ਆਰ. ਪੀ. ਐੱਲ. ਕ੍ਰਿਕਟ ਟੂਰਨਾਮੈਂਟ ਪਠਾਨਕੋਟ ਨੇ ਜਿੱਤਿਆ

ਅੰਮ੍ਰਿਤਸਰ (ਨਿਤਿਨ)-ਰੋਟਰੀ ਪ੍ਰੀਮੀਅਰ ਲੀਗ (ਆਰ. ਪੀ. ਐੱਲ.) ਕ੍ਰਿਕਟ ਟੂਰਨਾਮੈਂਟ ਅੱਜ ਸਫਲਤਾਪੂਰਵਕ ਸੰਪੰਨ ਹੋ ਗਿਆ। ਫਾਈਨਲ ਮੈਚ ਗਾਂਧੀ ਗਰਾਊਂਡ ਕ੍ਰਿਕਟ ਸਟੇਡੀਅਮ ’ਚ ਪਠਾਨਕੋਟ ਤੇ ਜਲੰਧਰ ਦੀ ਟੀਮ ’ਚ ਖੇਡਿਆ ਗਿਆ, ਜਿਸ ਵਿਚ ਜਲੰਧਰ ਦੀ ਟੀਮ ਨੇ ਟਾਸ ਜਿੱਤ ਕੇ ਪਠਾਨਕੋਟ ਨੂੰ ਪਹਿਲਾਂ ਬੱਲੇਬਾਜ਼ੀ ਕਰਨ ਦਾ ਸੱਦਾ ਦਿੱਤਾ, ਜੋ ਕਿ ਉਸ ਲਈ ਬੇਹੱਦ ਨੁਕਸਾਨਦਾਇਕ ਸਾਬਿਤ ਹੋਇਆ। ਪਠਾਨਕੋਟ ਦੀ ਟੀਮ ਨੇ ਨਿਤਿਨ (64) ਤੇ ਬਾਗ ਦੀਆਂ 62 ਦੌੜਾਂ ਦੀ ਬਦੌਲਤ 20 ਓਵਰਾਂ ’ਚ 2 ਵਿਕਟ ਗੁਆ ਕੇ 216 ਦੌੜਾਂ ਦਾ ਵਿਸ਼ਾਲ ਸਕੋਰ ਖਡ਼੍ਹਾ ਕਰ ਦਿੱਤਾ, ਜਿਸ ਤੋਂ ਬਾਅਦ ਬੱਲੇਬਾਜ਼ੀ ਕਰਨ ਉੱਤਰੀ ਜਲੰਧਰ ਦੀ ਟੀਮ ਦੇ ਕਪਤਾਨ ਪ੍ਰਭਪਾਲ ਸਿੰਘ ਨੇ ਚੰਗੀ ਪਾਰੀ ਖੇਡਦਿਆਂ 28 ਗੇਂਦਾਂ ’ਤੇ 4 ਛੱਕਿਆਂ ਤੇ 5 ਚੌਕਿਆਂ ਦੀ ਮਦਦ ਨਾਲ ਅਜੇਤੂ 55 ਦੌੜਾਂ ਬਣਾਈਆਂ ਤਾਂ ਉਥੇ ਹੀ ਦੂਜੇ ਪਾਸੇ ਰਾਹੁਲ ਨੇ 15 ਗੇਂਦਾਂ ’ਤੇ 28 ਦੌੜਾਂ ਦੀ ਪਾਰੀ ਖੇਡੀ। ਇਸ ਤਰ੍ਹਾਂ ਟੀਮ ਦੇ ਹੋਰ ਬੱਲੇਬਾਜ਼ਾਂ ਨੇ ਵੀ ਆਪਣਾ ਪੂਰਾ ਯੋਗਦਾਨ ਦਿੱਤਾ। ਫਾਈਨਲ ਮੈਚ ਅੰਤ ’ਚ ਰੋਮਾਂਚਕ ਭਰੀ ਹਾਲਤ ’ਚ ਪੁੱਜ ਗਿਆ। ਅਖਰੀਲੇ ਓਵਰ ’ਚ ਜਲੰਧਰ ਨੇ 24 ਦੌੜਾਂ ਬਣਾਉਣੀਆਂ ਸਨ। ਅਖੀਰ ਪਠਾਨਕੋਟ ਦੀ ਟੀਮ ਨੇ 19 ਦੌੜਾਂ ਨਾਲ ਮੈਚ ਜਿੱਤ ਕੇ ਟੂਰਨਾਮੈਂਟ ਆਪਣੇ ਨਾਂ ਕਰ ਲਿਆ। ਪਠਾਨਕੋਟ ਦੇ ਗੁਲਸ਼ਨ ਨੂੰ ਜਿਥੇ ਮੈਨ ਆਫ ਦਿ ਮੈਚ ਚੁਣਿਆ ਗਿਆ, ਉਥੇ ਹੀ 2 ਮੈਚਾਂ ’ਚ 50 ਦੌੜਾਂ ਦੀਆਂ ਪਾਰੀਆਂ ਖੇਡਣ ਲਈ ਮੈਨ ਆਫ ਦਿ ਸੀਰੀਜ਼ ਦਾ ਖਿਤਾਬ ਵੀ ਉਨ੍ਹਾਂ ਦੀ ਝੋਲੀ ’ਚ ਪਾਇਆ ਗਿਆ। ਅੰਮ੍ਰਿਤਸਰ ਜ਼ੋਨ ਦੇ ਕੋਆਰਡੀਨੇਟਰ ਐਡਵੋਕੇਟ ਐੱਸ. ਐੱਸ. ਬੱਤਰਾ ਨੇ ਕਿਹਾ ਕਿ ਇਹ ਕ੍ਰਿਕਟ ਟੂਰਨਾਮੈਂਟ ਅਮਿਟ ਯਾਦਾਂ ਛੱਡਦਾ ਖਤਮ ਹੋਇਆ। ਰੋਟਰੀ ਡਿਸਟ੍ਰਿਕਟ 3070 ’ਚ ਅਗਲੇ ਸਮੇਂ ਦੌਰਾਨ ਵੀ ਅਜਿਹੇ ਟੂਰਨਾਮੈਂਟ ਦਾ ਪ੍ਰਬੰਧ ਕੀਤਾ ਜਾਵੇਗਾ।