ਪੰਜਾਬ ''ਚ ਨਰਮੇ ਦੀ ਬਿਜਾਈ ਨੂੰ ਲੈ ਕੇ ਖੁੱਲ੍ਹੀ ਖੇਤੀ ਮਹਿਕਮੇ ਦੀ ਪੋਲ

ਬਠਿੰਡਾ(ਵੈੱਬ ਡੈਸਕ) : ਪੰਜਾਬ 'ਚ ਨਰਮੇ ਦੀ ਬਿਜਾਈ ਨੂੰ ਲੈ ਕੇ ਖੇਤੀ ਮਹਿਕਮੇ ਵੱਲੋਂ ਕੀਤੇ ਗਏ ਦਾਅਵੇ ਦੀ ਬੀਜ ਕੰਪਨੀਆਂ ਦੇ ਅਫਸਰਾਂ ਨੇ ਪੋਲ ਖੋਲ੍ਹ ਦਿੱਤੀ ਹੈ। ਵਿਭਾਗ ਦਾ ਕਹਿਣਾ ਹੈ ਕਿ ਪੰਜਾਬ ਵਿਚ ਐਤਕੀਂ 4.01 ਲੱਖ ਹੈਕਟੇਅਰ (ਕਰੀਬ 10 ਲੱਖ ਏਕੜ) 'ਚ ਨਰਮੇ ਦੀ ਬਿਜਾਂਦ ਹੋਈ ਹੈ। 'ਪੰਜਾਬੀ ਟ੍ਰਿਬਿਊਨ' ਨੂੰ ਜੋ ਖੇਤੀ ਮਹਿਕਮੇ ਵੱਲੋਂ ਬੀਟੀ ਬੀਜਾਂ ਦੀ ਵਿਕਰੀ ਦੀ ਸੂਚੀ ਦਿੱਤੀ ਗਈ, ਉਸ ਅਨੁਸਾਰ ਪੰਜਾਬ ਵਿਚ 20.06 ਲੱਖ ਪੈਕੇਟਾਂ ਦੀ ਵਿਕਰੀ ਹੋਈ ਹੈ। ਪ੍ਰਤੀ ਏਕੜ ਵਿਚ ਨਰਮੇ ਦੀ ਬਿਜਾਂਦ 'ਚ ਢਾਈ ਪੈਕੇਟ ਬੀਜ ਪੈਂਦੇ ਹਨ ਜਿਸ ਦਾ ਮਤਲਬ ਹੈ ਕਿ ਪੰਜਾਬ ਵਿਚ 8.02 ਲੱਖ ਏਕੜ (3.20 ਲੱਖ ਹੈਕਟੇਅਰ) 'ਚ ਬਿਜਾਈ ਹੋਈ ਹੈ। ਮਹਿਕਮੇ ਦੀ ਬੀਜ ਵਿਕਰੀ ਸੂਚੀ ਸਿੱਧੇ ਤੌਰ 'ਤੇ ਹੀ 80 ਹਜ਼ਾਰ ਹੈਕਟੇਅਰ ਦਾ ਝੂਠ ਫੜ ਗਈ ਹੈ।

ਖੇਤੀ ਮਹਿਕਮੇ ਦੀ ਸੂਚੀ ਅਨੁਸਾਰ ਪੰਜਾਬ ਵਿਚ ਸਭ ਤੋਂ ਵੱਧ ਰਾਸ਼ੀ ਕੰਪਨੀ ਦਾ ਬੀਜ ਵਿਕਿਆ ਜੋ ਕਿ 12.59 ਲੱਖ ਪੈਕੇਟ ਹੈ। ਰਾਸ਼ੀ ਕੰਪਨੀ ਦੇ ਸੀਨੀਅਰ ਅਧਿਕਾਰੀ ਵਰਿੰਦਰ ਸਿੰਘ ਮਾਨ ਨਾਲ ਗੱਲ ਕੀਤੀ ਗਈ ਤਾਂ ਉਨ੍ਹਾਂ ਦੱਸਿਆ ਕਿ ਪੰਜਾਬ ਵਿਚ ਰਾਸ਼ੀ ਕੰਪਨੀ ਦਾ 12.30 ਲੱਖ ਪੈਕੇਟ ਸੇਲ ਹੋਇਆ ਹੈ। ਇਵੇਂ ਹੀ 'ਯੂਐੱਸ ਐਗਰੀ' ਕੰਪਨੀ ਦਾ ਮਹਿਕਮੇ ਨੇ 2.70 ਲੱਖ ਪੈਕਟ ਵਿਕਿਆ ਦੱਸਿਆ ਹੈ ਜਦਕਿ ਇਸ ਕੰਪਨੀ ਦੇ ਅਧਿਕਾਰੀ ਰਾਜੀਵ ਕੁਮਾਰ ਨੇ ਦੱਸਿਆ ਕਿ ਪੰਜਾਬ ਵਿਚ ਉਨ੍ਹਾਂ ਨੇ 2.35 ਲੱਖ ਪੈਕੇਟ ਵੇਚਿਆ ਹੈ। ਖੇਤੀ ਮਹਿਕਮੇ ਨੇ 'ਬਾਯਰ' ਕੰਪਨੀ ਦੇ 1.59 ਲੱਖ ਪੈਕਟ ਵਿਕੇ ਦਿਖਾਏ ਹਨ ਜਦਕਿ ਇਸ ਕੰਪਨੀ ਦੇ ਜੋਤੀ ਮਿਸ਼ਰਾ ਦਾ ਕਹਿਣਾ ਸੀ ਕਿ ਉਨ੍ਹਾਂ ਦੇ ਪੰਜਾਬ 'ਚ 1.25 ਲੱਖ ਪੈਕਟ ਵਿਕੇ ਹਨ।

ਇਸੇ ਤਰ੍ਹਾਂ ਮਹਿਕਮੇ ਨੇ 'ਨਿਊਜੀਵਿਡੂ' ਕੰਪਨੀ ਦੇ 92,916 ਪੈਕੇਟ ਬੀਜਾਂ ਦੀ ਵਿਕਰੀ ਦਿਖਾਈ ਹੈ ਜਦ ਕਿ ਇਸ ਕੰਪਨੀ ਦੇ ਨਰਿੰਦਰ ਕੰਬੋਜ ਦਾ ਕਹਿਣਾ ਸੀ ਕਿ ਉਨ੍ਹਾਂ ਦੀ ਕੰਪਨੀ ਦੇ ਪੰਜਾਬ ਵਿਚ 81 ਹਜ਼ਾਰ ਪੈਕੇਟ ਵਿਕੇ ਹਨ। ਬੀਜ ਵਿਕਰੀ ਦੀ ਸੂਚੀ ਵਿਚ ਮਹਿਕਮੇ ਨੇ ਸ੍ਰੀ ਰਾਮ ਕੰਪਨੀ ਦੇ ਬੀਜਾਂ ਦੀ ਵਿਕਰੀ ਦਾ ਅੰਕੜਾ ਦੋ-ਦੋ ਵਾਰੀ ਦੇ ਦਿੱਤਾ ਹੈ। ਇਸ ਕੰਪਨੀ ਨੇ 10,400 ਪੈਕੇਟ ਵੇਚਿਆ ਹੈ ਜਦਕਿ ਮਹਿਕਮੇ ਨੇ 21,142 ਹੋਰ ਪੈਕਟਾਂ ਦਾ ਅੰਕੜਾ ਵਧਾ ਦਿੱਤਾ। ਜੇ.ਕੇ. ਸੀਡਜ਼ ਦੀ ਡਬਲ ਐਂਟਰੀ ਪਾ ਕੇ 11 ਹਜ਼ਾਰ ਪੈਕਟਾਂ ਦੀ ਗਿਣਤੀ ਵਧਾ ਦਿੱਤੀ ਗਈ ਹੈ। ਮਹਿਕਮੇ ਨੇ 69,300 ਪੈਕਟਾਂ ਨੂੰ ਅਦਰਜ਼ ਕੈਟਾਗਿਰੀ ਵਿਚ ਪਾ ਰੱਖਿਆ ਹੈ ਜਿਸ ਦਾ ਸਰੋਤ ਨਹੀਂ ਦੱਸਿਆ ਗਿਆ।

ਪੜਤਾਲ ਕਰਨ 'ਤੇ 2.05 ਲੱਖ ਪੈਕੇਟਾਂ ਦੀ ਵਿਕਰੀ ਬੋਗਸ ਦਿਖਾਈ ਗਈ ਸਾਹਮਣੇ ਆਈ ਹੈ। ਅੰਦਾਜ਼ੇ ਅਨੁਸਾਰ ਹਕੀਕਤ ਵਿਚ ਪੰਜਾਬ ਵਿਚ ਨਰਮੇ ਦੀ ਬਿਜਾਂਦ ਕਰੀਬ 2.90 ਲੱਖ ਹੈਕਟੇਅਰ ਦੇ ਕਰੀਬ ਹੀ ਹੋਈ ਹੈ ਜਦਕਿ ਖੇਤੀ ਮਹਿਕਮਾ 4.01 ਲੱਖ ਹੈਕਟੇਅਰ ਬਿਜਾਈ ਦੀ ਗੱਲ ਆਖ ਰਿਹਾ ਹੈ। ਬੀ.ਕੇ.ਯੂ (ਉਗਰਾਹਾਂ) ਦੇ ਜ਼ਿਲ੍ਹਾ ਪ੍ਰਧਾਨ ਸ਼ਿੰਗਾਰਾ ਸਿੰਘ ਮਾਨ ਕਹਿਣਾ ਸੀ ਕਿ ਖੇਤੀ ਮਹਿਕਮਾ ਧਰਾਤਲ 'ਤੇ ਕੰਮ ਨਹੀਂ ਕਰਦਾ ਅਤੇ ਅੰਕੜਿਆਂ ਨੂੰ ਘੁਮਾ ਕੇ ਖੇਤਾਂ ਵਿਚ ਟੀਂਡੇ ਲੱਗੇ ਦਿਖਾ ਰਿਹਾ ਹੈ ਜਿਸ ਦੀ ਜਾਂਚ ਹੋਣੀ ਚਾਹੀਦੀ ਹੈ।

ਬਠਿੰਡਾ 'ਚ ਬਿਜਾਈ ਨੱਬੇ ਹਜ਼ਾਰ ਹੈਕਟੇਅਰ, ਦਿਖਾਈ 1.40 ਲੱਖ ਹੈਕਟੇਅਰ
ਬਠਿੰਡਾ ਜ਼ਿਲ੍ਹੇ ਵਿਚ 1.40 ਲੱਖ ਹੈਕਟੇਅਰ ਰਕਬੇ ਵਿਚ ਨਰਮੇ ਦੀ ਬਿਜਾਂਦ ਦਿਖਾਈ ਗਈ ਹੈ ਜਦਕਿ ਹਕੀਕਤ ਵਿਚ ਰਕਬਾ 90 ਹਜ਼ਾਰ ਹੈਕਟੇਅਰ ਦੇ ਆਸ-ਪਾਸ ਹੈ। ਜ਼ਿਲ੍ਹਾ ਖੇਤੀ ਅਫ਼ਸਰ ਗੁਰਦਿੱਤਾ ਸਿੰਘ ਦਾ ਕਹਿਣਾ ਸੀ ਕਿ ਪ੍ਰਤੀ ਏਕੜ ਪਿੱਛੇ 2 ਤੋਂ ਢਾਈ ਪੈਕੇਟ ਬੀਜ ਪੈਂਦਾ ਹੈ ਅਤੇ ਬਠਿੰਡਾ ਜ਼ਿਲ੍ਹੇ ਵਿਚ ਕਰੀਬ 11 ਹਜ਼ਾਰ ਹੈਕਟੇਅਰ ਰਕਬਾ ਕਰੰਡ ਵੀ ਹੋਇਆ ਹੈ। ਵੇਰਵਿਆਂ ਅਨੁਸਾਰ ਪਿਛਲੇ ਵਰ੍ਹੇ ਰਕਬਾ 2.74 ਲੱਖ ਹੈਕਟੇਅਰ ਸੀ ਅਤੇ ਉਸ ਤੋਂ ਪਹਿਲਾਂ 2.91 ਲੱਖ ਹੈਕਟੇਅਰ ਰਕਬਾ ਸੀ। ਪੰਜਾਬ ਵਿਚ ਕਿਸੇ ਸਮੇਂ ਸੱਤ ਲੱਖ ਹੈਕਟੇਅਰ ਰਕਬੇ ਵਿਚ ਨਰਮੇ ਦੀ ਬਿਜਾਂਦ ਰਹੀ ਹੈ।

ਸੈਟੇਲਾਈਟ ਰਿਪੋਰਟ ਲੈ ਰਹੇ ਹਾਂ: ਪੰਨੂ 
ਖੇਤੀ ਮਹਿਕਮੇ ਦੇ ਸਕੱਤਰ ਕਾਹਨ ਸਿੰਘ ਪੰਨੂ ਨੇ ਕਿਹਾ ਕਿ ਥੋੜ੍ਹੇ ਦਿਨਾਂ ਤੱਕ ਨਰਮੇ ਦੀ ਬਿਜਾਂਦ ਬਾਰੇ ਸੈਟੇਲਾਈਟ (ਰਿਮੋਟ ਸੈਂਸਿੰਗ) ਰਿਪੋਰਟ ਆ ਜਾਣੀ ਹੈ। ਇਸ ਨਾਲ ਸੱਚ ਸਾਹਮਣੇ ਆ ਜਾਵੇਗਾ। ਖੇਤੀ ਮਹਿਕਮੇ ਦੇ ਡਾਇਰੈਕਟਰ ਸੁਤੰਤਰ ਐਰੀ ਨੇ 4.01 ਲੱਖ ਹੈਕਟੇਅਰ ਵਿਚ ਨਰਮੇ ਦੀ ਬਿਜਾਈ ਦੀ ਗੱਲ ਆਖੀ ਅਤੇ ਦੱਸਿਆ ਕਿ ਇੱਕ ਏਕੜ ਵਿਚ ਦੋ ਪੈਕੇਟ ਬੀਜ ਪੈਂਦਾ ਹੈ। ਉਨ੍ਹਾਂ ਕਿਹਾ ਕਿ ਜ਼ਿਲ੍ਹਾ ਖੇਤੀ ਅਫ਼ਸਰਾਂ ਤੋਂ ਇਹ ਰਿਪੋਰਟ ਪ੍ਰਾਪਤ ਹੋਈ ਸੀ ਤੇ ਹੁਣ ਉਹ ਕਿਸਾਨ ਵਾਈਜ਼ ਸਰਵੇਖਣ ਕਰ ਰਹੇ ਹਨ। ਉਹ ਬੀਜਾਂ ਦੀ ਵਿਕਰੀ ਤੇ ਰਕਬੇ ਵਿਚਲੇ ਫ਼ਰਕ ਬਾਰੇ ਸਪੱਸ਼ਟ ਨਾ ਦੱਸ ਸਕੇ।