ਇਨਫਲੂਐਂਜ਼ਾ ਨੇ ਵਧਾਈ ਟੈਨਸ਼ਨ, ਫਲੂ ਵੈਕਸੀਨ ਦੀ ਮੰਗ ’ਚ ਜ਼ਬਰਦਸਤ ਉਛਾਲ

ਨਵੀਂ ਦਿੱਲੀ - ਦੇਸ਼ ਦੇ ਕਈ ਹਿੱਸਿਆਂ ਵਿਚ ਇਨਫਲੂਐਂਜ਼ਾ ਅਤੇ ਖਾਸ ਕਰ ਕੇ ਐੱਚ-1-ਐੱਨ-1 ਦੇ ਵਧਦੇ ਮਾਮਲਿਆਂ ਦਰਮਿਆਨ ਫਲੂ ਵੈਕਸੀਨ ਦੀ ਮੰਗ ਵਿਚ ਅਚਾਨਕ ਤੇਜ਼ ਉਛਾਲ ਆਇਆ ਹੈ। ਲੋਕ ਹੁਣ ਹਸਪਤਾਲਾਂ ਅਤੇ ਕਲੀਨਿਕਾਂ ਤੋਂ ਇਲਾਵਾ ਡਿਜੀਟਲ ਸਿਹਤ ਪਲੇਟਫਾਰਮਾਂ ਰਾਹੀਂ ਘਰ ਬੈਠੇ ਵੈਕਸੀਨ ਲਗਵਾਉਣ ਅਤੇ ਫਲੂ ਦੀ ਜਾਂਚ ਕਰਵਾਉਣ ਨੂੰ ਪਹਿਲ ਦੇ ਰਹੇ ਹਨ। ਸਿਹਤ ਖੇਤਰ ਨਾਲ ਜੁੜੇ ਲੋਕਾਂ ਮੁਤਾਬਕ ਇਸ ਸਾਲ ਫਲੂ ਵੈਕਸੀਨ ਦੀ ਮੰਗ ਪਿਛਲੇ ਸਾਲ ਦੀ ਇਸੇ ਮਿਆਦ ਦੇ ਮੁਕਾਬਲੇ ਲਗਭਗ ਤਿੰਨ ਗੁਣਾ ਤੱਕ ਪਹੁੰਚ ਗਈ ਹੈ।

ਐੱਚ-1-ਐੱਨ-1 ਦੇ ਮਾਮਲਿਆਂ ’ਚ 6 ਗੁਣਾ ਤੱਕ ਵਾਧਾ
ਇਸ ਮੰਗ ਵਿਚ ਤੇਜ਼ੀ ਦੀ ਵੱਡੀ ਵਜ੍ਹਾ ਇਸ ਮਾਨਸੂਨ ਸੀਜ਼ਨ ਵਿਚ ਐੱਚ-1-ਐੱਨ-1 ਦੇ ਮਾਮਲਿਆਂ ਵਿਚ ਹੋਇਆ ਵਾਧਾ ਦੱਸੀ ਜਾ ਰਹੀ ਹੈ। ਰਿਪੋਰਟ ਮੁਤਾਬਕ ਪਿਛਲੇ ਸਾਲਾਂ ਦੀ ਤੁਲਨਾ ਵਿਚ ਇਸ ਵਾਰ ਐੱਚ-1-ਐੱਨ-1 ਦੇ ਮਾਮਲੇ ਲਗਭਗ 6 ਗੁਣਾ ਵਧੇ ਹਨ। ਇਸ ਕਾਰਨ ਆਮ ਲੋਕਾਂ ਦੇ ਨਾਲ-ਨਾਲ ਕੰਪਨੀਆਂ ਅਤੇ ਸੰਸਥਾਵਾਂ ਨੇ ਵੀ ਕਰਮਚਾਰੀਆਂ ਲਈ ਫਲੂ ਤੋਂ ਬਚਾਅ ਦੇ ਉਪਾਵਾਂ ’ਤੇ ਧਿਆਨ ਦੇਣਾ ਸ਼ੁਰੂ ਕੀਤਾ ਹੈ। ਟਾਟਾ 1 ਐੱਮ. ਜੀ. ਦੀ ਵਾਈਸ ਪ੍ਰੈਜ਼ੀਡੈਂਟ ਅਤੇ ਸਪੈਸ਼ਲਿਟੀ ਫਾਰਮੇਸੀ ਦੀ ਮੁਖੀ ਮਨੀਸ਼ਾ ਮਿਸ਼ਰਾ ਮੁਤਾਬਕ ਇਸ ਸਾਲ ਫਲੂ ਵੈਕਸੀਨ ਦੀ ਮੰਗ ਵਿਚ ਜ਼ਿਕਰਯੋਗ ਵਾਧਾ ਦੇਖਣ ਨੂੰ ਮਿਲ ਰਿਹਾ ਹੈ। ਜੁਲਾਈ ਦੇ ਮੁਕਾਬਲੇ ਵਿਕਰੀ ਦੁੱਗਣੇ ਤੋਂ ਵੱਧ ਵਧੀ ਹੈ।

2026-27 ਦੀ ਵੈਕਸੀਨ ’ਚ ਨਵੇਂ ਸਟ੍ਰੇਨ ਸ਼ਾਮਲ
ਇਸ ਸਾਲ ਦੀ ਫਲੂ ਵੈਕਸੀਨ ਨੂੰ ਵਿਸ਼ਵ ਸਿਹਤ ਸੰਗਠਨ (ਡਬਲਯੂ. ਐੱਚ. ਓ.) ਦੀਆਂ ਨਵੀਆਂ ਸਿਫਾਰਸ਼ਾਂ ਦੇ ਅਨੁਕੂਲ ਅਪਡੇਟ ਕੀਤਾ ਗਿਆ ਹੈ। ਮਾਹਿਰਾਂ ਮੁਤਾਬਕ ਇਨਫਲੂਐਂਜ਼ਾ ਵਾਇਰਸ ਲਗਾਤਾਰ ਆਪਣਾ ਰੂਪ ਬਦਲਦੇ ਰਹਿੰਦੇ ਹਨ, ਇਸ ਲਈ ਵੈਕਸੀਨ ਦੀ ਬਣਤਰ ਵਿਚ ਸਮੇਂ-ਸਮੇਂ ’ਤੇ ਬਦਲਾਅ ਕਰਨਾ ਜ਼ਰੂਰੀ ਹੁੰਦਾ ਹੈ। ਮਾਹਿਰਾਂ ਦਾ ਕਹਿਣਾ ਹੈ ਕਿ ਨਵੇਂ ਅਤੇ ਬਦਲਦੇ ਇਨਫਲੂਐਂਜ਼ਾ ਸਟ੍ਰੇਨ ਦੇ ਖਿਲਾਫ ਬਿਹਤਰ ਸੁਰੱਖਿਆ ਲਈ ਅਪਡੇਟਿਡ ਵੈਕਸੀਨ ਮਹੱਤਵਪੂਰਨ ਹੈ। ਫਲੂ ਵੈਕਸੀਨ ਦੇ ਨਾਲ ਇਨਫਲੂਐਂਜ਼ਾ ਦੀ ਜਾਂਚ ਕਰਵਾਉਣ ਵਾਲਿਆਂ ਦੀ ਸੰਖਿਆ ਵਿਚ ਵੀ ਤੇਜ਼ੀ ਆਈ ਹੈ।

ਮਾਸਕ ਅਤੇ ਹੱਥ ਧੋਣਾ ਹੁਣ ਵੀ ਕਾਰਗਰ ਬਚਾਅ
ਮਾਹਿਰਾਂ ਦਾ ਕਹਿਣਾ ਹੈ ਕਿ ਫਲੂ ਤੋਂ ਬਚਾਅ ਲਈ ਸਿਰਫ ਵੈਕਸੀਨ ’ਤੇ ਨਿਰਭਰ ਰਹਿਣ ਦੀ ਬਜਾਏ ਆਮ ਸਾਵਧਾਨੀਆਂ ਵੀ ਜ਼ਰੂਰੀ ਹਨ। ਭੀੜ-ਭੜੱਕੇ ਵਾਲੀਆਂ ਥਾਵਾਂ ’ਤੇ ਮਾਸਕ ਦੀ ਵਰਤੋਂ, ਹੱਥਾਂ ਦੀ ਸਫਾਈ, ਉਚਿਤ ਵੈਂਟੀਲੇਸ਼ਨ ਅਤੇ ਲੋੜ ਪੈਣ ’ਤੇ ਭੀੜ ਤੋਂ ਦੂਰੀ ਬਣਾਏ ਰੱਖਣਾ ਇਨਫੈਕਸ਼ਨ ਦੇ ਜੋਖਮ ਨੂੰ ਘੱਟ ਕਰਨ ਵਿਚ ਮਦਦ ਕਰ ਸਕਦਾ ਹੈ। ਫਿਲਹਾਲ ਫਲੂ ਦੇ ਵਧਦੇ ਮਾਮਲਿਆਂ ਨੇ ਵੈਕਸੀਨ ਅਤੇ ਟੈਸਟਿੰਗ ਦੋਵਾਂ ਦੀ ਮੰਗ ਵਧਾ ਦਿੱਤੀ ਹੈ। ਆਉਣ ਵਾਲੇ ਹਫ਼ਤਿਆਂ ਵਿਚ ਸੰਕ੍ਰਮਣ ਦੀ ਸਥਿਤੀ ਅਤੇ ਵੈਕਸੀਨ ਦੀ ਉਪਲਬਧਤਾ ’ਤੇ ਸਿਹਤ ਖੇਤਰ ਦੀ ਨਜ਼ਰ ਬਣੀ ਰਹੇਗੀ।

ਫਲੂ, ਡੇਂਗੂ ਅਤੇ ਟਾਈਫਾਈਡ ਦੇ ਲੱਛਣਾਂ ’ਚ ਸਮਾਨਤਾ ਨਾਲ ਵਧੀ ਪ੍ਰੇਸ਼ਾਨੀ
ਮਾਨਸੂਨ ਦੌਰਾਨ ਸਭ ਤੋਂ ਵੱਡੀ ਚੁਣੌਤੀ ਸਿਰਫ ਮਰੀਜ਼ਾਂ ਦੀ ਗਿਣਤੀ ਨਹੀਂ, ਸਗੋਂ ਵੱਖ-ਵੱਖ ਬੀਮਾਰੀਆਂ ਦੇ ਮਿਲਦੇ-ਜੁਲਦੇ ਲੱਛਣ ਵੀ ਹਨ। ਮੌਸਮੀ ਫਲੂ, ਡੇਂਗੂ ਅਤੇ ਟਾਈਫਾਈਡ ਵਿਚ ਬੁਖਾਰ, ਖੰਘ, ਸਰੀਰ ਵਿਚ ਦਰਦ ਅਤੇ ਥਕਾਵਟ ਵਰਗੇ ਲੱਛਣ ਦਿਖਾਈ ਦੇ ਸਕਦੇ ਹਨ। ਅਜਿਹੇ ਵਿਚ ਬਿਨਾਂ ਜਾਂਚ ਦੇ ਬੀਮਾਰੀ ਦੀ ਸਹੀ ਪਛਾਣ ਕਰਨਾ ਮੁਸ਼ਕਿਲ ਹੋ ਸਕਦਾ ਹੈ। ਮਾਹਿਰਾਂ ਮੁਤਾਬਕ ਪੁਸ਼ਟ ਜਾਂਚ ਹੋਣ ਨਾਲ ਡਾਕਟਰਾਂ ਨੂੰ ਇਲਾਜ ਦਾ ਸਹੀ ਤਰੀਕਾ ਤੈਅ ਕਰਨ ਵਿਚ ਮਦਦ ਮਿਲਦੀ ਹੈ ਅਤੇ ਮਰੀਜ਼ ਦੀ ਚਿੰਤਾ ਵੀ ਘੱਟ ਹੁੰਦੀ ਹੈ।

ਹਰ ਕਿਸੇ ਨੂੰ ਘਬਰਾਉਣ ਦੀ ਲੋੜ ਨਹੀਂ
ਭਾਰਤੀ ਆਯੁਰਵਿਗਿਆਨ ਖੋਜ ਪ੍ਰੀਸ਼ਦ (ਆਈ. ਸੀ. ਐੱਮ. ਆਰ.) ਦੇ ਡਾਇਰੈਕਟਰ ਜਨਰਲ ਰਾਜੀਵ ਬਹਿਲ ਮੁਤਾਬਕ ਮੌਸਮੀ ਇਨਫਲੂਐਂਜ਼ਾ ਆਮ ਤੌਰ ’ਤੇ ਹਲਕਾ ਰਹਿੰਦਾ ਹੈ ਅਤੇ ਹਰ ਮਾਮਲੇ ਵਿਚ ਘਬਰਾਉਣ ਦੀ ਲੋੜ ਨਹੀਂ ਹੈ। ਹਾਲਾਂਕਿ ਬਜ਼ੁਰਗਾਂ, ਛੋਟੇ ਬੱਚਿਆਂ, ਪਹਿਲਾਂ ਤੋਂ ਕਿਸੇ ਬੀਮਾਰੀ ਨਾਲ ਜੂਝ ਰਹੇ ਲੋਕਾਂ ਅਤੇ ਕਮਜ਼ੋਰ ਅਮਿਊਨਿਟੀ ਵਾਲੇ ਵਿਅਕਤੀਆਂ ਵਿਚ ਫਲੂ ਤੋਂ ਜਟਿਲਤਾਵਾਂ ਹੋਣ ਦਾ ਜੋਖਮ ਵਧੇਰੇ ਹੋ ਸਕਦਾ ਹੈ।