ਪੁਲਾੜ ਵੱਲ ਇਕ ਹੋਰ ਵੱਡੀ ਪੁਲਾਂਘ ਲਈ ਤਿਆਰ ਹੋਇਆ ਭਾਰਤ ! ISRO ਨੇ ਸਾਂਝੀ ਕੀਤੀ ਤਸਵੀਰ

ਨਵੀਂ ਦਿੱਲੀ- ਭਾਰਤੀ ਪੁਲਾੜ ਖੋਜ ਸੰਗਠਨ (ਇਸਰੋ) ਨੇ ਸ਼ੁੱਕਰਵਾਰ ਨੂੰ ਇੱਥੇ ਸ਼ੁਰੂ ਹੋਏ ਦੋ-ਰੋਜ਼ਾ ਰਾਸ਼ਟਰੀ ਪੁਲਾੜ ਦਿਵਸ ਸਮਾਰੋਹ ਦੌਰਾਨ ਭਾਰਤੀ ਅੰਤਰਿਕਸ਼ ਸਟੇਸ਼ਨ (ਬੀਏਐੱਸ) ਮਾਡਿਊਲ ਦੇ ਇਕ ਮਾਡਲ ਦਾ ਪਰਦਾਫਾਸ਼ ਕੀਤਾ। ਭਾਰਤ 2028 ਤੱਕ ਆਪਣੇ ਸਵੈ-ਨਿਰਮਿਤ ਪੁਲਾੜ ਸਟੇਸ਼ਨ, ਬੀਏਐੱਸ ਦੇ ਪਹਿਲੇ ਮਾਡਿਊਲ ਨੂੰ ਲਾਂਚ ਕਰਨ ਦੀ ਯੋਜਨਾ ਬਣਾ ਰਿਹਾ ਹੈ। ਇਸ ਨਾਲ ਭਾਰਤ ਉਨ੍ਹਾਂ ਦੇਸ਼ਾਂ ਦੇ ਚੁਨਿੰਦੇ ਸਮੂਹ 'ਚ ਸ਼ਾਮਲ ਹੋ ਜਾਵੇਗਾ ਜੋ ਔਰਬਿਟਲ ਪ੍ਰਯੋਗਸ਼ਾਲਾਵਾਂ ਚਲਾਉਂਦੇ ਹਨ। ਮੌਜੂਦਾ ਸਮੇਂ 2 ਔਰਬਿਟਲ ਪ੍ਰਯੋਗਸ਼ਾਲਾਵਾਂ ਹਨ- ਅੰਤਰਰਾਸ਼ਟਰੀ ਪੁਲਾੜ ਸਟੇਸ਼ਨ ਜੋ 5 ਪੁਲਾੜ ਏਜੰਸੀਆਂ ਦੁਆਰਾ ਸੰਚਾਲਿਤ ਹੈ ਅਤੇ ਚੀਨ ਦਾ ਤਿਆਨਗੋਂਗ ਪੁਲਾੜ ਸਟੇਸ਼ਨ।

ਪੁਲਾੜ ਖੇਤਰ ਲਈ ਆਪਣੀਆਂ ਮਹੱਤਵਪੂਰਨ ਯੋਜਨਾਵਾਂ ਦੇ ਹਿੱਸੇ ਵਜੋਂ, ਭਾਰਤ 2035 ਤੱਕ ਭਾਰਤੀ ਪੁਲਾੜ ਸਟੇਸ਼ਨ ਦੇ 5 ਮਾਡਿਊਲ ਸਥਾਪਤ ਕਰਨ ਦੀ ਯੋਜਨਾ ਬਣਾ ਰਿਹਾ ਹੈ। ਬੀਏਐੱਸ-01 ਮਾਡਿਊਲ ਦਾ ਭਾਰ 10 ਟਨ ਹੋਣ ਦੀ ਉਮੀਦ ਹੈ ਅਤੇ ਇਸ ਨੂੰ ਧਰਤੀ ਤੋਂ 450 ਕਿਲੋਮੀਟਰ ਉੱਪਰ, ਧਰਤੀ ਦੇ ਹੇਠਲੇ ਔਰਬਿਟ 'ਚ ਸਥਾਪਤ ਕੀਤਾ ਜਾਵੇਗਾ। ਇਸ ਦੀਆਂ ਮੁੱਖ ਵਿਸ਼ੇਸ਼ਤਾਵਾਂ 'ਚ ਸਵਦੇਸ਼ੀ ਤੌਰ 'ਤੇ ਵਿਕਸਿਤ ਵਾਤਾਵਰਣ ਕੰਟਰੋਲ ਅਤੇ ਜੀਵਨ ਸਹਾਇਤਾ ਪ੍ਰਣਾਲੀ (ECLSS), ਭਾਰਤ ਡੌਕਿੰਗ ਪ੍ਰਣਾਲੀ, ਭਾਰਤ ਬਰਥਿੰਗ ਵਿਧੀ, ਆਟੋਮੇਟਿਡ ਹੈਚ ਪ੍ਰਣਾਲੀ, ਮਾਈਕ੍ਰੋਗ੍ਰੈਵਿਟੀ ਖੋਜ ਅਤੇ ਤਕਨਾਲੋਜੀ ਪ੍ਰਦਰਸ਼ਨ ਲਈ ਪਲੇਟਫਾਰਮ, ਵਿਗਿਆਨਕ ਇਮੇਜਿੰਗ ਅਤੇ ਚਾਲਕ ਦਲ ਦੇ ਮਨੋਰੰਜਨ ਲਈ ਵਿਊਪੋਰਟ ਸ਼ਾਮਲ ਹਨ। ਭਾਰਤੀ ਪੁਲਾੜ ਸਟੇਸ਼ਨ 'ਚ ਪ੍ਰੋਪਲਸ਼ਨ ਅਤੇ ECLSS ਤਰਲ ਰੀਫਿਲਿੰਗ, ਰੇਡੀਏਸ਼ਨ, ਥਰਮਲ ਅਤੇ ਮਾਈਕ੍ਰੋਮੀਟੀਓਰੋਇਡ ਔਰਬਿਟਲ ਮਲਬਾ (MMOD) ਸੁਰੱਖਿਆ, ਸਪੇਸ ਸੂਟ, ਆਦਿ ਵੀ ਹੋਣਗੇ।

BAS ਤੋਂ ਪੁਲਾੜ, ਜੀਵਨ ਵਿਗਿਆਨ, ਦਵਾਈ ਅਤੇ ਅੰਤਰ-ਗ੍ਰਹਿ ਖੋਜ ਦੇ ਵੱਖ-ਵੱਖ ਪਹਿਲੂਆਂ ਦਾ ਅਧਿਐਨ ਕਰਨ ਲਈ ਇਕ ਖੋਜ ਪਲੇਟਫਾਰਮ ਵਜੋਂ ਕੰਮ ਕਰਨ ਦੀ ਉਮੀਦ ਹੈ। ਇਹ ਮਨੁੱਖੀ ਸਿਹਤ 'ਤੇ ਮਾਈਕ੍ਰੋਗ੍ਰੈਵਿਟੀ ਦੇ ਪ੍ਰਭਾਵਾਂ ਅਤੇ ਪੁਲਾੜ 'ਚ ਲੰਬੇ ਸਮੇਂ ਦੀ ਮਨੁੱਖੀ ਮੌਜੂਦਗੀ ਲਈ ਲੋੜੀਂਦੀਆਂ ਟੈਸਟ ਤਕਨਾਲੋਜੀਆਂ ਦਾ ਅਧਿਐਨ ਕਰਨ ਦਾ ਮੌਕਾ ਪ੍ਰਦਾਨ ਕਰੇਗਾ। ਪੁਲਾੜ ਸਟੇਸ਼ਨ ਪੁਲਾੜ ਸੈਰ-ਸਪਾਟੇ ਨੂੰ ਉਤਸ਼ਾਹਿਤ ਕਰੇਗਾ ਅਤੇ ਭਾਰਤ ਇਸ ਔਰਬਿਟਲ ਪ੍ਰਯੋਗਸ਼ਾਲਾ ਦੇ ਸਰੋਤਾਂ ਦਾ ਲਾਭ ਉਠਾ ਕੇ ਵਪਾਰਕ ਪੁਲਾੜ ਖੇਤਰ 'ਚ ਪ੍ਰਵੇਸ਼ ਕਰੇਗਾ। BAS ਚੱਲ ਰਹੇ ਅੰਤਰਰਾਸ਼ਟਰੀ ਸਹਿਯੋਗ 'ਚ ਯੋਗਦਾਨ ਪਾਵੇਗਾ ਅਤੇ ਵਿਗਿਆਨਕ ਖੋਜ ਲਈ ਇਕ ਕੇਂਦਰ ਵਜੋਂ ਕੰਮ ਕਰੇਗਾ ਅਤੇ ਨੌਜਵਾਨ ਪੀੜ੍ਹੀ ਨੂੰ ਪੁਲਾੜ ਵਿਗਿਆਨ ਅਤੇ ਤਕਨਾਲੋਜੀ 'ਚ ਕਰੀਅਰ ਬਣਾਉਣ ਲਈ ਪ੍ਰੇਰਿਤ ਕਰੇਗਾ। BAS-01 ਦਾ ਵਿਸ਼ਾਲ 3.8 ਮੀਟਰ ਗੁਣਾ 8 ਮੀਟਰ ਮਾਡਲ ਇੱਥੇ ਭਾਰਤ ਮੰਡਪਮ ਵਿਖੇ ਰਾਸ਼ਟਰੀ ਪੁਲਾੜ ਦਿਵਸ ਸਮਾਰੋਹ 'ਚ ਮੌਜੂਦ ਲੋਕਾਂ 'ਚ ਖਿੱਚ ਦਾ ਕੇਂਦਰ ਰਿਹਾ।

ਜਗਬਾਣੀ ਈ-ਪੇਪਰ ਨੂੰ ਪੜ੍ਹਨ ਅਤੇ ਐਪ ਨੂੰ ਡਾਊਨਲੋਡ ਕਰਨ ਲਈ ਇੱਥੇ ਕਲਿੱਕ ਕਰੋ 

For Android:-  https://play.google.com/store/apps/details?id=com.jagbani&hl=en 

For IOS:-  https://itunes.apple.com/in/app/id538323711?mt=8