ਕੈਸ਼ ਕਾਊਂਟਰ ਖੁੱਲ੍ਹਦੇ ਹੀ ਪਹਿਲੇ ਦਿਨ ਹੁਸ਼ਿਆਰਪੁਰ ਪਾਵਰਕਾਮ ਨੂੰ ਮਿਲਿਆ 69 ਲੱਖ ਦਾ ਰੈਵੇਨਿਊ

ਹੁਸ਼ਿਆਰਪੁਰ (ਅਮਰਿੰਦਰ) - ਕੋਰੋਨਾ ਵਾਇਰਸ ਕਾਰਨ ਬੀਤੀ 23 ਮਾਰਚ ਤੋਂ ਪੂਰੇ 46 ਦਿਨਾਂ ਬਾਅਦ ਸੂਬੇ ਦੇ ਸਾਰੇ ਪਾਵਰਕਾਮ ਦਫਤਰ ਖੁੱਲ੍ਹਣ ’ਤੇ ਸਰਕਾਰ ਵੱਲੋਂ ਸਾਰੇ ਕੈਸ਼ ਕਾਊਂਟਰ ਖੋਲ੍ਹਣ ਦੇ ਨਿਰਦੇਸ਼ ਦੇ ਪਹਿਲੇ ਹੀ ਦਿਨ ਸ਼ੁੱਕਰਵਾਰ ਨੂੰ ਹੁਸ਼ਿਆਰਪੁਰ ਪਾਵਰਕਾਮ ਸਰਕਲ ਨੂੰ 2570 ਬਿਜਲੀ ਖਪਤਕਾਰਾਂ ਦੇ ਜ਼ਰੀਏ 69 ਲੱਖ 8 ਹਜ਼ਾਰ 679 ਰੁਪਏ ਦਾ ਮਾਲੀਆ ਮਿਲਿਆ। ਵਰਨਣਯੋਗ ਹੈ ਕਿ ਸਰਕਾਰ ਵੱਲੋਂ ਲਏ ਗਏ ਫ਼ੈਸਲੇ ਦੇ ਬਾਅਦ ਅੱਜ ਸ਼ੁੱਕਰਵਾਰ ਨੂੰ 46 ਦਿਨ ਬਾਅਦ ਸੂਬੇ ਦੇ ਸਾਰੇ 515 ਕੈਸ਼ ਕਾਊਂਟਰ ਖੋਲ੍ਹਣ ਦੇ ਨਿਰਦੇਸ਼ ਦਿੱਤੇ ਗਏ ਸਨ। ਹੁਸ਼ਿਆਰਪੁਰ ਦੀਆਂ ਸਾਰੀਆਂ ਡਵੀਜ਼ਨਾਂ ਦੇ ਕੈਸ਼ ਕਾਊਂਟਰ ’ਤੇ ਸਵੇਰੇ 9 ਵਜੇ ਤੋਂ ਹੀ ਲੋਕ ਬਿਜਲੀ ਬਿੱਲ ਦੀ ਅਦਾਇਗੀ ਕਰਨ ਲਈ ਪੁੱਜਣ ਲੱਗੇ। ਪਾਵਰਕਾਮ ਕਰਮਚਾਰੀ ਬਿਜਲੀ ਖਪਤਕਾਰਾਂ ਦੇ ਕੈਸ਼ ਕਾਊਂਟਰ ਤੋਂ ਪਹਿਲਾਂ ਹੀ ਦੋਹਾਂ ਹੱਥਾਂ ਨੂੰ ਸੈਨੀਟਾਈਜ਼ ਕਰਨ ਦੇ ਬਾਅਦ ਲਾਈਨ ਵਿਚ ਸੋਸ਼ਲ ਡਿਸਟੈਂਸ ਬਣਾਏ ਰੱਖਣ ਦੀਆਂ ਹਦਾਇਤਾਂ ਦਿੰਦੇ ਵੇਖੇ ਗਏ।

ਬਿੱਲ ਜਮ੍ਹਾ ਕਰਵਾਉਣ ਦੇ ਮਾਮਲੇ ਵਿਚ ਵੀ ਹੁਸ਼ਿਆਰਪੁਰ ਸਰਕਲ ਅੱਵਲ

ਪਾਵਰਕਾਮ ਹੈੱਡਕਵਾਟਰ ਵੱਲੋਂ ਜਾਰੀ ਸੂਚਨਾ ਅਨੁਸਾਰ ਪਾਵਰਕਾਮ ਜਲੰਧਰ ਜ਼ੋਨ ਦੇ ਅਧੀਨ ਆਉਂਦੇ ਹੁਸ਼ਿਆਰਪੁਰ, ਨਵਾਂਸ਼ਹਿਰ, ਕਪੂਰਥਲਾ ਤੇ ਜਲੰਧਰ ਸਰਕਲ ਵਿਚ ਸ਼ੁੱਕਰਵਾਰ ਨੂੰ ਪਹਿਲੇ ਦਿਨ 1 ਕਰੋੜ 90 ਲੱਖ ਰੁਪਏ ਦਾ ਮਾਲੀਆ ਹਾਸਲ ਹੋਇਆ ਹੈ। ਇਸ ਵਿਚ ਸਭ ਤੋਂ ਜ਼ਿਆਦਾ ਮਾਲੀਆ ਹੁਸ਼ਿਆਰਪੁਰ ਪਾਵਰਕਾਮ ਸਰਕਲ ’ਚ 69 ਲੱਖ ਰੁਪਏ ਤੋਂ ਵੀ ਜ਼ਿਆਦਾ ਜਮ੍ਹਾ ਹੋਇਆ ਹੈ। ਜਾਣਕਾਰੀ ਅਨੁਸਾਰ ਜਲੰਧਰ ਸਰਕਲ ਤੋਂ ਪਹਿਲੇ ਦਿਨ 54 ਲੱਖ ਰੁਪਏ, ਕਪੂਰਥਲਾ ਸਰਕਲ ਤੋਂ 38 ਲੱਖ ਰੁਪਏ ਤੇ ਸਭ ਤੋਂ ਘੱਟ ਨਵਾਂਸ਼ਹਿਰ ਸਰਕਲ ਤੋਂ 29 ਲੱਖ ਰੁਪਏ ਜਮ੍ਹਾ ਹੋਏ ਹਨ। ਪਾਵਰਕਾਮ ਹੈੱਡਕਵਾਟਰ ਤੋਂ ਜਾਰੀ ਸੂਚਨਾ ਅਨੁਸਾਰ ਸ਼ਨੀਵਾਰ ਤੇ ਐਤਵਾਰ ਨੂੰ ਕੈਸ਼ ਕਾਊਂਟਰ ਬੰਦ ਰਹਿਣ ਦੇ ਬਾਅਦ ਸੋਮਵਾਰ ਤੋਂ ਪਹਿਲਾਂ ਦੀ ਹੀ ਤਰ੍ਹਾਂ ਸਾਰੇ ਕੈਸ਼ ਕਾਊਂਟਰ ਰੈਗੂਲਰ ਖੁੱਲ੍ਹੇ ਰਹਿਣਗੇ।

ਹੁਸ਼ਿਆਰਪੁਰ ਦੀ ਕਿਸ ਡਵੀਜ਼ਨ ਤੋਂ ਕਿੰਨਾ ਮਿਲਿਆ ਰੈਵੇਨਿਊ 

ਹੁਸ਼ਿਆਰਪੁਰ ਪਾਵਰਕਾਮ ਸਰਕਲ ਦੇ ਡਿਪਟੀ ਚੀਫ ਇੰਜੀਨੀਅਰ ਪੀ. ਐੱਸ. ਖਾਂਬਾ ਨੇ ਦੱਸਿਆ ਕਿ ਸਰਕਾਰੀ ਆਦੇਸ਼ਾਂ ਅਨੁਸਾਰ ਅੱਜ ਹੁਸ਼ਿਆਰਪੁਰ ਪਾਵਰਕਾਮ ਸਰਕਲ ਦੀਆਂ ਸਾਰੀਆਂ 6 ਡਵੀਜ਼ਨਾਂ ਦੇ ਅਧੀਨ ਆਉਂਦੇ ਸਾਰੇ ਕੈਸ਼ ਕਾਊਂਟਰ ਸਵੇਰੇ 9 ਤੋਂ ਲੈ ਕੇ 2 ਵਜੇ ਤੱਕ ਖੋਲ੍ਹ ਦਿੱਤੇ ਗਏ ਸੀ। ਪਹਿਲੇ ਹੀ ਦਿਨ ਸਿਟੀ ਡਵੀਜ਼ਨ ਤੋਂ 432 ਖਪਤਕਾਰਾਂ ਦੇ ਜ਼ਰੀਏ 18,97,979 ਰੁਪਏ, ਸਬ ਅਰਬਨ ਡਵੀਜ਼ਨ ਦੇ 302 ਖਪਤਕਾਰਾਂ ਦੇ ਜ਼ਰੀਏ 7,25,967 ਰੁਪਏ, ਦਸੂਹਾ ਡਵੀਜ਼ਨ ਦੇ 359 ਖਪਤਕਾਰਾਂ ਦੇ ਜ਼ਰੀਏੇ 10,31,000 ਰੁਪਏ, ਮੁਕੇਰੀਆਂ ਡਵੀਜ਼ਨ ਦੇ 520 ਖਪਤਕਾਰਾਂ ਦੇ ਜ਼ਰੀਏ 9,43,116 ਰੁਪਏ, ਭੋਗਪੁਰ ਡਵੀਜ਼ਨ ਦੇ 694 ਖਪਤਕਾਰਾਂ ਦੇ ਜ਼ਰੀਏ 16,03,117 ਰੁਪਏ ਅਤੇ ਮਾਹਿਲਪੁਰ ਡਵੀਜ਼ਨ ਦੇ 263 ਖਪਤਕਾਰਾਂ ਦੇ ਜ਼ਰੀਏ 7,07,500 ਰੁਪਏ, ਕੁੱਲ 2570 ਬਿਜਲੀ ਖ਼ਪਤਕਾਰਾਂ ਤੋਂ ਹੁਸ਼ਿਆਰਪੁਰ ਪਾਵਰਕਾਮ ਸਰਕਲ ਨੂੰ ਪਹਿਲੇ ਹੀ ਦਿਨ 69,08,679 ਰੁਪਏ ਦਾ ਰੈਵੇਨਿਊ ਹਾਸਲ ਹੋਇਆ ਹੈ। ਉਨ੍ਹਾਂ ਨੇ ਦੱਸਿਆ ਕਿ ਪਹਿਲਾਂ ਹੀ ਦਿਨ ਚੈੱਕ ਦੇ ਜ਼ਰੀਏ 18,92,821 ਰੁਪਏ ਮਿਲੇ ਤੇ ਕੈਸ਼ ਦੇ ਜ਼ਰੀਏ 50,15,858 ਰੁਪਏ ਜਮ੍ਹਾ ਹੋਏ ਹਨ।