Closing Ceremony ਤੋਂ ਪਹਿਲਾਂ ਐਫਿਲ ਟਾਵਰ ''ਤੇ ਚੜ੍ਹ ਗਿਆ ਨੌਜਵਾਨ, ਪੁਲਸ ਨੂੰ ਪਈਆਂ ਭਾਜੜਾਂ
Monday, Aug 12, 2024 - 12:47 AM (IST)
ਪੈਰਿਸ- ਪੈਰਿਸ ਓਲੰਪਿਕ 2024 ਦੇ ਸਮਾਪਤੀ ਸਮਾਰੋਹ ਤੋਂ ਪਹਿਲਾਂ ਇਕ ਨੌਜਵਾਨ ਐਫਿਲ ਟਾਵਰ 'ਤੇ ਚੜ੍ਹ ਗਿਆ। ਹਾਲਾਂਕਿ ਪੁਲਸ ਨੇ ਉਸ ਨੂੰ ਅੱਧ ਵਿਚਕਾਰ ਹੀ ਫੜ ਲਿਆ। ਸੋਸ਼ਲ ਮੀਡੀਆ 'ਤੇ ਪੋਸਟ ਕੀਤੀ ਗਈ ਵੀਡੀਓ 'ਚ ਦਿਖਾਈ ਦੇ ਰਿਹਾ ਹੈ ਕਿ ਨੌਜਵਾਨ ਬਿਨਾਂ ਰੱਸੀ ਦੀ ਮਦਦ ਦੇ ਟਾਵਰ 'ਤੇ ਚੜ੍ਹ ਰਿਹਾ ਸੀ। ਪੁਲਸ ਨੇ ਤੇਜ਼ੀ ਨਾਲ ਐਫਿਲ ਟਾਵਰ ਦੇ ਪੂਰੇ ਇਲਾਕੇ ਨੂੰ ਖਾਲੀ ਕਰਵਾ ਲਿਆ।
ਸਮਾਚਾਰ ਏਜੰਸੀ ਐਸੋਸੀਏਟ ਪ੍ਰੈੱਸ ਦੀ ਰਿਪੋਰਟ ਮੁਤਾਬਕ ਦੁਪਹਿਰ ਵੇਲੇ ਇਕ ਵਿਅਕਤੀ ਨੂੰ 330 ਮੀਟਰ (1,083 ਫੁੱਟ) ਉੱਚੇ ਟਾਵਰ 'ਤੇ ਚੜ੍ਹਦੇ ਦੇਖਿਆ ਗਿਆ। ਹਾਲਾਂਕਿ ਇਹ ਸਪੱਸ਼ਟ ਨਹੀਂ ਹੈ ਕਿ ਉਸ ਨੇ ਆਪਣੀ ਚੜ੍ਹਾਈ ਕਿੱਥੋਂ ਸ਼ੁਰੂ ਕੀਤੀ ਸੀ ਪਰ ਉਸ ਨੂੰ ਸਜਾਵਟ ਲਈ ਸਥਾਪਤ ਓਲੰਪਿਕ ਰਿੰਗਾਂ ਦੇ ਬਿਲਕੁਲ ਉੱਪਰ, ਐਫਿਲ ਟਾਵਰ ਦੇ ਦੂਜੇ ਪਾਸੇ ਵਿਊਇੰਗ ਡੈੱਕ ਦੇ ਉੱਪਰ ਦੇਖਿਆ ਗਿਆ ਸੀ।
ਪੁਲਸ ਨੇ ਦੁਪਹਿਰ 3 ਵਜੇ ਦੇ ਕਰੀਬ ਲੋਕਾਂ ਨੂੰ ਇਲਾਕੇ ਤੋਂ ਬਾਹਰ ਕੱਢਿਆ। ਦੂਜੀ ਮੰਜ਼ਿਲ 'ਤੇ ਬੰਦ ਕੁਝ ਲੋਕਾਂ ਨੂੰ ਲਗਭਗ 30 ਮਿੰਟ ਬਾਅਦ ਬਾਹਰ ਆਉਣ ਦੀ ਇਜਾਜ਼ਤ ਦਿੱਤੀ ਗਈ।
ਤੁਹਾਨੂੰ ਦੱਸ ਦੇਈਏ ਕਿ ਐਫਿਲ ਟਾਵਰ ਉਦਘਾਟਨ ਸਮਾਰੋਹ ਦਾ ਮੁੱਖ ਆਕਰਸ਼ਣ ਸੀ, ਜਿਸ ਵਿੱਚ ਸੇਲਿਨ ਡੀਓਨ ਨੇ ਸੰਗੀਤ ਵਜਾਇਆ ਸੀ। ਇਹ ਘਟਨਾ ਅਜਿਹੇ ਸਮੇਂ ਵਾਪਰੀ ਜਦੋਂ ਓਲੰਪਿਕ ਮੁਕਾਬਲੇ ਖਤਮ ਹੋ ਰਹੇ ਸਨ ਅਤੇ ਪੈਰਿਸ ਅਤੇ ਉਸ ਤੋਂ ਬਾਹਰ ਦੀਆਂ ਸੁਰੱਖਿਆ ਸੇਵਾਵਾਂ ਦਾ ਪੂਰਾ ਧਿਆਨ ਸਮਾਪਤੀ ਸਮਾਰੋਹ 'ਤੇ ਕੇਂਦਰਿਤ ਸੀ।
ਐਤਵਾਰ ਨੂੰ ਪੈਰਿਸ ਦੇ ਆਲੇ-ਦੁਆਲੇ 30,000 ਤੋਂ ਵੱਧ ਪੁਲਸ ਅਧਿਕਾਰੀ ਤਾਇਨਾਤ ਕੀਤੇ ਗਏ ਸਨ। ਫਰਾਂਸ ਦੇ ਮੰਤਰੀ ਗੇਰਾਲਡ ਡਰਮਨਿਨ ਨੇ ਕਿਹਾ ਕਿ ਓਲੰਪਿਕ ਦੇ ਅੰਤਿਮ ਦਿਨ ਸੁਰੱਖਿਆ ਨੂੰ ਯਕੀਨੀ ਬਣਾਉਣ ਲਈ ਐਤਵਾਰ ਦੇਰ ਤੱਕ 3,000 ਪੁਲਸ ਅਧਿਕਾਰੀ ਸੈਂਟ-ਡੈਨਿਸ ਖੇਤਰ ਫਰਾਂਸ ਦੇ ਆਲੇ-ਦੁਆਲੇ ਅਤੇ 20,000 ਪੁਲਿਸ ਜਵਾਨ ਅਤੇ ਹੋਰ ਸੁਰੱਖਿਆ ਕਰਮਚਾਰੀ ਤਾਇਨਾਤ ਕੀਤੇ ਜਾਣਗੇ।
