ਚੀਨੀ ਜਹਾਜ਼ ਦੱਖਣੀ ਚੀਨ ਸਾਗਰ ਦੇ ਵਿਵਾਦਿਤ ਖੇਤਰ ''ਚ ਦਾਖਲ, ਇੰਡੋਨੇਸ਼ੀਆ ਨੇ ਪਿੱਛੇ ਹਟਣ ਨੂੰ ਕੀਤਾ ਮਜ਼ਬੂਰ

ਇੰਟਰਨੈਸ਼ਨਲ ਡੈਸਕ : ਇੰਡੋਨੇਸ਼ੀਆ ਨੇ ਦਾਅਵਾ ਕੀਤਾ ਹੈ ਕਿ ਉਸ ਦੇ ਗਸ਼ਤੀ ਜਹਾਜ਼ਾਂ ਨੇ ਦੱਖਣੀ ਚੀਨ ਸਾਗਰ ਦੇ ਇਕ ਵਿਵਾਦਿਤ ਖੇਤਰ 'ਚ ਚੀਨੀ ਤੱਟ ਰੱਖਿਅਕ ਜਹਾਜ਼ ਨੂੰ ਪਿੱਛੇ ਹਟਣ ਲਈ ਮਜ਼ਬੂਰ ਕਰ ਦਿੱਤਾ। ਇੰਡੋਨੇਸ਼ੀਆਈ ਅਧਿਕਾਰੀਆਂ ਨੇ ਵੀਰਵਾਰ ਨੂੰ ਇਹ ਜਾਣਕਾਰੀ ਦਿੱਤੀ। ਇੰਡੋਨੇਸ਼ੀਆ ਦੀ ਸਮੁੰਦਰੀ ਸੁਰੱਖਿਆ ਏਜੰਸੀ ਨੇ ਕਿਹਾ ਕਿ ਚੀਨੀ ਜਹਾਜ਼ 'ਐੱਮਵੀ ਜੀਓ ਕੋਰਲ' ਨਾਮਕ ਉਸ ਦੇ ਸਮੁੰਦਰੀ ਜਹਾਜ਼ ਕੋਲ ਦੋ ਵਾਰ ਪਹੁੰਚਿਆ, ਜਿਸ ਨਾਲ ਭੂਚਾਲ ਸੰਬੰਧੀ ਡੇਟਾ ਇਕੱਠਾ ਕਰਨ ਲਈ ਕੀਤੇ ਜਾ ਰਹੇ ਸਰਵੇਖਣ 'ਚ ਵਿਘਨ ਪਿਆ। ਇਹ ਸਰਵੇਖਣ ਦੱਖਣੀ ਚੀਨ ਸਾਗਰ ਦੇ ਉਸ ਹਿੱਸੇ 'ਚ ਸਰਕਾਰੀ ਊਰਜਾ ਕੰਪਨੀ ਪੀਟੀ ਪਰਟਾਮਿਨਾ ਵੱਲੋਂ ਕਰਵਾਇਆ ਜਾ ਰਿਹਾ ਹੈ ਜਿਸ ਦਾ ਦੋਵਾਂ ਦੇਸ਼ਾਂ ਵੱਲੋਂ ਦਾਅਵਾ ਕੀਤਾ ਗਿਆ ਹੈ।

ਚੀਨ ਲਈ 'ਨੌ-ਡੈਸ਼ ਲਾਈਨ' ਮਹੱਤਵਪੂਰਨ ਹੈ, ਜਿਸ ਦੀ ਵਰਤੋਂ ਉਹ ਦੱਖਣੀ ਚੀਨ ਸਾਗਰ ਦੇ ਜ਼ਿਆਦਾਤਰ ਹਿੱਸੇ 'ਤੇ ਆਪਣੇ ਦਾਅਵੇ ਦੀ ਰੂਪਰੇਖਾ ਬਣਾਉਣ ਲਈ ਕਰਦਾ ਹੈ। ਚੀਨ ਦੀ ਇਹ 'ਨੌ-ਡੈਸ਼ ਲਾਈਨ' ਇੰਡੋਨੇਸ਼ੀਆ ਦੇ ਨਿਵੇਕਲੇ ਆਰਥਿਕ ਜ਼ੋਨ ਦੇ ਇੱਕ ਹਿੱਸੇ ਨੂੰ 'ਓਵਰਲੈਪ' ਕਰਦੀ ਹੈ ਜੋ ਨਟੂਨਾ ਟਾਪੂਆਂ ਤੱਕ ਫੈਲੀ ਹੋਈ ਹੈ। ਫਿਲੀਪੀਨਜ਼ ਨੂੰ ਸ਼ਾਮਲ ਕਰਨ ਵਾਲੇ 2016 ਦੇ ਇੱਕ ਅੰਤਰਰਾਸ਼ਟਰੀ ਸਾਲਸੀ ਫੈਸਲੇ ਨੇ ਸਮੁੰਦਰ ਵਿੱਚ ਚੀਨ ਦੇ ਜ਼ਿਆਦਾਤਰ ਦਾਅਵਿਆਂ ਨੂੰ ਅਯੋਗ ਕਰ ਦਿੱਤਾ। ਪਰ, ਚੀਨ ਨੇ ਇਸ ਫੈਸਲੇ ਨੂੰ ਨਜ਼ਰਅੰਦਾਜ਼ ਕੀਤਾ ਹੈ ਅਤੇ ਇਸ ਨੂੰ ਫਰਜ਼ੀ ਦੱਸਿਆ ਹੈ। ਚੀਨੀ ਜਹਾਜ਼ ਨਿਯਮਿਤ ਤੌਰ 'ਤੇ ਇੰਡੋਨੇਸ਼ੀਆ ਦੇ ਉੱਤਰੀ ਨਟੂਨਾ ਸਾਗਰ ਦੇ ਖੇਤਰ ਵਿੱਚ ਦਾਖਲ ਹੁੰਦੇ ਹਨ। ਚੀਨ ਦੇ ਅਜਿਹਾ ਕਰਨ ਨਾਲ ਦੋਵਾਂ ਦੇਸ਼ਾਂ ਵਿਚਾਲੇ ਤਣਾਅ ਕਾਫੀ ਵਧ ਗਿਆ ਹੈ। ਇੰਡੋਨੇਸ਼ੀਆਈ ਅਧਿਕਾਰੀਆਂ ਨੇ ਦੱਸਿਆ ਕਿ ਚੀਨੀ ਤੱਟ ਰੱਖਿਅਕ ਜਹਾਜ਼ ਸੀਸੀਜੀ 5402 ਸੋਮਵਾਰ ਨੂੰ ਐਮਵੀ ਜੀਓ ਕੋਰਲ ਦੇ ਨੇੜੇ ਦੇਖਿਆ ਗਿਆ ਸੀ।