ਦੀਪ ਢਿੱਲੋਂ ਦਾ ਬੇਬਾਕ ਇੰਟਰਵਿਊ: ਧਰਮਿੰਦਰ, ਵਰਿੰਦਰ, ਯੋਗਰਾਜ ਤੇ ਗੁੱਗੂ ਗਿੱਲ ਦੇ ਦੌਰ ਦੇ ਸੁਣੋ ਅਣਸੁਣੇ ਕਿੱਸੇ

ਜਲੰਧਰ- ਆਪਣੀ ਦਮਦਾਰ ਆਵਾਜ਼ ਕਾਰਨ ਵੱਡੀ ਪਛਾਣ ਬਣਾਉਣ ਵਾਲੇ ਭਾਰਤੀ ਸਿਨੇਮਾ ਅਤੇ ਪੰਜਾਬੀ ਫਿਲਮ ਇੰਡਸਟਰੀ ਦੇ ਦਿੱਗਜ ਅਦਾਕਾਰ ਦੀਪ ਢਿੱਲੋਂ ਨੇ ਹਾਲ ਹੀ 'ਚ ਜਗ ਬਾਣੀ ਦੀ ਸੀਨੀਅਰ ਪੱਤਰਕਾਰ ਰਮਨਦੀਪ ਸਿੰਘ ਸੋਢੀ ਨਾਲ ਇਕ ਵਿਸ਼ੇਸ਼ ਇੰਟਰਵਿਊ ਕੀਤੀ।  ਇੰਟਰਵਿਊ ਦੌਰਾਨ ਦੀਪ ਢਿੱਲੋਂ ਨੇ ਆਪਣੀ ਜ਼ਿੰਦਗੀ ਦੇ ਕਈ ਦਿਲਚਸਪ ਕਿੱਸੇ ਸਾਂਝੇ ਕੀਤੇ ਹਨ। ਪੱਟੀ ਦੇ ਖੇਤਾਂ ਤੋਂ ਲੈ ਕੇ ਮੁੰਬਈ ਦੀਆਂ ਰੰਗੀਨੀਆਂ ਤੱਕ ਦਾ ਉਨ੍ਹਾਂ ਦਾ ਸਫ਼ਰ ਕਿਸੇ ਫਿਲਮੀ ਕਹਾਣੀ ਤੋਂ ਘੱਟ ਨਹੀਂ ਹੈ।

ਖੇਤਾਂ ਤੋਂ ਰੰਗਮੰਚ ਤੱਕ ਦਾ ਸਫ਼ਰ 
ਦੀਪ ਢਿੱਲੋਂ ਨੇ ਦੱਸਿਆ ਕਿ ਉਨ੍ਹਾਂ ਦਾ ਪਿਛੋਕੜ ਕੋਈ ਫਿਲਮੀ ਨਹੀਂ ਸੀ। ਉਹ 5-6 ਕਿਲੋ ਦੁੱਧ ਪੀਣ ਵਾਲੇ ਅਤੇ 100-112 ਕਿੱਲੋ ਦਾ ਭਾਰ ਚੁੱਕਣ ਵਾਲੇ ਇਕ ਖਾਲਸ ਮਝੈਲ ਹਨ, ਜੋਕਿ ਖੇਤੀਬਾੜੀ ਅਤੇ ਖੇਡਾਂ (ਕਬੱਡੀ ਤੇ ਕੁਸ਼ਤੀ) ਨਾਲ ਜੁੜੇ ਹੋਏ ਸਨ। ਦੀਪ ਸਿੰਘ ਢਿੱਲੋਂ ਨੇ ਦੱਸਿਆ ਕਿ ਉਨ੍ਹਾਂ ਨੂੰ ਅਦਾਕਾਰੀ ਦੀ ਚਿਣਗ ਪੱਟੀ ਦੀ ਰਾਮਲੀਲਾ ਤੋਂ ਲੱਗੀ, ਜਿੱਥੋਂ ਉਹ ਅੰਮ੍ਰਿਤਸਰ ਅਤੇ ਪਟਿਆਲਾ ਦੇ ਥੀਏਟਰ ਤੱਕ ਪਹੁੰਚੇ। ਉਨ੍ਹਾਂ ਆਪਣਾ ਇਕ ਕਿੱਸਾ ਸਾਂਝਾ ਕਰਦੇ ਦੱਸਿਆ ਕਿ ਕਿਵੇਂ ਇਕ ਨਾਟਕ ਦੌਰਾਨ ਸਟੇਜ 'ਤੇ ਉਨ੍ਹਾਂ ਦੀ ਪੱਗ ਲੱਥ ਗਈ ਸੀ ਪਰ ਉਨ੍ਹਾਂ ਨੇ ਹਿੰਮਤ ਨਾ ਹਾਰੀ ਅਤੇ ਪੱਗ ਨੂੰ ਮੰਡਾਸੇ ਵਾਂਗ ਲਪੇਟ ਕੇ 15 ਮਿੰਟ ਦੀ ਸਪੀਚ ਪੂਰੀ ਕੀਤੀ।

ਇਹ ਵੀ ਪੜ੍ਹੋ: ਪੰਜਾਬ ਵਾਸੀਆਂ ਲਈ ਖ਼ਤਰੇ ਦੀ ਘੰਟੀ! ਪੌਂਗ ਡੈਮ ਦੇ ਖੋਲ੍ਹੇ ਫਲੱਡ ਗੇਟ, BBMB ਦੀ ਵੱਡੀ ਚਿਤਾਵਨੀ

'ਮਹਾਂਭਾਰਤ' ਤੋਂ ਮਿਲੀ ਵੱਖਰੀ ਪਛਾਣ ਅਤੇ ਬਾਲੀਵੁੱਡ 'ਚ ਦਿੱਤੀ ਦਸਤਕ 
ਦੀਪ ਸਿੰਘ ਢਿੱਲੋਂ ਲਈ ਮੁੰਬਈ ਜਾਣ ਦਾ ਫ਼ੈਸਲਾ ਅਚਨਚੇਤ ਸੀ। ਗੱਲਬਾਤ ਦੌਰਾਨ ਉਨ੍ਹਾਂ ਦੱਸਿਆ ਕਿ ਅਨੁਪਮ ਖੇਰ ਵਰਗੇ ਅਦਾਕਾਰਾਂ ਦੀ ਇਕ ਵਰਕਸ਼ਾਪ ਲਈ ਉਹ 60 ਕਿੱਲੋ ਦਾ ਆਪਣਾ ਵੇਟ-ਲਿਫਟਿੰਗ ਦਾ ਸਾਮਾਨ ਲੈ ਕੇ ਮੁੰਬਈ ਪਹੁੰਚੇ ਸਨ। ਬੀ. ਆਰ. ਚੋਪੜਾ ਦੇ ਮਸ਼ਹੂਰ ਸੀਰੀਅਲ 'ਮਹਾਂਭਾਰਤ' 'ਚ ਜੈਦਰਥ ਦੇ ਕਿਰਦਾਰ ਨੇ ਉਨ੍ਹਾਂ ਨੂੰ ਘਰ-ਘਰ 'ਚ ਪਛਾਣ ਦਿਵਾਈ। ਇਸ ਤੋਂ ਇਲਾਵਾ 'ਘਾਇਲ' ਅਤੇ 'ਘਾਤਕ' ਵਰਗੀਆਂ ਫਿਲਮਾਂ ਉਨ੍ਹਾਂ ਦੇ ਕਰੀਅਰ 'ਚ ਮੀਲ ਪੱਥਰ ਸਾਬਤ ਹੋਈਆਂ।

ਧਰਮਿੰਦਰ ਅਤੇ ਅਮਰੀਸ਼ ਪੁਰੀ ਨਾਲ ਰਿਸ਼ਤੇ 
ਦਿਲਚਸਪ ਕਿੱਸੇ ਸਾਂਝੀ ਕਰਦੇ ਹੋਏ ਦੀਪ ਢਿੱਲੋਂ ਨੇ ਦੱਸਿਆ ਕਿ ਉਨ੍ਹਾਂ ਦੇ ਧਰਮਿੰਦਰ ਦਿਓਲ ਨਾਲ ਬਹੁਤ ਨਿੱਘੇ ਸਬੰਧ ਰਹੇ ਹਨ। ਉਨ੍ਹਾਂ ਨੇ ਦੱਸਿਆ ਕਿ ਉਹ ਭਾਜੀ (ਧਰਮਿੰਦਰ) ਨਾਲ ਇੱਕੋ ਕਮਰੇ 'ਚ ਰਹੇ ਅਤੇ ਉਨ੍ਹਾਂ ਦੀ ਮਾਲਿਸ਼ ਵੀ ਕਰਦੇ ਰਹੇ ਸਨ। ਇਸੇ ਤਰ੍ਹਾਂ ਅਦਾਕਾਰ ਅਮਰੀਸ਼ ਪੁਰੀ ਨਾਲ ਉਨ੍ਹਾਂ ਦੀ ਆਵਾਜ਼ ਦੀ ਤੁਲਨਾ ਅਕਸਰ ਕੀਤੀ ਜਾਂਦੀ ਸੀ। ਉਨ੍ਹਾਂ ਦੱਸਿਆ ਕਿ ਅਮਰੀਸ਼ ਪੁਰੀ ਨੇ ਖ਼ੁਦ ਰਾਤ ਦੇ ਡੇਢ ਵਜੇ ਫੋਨ ਕਰਕੇ ਉਨ੍ਹਾਂ ਦੀ ਫਿਲਮ 'ਅਸਾਂ ਨੂੰ ਮਾਣ ਵਤਨਾਂ ਦਾ' 'ਚ ਕੀਤੀ ਅਦਾਕਾਰੀ ਦੀ ਤਾਰੀਫ਼ ਕੀਤੀ ਸੀ।

ਇਹ ਵੀ ਪੜ੍ਹੋ: ਪੰਜਾਬ: ਘਰੇਲੂ ਗੈਸ ਸਿਲੰਡਰ ਖ਼ਪਤਕਾਰਾਂ ਲਈ ਨਵੀਂ ਮੁਸੀਬਤ! 45 ਦਿਨ...

ਪੰਜਾਬੀ ਸਿਨੇਮਾ ਅਤੇ ਸਰਦਾਰੀ ਦਾ ਮਾਣ 
ਬਾਲੀਵੁੱਡ 'ਚ ਸਰਦਾਰਾਂ ਦੇ ਕਿਰਦਾਰਾਂ ਬਾਰੇ ਬੋਲਦੇ ਦੀਪ ਢਿੱਲੋਂ ਨੇ ਕਿਹਾ ਕਿ ਹਿੰਦੀ ਫਿਲਮਾਂ 'ਚ ਅਕਸਰ ਸਰਦਾਰਾਂ ਦਾ ਮਜ਼ਾਕ ਉਡਾਇਆ ਜਾਂਦਾ ਰਿਹਾ ਹੈ ਅਤੇ ਪੱਗਾਂ ਸਹੀ ਤਰੀਕੇ ਨਾਲ ਨਹੀਂ ਬੰਨ੍ਹੀਆਂ ਜਾਂਦੀਆਂ ਸਨ। ਉਨ੍ਹਾਂ ਨੇ ਮਨਮੋਹਨ ਸਿੰਘ ਦੀ ਫਿਲਮ 'ਜੀ ਆਇਆਂ ਨੂੰ' ਦੀ ਸ਼ਲਾਘਾ ਕੀਤੀ, ਜਿਸ ਨੇ ਪੰਜਾਬੀ ਸਿਨੇਮਾ ਨੂੰ ਮੁੜ ਸੁਰਜੀਤ ਕੀਤਾ ਅਤੇ ਸਰਦਾਰਾਂ ਦੀ ਇਕ ਸਹੀ ਤੇ ਸ਼ਾਨਦਾਰ ਤਸਵੀਰ ਪੇਸ਼ ਕੀਤੀ।

ਅੱਜ ਦੇ ਦੌਰ 'ਚ ਦੀਪ ਢਿੱਲੋਂ ਆਪਣੀ ਜ਼ਿੰਦਗੀ ਤੋਂ ਪੂਰੀ ਤਰ੍ਹਾਂ ਸੰਤੁਸ਼ਟ ਹਨ। ਉਹ ਮੁੰਬਈ ਦੀਆਂ ਪਾਰਟੀਆਂ ਤੋਂ ਦੂਰ ਰਹਿਣਾ ਪਸੰਦ ਕਰਦੇ ਹਨ ਅਤੇ ਅੱਜ ਵੀ ਆਪਣੀ ਸਿਹਤ ਅਤੇ ਪਰਿਵਾਰ ਨੂੰ ਤਰਜੀਹ ਦਿੰਦੇ ਹਨ। ਉਨ੍ਹਾਂ ਦਾ ਕਹਿਣਾ ਹੈ ਕਿ ਉਹ ਕੋਈ 'ਵਿਲਨ' ਨਹੀਂ ਸਗੋਂ ਇਕ 'ਕਰੈਕਟਰ ਐਕਟਰ' ਹਨ ਅਤੇ ਉਹ ਅੱਜ ਵੀ ਘੋੜੇ ਵਰਗੀ ਜਾਨ ਰੱਖਦੇ ਹਨ।

ਇਹ ਵੀ ਪੜ੍ਹੋ: ਵੱਡੀ ਖ਼ਬਰ: ਪੰਜਾਬ 'ਚ ਕਰੋੜਾਂ ਦੀ ਹੈਰੋਇਨ, 8 ਪਿਸਤੌਲਾਂ ਤੇ 12.95 ਲੱਖ ਨਕਦੀ ਸਣੇ 9 ਮੁਲਜ਼ਮ ਗ੍ਰਿਫ਼ਤਾਰ

ਜਗ ਬਾਣੀ ਈ-ਪੇਪਰ ਨੂੰ ਪੜ੍ਹਨ ਅਤੇ ਐਪ ਨੂੰ ਡਾਊਨਲੋਡ ਕਰਨ ਲਈ ਇੱਥੇ ਕਲਿੱਕ ਕਰੋ

For Android:- https://play.google.com/store/apps/details?id=com.jagbani&hl=en

For IOS:- https://itunes.apple.com/in/app/id538323711?mt=8