ਫੁੱਟਬਾਲ ਮੈਚ ਦੌਰਾਨ ਵਾਪਰੀ ਦਿਲ ਦਹਿਲਾ ਦੇਣ ਵਾਲੀ ਵਾਰਦਾਤ, 5 ਲੋਕਾਂ ਦੀ ਗੋਲੀ ਮਾਰ ਕੇ ਹੱਤਿਆ

ਇੰਟਰਨੈਸ਼ਨਲ ਡੈਸਕ - ਫੁੱਟਬਾਲ ਜਗਤ ਨਾਲ ਜੁੜੀ ਇਕ ਵੱਡੀ ਖਬਰ ਸਾਹਮਣੇ ਆਈ ਹੈ। ਜਮੈਕਾ ਵਿੱਚ ਇੱਕ ਫੁੱਟਬਾਲ ਮੈਚ ਦੌਰਾਨ ਇੱਕ ਦਿਲ ਦਹਿਲਾ ਦੇਣ ਵਾਲੀ ਘਟਨਾ ਵਾਪਰੀ। ਕਈ ਵਾਰ ਪ੍ਰਸ਼ੰਸਕ ਆਪਣੀ ਟੀਮ ਦਾ ਸਮਰਥਨ ਕਰਨ ਲਈ ਮੈਦਾਨ ਵਿੱਚ ਆਪਸ ਵਿੱਚ ਲੜਦੇ ਹਨ, ਅਜਿਹੀ ਘਟਨਾ ਕਈ ਵਾਰ ਦੇਖਣ ਨੂੰ ਮਿਲੀ ਹੈ। ਪਰ ਪਲੇਜ਼ੈਂਟ ਹਾਈਟਸ, ਰੌਕਫੋਰਟ, ਕਿੰਗਸਟਨ ਵਿੱਚ ਇੱਕ ਫੁੱਟਬਾਲ ਮੈਚ ਦੌਰਾਨ ਅੰਨ੍ਹੇਵਾਹ ਗੋਲੀਆਂ ਚਲਾਈਆਂ ਗਈਆਂ। ਇਸ ਦੌਰਾਨ 5 ਲੋਕਾਂ ਦੀ ਮੌਕੇ 'ਤੇ ਹੀ ਮੌਤ ਹੋ ਗਈ। ਇਸ ਦੇ ਨਾਲ ਹੀ ਕਈ ਲੋਕ ਜ਼ਖਮੀ ਦੱਸੇ ਜਾ ਰਹੇ ਹਨ।

ਲਾਈਵ ਮੈਚ ਦੌਰਾਨ 5 ਲੋਕਾਂ ਦੀ ਗੋਲੀ ਮਾਰ ਕੇ ਹੱਤਿਆ
ਸਥਾਨਕ ਪੁਲਸ ਮੁਤਾਬਕ ਸੋਮਵਾਰ 21 ਅਕਤੂਬਰ ਦੀ ਸ਼ਾਮ ਨੂੰ ਕਿੰਗਸਟਨ ਦੇ ਰੌਕਫੋਰਟ ਦੇ ਪਲੇਜ਼ੈਂਟ ਹਾਈਟਸ ਵਿੱਚ ਇੱਕ ਫੁੱਟਬਾਲ ਮੈਚ ਦੌਰਾਨ ਹੋਏ ਹਮਲੇ ਵਿੱਚ ਪੰਜ ਲੋਕਾਂ ਦੀ ਗੋਲੀ ਮਾਰ ਕੇ ਹੱਤਿਆ ਕਰ ਦਿੱਤੀ ਗਈ। ਕਿੰਗਸਟਨ ਪੂਰਬੀ ਪੁਲਸ ਦੇ ਮੁਖੀ ਸੁਪਰਡੈਂਟ ਟੌਮੀ ਚੈਂਬਰਜ਼ ਨੇ ਦੱਸਿਆ ਕਿ ਗੋਲੀਬਾਰੀ ਦੀ ਘਟਨਾ ਰਾਤ 8 ਵਜੇ ਵਾਪਰੀ। ਜਮੈਕਾ ਕਾਂਸਟੇਬੁਲਰੀ ਫੋਰਸ ਦੀ ਸੂਚਨਾ ਸ਼ਾਖਾ ਕਾਂਸਟੇਬੁਲਰੀ ਕਮਿਊਨੀਕੇਸ਼ਨ ਯੂਨਿਟ ਨੇ ਵੀ ਘਟਨਾ ਦੀ ਪੁਸ਼ਟੀ ਕੀਤੀ ਹੈ। ਇਸ ਦੇ ਨਾਲ ਹੀ ਇਸ ਘਟਨਾ 'ਚ ਕਿੰਨੇ ਲੋਕ ਜ਼ਖਮੀ ਹੋਏ ਹਨ, ਇਸ ਦੀ ਜਾਣਕਾਰੀ ਪੁਲਸ ਨੇ ਨਹੀਂ ਦਿੱਤੀ ਹੈ।

ਪਲੇਜ਼ੈਂਟ ਹਾਈਟਸ ਨੂੰ ਪਹਿਲਾਂ ਵਾਰੇਕਾ ਹਿੱਲਜ਼ ਵਜੋਂ ਜਾਣਿਆ ਜਾਂਦਾ ਸੀ। ਖੇਤਰ ਦਾ ਇੱਕ ਹਿੰਸਕ ਅਤੀਤ ਰਿਹਾ ਹੈ, ਖਾਸ ਤੌਰ 'ਤੇ ਮਾਰੂ ਗੈਂਗ ਲੜਾਈਆਂ ਕਾਰਨ, ਇਹ ਥਾਂ ਬਦਨਾਮ ਹੈ। ਕਿੰਗਸਟਨ ਈਸਟਰਨ ਡਿਵੀਜ਼ਨ ਦੇ ਸੁਪਰਡੈਂਟ ਟੌਮੀਲੀ ਚੈਂਬਰਜ਼ ਦੇ ਹਵਾਲੇ ਨਾਲ ਜਮੈਕਾ ਆਬਜ਼ਰਵਰ ਔਨਲਾਈਨ ਨੇ ਕਿਹਾ, 'ਸੱਤ ਲੋਕਾਂ ਨੂੰ ਗੋਲੀ ਮਾਰ ਦਿੱਤੀ ਗਈ ਅਤੇ ਪੰਜ ਲੋਕਾਂ ਦੀ ਮੌਤ ਹੋ ਗਈ।' ਰਿਪੋਰਟ ਵਿੱਚ ਇਹ ਵੀ ਕਿਹਾ ਗਿਆ ਹੈ ਕਿ ਪੁਲਸ ਨੇ ਗੋਲੀ ਮਾਰ ਕੇ ਮਾਰੇ ਗਏ ਪੰਜ ਵਿਅਕਤੀਆਂ ਵਿੱਚੋਂ ਚਾਰ ਦੀ ਪਛਾਣ ਕਰ ਲਈ ਹੈ। ਇਸ ਤੋਂ ਇਲਾਵਾ ਪੁਲਸ ਨੇ ਇਸ ਘਟਨਾ ਤੋਂ ਬਾਅਦ ਇਲਾਕੇ ਵਿੱਚ 48 ਘੰਟੇ ਦਾ ਕਰਫਿਊ ਲਗਾ ਦਿੱਤਾ ਹੈ।