ਖਿਡਾਰੀਆਂ ਦੀ ਉਪਲਬਧਤਾ ਲਈ ਵਿਦੇਸ਼ੀ ਬੋਰਡਾਂ ''ਤੇ ਦਬਾਅ ਪਾ ਰਿਹਾ ਹੈ BCCI

ਨਵੀਂ ਦਿੱਲੀ- ਬੀਸੀਸੀਆਈ ਅਤੇ ਆਈਪੀਐਲ ਟੀਮਾਂ ਵਿਦੇਸ਼ੀ ਬੋਰਡਾਂ 'ਤੇ ਦਬਾਅ ਪਾ ਰਹੀਆਂ ਹਨ ਕਿ ਉਹ 17 ਮਈ ਤੋਂ ਮੁੜ ਸ਼ੁਰੂ ਹੋ ਰਹੇ ਆਈਪੀਐਲ ਲਈ ਆਪਣੇ ਖਿਡਾਰੀ ਭੇਜਣ। ਹਾਲਾਂਕਿ ਭਾਰਤ... ਪਾਕਿਸਤਾਨ ਨਾਲ ਫੌਜੀ ਟਕਰਾਅ ਕਾਰਨ ਅਜੇ ਵੀ ਸੁਰੱਖਿਆ ਚਿੰਤਾਵਾਂ ਹਨ। ਬੀਸੀਸੀਆਈ ਦੇ ਉੱਚ ਅਧਿਕਾਰੀਆਂ ਨੇ ਆਈਪੀਐਲ ਦੇ ਸੀਓਓ ਹੇਮਾਂਗ ਅਮੀਨ ਨੂੰ ਸੁਰੱਖਿਆ ਚਿੰਤਾਵਾਂ ਨੂੰ ਦੂਰ ਕਰਨ ਲਈ ਕ੍ਰਿਕਟ ਆਸਟ੍ਰੇਲੀਆ ਅਤੇ ਇੰਗਲੈਂਡ ਅਤੇ ਵੇਲਜ਼ ਕ੍ਰਿਕਟ ਬੋਰਡ ਨਾਲ ਨਿੱਜੀ ਤੌਰ 'ਤੇ ਗੱਲ ਕਰਨ ਲਈ ਕਿਹਾ ਹੈ। ਭਾਰਤ ਅਤੇ ਪਾਕਿਸਤਾਨ ਵਿਚਕਾਰ ਫੌਜੀ ਟਕਰਾਅ ਕਾਰਨ ਲੀਗ 9 ਮਈ ਨੂੰ ਮੁਲਤਵੀ ਕਰ ਦਿੱਤੀ ਗਈ ਸੀ। ਹਾਲਾਂਕਿ, ਇੱਕ ਦਿਨ ਬਾਅਦ, ਜੰਗਬੰਦੀ ਦਾ ਐਲਾਨ ਕੀਤਾ ਗਿਆ, ਜਿਸ ਨਾਲ ਆਈਪੀਐਲ ਦੀ ਮੁੜ ਸ਼ੁਰੂਆਤ ਦਾ ਰਾਹ ਪੱਧਰਾ ਹੋ ਗਿਆ। 

ਬੀਸੀਸੀਆਈ ਦੇ ਇੱਕ ਅਧਿਕਾਰੀ ਨੇ ਕਿਹਾ, "ਅਸੀਂ ਵਿਦੇਸ਼ੀ ਬੋਰਡਾਂ ਨਾਲ ਨਿੱਜੀ ਤੌਰ 'ਤੇ ਗੱਲ ਕਰ ਰਹੇ ਹਾਂ ਜਦੋਂ ਕਿ ਟੀਮਾਂ ਸਿੱਧੇ ਆਪਣੇ ਖਿਡਾਰੀਆਂ ਨਾਲ ਸੰਪਰਕ ਵਿੱਚ ਹਨ। ਸਾਨੂੰ ਉਮੀਦ ਹੈ ਕਿ ਉਨ੍ਹਾਂ ਵਿੱਚੋਂ ਜ਼ਿਆਦਾਤਰ ਵਾਪਸ ਆ ਜਾਣਗੇ।" ਕ੍ਰਿਕਟ ਆਸਟ੍ਰੇਲੀਆ ਨੇ ਭਾਰਤ ਵਾਪਸ ਆਉਣ ਜਾਂ ਨਾ ਆਉਣ ਦਾ ਫੈਸਲਾ ਖਿਡਾਰੀਆਂ 'ਤੇ ਛੱਡ ਦਿੱਤਾ ਹੈ। ਟੀਮ ਅਧਿਕਾਰੀਆਂ ਨੇ ਪੀਟੀਆਈ ਨੂੰ ਦੱਸਿਆ ਕਿ ਕੁਝ ਵਿਦੇਸ਼ੀ ਖਿਡਾਰੀ ਅਜੇ ਵੀ ਆਪਣੀ ਵਾਪਸੀ ਨੂੰ ਲੈ ਕੇ ਚਿੰਤਤ ਹਨ ਪਰ ਜ਼ਿਆਦਾਤਰ ਦੇ ਵਾਪਸ ਆਉਣ ਦੀ ਸੰਭਾਵਨਾ ਹੈ। 

ਚੇਨਈ ਸੁਪਰ ਕਿੰਗਜ਼ ਦੇ ਸੀਈਓ ਕਾਸੀ ਵਿਸ਼ਵਨਾਥ ਨੇ ਕਿਹਾ, "ਸੋਧੇ ਹੋਏ ਸ਼ਡਿਊਲ ਦਾ ਐਲਾਨ ਕੱਲ੍ਹ ਰਾਤ ਕੀਤਾ ਗਿਆ ਸੀ।" ਅਸੀਂ ਆਪਣੇ ਵਿਦੇਸ਼ੀ ਖਿਡਾਰੀਆਂ ਨਾਲ ਸੰਪਰਕ ਕਰ ਰਹੇ ਹਾਂ। ਇਸ ਤੋਂ ਬਾਅਦ ਹੀ ਤਸਵੀਰ ਸਪੱਸ਼ਟ ਹੋਵੇਗੀ। ਸਾਡਾ ਮੈਚ 20 ਮਈ ਨੂੰ ਹੈ, ਇਸ ਲਈ ਅਜੇ ਵੀ ਬਹੁਤ ਸਮਾਂ ਹੈ। ਪੰਜਾਬ ਕਿੰਗਜ਼ ਦੇ ਆਸਟ੍ਰੇਲੀਆਈ ਆਲਰਾਊਂਡਰ ਮਾਰਕਸ ਸਟੋਇਨਿਸ ਅਤੇ ਜੋਸ਼ ਇੰਗਲਿਸ ਦੇ ਵਾਪਸ ਆਉਣ ਦੀ ਸੰਭਾਵਨਾ ਨਹੀਂ ਹੈ ਹਾਲਾਂਕਿ ਮੁੱਖ ਕੋਚ ਰਿੱਕੀ ਪੋਂਟਿੰਗ ਉਨ੍ਹਾਂ ਨੂੰ ਮਨਾਉਣ ਦੀ ਕੋਸ਼ਿਸ਼ ਕਰ ਰਹੇ ਹਨ। ਆਸਟ੍ਰੇਲੀਆ ਦੇ ਜ਼ੇਵੀਅਰ ਬਾਰਟਲੇਟ, ਐਰੋਨ ਹਾਰਡੀ, ਅਫਗਾਨਿਸਤਾਨ ਦੇ ਅਜ਼ਮਤੁੱਲਾ ਉਮਰਜ਼ਈ ਅਤੇ ਦੱਖਣੀ ਅਫਰੀਕਾ ਦੇ ਮਾਰਕੋ ਜੈਨਸਨ ਵਾਪਸੀ ਕਰ ਸਕਦੇ ਹਨ। ਚੇਨਈ ਅਤੇ ਸਨਰਾਈਜ਼ਰਜ਼ ਹੈਦਰਾਬਾਦ ਪਲੇਆਫ ਦੀ ਦੌੜ ਤੋਂ ਬਾਹਰ ਹੋ ਗਏ ਹਨ ਜਦੋਂ ਕਿ ਪੰਜਾਬ ਪਲੇਆਫ ਵਿੱਚ ਪਹੁੰਚ ਸਕਦਾ ਹੈ। ਸਨਰਾਈਜ਼ਰਜ਼ ਤੋਂ ਕਪਤਾਨ ਪੈਟ ਕਮਿੰਸ ਅਤੇ ਟ੍ਰੈਵਿਸ ਹੈੱਡ ਦੀ ਵਾਪਸੀ ਦੀ ਉਮੀਦ ਹੈ।