ਆਫ਼ ਦਿ ਰਿਕਾਰਡ : ਯੂ.ਪੀ. ’ਚ ਕਾਂਗਰਸ ਦਾ ਜੂਆ

ਲੱਗਭਗ 20 ਸਾਲਾਂ ਬਾਅਦ, ਕਾਂਗਰਸ ਮੁੜ ਤੋਂ ਉਹੀ ਜੂਆ ਖੇਡ ਰਹੀ ਹੈ; ਰੀਤਾ ਬਹੁਗੁਣਾ ਜੋਸ਼ੀ ਦੇ ਪ੍ਰਯੋਗ ਦੇ ਬੁਰੀ ਤਰ੍ਹਾਂ ਅਸਫ਼ਲ ਹੋਣ ਤੋਂ ਬਾਅਦ ਇਕ ਔਰਤ ਨੂੰ ਆਪਣੀ ਯੂ. ਪੀ. ਯੂਨਿਟ ਦੀ ਪ੍ਰਧਾਨ ਨਿਯੁਕਤ ਕੀਤਾ ਹੈ। ਬਹੁਗੁਣਾ 2007-2012 ਦਰਮਿਆਨ ਯੂ. ਪੀ. ਯੂਨਿਟ ਦੀ ਮੁਖੀ ਸੀ ਅਤੇ ਬਾਅਦ ਵਿਚ ਸਪਾ (ਸਮਾਜਵਾਦੀ ਪਾਰਟੀ) ਨਾਲ ਕੁਝ ਸਮਾਂ ਰਹਿਣ ਤੋਂ ਬਾਅਦ ਭਾਜਪਾ ਵਿਚ ਸ਼ਾਮਲ ਹੋ ਗਈ। ਕਾਂਗਰਸ ਨੇ ਬ੍ਰਾਹਮਣਾਂ ਅਤੇ ਔਰਤਾਂ ਨੂੰ ਲੁਭਾਉਣ ਲਈ ਸ਼ੀਲਾ ਦੀਕਸ਼ਿਤ ਨਾਲ ਵੀ ਕੁਝ ਸਮੇਂ ਲਈ ਪ੍ਰਯੋਗ ਕੀਤਾ ਸੀ। ਪਾਰਟੀ ਉਸੇ ਵੋਟ ਬੈਂਕ ਨੂੰ ਲੁਭਾਉਣ ਲਈ ਆਰਾਧਨਾ ਮਿਸ਼ਰਾ ਮੋਨਾ ਨਾਲ ਵਾਪਸ ਆਈ ਹੈ।

ਪਰ ਯੂ.ਪੀ. ਵਿਚ ਗਤੀਵਿਧੀਆਂ ’ਤੇ ਨਜ਼ਰ ਰੱਖਣ ਵਾਲਿਆਂ ਦਾ ਕਹਿਣਾ ਹੈ ਕਿ ਇਸ ਕਦਮ ਨਾਲ ਸਮਾਜਵਾਦੀ ਪਾਰਟੀ ਨਾਲ ਸੀਟ-ਸ਼ੇਅਰਿੰਗ ਦੀ ਗੱਲ ਹੁਣ ਪਹਿਲਾਂ ਨਾਲੋਂ ਆਸਾਨ ਹੋ ਸਕਦੀ ਹੈ। ਜਦੋਂ ਤੱਕ ਅਜੇ ਰਾਏ ਇੰਚਾਰਜ ਸਨ, ਇਹ ਮੁਸ਼ਕਿਲ ਲੱਗ ਰਿਹਾ ਸੀ। ਰਾਏ ਇਕ ਸਟ੍ਰੀਟ ਲੀਡਰ ਹਨ ਅਤੇ ਉਨ੍ਹਾਂ ਨੇ 2024 ਵਿਚ ਵਾਰਾਣਸੀ ਲੋਕ ਸਭਾ ਸੀਟ ’ਤੇ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨੂੰ ਸਖਤ ਟੱਕਰ ਦਿੱਤੀ ਸੀ।

ਆਰਾਧਨਾ ਮਿਸ਼ਰਾ ਨੂੰ ਇਸ ਲਈ ਚੁਣਿਆ ਗਿਆ ਹੈ ਕਿਉਂਕਿ ਉਹ ਪਾਰਟੀ ਦੇ ਸੀਨੀਅਰ ਨੇਤਾ ਪ੍ਰਮੋਦ ਤਿਵਾੜੀ ਦੀ ਧੀ ਹਨ ਅਤੇ ਇਸ ਨਾਲ ਸਪਾ ਨਾਲ ਗੱਠਜੋੜ ਆਸਾਨ ਹੋ ਸਕਦਾ ਹੈ। ਰੀਤਾ ਬਹੁਗੁਣਾ ਜੋਸ਼ੀ ਵੀ ਸਵਰਗੀ ਹੇਮਵਤੀ ਨੰਦਨ ਬਹੁਗੁਣਾ ਦੀ ਧੀ ਸੀ ਅਤੇ ਸ਼ੀਲਾ ਦੀਕਸ਼ਿਤ ਸਵਰਗੀ ਉਮਾ ਸ਼ੰਕਰ ਦੀਕਸ਼ਿਤ ਦੀ ਨੂੰਹ ਸੀ। ਦਿਲਚਸਪ ਗੱਲ ਇਹ ਹੈ ਕਿ ਅਨੁਰਾਧਾ ਪੀ. ਸੀ. ਸੀ. ਮੁਖੀ ਬਣਨ ਤੋਂ ਪਹਿਲਾਂ 26 ਅਗਸਤ ਨੂੰ ਆਪਣੇ ਪਿਤਾ ਨਾਲ ਅਖਿਲੇਸ਼ ਯਾਦਵ ਨੂੰ ਮਿਲੀ ਸੀ। ਹਾਲ ਹੀ ਦੇ ਵਿਰੋਧ ਪ੍ਰਦਰਸ਼ਨਾਂ ਦੌਰਾਨ ਅਖਿਲੇਸ਼ ਯਾਦਵ ਨਾਲ ਰਾਹੁਲ ਦੀ ਹਾਲੀਆ ਦੋਸਤੀ ਵੀ ਇਸ ਗੱਲ ਦਾ ਸੰਕੇਤ ਹੈ ਕਿ ਸੀਟਾਂ ’ਤੇ ਤਾਲਮੇਲ ਆਖ਼ਰਕਾਰ ਪੱਕਾ ਹੋ ਜਾਵੇਗਾ।