ਰਾਸ਼ਟਰਪਤੀ ਭਵਨ ਅਤੇ ਏਅਰਪੋਰਟ ਨੇੜੇ ਹੋਏ ਧਮਾਕੇ, ਨਾਈਜਰ ਦੀ ਰਾਜਧਾਨੀ ''ਚ ਦਹਿਸ਼ਤ ਦਾ ਮਾਹੌਲ

ਨਾਈਜਰ - ਨਾਈਜਰ ਦੀ ਰਾਜਧਾਨੀ ਨਿਆਮੀ 'ਚ ਸ਼ੁੱਕਰਵਾਰ ਦੇਰ ਰਾਤ ਤੋਂ ਸ਼ਨੀਵਾਰ ਸਵੇਰ ਤੱਕ ਭਾਰੀ ਗੋਲੀਬਾਰੀ ਅਤੇ ਜ਼ੋਰਦਾਰ ਧਮਾਕੇ ਸੁਣਾਈ ਦਿੱਤੇ। ਇਹ ਘਟਨਾ ਪ੍ਰਸ਼ਾਸਕੀ ਖੇਤਰ ਦੇ ਨੇੜੇ ਵਾਪਰੀ ਜਿਸ 'ਚ ਮੁੱਖ ਅੰਤਰਰਾਸ਼ਟਰੀ ਹਵਾਈ ਅੱਡਾ ਅਤੇ ਰਾਸ਼ਟਰਪਤੀ ਮਹਿਲ ਸਥਿਤ ਹੈ, ਜਿਸ ਨਾਲ ਪੂਰੇ ਇਲਾਕੇ 'ਚ ਦਹਿਸ਼ਤ ਫੈਲ ਗਈ।

ਚਸ਼ਮਦੀਦਾਂ ਦੇ ਅਨੁਸਾਰ, ਡਾਇਓਰੀ ਹਮਾਨੀ ਅੰਤਰਰਾਸ਼ਟਰੀ ਹਵਾਈ ਅੱਡੇ ਦੇ ਅਹਾਤੇ 'ਚ ਅੱਧੀ ਰਾਤ ਤੋਂ ਥੋੜ੍ਹੀ ਦੇਰ ਬਾਅਦ ਭਾਰੀ ਗੋਲੀਬਾਰੀ ਸ਼ੁਰੂ ਹੋ ਗਈ, ਜਿੱਥੇ ਇਕ ਵੱਡਾ ਫੌਜੀ ਅੱਡਾ ਵੀ ਹੈ। ਸੁਰੱਖਿਆ ਕਾਰਨਾਂ ਕਰਕੇ ਇਸ ਖੇਤਰ ਨੂੰ ਬਹੁਤ ਸੰਵੇਦਨਸ਼ੀਲ ਮੰਨਿਆ ਜਾਂਦਾ ਹੈ। ਇਸ ਸਾਲ ਹਵਾਈ ਅੱਡੇ ਦੇ ਨੇੜੇ ਅਸ਼ਾਂਤੀ ਦੀ ਇਹ ਤੀਜੀ ਘਟਨਾ ਹੈ। ਇਸ ਤੋਂ ਇਲਾਵਾ, ਪਠਾਰ ਪ੍ਰਸ਼ਾਸਕੀ ਖੇਤਰ ਤੋਂ ਵੀ ਭਾਰੀ ਗੋਲੀਬਾਰੀ ਦੀ ਰਿਪੋਰਟ ਮਿਲੀ ਹੈ, ਜਿੱਥੇ ਰਾਸ਼ਟਰਪਤੀ ਮਹਿਲ ਅਤੇ ਕਈ ਹੋਰ ਮਹੱਤਵਪੂਰਨ ਸਰਕਾਰੀ ਅਦਾਰੇ ਸਥਿਤ ਹਨ।

ਇਸ ਘਟਨਾ ਤੋਂ ਬਾਅਦ, ਨਾਈਜਰ ਦੀ ਸੱਤਾਧਾਰੀ ਫੌਜੀ ਕੌਂਸਲ, ਨੈਸ਼ਨਲ ਕੌਂਸਲ ਫਾਰ ਦ ਸੇਫਗਾਰਡ ਆਫ਼ ਦ ਹੋਮਲੈਂਡ, ਨੇ ਇਕ ਬਿਆਨ ਜਾਰੀ ਕਰਕੇ ਕਿਹਾ ਕਿ ਦੇਸ਼ ਦੇ ਰੱਖਿਆ ਅਤੇ ਸੁਰੱਖਿਆ ਬਲ ਪੂਰੀ ਤਰ੍ਹਾਂ ਤਾਇਨਾਤ ਅਤੇ ਸਰਗਰਮ ਹਨ। ਫੌਜੀ ਕੌਂਸਲ ਨੇ ਨਾਗਰਿਕਾਂ ਨੂੰ ਇੱਕਜੁੱਟ, ਚੌਕਸ ਅਤੇ ਸਹਿਯੋਗੀ ਰਹਿਣ ਦੀ ਅਪੀਲ ਕੀਤੀ ਹੈ। ਗੋਲੀਬਾਰੀ ਅਤੇ ਧਮਾਕਿਆਂ ਦਾ ਸਹੀ ਕਾਰਨ ਅਜੇ ਪਤਾ ਨਹੀਂ ਹੈ, ਹਾਲਾਂਕਿ ਇੱਕ ਸਥਾਨਕ ਸੰਸਦ ਮੈਂਬਰ ਨੇ ਇਸਨੂੰ "ਕਾਇਰਾਨਾ ਹਮਲਾ" ਦੱਸਿਆ ਹੈ।

 ਜ਼ਿਕਰਯੋਗ ਹੈ ਕਿ ਪਿਛਲੇ ਕੁਝ ਮਹੀਨਿਆਂ 'ਚ ਹਵਾਈ ਅੱਡੇ ਦੇ ਖੇਤਰ ਨੂੰ ਜੇਹਾਦੀ ਸਮੂਹਾਂ ਵੱਲੋਂ ਦੋ ਵਾਰ ਨਿਸ਼ਾਨਾ ਬਣਾਇਆ ਗਿਆ ਹੈ, ਜਿਸ ਕਾਰਨ ਦੇਸ਼ ਦੇ ਫੌਜੀ ਸ਼ਾਸਨ 'ਤੇ ਦਬਾਅ ਲਗਾਤਾਰ ਵਧ ਰਿਹਾ ਹੈ।