ਗੋਲਫ਼ ਤੋਂ ''ਐਲੀਟ'' ਖੇਡ ਦਾ ਠੱਪਾ ਹਟਣਾ ਚਾਹੀਦਾ ਹੈ: ਕਪਿਲ ਦੇਵ

ਨਵੀਂ ਦਿੱਲੀ : ਭਾਰਤੀ ਕ੍ਰਿਕਟ ਟੀਮ ਦੇ ਸਾਬਕਾ ਕਪਤਾਨ ਅਤੇ 'ਡੀ.ਪੀ. ਵਰਲਡ ਪੀ.ਜੀ.ਟੀ.ਆਈ.' ਦੇ ਪ੍ਰਧਾਨ ਕਪਿਲ ਦੇਵ ਨੇ ਗੋਲਫ਼ ਨੂੰ 'ਐਲੀਟ' (ਖਾਸ ਵਰਗ ਦੀ) ਖੇਡ ਦੇ ਅਕਸ ਤੋਂ ਬਾਹਰ ਕੱਢਣ ਦੀ ਵਕਾਲਤ ਕੀਤੀ ਹੈ। ਉਨ੍ਹਾਂ ਕਿਹਾ ਕਿ ਇਹ ਖੇਡ ਨਾ ਸਿਰਫ਼ ਕਰੀਅਰ ਬਣਾਉਣ ਦੇ ਬਿਹਤਰੀਨ ਮੌਕੇ ਪ੍ਰਦਾਨ ਕਰਦੀ ਹੈ, ਸਗੋਂ ਲੋਕਾਂ ਵਿਚਾਲੇ ਆਪਸੀ ਰਿਸ਼ਤੇ ਅਤੇ ਦੋਸਤੀ ਮਜ਼ਬੂਤ ਕਰਨ ਵਿੱਚ ਵੀ ਅਹਿਮ ਭੂਮਿਕਾ ਨਿਭਾਉਂਦੀ ਹੈ।

ਕਪਿਲ ਦੇਵ ਨਵੀਂ ਦਿੱਲੀ ਦੇ ਕੁਤੁਬ ਗੋਲਫ਼ ਕੋਰਸ ਵਿਖੇ 'ਬਿਜ਼ਨਸ ਟੂਡੇ' ਅਤੇ 'ਪੀ.ਜੀ.ਟੀ.ਆਈ.' ਦੇ ਸਾਂਝੇ ਯਤਨਾਂ ਨਾਲ ਆਯੋਜਿਤ ਹੋਣ ਵਾਲੇ 'ਬੀ.ਟੀ. ਗੋਲਫ਼' ਦੇ 27ਵੇਂ ਸੀਜ਼ਨ ਦੀ ਘੋਸ਼ਣਾ ਦੇ ਮੌਕੇ 'ਤੇ ਸੰਬੋਧਨ ਕਰ ਰਹੇ ਸਨ। ਉਨ੍ਹਾਂ ਕਿਹਾ ਕਿ ਸਾਨੂੰ 'ਐਲੀਟ' ਸ਼ਬਦ ਵਿੱਚ ਨਹੀਂ ਉਲਝਣਾ ਚਾਹੀਦਾ। ਜਿਵੇਂ ਲੋਕ ਡਾਕਟਰ, ਇੰਜੀਨੀਅਰ ਜਾਂ ਵਿਗਿਆਨੀ ਬਣ ਕੇ ਬਿਹਤਰ ਜ਼ਿੰਦਗੀ ਚਾਹੁੰਦੇ ਹਨ, ਉਵੇਂ ਹੀ ਜੇਕਰ ਖੇਡ ਰਾਹੀਂ ਕਿਸੇ ਨੂੰ ਉੱਤਮ ਪ੍ਰਦਰਸ਼ਨ ਕਰਨ ਅਤੇ ਅੱਗੇ ਵਧਣ ਦਾ ਮੌਕਾ ਮਿਲਦਾ ਹੈ ਤਾਂ ਇਸ ਵਿੱਚ ਕੋਈ ਬੁਰਾਈ ਨਹੀਂ ਹੈ।

ਉਨ੍ਹਾਂ ਨੇ ਲੋਕਾਂ ਨੂੰ ਆਪਸ ਵਿੱਚ ਜੋੜਨ ਲਈ ਗੋਲਫ਼ ਦੀ ਭੂਮਿਕਾ 'ਤੇ ਵੀ ਜ਼ੋਰ ਦਿੱਤਾ। ਕਪਿਲ ਦੇਵ ਅਨੁਸਾਰ, ਗੋਲਫ਼ ਕੋਰਸ 'ਤੇ ਬਿਤਾਇਆ ਸਮਾਂ ਖਿਡਾਰੀਆਂ ਨੂੰ ਇੱਕ-ਦੂਜੇ ਦੇ ਨਜ਼ਰੀਏ ਨੂੰ ਸਮਝਣ ਅਤੇ ਆਪਸੀ ਰਿਸ਼ਤੇ ਬਣਾਉਣ ਦਾ ਸ਼ਾਨਦਾਰ ਮੌਕਾ ਦਿੰਦਾ ਹੈ। 'ਬਿਜ਼ਨਸ ਟੂਡੇ' ਅਤੇ 'ਡੀ.ਪੀ. ਵਰਲਡ ਪੀ.ਜੀ.ਟੀ.ਆਈ.' ਦੀ ਇਹ ਸਾਂਝੇਦਾਰੀ ਭਾਰਤੀ ਕਾਰਪੋਰੇਟ ਜਗਤ ਨੂੰ ਪੇਸ਼ੇਵਰ ਗੋਲਫ਼ ਦੇ ਨੇੜੇ ਲਿਆਉਣ ਅਤੇ ਇਸ ਖੇਡ ਦੀ ਲੋਕਪ੍ਰਿਯਤਾ ਵਧਾਉਣ ਦੇ ਉਦੇਸ਼ ਨਾਲ ਕੀਤੀ ਗਈ ਹੈ।