ਸ਼ੁਭ ਦਿਨ ਦੀ ਉਡੀਕ

ਕੇਂਦਰੀ ਮੰਤਰੀ ਮੰਡਲ ’ਚ ਫੇਰਬਦਲ ਹੁਣ ਇਕ ਸਿਆਸੀ ਅਭਿਆਸ ਘੱਟ ਤੇ ਸਹੀ ਸਮੇਂ ਦੀ ਭਾਲ ਵੱਧ ਹੋ ਸਕਦਾ ਹੈ। ਅਟਕਲਾਂ ਲਗਾਤਾਰ ਜਾਰੀ ਹਨ, ਇਸ ਲਈ ਸਿਆਸੀ ਹਲਕੇ ਹੁਣ ਨਰਾਤਿਆਂ ਦੌਰਾਨ ਇਕ ਸੰਭਾਵਿਤ ਮਿਤੀ ’ਤੇ ਧਿਆਨ ਕੇਂਦ੍ਰਿਤ ਕਰ ਰਹੇ ਹਨ।

ਮਾਹਿਰਾਂ ਅਨੁਸਾਰ ਜੇ ਨਰਾਤਿਆਂ ਦੌਰਾਨ ਵੀ ਫੇਰਬਦਲ ਨਹੀਂ ਕੀਤਾ ਜਾਂਦਾ ਤਾਂ ਫਿਰ ਨਵੰਬਰ ਤੱਕ ਅਜਿਹੇ ਵੱਡੇ ਸਿਆਸੀ ਕਦਮ ਲਈ ਕੋਈ ਸ਼ੁਭ ਸਮਾਂ ਨਹੀਂ ਹੋਵੇਗਾ। ਇਸ ਨੇ ਮੋਦੀ ਨੂੰ ਇਕ ਅਜੀਬ ਦੁਬਿਧਾ ’ਚ ਪਾ ਦਿੱਤਾ ਹੈ: ਹੁਣੇ ਫੇਰਬਦਲ ਕਰੋ ਜਾਂ ਸਿਤਾਰਿਆਂ ਦੇ ਸਾਥ ਦੀ ਉਡੀਕ ਕਰੋ।

ਸਿਆਸੀ ਗਣਿਤ ਪਹਿਲਾਂ ਹੀ ਕਾਫ਼ੀ ਉਲਝਿਆ ਹੋਇਆ ਹੈ। ਮੰਤਰੀਆਂ ਨੂੰ ਹਟਾਉਣ ਤੇ ਨਵੇਂ ਚਿਹਰੇ ਜੋੜਨ ਦੀ ਲੋੜ ਹੈ, ਸੂਬਿਆਂ ਤੇ ਸਮਾਜਿਕ ਸਮੀਕਰਨਾਂ ਨੂੰ ਸੰਤੁਲਿਤ ਕਰਨ ਦੀ ਲੋੜ ਹੈ, ਸਹਿਯੋਗੀਆਂ ਨੂੰ ਸ਼ਾਮਲ ਕਰਨ ਦੀ ਲੋੜ ਹੈ। ਨਾਲ ਹੀ ਚੋਣਾਂ ਦੇ ਹਿਸਾਬ-ਕਿਤਾਬ ਨੂੰ ਵੀ ਧਿਆਨ ’ਚ ਰੱਖਣ ਦੀ ਲੋੜ ਹੈ।

ਪਰ ਇਕ ਹੋਰ ਸਿਧਾਂਤ ਵੀ ਹੈ। ਸ਼ਾਇਦ ਦੇਰੀ ਇਸ ਲਈ ਨਹੀਂ ਹੈ ਕਿ ਪ੍ਰਧਾਨ ਮੰਤਰੀ ਨੇ ਆਪਣਾ ਮਨ ਨਹੀਂ ਬਣਾਇਆ ਸਗੋਂ ਇਸ ਲਈ ਹੈ ਕਿਉਂਕਿ ਉਹ ਇਸ ਦਾ ਐਲਾਨ ਕਰਨ ਲਈ ਇਕ ਸ਼ੁਭ ਮਿਤੀ ਦੀ ਭਾਲ ਕਰ ਰਹੇ ਹਨ। ਜੇ ਹੁਣ ਨਹੀਂ ਤਾਂ ਮੰਤਰੀਆਂ ਨੂੰ ਨਰਾਤਿਆਂ ਦੇ ਸਮੇਂ ਨੂੰ ਛੱਡ ਕੇ ਲੱਗਭਗ 2 ਮਹੀਨਿਆਂ ਦੀ ਅਚਾਨਕ ਰਾਹਤ ਮਿਲ ਸਕਦੀ ਹੈ।

ਇਸ ਵੇਲੇ ਦਿੱਲੀ ਦੇ ਸਿਆਸੀ ਜੋਤਸ਼ੀ ਵੀ ਇਸ ਦੇ ਸਿਆਸੀ ਰਣਨੀਤੀਕਾਰਾਂ ਵਾਂਗ ਅਹਿਮ ਹੋ ਗਏ ਹਨ। ਮੋਦੀ ਮੰਤਰੀ ਮੰਡਲ ’ਚ ਅਗਲਾ ਫੇਰਬਦਲ ਸਿਰਫ਼ ਗਿਣਤੀ ’ਤੇ ਨਹੀਂ, ਸਗੋਂ ਸਿਤਾਰਿਆਂ ’ਤੇ ਵੀ ਨਿਰਭਰ ਕਰ ਸਕਦਾ ਹੈ। ਇਸ ਮੁੱਦੇ ’ਤੇ ਅੰਤਿਮ ਸ਼ਬਦ ਅਜੇ ਲਿਖੇ ਜਾਣੇ ਬਾਕੀ ਹਨ।