ਕਿੰਨਰ ਕਿਉਂ ਕਰਦੇ ਹਨ ਇਕ ਰਾਤ ਲਈ ਵਿਆਹ? ਜਾਣੋ ਇਸ ਦੇ ਪਿੱਛੇ ਦੀ ਪੂਰੀ ਕਥਾ

ਨੈਸ਼ਨਲ ਡੈਸਕ - ਹਿੰਦੂ ਸਮਾਜ 'ਚ ਕਿੰਨਰਾਂ ਨੂੰ ਹਮੇਸ਼ਾ ਇਕ ਵਿਸ਼ੇਸ਼ ਸਥਾਨ ਦਿੱਤਾ ਗਿਆ ਹੈ ਅਤੇ ਉਨ੍ਹਾਂ ਨੂੰ ਅਧਿਆਤਮਿਕ ਤੇ ਦੈਵੀ ਸ਼ਕਤੀਆਂ ਨਾਲ ਜੋੜ ਕੇ ਦੇਖਿਆ ਜਾਂਦਾ ਹੈ। ਕਿੰਨਰ ਭਾਈਚਾਰੇ ਨਾਲ ਜੁੜੀਆਂ ਕਈ ਪਰੰਪਰਾਵਾਂ ਅਕਸਰ ਲੋਕਾਂ ਲਈ ਉਤਸੁਕਤਾ ਦਾ ਵਿਸ਼ਾ ਬਣੀਆਂ ਰਹਿੰਦੀਆਂ ਹਨ। ਅਜਿਹੀ ਹੀ ਇੱਕ ਹੈਰਾਨੀਜਨਕ ਪਰੰਪਰਾ ਹੈ 'ਇਕ ਰਾਤ ਦਾ ਵਿਆਹ', ਜੋ ਮੁੱਖ ਤੌਰ 'ਤੇ ਤਾਮਿਲਨਾਡੂ 'ਚ ਇਕ ਤਿਉਹਾਰ ਵਜੋਂ ਮਨਾਈ ਜਾਂਦੀ ਹੈ।

ਭਗਵਾਨ ਅਰਾਵਨ ਨਾਲ ਰਚਾਇਆ ਜਾਂਦਾ ਹੈ ਵਿਆਹ 
ਸਰੋਤਾਂ ਅਨੁਸਾਰ, ਤਾਮਿਲਨਾਡੂ ਦੇ ਇਕ ਪਿੰਡ 'ਚ ਕਿੰਨਰ ਬੜੀ ਧੂਮਧਾਮ ਨਾਲ ਭਗਵਾਨ ਅਰਾਵਨ ਨਾਲ ਇਕ ਰਾਤ ਲਈ ਵਿਆਹ ਕਰਦੇ ਹਨ। ਭਗਵਾਨ ਅਰਾਵਨ ਨੂੰ ਕਿੰਨਰਾਂ ਦਾ ਦੇਵਤਾ ਮੰਨਿਆ ਜਾਂਦਾ ਹੈ। ਦੱਸਿਆ ਜਾਂਦਾ ਹੈ ਕਿ ਅਰਾਵਨ ਮਹਾਂਭਾਰਤ ਦੇ ਮਹਾਨ ਯੋਧੇ ਅਰਜੁਨ ਅਤੇ ਨਾਗ ਕੰਨਿਆ ਉਲੂਪੀ ਦੇ ਪੁੱਤਰ ਸਨ।

ਕੀ ਹੈ ਇਸ ਦੇ ਪਿੱਛੇ ਦੀ ਪੌਰਾਣਿਕ ਕਥਾ?
ਇਸ ਪਰੰਪਰਾ ਦੇ ਪਿੱਛੇ ਮਹਾਂਭਾਰਤ ਕਾਲ ਦੀ ਇਕ ਦਿਲਚਸਪ ਕਥਾ ਜੁੜੀ ਹੋਈ ਹੈ। ਮਾਨਤਾ ਹੈ ਕਿ ਮਹਾਂਭਾਰਤ ਦੇ ਯੁੱਧ ਤੋਂ ਪਹਿਲਾਂ ਪਾਂਡਵਾਂ ਨੇ ਮਾਂ ਕਾਲੀ ਨੂੰ ਪ੍ਰਸੰਨ ਕਰਨ ਲਈ ਇਕ ਰਾਜਕੁਮਾਰ ਦੀ ਬਲੀ ਦੇਣੀ ਸੀ। ਜਦੋਂ ਕੋਈ ਤਿਆਰ ਨਹੀਂ ਹੋਇਆ, ਤਾਂ ਅਰਾਵਨ ਨੇ ਖੁਦ ਬਲੀ ਦੇਣ ਦੀ ਇੱਛਾ ਜਤਾਈ, ਪਰ ਉਨ੍ਹਾਂ ਨੇ ਇਕ ਸ਼ਰਤ ਰੱਖੀ ਕਿ ਉਹ ਬਿਨਾਂ ਵਿਆਹ ਕੀਤੇ ਬਲੀ ਨਹੀਂ ਦੇਣਗੇ।

ਸਮੱਸਿਆ ਇਹ ਸੀ ਕਿ ਕੋਈ ਵੀ ਕੰਨਿਆ ਅਜਿਹੇ ਵਿਅਕਤੀ ਨਾਲ ਵਿਆਹ ਕਰਨ ਨੂੰ ਤਿਆਰ ਨਹੀਂ ਸੀ ਜਿਸ ਨੇ ਅਗਲੇ ਹੀ ਦਿਨ ਮਰ ਜਾਣਾ ਹੋਵੇ। ਅਜਿਹੀ ਸਥਿਤੀ 'ਚ, ਭਗਵਾਨ ਕ੍ਰਿਸ਼ਨ ਨੇ 'ਮੋਹਿਨੀ' ਦਾ ਰੂਪ ਧਾਰਨ ਕੀਤਾ ਅਤੇ ਅਰਾਵਨ ਨਾਲ ਵਿਆਹ ਕਰਵਾਇਆ। ਅਗਲੇ ਦਿਨ ਅਰਾਵਨ ਦੀ ਬਲੀ ਤੋਂ ਬਾਅਦ ਭਗਵਾਨ ਕ੍ਰਿਸ਼ਨ ਨੇ ਵਿਧਵਾ ਦੇ ਰੂਪ 'ਚ ਸ਼ੋਕ ਵੀ ਮਨਾਇਆ ਸੀ।

ਕੂਵਗਮ ਤਿਉਹਾਰ 'ਚ ਮਨਾਈ ਜਾਂਦੀ ਹੈ ਇਹ ਪਰੰਪਰਾ
ਇਸੇ ਪੌਰਾਣਿਕ ਕਥਾ ਨੂੰ ਯਾਦ ਕਰਦਿਆਂ, ਕਿੰਨਰ ਭਾਈਚਾਰਾ ਹਰ ਸਾਲ ਕੂਵਗਮ ਤਿਉਹਾਰ ਦੌਰਾਨ ਪ੍ਰਤੀਕਾਤਮਕ ਵਿਆਹ ਕਰਦਾ ਹੈ। ਇਸ ਉਤਸਵ 'ਚ ਕਿੰਨਰ ਇਕ ਰਾਤ ਲਈ ਅਰਾਵਨ ਦੇ ਨਾਮ ਦਾ ਸ਼ਿੰਗਾਰ ਕਰਦੇ ਹਨ ਅਤੇ ਵਿਆਹ ਕਰਵਾਉਂਦੇ ਹਨ। ਅਗਲੇ ਦਿਨ, ਉਹ ਅਰਾਵਨ ਦੀ ਮੌਤ ਦੇ ਪ੍ਰਤੀਕ ਵਜੋਂ ਆਪਣੀਆਂ ਚੂੜੀਆਂ ਤੋੜ ਦਿੰਦੇ ਹਨ ਅਤੇ ਇੱਕ ਵਿਧਵਾ ਦੀ ਤਰ੍ਹਾਂ ਸ਼ੋਕ ਮਨਾਉਂਦੇ ਹਨ।

ਇਹ ਪਰੰਪਰਾ ਨਾ ਸਿਰਫ਼ ਉਨ੍ਹਾਂ ਦੀ ਡੂੰਘੀ ਆਸਥਾ ਨੂੰ ਦਰਸਾਉਂਦੀ ਹੈ, ਸਗੋਂ ਕਿੰਨਰਾਂ ਨੂੰ ਭਗਵਾਨ ਦੇ ਵਿਸ਼ੇਸ਼ ਸਰੂਪ ਵਜੋਂ ਮਾਨਤਾ ਦੇਣ ਵਾਲੀਆਂ ਪ੍ਰਾਚੀਨ ਮਾਨਤਾਵਾਂ ਨੂੰ ਵੀ ਤਾਜ਼ਾ ਕਰਦੀ ਹੈ।