ਇਟਾਲੀਅਨ ਓਪਨ 2026 : ਦੂਜੇ ਦੌਰ ''ਚ ਵੱਡਾ ਉਲਟਫੇਰ, ਯੁਵਾ ਖਿਡਾਰੀ ਪ੍ਰਿਜਮਿਕ ਤੋਂ ਹਾਰੇ ਜੋਕੋਵਿਚ

ਰੋਮ : ਇਟਾਲੀਅਨ ਓਪਨ 2026 ਵਿੱਚ ਇੱਕ ਬਹੁਤ ਵੱਡਾ ਉਲਟਫੇਰ ਦੇਖਣ ਨੂੰ ਮਿਲਿਆ ਹੈ, ਜਿੱਥੇ ਛੇ ਵਾਰ ਦੇ ਚੈਂਪੀਅਨ ਨੋਵਾਕ ਜੋਕੋਵਿਚ ਦਾ ਸਫ਼ਰ ਦੂਜੇ ਦੌਰ ਵਿੱਚ ਹੀ ਖ਼ਤਮ ਹੋ ਗਿਆ ਹੈ। ਕਰੋਏਸ਼ੀਆ ਦੇ ਨੌਜਵਾਨ ਖਿਡਾਰੀ ਡੀਨੋ ਪ੍ਰਿਜ਼ਮਿਕ ਨੇ ਸ਼ਾਨਦਾਰ ਪ੍ਰਦਰਸ਼ਨ ਕਰਦਿਆਂ ਤਜਰਬੇਕਾਰ ਸਰਬੀਆਈ ਸਟਾਰ ਜੋਕੋਵਿਚ ਨੂੰ ਤਿੰਨ ਸੈੱਟਾਂ ਤੱਕ ਚੱਲੇ ਮੁਕਾਬਲੇ ਵਿੱਚ 2-6, 6-2, 6-4 ਨਾਲ ਹਰਾ ਕੇ ਟੂਰਨਾਮੈਂਟ ਦੇ ਅੰਤਿਮ-32 ਵਿੱਚ ਜਗ੍ਹਾ ਬਣਾਈ ਹੈ।

ਸ਼ਾਨਦਾਰ ਸ਼ੁਰੂਆਤ ਦੇ ਬਾਵਜੂਦ ਜੋਕੋਵਿਚ ਦੀ ਹਾਰ 
ਮੈਚ ਦੀ ਸ਼ੁਰੂਆਤ ਵਿੱਚ ਜੋਕੋਵਿਚ ਪੂਰੀ ਤਰ੍ਹਾਂ ਲੈਅ ਵਿੱਚ ਨਜ਼ਰ ਆਏ ਅਤੇ ਉਨ੍ਹਾਂ ਨੇ ਸ਼ਾਨਦਾਰ ਡ੍ਰੌਪ ਸ਼ਾਟਸ ਅਤੇ ਫੋਰਹੈਂਡ ਵਿਨਰਜ਼ ਦੇ ਦਮ 'ਤੇ ਪਹਿਲਾ ਸੈੱਟ 6-2 ਨਾਲ ਜਿੱਤ ਕੇ ਮੈਚ 'ਤੇ ਪਕੜ ਬਣਾਈ। ਹਾਲਾਂਕਿ, ਦੂਜੇ ਸੈੱਟ ਵਿੱਚ ਖੇਡ ਦਾ ਰੁਖ਼ ਪੂਰੀ ਤਰ੍ਹਾਂ ਬਦਲ ਗਿਆ। ਪ੍ਰਿਜ਼ਮਿਕ ਨੇ ਹਮਲਾਵਰ ਖੇਡ ਦਿਖਾਉਂਦੇ ਹੋਏ 4-0 ਦੀ ਬੜ੍ਹਤ ਬਣਾ ਲਈ ਅਤੇ ਜੋਕੋਵਿਚ ਦੀ ਕਮਜ਼ੋਰ ਪੈਂਦੀ ਸਰਵਿਸ ਦਾ ਫਾਇਦਾ ਉਠਾਉਂਦੇ ਹੋਏ ਦੂਜਾ ਸੈੱਟ 6-2 ਨਾਲ ਆਪਣੇ ਨਾਮ ਕਰ ਲਿਆ।

ਨਿਰਣਾਇਕ ਸੈੱਟ ਵਿੱਚ ਪ੍ਰਿਜ਼ਮਿਕ ਦਾ ਦਬਦਬਾ 
ਤੀਜੇ ਅਤੇ ਨਿਰਣਾਇਕ ਸੈੱਟ ਵਿੱਚ ਦੋਵਾਂ ਖਿਡਾਰੀਆਂ ਵਿਚਾਲੇ ਕਾਂਟੇ ਦੀ ਟੱਕਰ ਦੇਖਣ ਨੂੰ ਮਿਲੀ। ਪਰ ਪੰਜਵੇਂ ਗੇਮ ਵਿੱਚ ਪ੍ਰਿਜ਼ਮਿਕ ਨੇ ਅਹਿਮ ਬ੍ਰੇਕ ਹਾਸਲ ਕੀਤਾ ਅਤੇ ਬੜ੍ਹਤ ਬਣਾਈ ਰੱਖਦੇ ਹੋਏ ਸੈੱਟ 6-4 ਨਾਲ ਜਿੱਤ ਕੇ ਆਪਣੇ ਕਰੀਅਰ ਦੀ ਸਭ ਤੋਂ ਵੱਡੀ ਜਿੱਤ ਦਰਜ ਕੀਤੀ।

ਹਾਰ ਤੋਂ ਬਾਅਦ ਜੋਕੋਵਿਚ ਦਾ ਬਿਆਨ 
ਮੈਚ ਤੋਂ ਬਾਅਦ ਨੋਵਾਕ ਜੋਕੋਵਿਚ ਨੇ ਸਵੀਕਾਰ ਕੀਤਾ ਕਿ ਉਹ ਆਪਣੇ ਸਰਵੋਤਮ ਪੱਧਰ 'ਤੇ ਨਹੀਂ ਸਨ। ਉਨ੍ਹਾਂ ਨੇ ਕਿਹਾ ਕਿ ਉਹ ਖੁਦ ਨੂੰ ਵਿਰੋਧੀ ਤੋਂ ਅੱਧਾ ਕਦਮ ਪਿੱਛੇ ਮਹਿਸੂਸ ਕਰ ਰਹੇ ਸਨ। ਜੋਕੋਵਿਚ ਨੇ ਪ੍ਰਿਜ਼ਮਿਕ ਦੀ ਤਾਰੀਫ਼ ਕਰਦਿਆਂ ਕਿਹਾ ਕਿ ਉਸ ਨੇ ਬਹੁਤ ਹੀ ਉੱਚ ਪੱਧਰੀ ਟੈਨਿਸ ਖੇਡੀ ਅਤੇ ਉਸ ਦੇ ਫੋਰਹੈਂਡ ਵਿੱਚ ਪਹਿਲਾਂ ਨਾਲੋਂ ਕਾਫੀ ਸੁਧਾਰ ਦੇਖਣ ਨੂੰ ਮਿਲਿਆ ਹੈ।

ਅਗਲੇ ਮੁਕਾਬਲੇ ਹੁਣ ਸਾਰਿਆਂ ਦੀਆਂ ਨਜ਼ਰਾਂ ਘਰੇਲੂ ਸਟਾਰ ਅਤੇ ਦੁਨੀਆ ਦੇ ਨੰਬਰ-1 ਖਿਡਾਰੀ ਜੈਨਿਕ ਸਿਨਰ 'ਤੇ ਹੋਣਗੀਆਂ, ਜੋ ਸ਼ਨੀਵਾਰ ਨੂੰ ਰੋਮ ਵਿੱਚ ਆਪਣੀ ਮੁਹਿੰਮ ਦੀ ਸ਼ੁਰੂਆਤ ਕਰਨਗੇ । ਮਹਿਲਾ ਵਰਗ ਵਿੱਚ ਚੀਨ ਦੀ ਝੇਂਗ ਕਿਨਵੇਨ ਦਾ ਸਾਹਮਣਾ ਸਾਬਕਾ ਫ੍ਰੈਂਚ ਓਪਨ ਚੈਂਪੀਅਨ ਜੇਲੇਨਾ ਓਸਟਾਪੈਂਕੋ ਨਾਲ ਹੋਵੇਗਾ।