BWF ਵਿਸ਼ਵ ਚੈਂਪੀਅਨਸ਼ਿਪ: ਆਯੁਸ਼ ਸ਼ੈੱਟੀ ਹਾਰੇ, ਤ੍ਰਿਸ਼ਾ-ਗਾਇਤਰੀ ਕੁਆਰਟਰ ਫਾਈਨਲ ਪੁੱਜੀਆਂ
Friday, Aug 21, 2026 - 04:21 PM (IST)
ਸਪੋਰਟਸ ਡੈਸਕ : ਭਾਰਤ ਦੇ ਆਯੁਸ਼ ਸ਼ੈੱਟੀ ਵੀਰਵਾਰ ਨੂੰ ਇੱਥੇ ਬੀਡਬਲਯੂਐਫ ਵਿਸ਼ਵ ਚੈਂਪੀਅਨਸ਼ਿਪ ਦੇ ਪ੍ਰੀ-ਕੁਆਰਟਰ ਫਾਈਨਲ ਵਿੱਚ ਇੰਡੋਨੇਸ਼ੀਆ ਦੇ ਅਲਵੀ ਫਰਹਾਨ ਤੋਂ ਹਾਰ ਗਏ, ਜਿਸ ਨਾਲ ਟੂਰਨਾਮੈਂਟ ਵਿੱਚ ਭਾਰਤ ਦੀ ਪੁਰਸ਼ ਸਿੰਗਲਜ਼ ਮੁਹਿੰਮ ਖਤਮ ਹੋ ਗਈ। 21 ਸਾਲਾ ਸ਼ੈੱਟੀ, ਜਿਸਨੇ ਸ਼ੁਰੂਆਤੀ ਦੌਰ ਵਿੱਚ ਮੌਜੂਦਾ ਚੈਂਪੀਅਨ ਅਤੇ ਵਿਸ਼ਵ ਨੰਬਰ ਇੱਕ ਚੀਨ ਦੇ ਸ਼ੀ ਯੂ ਕੀ ਨੂੰ ਹਰਾਇਆ ਸੀ, ਨੂੰ ਵਿਸ਼ਵ ਨੰਬਰ 12 ਫਰਹਾਨ ਤੋਂ 21-19, 21-11 ਨਾਲ ਹਾਰ ਦਾ ਸਾਹਮਣਾ ਕਰਨਾ ਪਿਆ।
ਇਹ 11ਵਾਂ ਦਰਜਾ ਪ੍ਰਾਪਤ ਇੰਡੋਨੇਸ਼ੀਆਈ ਖਿਡਾਰੀ ਦੇ ਖਿਲਾਫ ਅੱਠ ਮੈਚਾਂ ਵਿੱਚ ਸ਼ੈੱਟੀ ਦੀ ਪੰਜਵੀਂ ਹਾਰ ਹੈ। ਇਸ ਨਤੀਜੇ ਦੇ ਨਾਲ ਹੀ ਭਾਰਤ ਦੀ ਪੁਰਸ਼ ਸਿੰਗਲਜ਼ ਮੁਹਿੰਮ ਖਤਮ ਹੋ ਗਈ। ਲਕਸ਼ਯ ਸੇਨ ਬੁੱਧਵਾਰ ਨੂੰ ਹੀ ਮੁਕਾਬਲੇ ਤੋਂ ਬਾਹਰ ਹੋ ਗਏ ਸਨ। ਇਸ ਤੋਂ ਪਹਿਲਾਂ, ਤ੍ਰਿਸ਼ਾ ਜੌਲੀ ਅਤੇ ਗਾਇਤਰੀ ਗੋਪੀਚੰਦ ਦੀ ਭਾਰਤੀ ਮਹਿਲਾ ਡਬਲਜ਼ ਜੋੜੀ ਨੇ ਸੱਤਵਾਂ ਦਰਜਾ ਪ੍ਰਾਪਤ ਜਾਪਾਨ ਦੀ ਰਿਨ ਇਵਾਨਗਾ ਅਤੇ ਕੇਈ ਨਾਕਾਨਿਸ਼ੀ ਨੂੰ ਸਿੱਧੇ ਗੇਮਾਂ ਵਿੱਚ ਹਰਾ ਕੇ ਕੁਆਰਟਰ ਫਾਈਨਲ ਵਿੱਚ ਪ੍ਰਵੇਸ਼ ਕੀਤਾ।
ਗੈਰ-ਦਰਜਾ ਪ੍ਰਾਪਤ ਭਾਰਤੀ ਜੋੜੀ ਨੇ ਇੱਕ ਪਾਸੜ ਮੁਕਾਬਲੇ ਵਿੱਚ ਦੁਨੀਆ ਦੀ ਸੱਤਵੇਂ ਨੰਬਰ ਦੀ ਜੋੜੀ ਰਿਨ ਅਤੇ ਨਕਾਨਿਸ਼ੀ ਨੂੰ 21-16, 21-12 ਨਾਲ ਹਰਾਇਆ। ਹਾਲ ਹੀ ਵਿੱਚ ਅਰਜੁਨ ਪੁਰਸਕਾਰ ਜੇਤੂ ਤ੍ਰਿਸ਼ਾ ਅਤੇ ਗਾਇਤਰੀ ਨੇ ਸ਼ੁਰੂਆਤ ਤੋਂ ਹੀ ਵਧੀਆ ਪ੍ਰਦਰਸ਼ਨ ਕੀਤਾ ਅਤੇ ਆਪਣੇ ਵਿਰੋਧੀਆਂ ਨੂੰ ਕੋਈ ਮੌਕਾ ਨਹੀਂ ਦਿੱਤਾ। ਇਹ ਭਾਰਤੀ ਜੋੜੀ 2022 ਅਤੇ 2023 ਵਿੱਚ ਲਗਾਤਾਰ ਦੋ ਸਾਲਾਂ ਲਈ ਆਲ ਇੰਗਲੈਂਡ ਓਪਨ ਦੇ ਸੈਮੀਫਾਈਨਲ ਵਿੱਚ ਪਹੁੰਚੀ ਸੀ।
ਉਨ੍ਹਾਂ ਨੇ 2022 ਦੀਆਂ ਰਾਸ਼ਟਰਮੰਡਲ ਖੇਡਾਂ ਵਿੱਚ ਕਾਂਸੀ ਦਾ ਤਗਮਾ ਵੀ ਜਿੱਤਿਆ ਅਤੇ ਪਿਛਲੇ ਸਾਲ ਦੇ ਸ਼ੁਰੂ ਵਿੱਚ ਦੁਨੀਆ ਦੇ ਚੋਟੀ ਦੇ 10 ਜੋੜਿਆਂ ਵਿੱਚ ਸ਼ਾਮਲ ਹੋ ਗਏ। ਇਸ ਸਾਲ ਦੇ ਸ਼ੁਰੂ ਵਿੱਚ ਤ੍ਰਿਸਾ ਨੂੰ ਗਿੱਟੇ ਦੀ ਸੱਟ ਲੱਗ ਗਈ ਸੀ, ਜਿਸ ਕਾਰਨ ਉਨ੍ਹਾਂ ਨੂੰ ਕੁਝ ਟੂਰਨਾਮੈਂਟਾਂ ਤੋਂ ਖੁੰਝਣਾ ਪਿਆ। ਉਨ੍ਹਾਂ ਨੇ ਇੰਡੋਨੇਸ਼ੀਆ ਓਪਨ ਵਿੱਚ ਵਾਪਸੀ ਕੀਤੀ ਅਤੇ ਇਸ ਮਹੀਨੇ ਦੇ ਸ਼ੁਰੂ ਵਿੱਚ ਫਿਲੀਪੀਨ ਇੰਟਰਨੈਸ਼ਨਲ ਚੈਲੇਂਜ ਜਿੱਤਿਆ।