ਸਹੁਰਿਆਂ ਹੱਥੋਂ ਪਰੇਸ਼ਾਨ 24048 ਔਰਤਾਂ ਨੇ ਕੀਤੀ ਖੁਦਕੁਸ਼ੀ

ਨੈਸ਼ਨਲ ਡੈਸਕ- ਮਹਾਰਾਸ਼ਟਰ ਦੇ ਵਾਤਾਵਰਣ ਮੰਤਰੀ ਪੰਕਜਾ ਮੁੰਡੇ ਦੇ ਨਿੱਜੀ ਸਹਾਇਕ ਅਨੰਤ ਗਰਜੇ ਦੀ ਪਤਨੀ ਡਾ. ਗੌਰੀ ਪਾਲਵੇ ਦੀ ਖੁਦਕੁਸ਼ੀ ਨੇ ਇਕ ਵਾਰ ਫਿਰ ਨੂੰਹਾਂ ਨੂੰ ਉਨ੍ਹਾਂ ਦੇ ਸਹੁਰਿਆਂ ਵੱਲੋਂ ਪਰੇਸ਼ਾਨ ਕਰਨ ਦਾ ਮੁੱਦਾ ਉਠਾਇਆ ਹੈ। 2023 ’ਚ ਦੇਸ਼ ’ਚ 24048 ਔਰਤਾਂ ਨੇ ਆਪਣੇ ਪਤੀਆਂ ਤੇ ਸਹੁਰਿਆਂ ਹੱਥੋਂ ਪਰੇਸ਼ਾਨ ਹੋਣ ਕਾਰਨ ਖੁਦਕੁਸ਼ੀ ਕੀਤੀ।

ਉਸੇ ਸਾਲ ਕੁੱਲ 46648 ਔਰਤਾਂ ਨੇ ਖੁਦਕੁਸ਼ੀ ਕੀਤੀ। ਅਹਿਮ ਗੱਲ ਇਹ ਹੈ ਕਿ ਇਨ੍ਹਾਂ ’ਚੋਂ ਲਗਭਗ 50 ਫੀਸਦੀ ਔਰਤਾਂ ਨੇ ਆਪਣੇ ਪਤੀਆਂ ਦੇ ਵਿਆਹ ਤੋਂ ਬਾਹਰਲੇ ਸਬੰਧਾਂ ਤੇ ਸਹੁਰਿਆਂ ਦੇ ਅੱਤਿਆਚਾਰਾਂ ਕਾਰਨ ਖੁਦਕੁਸ਼ੀ ਕੀਤੀ।

ਡਾ. ਗੌਰੀ ਪਾਲਵੇ ਦੀ ਘਟਨਾ ਨੇ ਨਾ ਸਿਰਫ਼ ਮਹਾਰਾਸ਼ਟਰ ਸਗੋਂ ਪੂਰੇ ਦੇਸ਼ ਨੂੰ ਹਿਲਾ ਕੇ ਰੱਖ ਦਿੱਤਾ ਹੈ। 2023 ’ਚ ਮਹਾਰਾਸ਼ਟਰ ’ਚ 2373 ਨੂੰਹਾਂ ਨੇ ਆਪਣੇ ਪਤੀਆਂ ਤੇ ਸਹੁਰਿਆਂ ਦੇ ਅਸਹਿ ਦੁੱਖ ਝੱਲਣ ਕਾਰਨ ਖੁਦਕੁਸ਼ੀ ਕਰਨ ਦਾ ਫੈਸਲਾ ਕੀਤਾ। ਇਹ ਜਾਣਕਾਰੀ ਮਹਾਰਾਸ਼ਟਰ ਲਈ ਸ਼ਰਮ ਵਾਲੀ ਹੈ।

ਇਹ ਤੱਥ ਨੈਸ਼ਨਲ ਕ੍ਰਾਈਮ ਰਿਕਾਰਡ ਬਿਊਰੋ ਦੀ 2023 ਦੀ ਰਿਪੋਰਟ ਤੋਂ ਸਾਹਮਣੇ ਆਏ ਹਨ। ਬਿਊਰੋ ਅਨੁਸਾਰ 2023 ’ਚ 1,71,000 ਲੋਕਾਂ ਨੇ ਖੁਦਕੁਸ਼ੀ ਕੀਤੀ। ਇਨ੍ਹਾਂ ’ਚੋਂ 46648 ਔਰਤਾਂ ਸਨ। ਇਹ ਧਿਆਨ ਦੇਣ ਯੋਗ ਹੈ ਕਿ 24048 ਔਰਤਾਂ ਨੇ ਆਪਣੇ ਸਹੁਰਿਆਂ ਵੱਲੋਂ ਪੈਦਾ ਕੀਤੀਆਂ ਸਮੱਸਿਆਵਾਂ ਕਾਰਨ ਖੁਦਕੁਸ਼ੀ ਕੀਤੀ।

ਇਸ ਕਾਰਨ ਸਭ ਤੋਂ ਵੱਧ 3080 ਖੁਦਕੁਸ਼ੀਆਂ ਤਾਮਿਲਨਾਡੂ ’ਚ ਹੋਈਆਂ। ਮੱਧ ਪ੍ਰਦੇਸ਼ ’ ਦੂਜੇ ਨੰਬਰ ’ਤੇ ਹੈ ਜਿੱਥੇ 2637 ਔਰਤਾਂ ਨੇ ਖੁਦਕੁਸ਼ੀ ਕੀਤੀ। ਇਸ ਸੂਚੀ ’ਚ ਮਹਾਰਾਸ਼ਟਰ ਦੇਸ਼ ’ਚ ਤੀਜੇ ਨੰਬਰ 'ਤੇ ਹੈ ਜਿੱਥੇ 2,373 ਨੇ ਆਪਣੀ ਜੀਵਨ ਲੀਲਾ ਖਤਮ ਕੀਤੀ।

ਆਪਣੇ ਪਤੀਆਂ ਦੇ ਵਿਆਹ ਤੋਂ ਬਾਹਰਲੇ ਸਬੰਧਾਂ ਕਾਰਨ ਖੁਦਕੁਸ਼ੀ ਕਰਨ ਵਾਲੀਆਂ ਔਰਤਾਂ ਦੀ ਗਿਣਤੀ 41.9 ਫੀਸਦੀ ਹੈ, ਜਦੋਂ ਕਿ ਪ੍ਰੇਮ ਸਬੰਧਾਂ, ਦਾਜ ਲਈ ਪਰੇਸ਼ਾਨ ਕਰਨਾ ਤੇ ਜੀਵਨ ਸਾਥੀ ਦੇ ਝਗੜੇ ਕਾਰਨ 19 ਔਰਤਾਂ ਨੇ ਖੁਦਕੁਸ਼ੀ ਕੀਤੀ।