ਆਸਟਰੇਲੀਆ ਦੌਰੇ ਲਈ ਭਾਰਤੀ ਮਹਿਲਾ ਹਾਕੀ ਟੀਮ ''ਚ ਪੰਜ ਨਵੇਂ ਚਿਹਰੇ

ਨਵੀਂ ਦਿੱਲੀ- ਹਾਕੀ ਇੰਡੀਆ ਨੇ ਸੋਮਵਾਰ ਨੂੰ 26 ਅਪ੍ਰੈਲ ਤੋਂ 4 ਮਈ ਤੱਕ ਹੋਣ ਵਾਲੇ ਆਸਟ੍ਰੇਲੀਆ ਦੌਰੇ ਲਈ 26 ਮੈਂਬਰੀ ਮਹਿਲਾ ਟੀਮ ਦਾ ਐਲਾਨ ਕੀਤਾ, ਜਿਸ 'ਚ ਪਹਿਲੀ ਵਾਰ ਪੰਜ ਨਵੀਆਂ ਖਿਡਾਰਨਾਂ ਨੂੰ ਸੀਨੀਅਰ ਟੀਮ 'ਚ ਸ਼ਾਮਲ ਕੀਤਾ ਗਿਆ ਹੈ। ਭਾਰਤ ਇਸ ਦੌਰੇ 'ਚ ਕੁੱਲ ਪੰਜ ਮੈਚ ਖੇਡੇਗਾ। ਉਹ ਪਹਿਲੇ ਦੋ ਮੈਚਾਂ 'ਚ ਆਸਟਰੇਲੀਆ ਏ ਦਾ ਸਾਹਮਣਾ ਕਰੇਗਾ ਅਤੇ ਇਸ ਤੋਂ ਬਾਅਦ ਉਹ ਸੀਨੀਅਰ ਆਸਟਰੇਲੀਆਈ ਟੀਮ ਵਿਰੁੱਧ ਤਿੰਨ ਮੈਚ ਖੇਡੇਗਾ। ਸਾਰੇ ਪੰਜ ਮੈਚ ਪਰਥ ਹਾਕੀ ਸਟੇਡੀਅਮ 'ਚ ਖੇਡੇ ਜਾਣਗੇ। ਇਹ ਦੌਰਾ ਬਹੁਤ ਮਹੱਤਵਪੂਰਨ ਹੈ ਕਿਉਂਕਿ ਟੀਮ ਜੂਨ 'ਚ ਹੋਣ ਵਾਲੇ FIH ਪ੍ਰੋ ਲੀਗ 2024-25 ਦੇ ਯੂਰਪੀਅਨ ਪੜਾਅ ਦੀ ਤਿਆਰੀ ਕਰ ਰਹੀ ਹੈ।ਪੰਜ ਖਿਡਾਰਨਾਂ ਜੋਤੀ ਸਿੰਘ, ਸੁਜਾਤਾ ਕੁਜੂਰ, ਅਜਮੀਨਾ ਕੁਜੂਰ, ਪੂਜਾ ਯਾਦਵ ਅਤੇ ਮਹਿਮਾ ਟੇਟੇ ਨੂੰ ਪਹਿਲੀ ਵਾਰ ਸੀਨੀਅਰ ਟੀਮ 'ਚ ਸ਼ਾਮਲ ਕੀਤਾ ਗਿਆ ਹੈ।
ਟੀਮ ਤਜਰਬੇਕਾਰ ਅਤੇ ਨਵੇਂ ਖਿਡਾਰੀਆਂ ਦਾ ਮਿਸ਼ਰਣ ਹੈ। ਟੀਮ ਦੀ ਅਗਵਾਈ ਮਿਡਫੀਲਡਰ ਸਲੀਮਾ ਟੇਟੇ ਕਰੇਗੀ, ਜਦੋਂ ਕਿ ਤਜਰਬੇਕਾਰ ਫਾਰਵਰਡ ਨਵਨੀਤ ਕੌਰ ਨੂੰ ਉਪ-ਕਪਤਾਨ ਨਿਯੁਕਤ ਕੀਤਾ ਗਿਆ ਹੈ। ਤਜਰਬੇਕਾਰ ਸਵਿਤਾ ਅਤੇ ਬਿਚੂ ਦੇਵੀ ਖਾਰੀਬਮ ਗੋਲਕੀਪਰ ਦੀ ਜ਼ਿੰਮੇਵਾਰੀ ਸੰਭਾਲਣਗੇ ਜਦੋਂ ਕਿ ਡਿਫੈਂਸ ਲਾਈਨ 'ਚ ਜੋਤੀ ਸਿੰਘ, ਇਸ਼ਿਕਾ ਚੌਧਰੀ, ਸੁਸ਼ੀਲਾ ਚਾਨੂ ਪੁਖਰੰਬਮ, ਸੁਜਾਤਾ ਕੁਜੂਰ, ਸੁਮਨ ਦੇਵੀ ਥੌਦਾਮ, ਜੋਤੀ, ਅਜ਼ਮੀਨਾ ਕੁਜੂਰ ਅਤੇ ਸਾਕਸ਼ੀ ਰਾਣਾ ਸ਼ਾਮਲ ਹਨ। ਮੱਧ ਲਾਈਨ ਦੀ ਜ਼ਿੰਮੇਵਾਰੀ ਕਪਤਾਨ ਟੇਟੇ, ਵੈਸ਼ਨਵੀ ਵਿੱਠਲ ਫਾਲਕੇ, ਨੇਹਾ, ਸ਼ਰਮੀਲਾ ਦੇਵੀ, ਮਨੀਸ਼ਾ ਚੌਹਾਨ, ਸੁਨੇਲਿਤਾ ਟੋਪੋ, ਮਹਿਮਾ ਟੇਟੇ, ਪੂਜਾ ਯਾਦਵ ਅਤੇ ਲਾਲਰੇਮਸਿਆਮੀ 'ਤੇ ਹੋਵੇਗੀ। ਨਵਨੀਤ ਕੌਰ, ਦੀਪਿਕਾ, ਰੁਤਜਾ ਦਾਦਾਸੋ ਪਿਸਲ, ਮੁਮਤਾਜ਼ ਖਾਨ, ਬਲਜੀਤ ਕੌਰ, ਦੀਪਿਕਾ ਸੋਰੇਂਗ ਅਤੇ ਬਿਊਟੀ ਡੰਗਡੰਗ ਫਰੰਟ ਲਾਈਨ ਦੀ ਜ਼ਿੰਮੇਵਾਰੀ ਸੰਭਾਲਣਗੇ। ਬਾਂਸਾਰੀ ਸੋਲੰਕੀ (ਗੋਲਕੀਪਰ), ਅੰਜਨਾ ਡੰਡੁੰਗ ਅਤੇ ਲਾਲਥੰਤੁਆਂਗੀ (ਡਿਫੈਂਡਰ), ਸਾਕਸ਼ੀ ਸ਼ੁਕਲਾ ਅਤੇ ਖੈਦੇਮ ਸ਼ਿਲੇਮਾ ਚਾਨੂ (ਮਿਡਫੀਲਡਰ) ਅਤੇ ਮੋਨਿਕਾ ਟੋਪੋ ਅਤੇ ਸੋਨਮ (ਫਾਰਵਰਡ) ਨੂੰ ਸਟੈਂਡਬਾਏ ਖਿਡਾਰੀ ਵਜੋਂ ਚੁਣਿਆ ਗਿਆ ਹੈ। ਟੀਮ ਦੇ ਮੁੱਖ ਕੋਚ ਹਰਿੰਦਰ ਸਿੰਘ ਨੇ ਕਿਹਾ, "ਅਸੀਂ ਇੱਕ ਸੰਤੁਲਿਤ ਟੀਮ ਚੁਣੀ ਹੈ ਜੋ ਤਜਰਬੇਕਾਰ ਅਤੇ ਨੌਜਵਾਨਾਂ ਖਿਡਾਰਨਾਂ ਦਾ ਵਧੀਆ ਮਿਸ਼ਰਣ ਹੈ। ਨੌਜਵਾਨ ਖਿਡਾਰਨਾਂ ਨੇ ਰਾਸ਼ਟਰੀ ਪੱਧਰ ਦੇ ਮੁਕਾਬਲਿਆਂ ਅਤੇ ਸੀਨੀਅਰ ਕੈਂਪਾਂ 'ਚ ਆਪਣਾ ਹੁਨਰ ਦਿਖਾਇਆ ਹੈ। ਇਹ ਦੇਖਣਾ ਦਿਲਚਸਪ ਹੋਵੇਗਾ ਕਿ ਉਹ ਅੰਤਰਰਾਸ਼ਟਰੀ ਪੱਧਰ ਦੀ ਚੁਣੌਤੀ ਦਾ ਸਾਹਮਣਾ ਕਿਵੇਂ ਕਰਦੀਆਂ ਹਨ।"