Valentine''s Day Special : ਆਪਣੇ ਪਾਰਟਨਰ ਦਾ ਦਿਲ ਜਿੱਤਣ ਲਈ ਘਰ ''ਚ ਹੀ ਬਣਾਓ ਇਹ ਦੋ ਖਾਸ ਪਕਵਾਨ
Saturday, Feb 14, 2026 - 09:35 AM (IST)
ਵੈੱਬ ਡੈਸਕ - ਅੱਜ ਵੈਲਨਟਾਈਨ ਡੇਅ ਹੈ, ਜਿਸ ਨੂੰ ਪਿਆਰ ਦੇ ਦਿਨ ਵਜੋਂ ਮਨਾਇਆ ਜਾਂਦਾ ਹੈ। ਇਸ ਖਾਸ ਮੌਕੇ 'ਤੇ ਪ੍ਰੇਮੀ ਜੋੜੇ ਇਕ-ਦੂਜੇ ਪ੍ਰਤੀ ਆਪਣੇ ਪਿਆਰ ਦਾ ਇਜ਼ਹਾਰ ਕਰਨ ਲਈ ਕਈ ਤਰੀਕੇ ਅਪਣਾਉਂਦੇ ਹਨ। ਸਰੋਤਾਂ ਅਨੁਸਾਰ, ਕਿਸੇ ਮਹਿੰਗੇ ਰੈਸਟੋਰੈਂਟ 'ਚ ਜਾਣ ਦੀ ਬਜਾਏ, ਜੇਕਰ ਤੁਸੀਂ ਆਪਣੇ ਹੱਥਾਂ ਨਾਲ ਕੁਝ ਖਾਸ ਬਣਾ ਕੇ ਆਪਣੇ ਸਾਥੀ ਨੂੰ ਖੁਆਉਂਦੇ ਹੋ, ਤਾਂ ਉਹ ਪਲ ਵਧੇਰੇ ਯਾਦਗਾਰ ਬਣ ਜਾਂਦੇ ਹਨ ਕਿਉਂਕਿ ਉਸ 'ਚ ਤੁਹਾਡੀ ਮਿਹਨਤ ਅਤੇ ਭਾਵਨਾਵਾਂ ਸ਼ਾਮਲ ਹੁੰਦੀਆਂ ਹਨ। ਇਸ ਵੈਲਨਟਾਈਨ ਡੇਅ ਨੂੰ ਹੋਰ ਵੀ ਰੋਮਾਂਟਿਕ ਬਣਾਉਣ ਲਈ ਤੁਸੀਂ ਘਰ 'ਚ 'ਹਾਰਟ ਸ਼ੇਪ ਪੀਜ਼ਾ' ਅਤੇ 'ਚਾਕੋ ਲਾਵਾ ਕੇਕ' ਤਿਆਰ ਕਰ ਸਕਦੇ ਹੋ।
ਹਾਰਟ ਸ਼ੇਪ ਪੀਜ਼ਾ
- ਇਸ ਨੂੰ ਬਣਾਉਣ ਲਈ ਤੁਹਾਨੂੰ ਪੀਜ਼ਾ ਬੇਸ, ਪੀਜ਼ਾ ਸਾਸ, ਮੋਜ਼ੇਰੇਲਾ ਚੀਜ਼, ਸਬਜ਼ੀਆਂ (ਸ਼ਿਮਲਾ ਮਿਰਚ, ਪਿਆਜ਼, ਕੌਰਨ), ਚਿੱਲੀ ਫਲੇਕਸ ਅਤੇ ਓਰੀਗੈਨੋ ਦੀ ਲੋੜ ਪਵੇਗੀ। ਇਸ ਲਈ ਸਭ ਤੋਂ ਪਹਿਲਾਂ ਇਕ ਗੋਲ ਪੀਜ਼ਾ ਬੇਸ ਲਓ ਅਤੇ ਚਾਕੂ ਦੀ ਮਦਦ ਨਾਲ ਉੱਪਰਲੇ ਹਿੱਸੇ ਤੋਂ 'V' ਆਕਾਰ ਦਾ ਕੱਟ ਲਗਾ ਕੇ ਅਤੇ ਹੇਠਲੇ ਹਿੱਸੇ ਨੂੰ ਨੁਕੀਲਾ ਕਰਕੇ ਇਸ ਨੂੰ ਦਿਲ ਦੀ ਸ਼ਕਲ ਦਿਓ। ਇਸ 'ਤੇ ਪੀਜ਼ਾ ਸਾਸ ਅਤੇ ਚੀਜ਼ ਫੈਲਾਓ। ਆਪਣੀ ਪਸੰਦ ਦੀਆਂ ਸਬਜ਼ੀਆਂ ਨਾਲ ਸਜਾ ਕੇ ਇਸ ਨੂੰ ਮਾਈਕ੍ਰੋਵੇਵ ਜਾਂ ਤਵੇ 'ਤੇ 10-12 ਮਿੰਟ ਲਈ ਪਕਾਓ।
ਮਿੰਟਾਂ 'ਚ ਤਿਆਰ ਹੋਣ ਵਾਲਾ ਚਾਕੋ ਲਾਵਾ ਕੇਕ
- ਇਸ ਲਈ ਤੁਹਾਨੂੰ ਡਾਰਕ ਚਾਕਲੇਟ (100 ਗ੍ਰਾਮ), ਮੱਖਣ (3 ਚਮਚ), ਮੈਦਾ (2 ਚਮਚ), ਪੀਸੀ ਹੋਈ ਚੀਨੀ ਅਤੇ ਵਨੀਲਾ ਐਸੈਂਸ ਦੀ ਲੋੜ ਹੋਵੇਗੀ। ਪਹਿਲਾਂ ਡਾਰਕ ਚਾਕਲੇਟ ਅਤੇ ਮੱਖਣ ਨੂੰ ਪਿਘਲਾ ਲਓ। ਹੁਣ ਇਸ 'ਚ ਚੀਨੀ, ਮੈਦਾ ਅਤੇ ਵਨੀਲਾ ਐਸੈਂਸ ਪਾ ਕੇ ਚੰਗੀ ਤਰ੍ਹਾਂ ਮਿਲਾਓ। ਤਿਆਰ ਮਿਸ਼ਰਣ ਨੂੰ ਮੋਲਡ 'ਚ ਭਰ ਕੇ ਸਿਰਫ਼ 7-8 ਮਿੰਟ ਲਈ ਬੇਕ ਕਰੋ। ਧਿਆਨ ਰਹੇ ਕਿ ਕੇਕ ਦਾ ਵਿਚਕਾਰਲਾ ਹਿੱਸਾ ਥੋੜਾ ਨਰਮ ਹੋਣਾ ਚਾਹੀਦਾ ਹੈ ਤਾਂ ਜੋ ਅੰਦਰੋਂ ਚਾਕਲੇਟ ਲਾਵੇ ਵਾਂਗ ਨਿਕਲੇ।
ਇਹਨਾਂ ਸੁਆਦੀ ਪਕਵਾਨਾਂ ਨਾਲ ਤੁਸੀਂ ਆਪਣੇ ਵੈਲਨਟਾਈਨ ਡੇਅ ਨੂੰ ਬੇਹੱਦ ਖਾਸ ਅਤੇ ਯਾਦਗਾਰ ਬਣਾ ਸਕਦੇ ਹੋ।
