ਭਾਰਤੀ ਪੁਰਸ਼ ਤੇ ਮਹਿਲਾ 4x400 ਮੀਟਰ ਰਿਲੇਅ ਟੀਮ ਓਲੰਪਿਕ ਫਾਈਨਲ ਰਾਊਂਡ ਲਈ ਕੁਆਲੀਫਾਈ ਕਰਨ ''ਚ ਅਸਫਲ

ਪੈਰਿਸ—ਭਾਰਤੀ ਪੁਰਸ਼ 4x400 ਮੀਟਰ ਰਿਲੇਅ ਟੀਮ ਸ਼ੁੱਕਰਵਾਰ ਨੂੰ ਇੱਥੇ ਪੈਰਿਸ ਓਲੰਪਿਕ 'ਚ ਉਮੀਦਾਂ 'ਤੇ ਖਰਾ ਨਹੀਂ ਉਤਰ ਸਕੀ ਅਤੇ ਹੀਟ ਰੇਸ (ਸ਼ੁਰੂਆਤੀ ਰੇਸ) 'ਚ ਕੁੱਲ ਮਿਲਾ ਕੇ 10ਵੇਂ ਸਥਾਨ 'ਤੇ ਰਹਿ ਕੇ ਅੰਤਿਮ ਦੌਰ 'ਚ ਜਗ੍ਹਾ ਬਣਾਉਣ ਤੋਂ ਖੁੰਝ ਗਈ। ਮੁਹੰਮਦ ਅਨਸ ਯਾਹੀਆ, ਮੁਹੰਮਦ ਅਜਮਲ, ਅਮੋਜ ਜੈਕਬ ਅਤੇ ਰਾਜੇਸ਼ ਰਮੇਸ਼ ਦੇ ਭਾਰਤੀ ਕੁਆਟਰ ਨੇ ਹਾਲਾਂਕਿ ਤਿੰਨ ਮਿੰਟ 0.58 ਸੈਕਿੰਡ ਦੇ ਸਮੇਂ ਨਾਲ ਸੈਸ਼ਨ ਦਾ ਸਰਵੋਤਮ ਪ੍ਰਦਰਸ਼ਨ ਕੀਤਾ। ਪਰ ਉਹ ਦੂਜੀ ਹੀਟ ਵਿੱਚ 16 ਟੀਮਾਂ ਵਿੱਚੋਂ 10ਵੇਂ ਸਥਾਨ 'ਤੇ ਰਹਿ ਕੇ ਸੱਤਵੇਂ ਸਥਾਨ 'ਤੇ ਰਹੀ। ਦੋ ਹੀਟਾਂ ਵਿੱਚੋਂ ਹਰੇਕ ਵਿੱਚ ਚੋਟੀ ਦੀਆਂ ਤਿੰਨ ਟੀਮਾਂ ਅਤੇ ਦੋਵੇਂ ਹੀਟਸ ਵਿੱਚ ਅਗਲੀਆਂ ਦੋ ਸਭ ਤੋਂ ਤੇਜ਼ ਟੀਮਾਂ ਫਾਈਨਲ ਗੇੜ ਵਿੱਚ ਪਹੁੰਚ ਜਾਂਦੀਆਂ ਹਨ।
ਬੋਤਸਵਾਨਾ (2:57.76), ਬ੍ਰਿਟੇਨ (2:58.88) ਅਤੇ ਅਮਰੀਕਾ ਦੀ ਟੀਮ (2:59.15) ਚੋਟੀ ਦੇ ਤਿੰਨ 'ਤੇ ਰਹੀ ਜਦੋਂ ਕਿ ਜਾਪਾਨ 2:59.48 ਦੇ ਸਮੇਂ ਨਾਲ ਚੌਥੇ ਸਥਾਨ 'ਤੇ ਸੀ। ਭਾਰਤ ਦਾ ਏਸ਼ੀਆਈ ਰਿਕਾਰਡ 2:59.05 ਸਕਿੰਟ ਦਾ ਹੈ ਜੋ 2023 ਬੁਡਾਪੇਸਟ ਵਿਸ਼ਵ ਚੈਂਪੀਅਨਸ਼ਿਪ ਦੌਰਾਨ ਕਾਇਮ ਕੀਤਾ ਗਿਆ ਸੀ। ਅਥਲੈਟਿਕਸ ਫੈਡਰੇਸ਼ਨ ਆਫ ਇੰਡੀਆ (ਏਐੱਫਆਈ) ਨੇ ਪੁਰਸ਼ਾਂ ਦੀ 4x400 ਮੀਟਰ ਰਿਲੇਅ ਟੀਮ ਦੇ ਫਾਈਨਲ ਗੇੜ ਵਿੱਚ ਪਹੁੰਚਣ ਦੀ ਉਮੀਦ ਕੀਤੀ ਸੀ। ਪਰ ਟੀਮ ਅਜਿਹਾ ਨਹੀਂ ਕਰ ਸਕੀ।
ਮਹਿਲਾਵਾਂ ਦੀ 4x400 ਮੀਟਰ ਰਿਲੇਅ ਟੀਮ ਵੀ ਪਹਿਲੇ ਗੇੜ ਦੇ ਹੀਟਸ ਵਿੱਚ ਭਾਗ ਲੈਣ ਵਾਲੇ 16 ਦੇਸ਼ਾਂ ਵਿੱਚੋਂ 15ਵੇਂ ਸਥਾਨ ’ਤੇ ਰਹਿਣ ਤੋਂ ਬਾਅਦ ਕੁਆਲੀਫਾਈ ਕਰਨ ਵਿੱਚ ਅਸਫਲ ਰਹੀ। ਵਿਥਿਆ ਰਾਮਰਾਜ, ਜਯੋਤਿਕਾ ਸ਼੍ਰੀ ਦਾਂਡੀ, ਐੱਮਆਰ ਪੂਵੰਮਾ ਅਤੇ ਸੁਭਾ ਵੈਂਕਟੇਸ਼ਨ ਦੀ ਕੁਆਰੇਟ 3:32.51 ਨਾਲ ਕੁੱਲ ਮਿਲਾ ਕੇ 15ਵੇਂ ਸਥਾਨ 'ਤੇ ਰਹੀ, ਜੋ ਹੀਟ ਨੰਬਰ ਦੋ ਵਿੱਚ ਅੱਠਵੇਂ ਅਤੇ ਆਖਰੀ ਸਥਾਨ ਤੋਂ ਉੱਪਰ ਰਹੀ।