ਆਸਟ੍ਰੇਲੀਅਨ ਓਪਨ: ਇਗਾ ਸਵੀਆਤੇਕ ਦੀ ਸੰਘਰਸ਼ਪੂਰਨ ਜਿੱਤ

ਮੈਲਬੋਰਨ : ਦੁਨੀਆ ਦੀ ਦੂਜੇ ਨੰਬਰ ਦੀ ਖਿਡਾਰਨ ਇਗਾ ਸਵੀਆਤੇਕ ਨੂੰ ਆਸਟ੍ਰੇਲੀਅਨ ਓਪਨ ਦੇ ਪਹਿਲੇ ਦੌਰ ਵਿੱਚ ਜਿੱਤ ਹਾਸਲ ਕਰਨ ਲਈ ਕਾਫੀ ਪਸੀਨਾ ਵਹਾਉਣਾ ਪਿਆ। ਚੀਨ ਦੀ ਕੁਆਲੀਫਾਇਰ ਖਿਡਾਰਨ ਯੁਆਨ ਯੁਈ, ਜੋ ਕਿ 130ਵੇਂ ਰੈਂਕ 'ਤੇ ਹੈ, ਨੇ ਸਵੀਆਤੇਕ ਨੂੰ ਕਰੜੀ ਟੱਕਰ ਦਿੱਤੀ, ਪਰ ਅੰਤ ਵਿੱਚ ਸਵੀਆਤੇਕ ਨੇ 7-6, 6-3 ਨਾਲ ਮੈਚ ਆਪਣੇ ਨਾਂ ਕਰ ਲਿਆ। ਚਾਰ ਵਾਰ ਦੀ ਫਰੈਂਚ ਓਪਨ ਅਤੇ ਇੱਕ ਵਾਰ ਦੀ ਅਮਰੀਕੀ ਓਪਨ ਜੇਤੂ ਸਵੀਆਤੇਕ ਅਜੇ ਤੱਕ ਮੈਲਬੋਰਨ ਪਾਰਕ ਵਿੱਚ ਖਿਤਾਬ ਨਹੀਂ ਜਿੱਤ ਸਕੀ ਹੈ।

ਮਹਿਲਾ ਵਰਗ ਵਿੱਚ ਹੋਰਨਾਂ ਮੁਕਾਬਲਿਆਂ ਦੌਰਾਨ ਚੌਥੀ ਰੈਂਕਿੰਗ ਵਾਲੀ ਅਮਾਂਡਾ ਐਨੀਸੀਮੋਵਾ ਅਤੇ ਛੇਵੀਂ ਰੈਂਕਿੰਗ ਵਾਲੀ ਜੈਸਿਕਾ ਪੇਗੁਲਾ ਨੇ ਸਿੱਧੇ ਸੈੱਟਾਂ ਵਿੱਚ ਜਿੱਤ ਦਰਜ ਕੀਤੀ। ਇਸ ਦੇ ਨਾਲ ਹੀ ਮਿਰਰਾ ਆਂਦਰੀਵਾ, ਵਿਕਟੋਰੀਆ ਐਮਬੋਕੋ ਅਤੇ ਪਾਉਲਾ ਬਾਡੋਸਾ ਵੀ ਦੂਜੇ ਦੌਰ ਵਿੱਚ ਪਹੁੰਚ ਗਈਆਂ ਹਨ। ਹਾਲਾਂਕਿ, 2020 ਦੀ ਚੈਂਪੀਅਨ ਸੋਫੀਆ ਕੇਨਿਨ ਲਈ ਦਿਨ ਨਿਰਾਸ਼ਾਜਨਕ ਰਿਹਾ ਅਤੇ ਉਹ ਅਮਰੀਕਾ ਦੀ ਪੇਟਨ ਸਟੀਅਰਨਜ਼ ਤੋਂ 3-6, 2-6 ਨਾਲ ਹਾਰ ਕੇ ਟੂਰਨਾਮੈਂਟ ਤੋਂ ਬਾਹਰ ਹੋ ਗਈ।

ਮਰਦਾਂ ਦੇ ਵਰਗ ਵਿੱਚ ਤਿੰਨ ਵਾਰ ਦੇ ਉਪ-ਜੇਤੂ ਦਾਨਿਲ ਮੇਦਵੇਦੇਵ ਨੇ ਜੈਸਪਰ ਡੀ ਜੋਂਗ ਨੂੰ 7-5, 6-2, 7-6 ਨਾਲ ਹਰਾ ਕੇ ਅਗਲੇ ਦੌਰ ਵਿੱਚ ਪ੍ਰਵੇਸ਼ ਕੀਤਾ। ਟੌਮੀ ਪੌਲ ਨੇ ਵੀ ਅਲੈਗਜ਼ੈਂਡਰ ਕੋਵਾਸੇਵਿਚ ਨੂੰ ਸਿੱਧੇ ਸੈੱਟਾਂ ਵਿੱਚ ਮਾਤ ਦਿੱਤੀ। ਦੂਜੇ ਪਾਸੇ, ਸੱਤਵੀਂ ਰੈਂਕਿੰਗ ਵਾਲੇ ਕੈਨੇਡਾ ਦੇ ਫੇਲਿਕਸ ਆਗਰ ਅਲੀਆਸਿਮੇ ਨੂੰ ਮੈਚ ਦੌਰਾਨ ਸੱਟ ਲੱਗਣ ਕਾਰਨ ਵਿਚਾਲੇ ਹੀ ਹਟਣਾ ਪਿਆ, ਜਿਸ ਕਾਰਨ ਪੁਰਤਗਾਲ ਦੇ ਨੁਨੋ ਬੋਰਗੇਸ ਨੂੰ ਜੇਤੂ ਕਰਾਰ ਦਿੱਤਾ ਗਿਆ।

ਵਾਵਰਿੰਕਾ ਦੇ ਆਖਰੀ ਸਫ਼ਰ ਦੀ ਸ਼ੁਰੂਆਤ ਸਵਿਟਜ਼ਰਲੈਂਡ ਦੇ ਦਿੱਗਜ ਖਿਡਾਰੀ ਸਟੈਨ ਵਾਵਰਿੰਕਾ ਨੇ ਲਾਸਲੋ ਜੇਰੇ ਨੂੰ 5-7, 6-3, 6-4, 7-6 ਨਾਲ ਹਰਾ ਕੇ ਜਿੱਤ ਦਰਜ ਕੀਤੀ। ਜ਼ਿਕਰਯੋਗ ਹੈ ਕਿ ਵਾਵਰਿੰਕਾ ਨੇ ਪਿਛਲੇ ਮਹੀਨੇ ਐਲਾਨ ਕੀਤਾ ਸੀ ਕਿ ਇਹ ਉਨ੍ਹਾਂ ਦੇ ਕਰੀਅਰ ਦਾ ਆਖਰੀ ਸੀਜ਼ਨ ਹੋਵੇਗਾ।