IPL ਜਿੱਤ ਦੇ ਜਸ਼ਨਾਂ ਦੌਰਾਨ ਵੱਡਾ ਝਟਕਾ: RCB ਦੇ ਸਟਾਰ ਖਿਡਾਰੀ ''ਤੇ ਲੱਗਾ ਬੈਨ, BCCI ਨੇ ਅੱਧੀ ਕਮਾਈ ਵੀ ਕੱਟੀ

ਸਪੋਰਟਸ ਡੈਸਕ : ਰਾਇਲ ਚੈਲੇਂਜਰਜ਼ ਬੈਂਗਲੁਰੂ (RCB) ਨੇ ਆਈ.ਪੀ.ਐੱਲ. 2026 ਦਾ ਖਿਤਾਬ ਜਿੱਤ ਕੇ ਇਤਿਹਾਸ ਰਚ ਦਿੱਤਾ ਹੈ। ਅਹਿਮਦਾਬਾਦ ਦੇ ਨਰਿੰਦਰ ਮੋਦੀ ਸਟੇਡੀਅਮ ਵਿੱਚ ਖੇਡੇ ਗਏ ਫਾਈਨਲ ਵਿੱਚ ਬੈਂਗਲੁਰੂ ਨੇ ਗੁਜਰਾਤ ਟਾਈਟਨਸ ਨੂੰ 5 ਵਿਕਟਾਂ ਨਾਲ ਹਰਾ ਕੇ ਲਗਾਤਾਰ ਦੂਜੀ ਵਾਰ ਟਰਾਫੀ ਆਪਣੇ ਨਾਂ ਕੀਤੀ। ਪਰ ਇਸ ਇਤਿਹਾਸਕ ਜਿੱਤ ਦੇ ਅਗਲੇ ਹੀ ਦਿਨ ਟੀਮ ਲਈ ਇੱਕ ਬੁਰੀ ਖ਼ਬਰ ਸਾਹਮਣੇ ਆਈ ਹੈ। ਟੀਮ ਦੇ ਸਟਾਰ ਬੱਲੇਬਾਜ਼ ਟਿਮ ਡੇਵਿਡ 'ਤੇ ਭਾਰਤੀ ਕ੍ਰਿਕਟ ਕੰਟਰੋਲ ਬੋਰਡ (BCCI) ਨੇ ਨਿਯਮਾਂ ਦੀ ਉਲੰਘਣਾ ਕਰਨ ਦੇ ਦੋਸ਼ ਵਿੱਚ ਇੱਕ ਮੈਚ ਦੀ ਪਾਬੰਦੀ ਲਗਾ ਦਿੱਤੀ ਹੈ। ਇਸ ਦੇ ਨਾਲ ਹੀ ਉਨ੍ਹਾਂ ਦੀ ਮੈਚ ਫੀਸ ਦਾ 50 ਫੀਸਦੀ ਹਿੱਸਾ ਵੀ ਜੁਰਮਾਨੇ ਵਜੋਂ ਕੱਟਿਆ ਗਿਆ ਹੈ। 

ਅੰਪਾਇਰ ਵੱਲ ਸੁੱਟਿਆ ਸੀ ਆਈਸ ਬੈਗ 

ਬੀ.ਸੀ.ਸੀ.ਆਈ. ਵੱਲੋਂ ਜਾਰੀ ਪ੍ਰੈਸ ਰਿਲੀਜ਼ ਅਨੁਸਾਰ, ਟਿਮ ਡੇਵਿਡ ਨੂੰ ਆਈ.ਪੀ.ਐੱਲ. ਕੋਡ ਆਫ ਕੰਡਕਟ ਦੀ ਉਲੰਘਣਾ ਦਾ ਦੋਸ਼ੀ ਪਾਇਆ ਗਿਆ ਹੈ। ਫਾਈਨਲ ਮੈਚ ਦੌਰਾਨ ਗੁਜਰਾਤ ਦੀ ਪਾਰੀ ਦੇ 10ਵੇਂ ਓਵਰ ਵਿੱਚ ਜਦੋਂ ਇੱਕ ਵਿਕਟ ਡਿੱਗੀ, ਤਾਂ ਡੇਵਿਡ ਨੇ ਹਮਲਾਵਰ ਅੰਦਾਜ਼ ਵਿੱਚ ਅੰਪਾਇਰ ਨਿਤਿਨ ਮੇਨਨ ਵੱਲ ਇੱਕ ਆਈਸ ਬੈਗ (ice bag) ਸੁੱਟਿਆ। ਇਹ ਹਰਕਤ ਆਰਟੀਕਲ 2.9 ਦੀ ਉਲੰਘਣਾ ਹੈ, ਜੋ ਕਿਸੇ ਖਿਡਾਰੀ ਜਾਂ ਮੈਚ ਅਧਿਕਾਰੀ ਵੱਲ ਕੋਈ ਚੀਜ਼ ਸੁੱਟਣ ਨਾਲ ਸਬੰਧਤ ਹੈ। ਡੇਵਿਡ ਨੇ ਮੈਚ ਰੈਫਰੀ ਦੇ ਸਾਹਮਣੇ ਆਪਣੀ ਗਲਤੀ ਕਬੂਲ ਕਰ ਲਈ ਹੈ।

ਇਹ ਵੀ ਪੜ੍ਹੋ : ICC ਨੇ ਬਦਲਿਆ ਚੈਂਪੀਅਨ ਟਰਾਫੀ ਦਾ ਸ਼ੈਡਿਊਲ, ਭਾਰਤ-ਪਾਕਿਸਤਾਨ ਮੈਚ ਬਾਰੇ ਵੀ ਕੀਤਾ ਵੱਡਾ ਐਲਾਨ 

ਤੀਜੀ ਗਲਤੀ ਪਈ ਭਾਰੀ 

ਟਿਮ ਡੇਵਿਡ 'ਤੇ ਇਹ ਪਾਬੰਦੀ ਇਸ ਲਈ ਲੱਗੀ ਹੈ ਕਿਉਂਕਿ ਮੌਜੂਦਾ ਸੀਜ਼ਨ ਵਿੱਚ ਉਨ੍ਹਾਂ ਦੀ ਇਹ ਤੀਜੀ ਗਲਤੀ ਸੀ। ਇਸ ਤੋਂ ਪਹਿਲਾਂ ਉਨ੍ਹਾਂ ਨੂੰ 20ਵੇਂ ਅਤੇ 54ਵੇਂ ਮੈਚ ਵਿੱਚ ਵੀ ਅਨੁਸ਼ਾਸਨਹੀਣਤਾ ਲਈ ਡੀਮੈਰਿਟ ਅੰਕ ਮਿਲੇ ਸਨ। ਹੁਣ ਕੁੱਲ 5 ਡੀਮੈਰਿਟ ਅੰਕ ਹੋਣ ਕਾਰਨ ਉਨ੍ਹਾਂ 'ਤੇ ਇੱਕ ਮੈਚ ਦੀ ਪਾਬੰਦੀ ਲਗਾਈ ਗਈ ਹੈ। 

ਅਗਲੇ ਸਾਲ ਭੁਗਤਣੀ ਪਵੇਗੀ ਸਜ਼ਾ 

ਕਿਉਂਕਿ ਆਈ.ਪੀ.ਐੱਲ. 2026 ਦਾ ਸੀਜ਼ਨ ਖਤਮ ਹੋ ਚੁੱਕਾ ਹੈ, ਇਸ ਲਈ ਟਿਮ ਡੇਵਿਡ 'ਤੇ ਇਹ ਪਾਬੰਦੀ ਅਗਲੇ ਸਾਲ (2027 ਸੀਜ਼ਨ) ਦੇ ਪਹਿਲੇ ਮੈਚ 'ਤੇ ਲਾਗੂ ਹੋਵੇਗੀ। ਡੇਵਿਡ ਅਗਲੇ ਸਾਲ ਜਿਸ ਵੀ ਟੀਮ ਵੱਲੋਂ ਮੈਦਾਨ 'ਚ ਉਤਰਨਗੇ, ਉਹ ਪਹਿਲਾ ਮੈਚ ਨਹੀਂ ਖੇਡ ਸਕਣਗੇ। ਦੱਸਣਯੋਗ ਹੈ ਕਿ ਇਸ ਤੋਂ ਪਹਿਲਾਂ ਸਾਲ 2024 ਵਿੱਚ ਹਾਰਦਿਕ ਪੰਡਯਾ 'ਤੇ ਵੀ ਅਜਿਹੀ ਹੀ ਪਾਬੰਦੀ ਲੱਗੀ ਸੀ, ਜਿਸ ਕਾਰਨ ਉਹ 2025 ਸੀਜ਼ਨ ਦਾ ਪਹਿਲਾ ਮੈਚ ਨਹੀਂ ਖੇਡ ਸਕੇ ਸਨ।

ਜਗ ਬਾਣੀ ਈ-ਪੇਪਰ ਨੂੰ ਪੜ੍ਹਨ ਅਤੇ ਐਪ ਨੂੰ ਡਾਊਨਲੋਡ ਕਰਨ ਲਈ ਇੱਥੇ ਕਲਿੱਕ ਕਰੋ

For Android:- https://play.google.com/store/apps/details?id=com.jagbani&hl=en

For IOS:- https://itunes.apple.com/in/app/id538323711?mt=8