ProposeDay ਪਿਆਰ ਦੇ ਇਜ਼ਹਾਰ ਦਾ ਸਭ ਤੋਂ ਖਾਸ ਮੌਕਾ ਹੈ ਪ੍ਰਪੋਜ਼ ਡੇਅ

ਸੰਗਰੂਰ/ਬਰਨਾਲਾ (ਵਿਵੇਕ ਸਿੰਧਵਾਨੀ, ਰਵੀ)– ਫਰਵਰੀ ਦਾ ਮਹੀਨਾ ਪਿਆਰ ਅਤੇ ਰੋਮਾਂਸ ਨਾਲ ਭਰਿਆ ਹੁੰਦਾ ਹੈ। ਵੈਲੇਂਟਾਈਨ ਵੀਕ ਦੀ ਸ਼ੁਰੂਆਤ ਤੋਂ ਬਾਅਦ ਅੱਜ 8 ਫਰਵਰੀ ਨੂੰ ਪ੍ਰਪੋਜ਼ ਡੇਅ ਉਤਸ਼ਾਹ ਨਾਲ ਮਨਾਇਆ ਜਾ ਰਿਹਾ ਹੈ। ਇਹ ਦਿਨ ਉਨ੍ਹਾਂ ਲੋਕਾਂ ਲਈ ਬਹੁਤ ਖਾਸ ਹੁੰਦਾ ਹੈ ਜੋ ਆਪਣੇ ਦਿਲ ਦੀ ਗੱਲ ਆਪਣੇ ਪਿਆਰੇ ਨਾਲ ਸਾਂਝੀ ਕਰਨਾ ਚਾਹੁੰਦੇ ਹਨ।
 

ਪ੍ਰਪੋਜ਼ ਡੇਅ ਦਾ ਮਹੱਤਵ

ਪ੍ਰਪੋਜ਼ ਡੇਅ ਸਿਰਫ ਪ੍ਰੇਮੀ-ਪ੍ਰੇਮਿਕਾਵਾਂ ਲਈ ਨਹੀਂ, ਸਗੋਂ ਉਨ੍ਹਾਂ ਸਭ ਲਈ ਵੀ ਖਾਸ ਹੁੰਦਾ ਹੈ ਜੋ ਕਿਸੇ ਨੂੰ ਪਸੰਦ ਕਰਦੇ ਹਨ ਅਤੇ ਉਨ੍ਹਾਂ ਨਾਲ ਆਪਣੀਆਂ ਭਾਵਨਾਵਾਂ ਸ਼ੇਅਰ ਕਰਨ ਦੀ ਹਿੰਮਤ ਇਕੱਠੀ ਕਰ ਰਹੇ ਹਨ। ਇਹ ਦਿਨ ਪਿਆਰ ਨੂੰ ਇਕ ਨਵੀਂ ਦਿਸ਼ਾ ਦੇਣ ਦਾ ਮੌਕਾ ਦਿੰਦਾ ਹੈ।

ਸਹੀ ਸਮੇਂ ਅਤੇ ਸਹੀ ਮਾਹੌਲ ’ਚ ਕੀਤਾ ਗਿਆ ਪ੍ਰਪੋਜ਼ਲ ਰਿਸ਼ਤੇ ਨੂੰ ਮਜ਼ਬੂਤ ਬਣਾਉਂਦਾ ਹੈ। ਇਹ ਦਿਨ ਸਿਰਫ ਗੋਡਿਆਂ ’ਤੇ ਬੈਠ ਕੇ ਗੁਲਾਬ ਦੇਣ ਦਾ ਹੀ ਨਹੀਂ, ਬਲਕਿ ਆਪਣੇ ਰਿਸ਼ਤੇ ਨੂੰ ਸਮਝਣ ਅਤੇ ਉਸ ਨੂੰ ਨਵੀਆਂ ਉੱਚਾਈਆਂ ’ਤੇ ਲੈ ਜਾਣ ਦਾ ਪ੍ਰਤੀਕ ਵੀ ਹੈ। ਜੇਕਰ ਤੁਸੀਂ ਵੀ ਆਪਣੇ ਕਿਸੇ ਖਾਸ ਨੂੰ ਪ੍ਰਪੋਜ਼ ਕਰਨ ਦੀ ਯੋਜਨਾ ਬਣਾ ਰਹੇ ਹੋ, ਤਾਂ ਕੁਝ ਖਾਸ ਗੱਲਾਂ ਦਾ ਧਿਆਨ ਰੱਖਣਾ ਜ਼ਰੂਰੀ ਹੈ।

1. ਸਹੀ ਸਮਾਂ ਅਤੇ ਥਾਂ ਚੁਣੋ : ਪ੍ਰਪੋਜ਼ਲ ਦਾ ਪ੍ਰਭਾਵ ਇਸ ਗੱਲ ’ਤੇ ਵੀ ਨਿਰਭਰ ਕਰਦਾ ਹੈ ਕਿ ਤੁਸੀਂ ਇਹ ਕਿਥੇ ਅਤੇ ਕਦੋਂ ਕਰ ਰਹੇ ਹੋ। ਜੇਕਰ ਤੁਹਾਡਾ ਸਾਥੀ ਰੋਮਾਂਟਿਕ ਥਾਵਾਂ ਨੂੰ ਪਸੰਦ ਕਰਦਾ ਹੈ, ਤਾਂ ਕਿਸੇ ਸੁੰਦਰ ਥਾਂ ’ਤੇ ਪ੍ਰਪੋਜ਼ ਕਰੋ।

2. ਸਰਪ੍ਰਾਈਜ਼ ਯੋਜਨਾ ਬਣਾਓ : ਸਰਪ੍ਰਾਈਜ਼ ਪ੍ਰਪੋਜ਼ਲ ਹਮੇਸ਼ਾ ਯਾਦਗਾਰ ਬਣਦੇ ਹਨ। ਤੁਸੀਂ ਕਿਸੇ ਵਿਲੱਖਣ ਢੰਗ ਨਾਲ ਪ੍ਰਪੋਜ਼ ਕਰ ਸਕਦੇ ਹੋ, ਜਿਵੇਂ ਕਿ-ਕੈਂਡਲ ਲਾਈਟ ਡਿਨਰ, ਬੀਚ ’ਤੇ ਡੇਟ ਅਤੇ ਕਿਸੇ ਵਿਸ਼ੇਸ਼ ਥਾਂ ’ਤੇ ਜੋ ਤੁਹਾਡਾ ਸਾਥੀ ਪਸੰਦ ਕਰਦਾ ਹੋਵੇ।

3. ਆਪਣੀਆਂ ਭਾਵਨਾਵਾਂ ਸਾਫ-ਸੁਥਰੀ ਤਰੀਕੇ ਨਾਲ ਪ੍ਰਗਟ ਕਰੋ : ਪ੍ਰਪੋਜ਼ ਕਰਦੇ ਸਮੇਂ ਇਹ ਯਕੀਨੀ ਬਣਾਓ ਕਿ ਤੁਸੀਂ ਆਪਣੇ ਭਾਵਨਾਂ ਨੂੰ ਈਮਾਨਦਾਰੀ ਅਤੇ ਸਪੱਸ਼ਟਤਾ ਨਾਲ ਪ੍ਰਗਟ ਕਰ ਰਹੇ ਹੋ, ਤਾਂ ਜੋ ਤੁਹਾਡਾ ਸਾਥੀ ਤੁਹਾਡੀਆਂ ਭਾਵਨਾਵਾਂ ਨੂੰ ਚੰਗੀ ਤਰ੍ਹਾਂ ਸਮਝ ਸਕੇ।

4. ਸਹੀ ਤੋਹਫਾ ਦਿਓ : ਇਕ ਵਧੀਆ ਤੋਹਫਾ ਤੁਹਾਡੇ ਪ੍ਰਪੋਜ਼ਲ ਨੂੰ ਹੋਰ ਵੀ ਖਾਸ ਬਣਾ ਸਕਦਾ ਹੈ। ਅੰਗੂਠੀ, ਗੁਲਾਬ, ਚਾਕਲੇਟ, ਟੈਡੀ ਬੀਅਰ ਜਾਂ ਕੋਈ ਖਾਸ ਚੀਜ਼ ਜੋ ਤੁਹਾਡੇ ਰਿਸ਼ਤੇ ਨਾਲ ਜੁੜੀ ਹੋਈ ਹੋ।

‘‘ਦਿਲ ਦੀ ਕਿਤਾਬ ’ਚ ਗੁਲਾਬ ਉਨ੍ਹਾਂ ਦਾ ਸੀ,
ਰਾਤ ਦੀ ਨੀਂਦ ’ਚ ਖਵਾਬ ਉਨ੍ਹਾਂ ਦਾ ਸੀ,
ਕਿੰਨਾ ਪਿਆਰ ਕਰਦੇ ਹੋ?– ਜਦੋਂ ਇਹ ਪੁੱਛਿਆ,
ਮਰ ਜਾਵਾਂਗੇ ਤੁਹਾਡੇ ਬਿਨਾਂ–ਇਹ ਜਵਾਬ ਉਨ੍ਹਾਂ ਦਾ ਸੀ।’’

ਕਿਵੇਂ ਬਣਾਏ ਇਕ ਯਾਦਗਾਰ ਪ੍ਰਪੋਜ਼ਲ?

ਜੇਕਰ ਤੁਸੀਂ ਆਪਣੇ ਪ੍ਰਪੋਜ਼ਲ ਨੂੰ ਵਿਲੱਖਣ ਅਤੇ ਯਾਦਗਾਰ ਬਣਾਉਣਾ ਚਾਹੁੰਦੇ ਹੋ, ਤਾਂ ਹੇਠਾਂ ਦਿੱਤੇ ਢੰਗ ਅਪਣਾ ਸਕਦੇ ਹੋ।

1. ਫਲੈਸ਼ ਮੋਬ ਪ੍ਰਪੋਜ਼ਲ – ਦੋਸਤਾਂ ਦੀ ਮਦਦ ਨਾਲ ਇਕ ਰੋਮਾਂਟਿਕ ਡਾਂਸ ਜਾਂ ਐਕਟ ਤਿਆਰ ਕਰ ਸਕਦੇ ਹੋ।

2. ਸਿਨੇਮੈਟਿਕ ਪ੍ਰਪੋਜ਼ਲ–ਕਿਸੇ ਥੀਏਟਰ ’ਚ ਵੱਡੀ ਸਕਰੀਨ ’ਤੇ ਆਪਣੀ ਲਵ ਸਟੋਰੀ ਦਿਖਾ ਕੇ ਪ੍ਰਪੋਜ਼ ਕਰ ਸਕਦੇ ਹੋ।

3. ਰੋਮਾਂਟਿਕ ਨੋਟਸ ਰਾਹੀਂ–ਛੋਟੇ-ਛੋਟੇ ਨੋਟਸ ਛੱਡ ਕੇ ਅਖੀਰ ਵਿਚ ਇਕ ਖਾਸ ਥਾਂ ’ਤੇ ਪ੍ਰਪੋਜ਼ ਕਰ ਸਕਦੇ ਹੋ।

4. ਡਿਨਰ ਡੇਟ ’ਤੇ ਪ੍ਰਪੋਜ਼ਲ–ਕਿਸੇ ਰੋਮਾਂਟਿਕ ਰੈਸਟੋਰੈਂਟ ’ਚ ਕੈਂਡਲ ਲਾਈਟ ਡਿਨਰ ਦੌਰਾਨ ਪ੍ਰਪੋਜ਼ ਕਰਨਾ ਇਕ ਕਲਾਸਿਕ ਢੰਗ ਹੈ।

ਬਾਜ਼ਾਰਾਂ ’ਚ ਖਾਸ ਰੌਣਕ

ਪ੍ਰਪੋਜ਼ ਡੇਅ ਅਤੇ ਵੈਲੇਂਟਾਈਨ ਵੀਕ ਦੀ ਚਲਦੀ ਤਿਆਰੀ ਕਾਰਨ, ਬਾਜ਼ਾਰਾਂ ’ਚ ਵੀ ਕਾਫੀ ਚਹਿਲ-ਪਹਿਲ ਦੇਖੀ ਜਾ ਰਹੀ ਹੈ।

ਲਾਲ ਗੁਲਾਬ ਦੀ ਮੰਗ ਵਧ ਗਈ ਹੈ। ਗਿਫਟ ਦੀਆਂ ਦੁਕਾਨਾਂ ਅਤੇ ਆਨਲਾਈਨ ਸਟੋਰਾਂ ’ਤੇ ਵੀ ਖਰੀਦਦਾਰੀ ਜ਼ੋਰਾਂ ’ਤੇ ਹੈ।

ਸੋਸ਼ਲ ਮੀਡੀਆ ’ਤੇ ਵਧ ਰਿਹੈ ਕ੍ਰੇਜ਼

ਅੱਜ ਦੇ ਡਿਜੀਟਲ ਯੁੱਗ ’ਚ ਸੋਸ਼ਲ ਮੀਡੀਆ ਵੀ ਪ੍ਰਪੋਜ਼ ਡੇ ਦਾ ਇਕ ਅਹਿਮ ਹਿੱਸਾ ਬਣ ਗਿਆ ਹੈ। ਲੋਕ Instagram, Facebook, WhatsApp ’ਤੇ ਆਪਣੇ ਖਾਸ ਪਲਾਂ ਦੀਆਂ ਤਸਵੀਰਾਂ ਅਤੇ ਵੀਡੀਓ ਸ਼ੇਅਰ ਕਰ ਰਹੇ ਹਨ।

ਪ੍ਰਪੋਜ਼ਲ ਨੂੰ ‘ਹਾਂ’ ਜਾਂ ‘ਨਾ’– ਸੋਚ-ਸਮਝ ਕੇ ਫੈਸਲਾ ਲਓ

ਪਿਆਰ ਦੇ ਇਜ਼ਹਾਰ ਦਾ ਇਹ ਦਿਨ ਬੇਹੱਦ ਖਾਸ ਹੁੰਦਾ ਹੈ ਪਰ ਕਿਸੇ ਵੀ ਰਿਸ਼ਤੇ ’ਚ ਅੱਗੇ ਵਧਣ ਤੋਂ ਪਹਿਲਾਂ ਇਹ ਯਕੀਨੀ ਬਣਾਓ ਕਿ ਤੁਸੀਂ ਅਤੇ ਤੁਹਾਡਾ ਸਾਥੀ ਇਕ-ਦੂਜੇ ਲਈ ਸਹੀ ਹੋ। ਪ੍ਰਪੋਜ਼ ਡੇਅ ਪਿਆਰ ਦੇ ਇਜ਼ਹਾਰ ਦਾ ਸਭ ਤੋਂ ਖਾਸ ਮੌਕਾ ਹੁੰਦਾ ਹੈ। ਚਾਹੇ ਇਹ ਗੋਡਿਆਂ ’ਤੇ ਬੈਠ ਕੇ ਇਕ ਰਵਾਇਤੀ ਪ੍ਰਪੋਜ਼ਲ ਹੋਵੇ ਜਾਂ ਕੋਈ ਵਿਲੱਖਣ ਢੰਗ, ਸਭ ਤੋਂ ਮਹੱਤਵਪੂਰਨ ਗੱਲ ਇਹ ਹੈ ਕਿ ਤੁਹਾਡੀਆਂ ਭਾਵਨਾਵਾਂ ਸੱਚੀਆਂ ਹੋਣ।