IPL 2026 ਦੇ 3 ਮੈਚਾਂ ਮਗਰੋਂ ਹੀ ਆ ਗਈ ਮੰਦਭਾਗੀ ਖ਼ਬਰ ! ਹੋਟਲ 'ਚ BCCI ਦੇ ਮੁਲਾਜ਼ਮ ਦੀ ਮਿਲੀ ਲਾਸ਼
Tuesday, Mar 31, 2026 - 04:01 PM (IST)
ਮੁੰਬਈ : ਇੰਡੀਅਨ ਪ੍ਰੀਮੀਅਰ ਲੀਗ (IPL) 2026 ਦੇ ਉਤਸ਼ਾਹ ਦੇ ਵਿਚਕਾਰ ਮੁੰਬਈ ਤੋਂ ਇੱਕ ਬੇਹੱਦ ਦੁਖਦਾਈ ਖਬਰ ਸਾਹਮਣੇ ਆਈ ਹੈ। ਮੁੰਬਈ ਦੇ ਇੱਕ ਨਾਮੀ ਹੋਟਲ ਵਿੱਚ ਆਈਪੀਐਲ ਮੈਚਾਂ ਦੀ ਲਾਈਵ ਕਵਰੇਜ ਨਾਲ ਜੁੜੇ ਬੀਸੀਸੀਆਈ (BCCI) ਦੇ ਇੱਕ ਵਿਦੇਸ਼ੀ ਬ੍ਰੌਡਕਾਸਟ ਇੰਜੀਨੀਅਰ ਦੀ ਸ਼ੱਕੀ ਹਾਲਾਤਾਂ ਵਿੱਚ ਮੌਤ ਹੋ ਗਈ ਹੈ। ਇਸ ਘਟਨਾ ਨਾਲ ਖੇਡ ਜਗਤ ਵਿੱਚ ਤਰਥੱਲੀ ਮਚ ਗਈ ਹੈ।
ਮ੍ਰਿਤਕ ਦੀ ਪਛਾਣ ਅਤੇ ਕੰਮ
ਮ੍ਰਿਤਕ ਦੀ ਪਛਾਣ ਬ੍ਰਿਟੇਨ ਦੇ ਨਾਗਰਿਕ ਇਆਨ ਵਿਲੀਅਮਜ਼ ਲੈਂਗਫੋਰਡ ਵਜੋਂ ਹੋਈ ਹੈ। ਉਹ ਬੀਸੀਸੀਆਈ ਦੇ ਨਾਲ ਬ੍ਰੌਡਕਾਸਟ ਇੰਜੀਨੀਅਰ ਵਜੋਂ ਕੰਮ ਕਰ ਰਹੇ ਸਨ ਅਤੇ ਆਈਪੀਐਲ ਮੈਚਾਂ ਦੇ ਲਾਈਵ ਪ੍ਰਸਾਰਣ ਦੀ ਅਹਿਮ ਜ਼ਿੰਮੇਵਾਰੀ ਸੰਭਾਲ ਰਹੇ ਸਨ।
ਘਟਨਾ ਦਾ ਵੇਰਵਾ
ਜਾਣਕਾਰੀ ਅਨੁਸਾਰ ਇਆਨ 24 ਮਾਰਚ ਤੋਂ ਮੁੰਬਈ ਦੇ ਟ੍ਰਾਈਡੈਂਟ ਹੋਟਲ ਵਿੱਚ ਰੁਕੇ ਹੋਏ ਸਨ। 29 ਮਾਰਚ ਨੂੰ ਵਾਨਖੇੜੇ ਸਟੇਡੀਅਮ ਵਿੱਚ ਮੁੰਬਈ ਇੰਡੀਅਨਜ਼ ਅਤੇ ਕੋਲਕਾਤਾ ਨਾਈਟ ਰਾਈਡਰਜ਼ ਵਿਚਾਲੇ ਖੇਡੇ ਗਏ ਮੈਚ ਦੀ ਕਵਰੇਜ ਤੋਂ ਬਾਅਦ ਉਹ ਆਪਣੇ ਕਮਰੇ ਵਿੱਚ ਪਰਤੇ ਸਨ। ਅਗਲੇ ਦਿਨ, 30 ਮਾਰਚ ਨੂੰ ਜਦੋਂ ਹੋਟਲ ਸਟਾਫ਼ ਨੇ ਉਨ੍ਹਾਂ ਨਾਲ ਸੰਪਰਕ ਕਰਨ ਦੀ ਕੋਸ਼ਿਸ਼ ਕੀਤੀ ਤਾਂ ਅੰਦਰੋਂ ਕੋਈ ਜਵਾਬ ਨਹੀਂ ਮਿਲਿਆ। ਸ਼ੱਕ ਹੋਣ 'ਤੇ ਹੋਟਲ ਪ੍ਰਬੰਧਨ ਨੇ ਮਾਸਟਰ ਚਾਬੀ ਦੀ ਮਦਦ ਨਾਲ ਕਮਰਾ ਖੋਲ੍ਹਿਆ, ਜਿੱਥੇ ਇਆਨ ਫਰਸ਼ 'ਤੇ ਬੇਹੋਸ਼ ਪਾਏ ਗਏ।
ਪੁਲਸ ਕਾਰਵਾਈ ਅਤੇ ਜਾਂਚ
ਹੋਟਲ ਦੇ ਇਨ-ਹਾਊਸ ਡਾਕਟਰ ਨੇ ਜਾਂਚ ਤੋਂ ਬਾਅਦ ਉਨ੍ਹਾਂ ਨੂੰ ਮ੍ਰਿਤਕ ਐਲਾਨ ਦਿੱਤਾ। ਇਸ ਤੋਂ ਬਾਅਦ ਮਰੀਨ ਡਰਾਈਵ ਪੁਲਸ ਨੂੰ ਸੂਚਿਤ ਕੀਤਾ ਗਿਆ, ਜਿਨ੍ਹਾਂ ਨੇ ਮੌਕੇ 'ਤੇ ਪਹੁੰਚ ਕੇ ਮਾਮਲਾ ਦਰਜ ਕਰ ਲਿਆ ਹੈ। ਪੁਲਸ ਇਸ ਗੱਲ ਦੀ ਜਾਂਚ ਕਰ ਰਹੀ ਹੈ ਕਿ ਮੌਤ ਕਿਨ੍ਹਾਂ ਹਾਲਾਤਾਂ ਵਿੱਚ ਹੋਈ। ਫਿਲਹਾਲ ਮੌਤ ਦੇ ਅਸਲੀ ਕਾਰਨਾਂ ਦਾ ਪਤਾ ਲਗਾਉਣ ਲਈ ਲਾਸ਼ ਨੂੰ ਪੋਸਟਮਾਰਟਮ ਲਈ ਭੇਜਿਆ ਗਿਆ ਹੈ ਅਤੇ ਰਿਪੋਰਟ ਦਾ ਇੰਤਜ਼ਾਰ ਕੀਤਾ ਜਾ ਰਿਹਾ ਹੈ।
