜ਼ ਨੇ ਪਹਿਲਾਂ ਬੱਲੇਬਾਜ਼ੀ ਕਰਦਿਆਂ 181 ਦੌੜਾਂ ਬਣਾਈਆਂ ਸਨ। ਟੀਚੇ ਦਾ ਪਿੱਛਾ ਕਰਦਿਆਂ ਲਖਨਊ ਦੀ ਟੀਮ ਇੱਕ ਸਮੇਂ 128 ਦੌੜਾਂ 'ਤੇ 7 ਵਿਕਟਾਂ ਗੁਆ ਚੁੱਕੀ ਸੀ ਤੇ ਉਸ ਦੀ ਹਾਰ ਤੈਅ ਮੰਨੀ ਜਾ ਰਹੀ ਸੀ। ਅਜਿਹੇ ਨਾਜ਼ੁਕ ਮੌਕੇ 'ਤੇ ਬੱਲੇਬਾਜ਼ੀ ਕਰਨ ਆਏ ਮੁਕੁਲ ਚੌਧਰੀ ਨੇ ਸਿਰਫ਼ 27 ਗੇਂਦਾਂ ਵਿੱਚ ਅਜੇਤੂ 54 ਦੌੜਾਂ ਦੀ ਤੂਫ਼ਾਨੀ ਪਾਰੀ ਖੇਡੀ, ਜਿਸ 'ਚ 7 ਸ਼ਾਨਦਾਰ ਛੱਕੇ ਤੇ 2 ਚੌਕੇ ਸ਼ਾਮਲ ਸਨ।

ਆਖਰੀ ਗੇਂਦ ਤੱਕ ਬਣਿਆ ਰਿਹਾ ਰੋਮਾਂਚ
ਲਖਨਊ ਨੂੰ ਜਿੱਤ ਲਈ ਆਖਰੀ ਓਵਰ ਵਿੱਚ 14 ਦੌੜਾਂ ਦੀ ਲੋੜ ਸੀ। ਮੁਕੁਲ ਨੇ ਓਵਰ ਦੀ ਪੰਜਵੀਂ ਗੇਂਦ 'ਤੇ ਛੱਕਾ ਮਾਰ ਕੇ ਸਕੋਰ ਬਰਾਬਰ ਕੀਤਾ ਤੇ ਫਿਰ ਆਖਰੀ ਗੇਂਦ 'ਤੇ ਇੱਕ ਦੌੜ ਲੈ ਕੇ ਟੀਮ ਨੂੰ ਜਿੱਤ ਦਿਵਾਈ। ਉਸ ਨੇ 8ਵੇਂ ਵਿਕਟ ਲਈ ਆਵੇਸ਼ ਖਾਨ ਨਾਲ 54 ਦੌੜਾਂ ਦੀ ਅਟੁੱਟ ਸਾਂਝੇਦਾਰੀ ਕੀਤੀ, ਜਿਸ ਵਿੱਚ ਆਵੇਸ਼ ਦਾ ਯੋਗਦਾਨ ਸਿਰਫ਼ 1 ਦੌੜ ਸੀ।

ਪਿਤਾ ਦਾ ਸੁਪਨਾ ਪੂਰਾ ਕਰਨ ਲਈ ਫੜਿਆ ਬੈਟ
ਰਾਜਸਥਾਨ ਦੇ ਝੁੰਝੁਨੂ ਜ਼ਿਲ੍ਹੇ ਦੇ ਰਹਿਣ ਵਾਲੇ ਮੁਕੁਲ ਦਾ ਜਨਮ 6 ਅਗਸਤ 2004 ਨੂੰ ਹੋਇਆ ਸੀ। ਉਸ ਦੇ ਪਿਤਾ ਦਲੀਪ ਕੁਮਾਰ ਚੌਧਰੀ ਦਾ ਸੁਪਨਾ ਸੀ ਕਿ ਉਨ੍ਹਾਂ ਦਾ ਬੇਟਾ ਕ੍ਰਿਕਟਰ ਬਣੇ, ਪਰ ਘਰ ਦੀ ਆਰਥਿਕ ਹਾਲਤ ਠੀਕ ਨਾ ਹੋਣ ਕਾਰਨ ਮੁਕੁਲ ਨੇ 12 ਸਾਲ ਦੀ ਉਮਰ ਤੋਂ ਬਾਅਦ ਕ੍ਰਿਕਟ ਖੇਡਣਾ ਸ਼ੁਰੂ ਕੀਤਾ। ਐਮਐਸ ਧੋਨੀ ਨੂੰ ਆਪਣਾ ਆਦਰਸ਼ ਮੰਨਣ ਵਾਲੇ ਮੁਕੁਲ ਨੇ ਸ਼ੁਰੂ ਵਿੱਚ ਤੇਜ਼ ਗੇਂਦਬਾਜ਼ ਬਣਨ ਦੀ ਕੋਸ਼ਿਸ਼ ਕੀਤੀ ਸੀ ਪਰ ਬਾਅਦ ਵਿੱਚ ਉਸ ਨੇ ਵਿਕਟਕੀਪਿੰਗ ਅਤੇ ਬੱਲੇਬਾਜ਼ੀ ਨੂੰ ਚੁਣਿਆ।

2.60 ਕਰੋੜ ਦੀ ਕੀਮਤ ਨੂੰ ਕੀਤਾ ਸਹੀ ਸਾਬਤ
ਆਈਪੀਐਲ 2026 ਦੀ ਨਿਲਾਮੀ ਵਿੱਚ ਮੁਕੁਲ ਚੌਧਰੀ ਦਾ ਬੇਸ ਪ੍ਰਾਈਸ ਸਿਰਫ਼ 30 ਲੱਖ ਰੁਪਏ ਸੀ, ਪਰ ਲਖਨਊ ਸੁਪਰ ਜਾਇੰਟਸ ਨੇ ਉਸ ਦੀ ਪ੍ਰਤਿਭਾ 'ਤੇ ਭਰੋਸਾ ਜਤਾਉਂਦੇ ਹੋਏ ਉਸ ਨੂੰ 2.60 ਕਰੋੜ ਰੁਪਏ ਵਿੱਚ ਖਰੀਦਿਆ। ਮੁਕੁਲ ਨੇ ਸਈਅਦ ਮੁਸ਼ਤਾਕ ਅਲੀ ਟਰਾਫੀ (2025/26) ਵਿੱਚ 57 ਤੋਂ ਵੱਧ ਦੀ ਔਸਤ ਨਾਲ 173 ਦੌੜਾਂ ਬਣਾ ਕੇ ਆਪਣੀ ਪਛਾਣ ਬਣਾਈ ਸੀ। ਅੱਜ ਦੀ ਇਸ ਪਾਰੀ ਨੇ ਉਸ ਨੂੰ ਆਈਪੀਐਲ ਦਾ ਨਵਾਂ ਸੁਪਰਸਟਾਰ ਬਣਾ ਦਿੱਤਾ ਹੈ।

ਜਗ ਬਾਣੀ ਈ-ਪੇਪਰ ਨੂੰ ਪੜ੍ਹਨ ਅਤੇ ਐਪ ਨੂੰ ਡਾਊਨਲੋਡ ਕਰਨ ਲਈ ਇੱਥੇ ਕਲਿੱਕ ਕਰੋ

For Android:- https://play.google.com/store/apps/details?id=com.jagbani&hl=en

For IOS:- https://itunes.apple.com/in/app/id538323711?mt=8

Whatsapp Channel: https://whatsapp.com/channel/0029Va94hsaHAdNVur4L170e