ਅਧਿਆਪਕ ਬਣਨ ਦੇ ਚਾਹਵਾਨਾਂ ਲਈ ਵੱਡੀ ਖ਼ਬਰ: ਇਸ ਮਹੀਨੇ ਹੋਵੇਗਾ CTET ਦਾ ਪੇਪਰ

ਲੁਧਿਆਣਾ (ਵਿੱਕੀ) - ਸੈਂਟਰਲ ਬੋਰਡ ਆਫ ਸੈਕੰਡਰੀ ਐਜੂਕੇਸ਼ਨ ਨੇ ਸੀ. ਟੀ. ਈ. ਟੀ. ਫਰਵਰੀ 2026 ਦਾ ਅਧਿਕਾਰਤ ਨੋਟੀਫਿਕੇਸ਼ਨ ਜਾਰੀ ਕਰ ਦਿੱਤਾ ਹੈ, ਜਿਸ ਨਾਲ ਦੇਸ਼ ਭਰ ਵਿਚ ਅਧਿਆਪਕ ਬਣਨ ਦੀ ਤਿਆਰੀ ਕਰ ਰਹੇ ਉਮੀਦਵਾਰਾਂ ਲਈ ਇਹ ਸਾਲ ਦਾ ਸਭ ਤੋਂ ਮਹੱਤਵਪੂਰਨ ਮੌਕਾ ਬਣ ਗਿਆ ਹੈ। ਨੋਟੀਫਿਕੇਸ਼ਨ ctet.nic.in ’ਤੇ ਉਪਲੱਬਧ ਹੈ ਅਤੇ ਇੱਛੁਕ ਕੈਂਡੀਡੇਟ ਹੁਣ ਨਿਰਧਾਰਤ ਪ੍ਰਕਿਰਿਆ ਰਾਹੀਂ ਅਪਲਾਈ ਕਰ ਸਕਦੇ ਹਨ। ਅਰਜ਼ੀ ਦੇਣ ਦੀ ਆਖਰੀ ਤਰੀਕ 18 ਦਸੰਬਰ ਤੈਅ ਕੀਤੀ ਗਈ ਹੈ। ਇਸ ਲਈ ਉਮੀਦਵਾਰਾਂ ਲਈ ਨਿਰਧਾਰਿਤ ਸਮੇਂ ਵਿਚ ਫਾਰਮ ਭਰਨਾ ਜ਼ਰੂਰੀ ਹੈ। ਪ੍ਰੀਖਿਆ 8 ਫਰਵਰੀ 2016 ਨੂੰ ਹੋਵੇਗੀ।

ਸੀ. ਟੀ. ਈ. ਟੀ. ਉਨ੍ਹਾਂ ਨੌਜਵਾਨਾਂ ਲਈ ਜ਼ਰੂਰੀ ਪਾਤਰਤਾ ਪ੍ਰੀਖਿਆ ਹੈ, ਜੋ ਪਹਿਲੀ ਤੋਂ 8ਵੀਂ ਕਲਾਸ ਤੱਕ ਪੜ੍ਹਾਉਣ ਦਾ ਨਿਸ਼ਾਨਾ ਰੱਖਦੇ ਹਨ। ਕੇ. ਵੀ. ਐੱਸ., ਐੱਨ. ਵੀ. ਐੱਸ. ਅਤੇ ਵੱਖ-ਵੱਖ ਪ੍ਰਾਈਵੇਟ ਸਕੂਲਾਂ ਵਿਚ ਅਧਿਆਪਕ ਅਹੁਦੇ ਦੇ ਲਈ ਸੀ. ਟੀ. ਈ. ਟੀ. ਕੁਆਲੀਫਾਈ ਕਰਨਾ ਇਕ ਮਹੱਤਵਪੂਰਨ ਪਾਤਰਤਾ ਮੰਨੀ ਜਾਂਦੀ ਹੈ। ਪ੍ਰੀਖਿਆ ਪਾਸ ਕਰਨ ਤੋਂ ਬਾਅਦ ਉਮੀਦਵਾਰ ਸਰਕਾਰੀ ਅਤੇ ਨਿੱਜੀ ਦੋਵੇਂ ਅਦਾਰਿਆਂ ’ਚ ਅਧਿਆਪਕ ਅਹੁਦਿਆਂ ਲਈ ਅਪਲਾਈ ਕਰਨ ਦੇ ਯੋਗ ਹੋ ਜਾਂਦੇ ਹਨ।

ਪੇਪਰ-1 ਅਤੇ ਪੇਪਰ-2 ਦਾ ਪੈਟਰਨ
ਪੇਪਰ-1 ਪਹਿਲੀ ਤੋਂ 5ਵੀਂ ਕਲਾਸ ਤੱਕ ਪੜ੍ਹਾਉਣ ਦੇ ਇੱਛੁਕ ਕੈਂਡੀਡੇਟਾਂ ਲਈ ਹੈ। ਇਸ ਦੇ ਲਈ 12ਵੀਂ ਦੇ ਨਾਲ 2 ਸਾਲ ਡੀ. ਐੱਲ. ਐੱਡ. ਜਾਂ ਬੀ. ਐੱਲ. ਐੱਡ. ਵਰਗੀ ਯੋਗਤਾ ਜ਼ਰੂਰੀ ਹੈ। ਪੇਪਰ-2 6ਵੀਂ ਤੋਂ 8ਵੀਂ ਕਲਾਸ ਦੇ ਲਈ ਹੈ, ਜਿਸ ਵਿਚ ਸਨਾਤਕ ਦੇ ਨਾਲ ਬੀ. ਐੱਡ. ਜਾਂ 4 ਸਾਲਾਂ ਬੀ. ਏ./ਬੀ. ਐੱਸ. ਸੀ. ਐੱਡ ਯੋਗਤਾ ਮੰਗੀ ਜਾਂਦੀ ਹੈ। ਦੋਵੇਂ ਪੇਪਰ ਢਾਈ ਘੰਟੇ ਦੇ ਹੁੰਦੇ ਹਨ। ਕੁੱਲ 150 ਪ੍ਰਸ਼ਨ ਪੁੱਛੇ ਜਾਂਦੇ ਹਨ ਅਤੇ ਇਨ੍ਹਾਂ ’ਚ ਨੈਗੇਟਿਵ ਮਾਰਕਿੰਗ ਨਹੀਂ ਹੁੰਦੀ।

ਇਹ ਹੈ ਕ੍ਰਾਈਟੇਰੀਆ
ਆਮ ਵਰਗ ਦੇ ਡੈਂਡੀਡੇਟਾਂ ਨੂੰ 60 ਫੀਸਦੀ ਅੰਕ ਮਤਲਬ 150 ’ਚੋਂ 90 ਅੰਕ ਪ੍ਰਾਪਤ ਕਰਨੇ ਹੁੰਦੇ ਹਨ। ਓ. ਬੀ. ਸੀ., ਐੱਸ. ਸੀ. ਅਤੇ ਐੱਸ. ਟੀ. ਵਰਗ ਦੇ ਲਈ ਲਗਭਗ 55 ਫੀਸਦੀ ਮਤਲਬ 82.5 ਅੰਕ ਕਾਫੀ ਮੰਨੇ ਜਾਂਦੇ ਹਨ। ਪੇਪਰ-1 ਵਿਚ ਚਾਈਲਡ, ਸਾਈਕੋਲੋਜੀ, ਭਾਸ਼ਾ, ਗਣਿਤ ਅਤੇ ਵਾਤਾਵਰਣ ਅਧਿਐਨ ਸ਼ਾਮਲ ਹੁੰਦੇ ਹਨ, ਜਦੋਂਕਿ ਪੇਪਰ-2 ਵਿਚ ਬਾਲ ਵਿਕਾਸ, ਭਾਸ਼ਾ ਕੌਸ਼ਲ, ਗਣਿਤ-ਵਿਗਿਆਨ ਜਾਂ ਸਮਾਜਿਕ ਅਧਿਐਨ ਨਾਲ ਜੁੜੇ ਪ੍ਰਸ਼ਨ ਪੁੱਛੇ ਜਾਂਦੇ ਹਨ।