Cervical cancer ਹਮੇਸ਼ਾ ਲਈ ਹੋਵੇਗਾ ਖ਼ਤਮ! ਇਸ ਦੇਸ਼ ਨੇ ਲੱਭ ਲਿਆ ਤਰੀਕਾ
Sunday, May 03, 2026 - 01:12 PM (IST)
ਇੰਟਰਨੈਸ਼ਨਲ ਡੈਸਕ- ਸਰਵਾਈਕਲ ਕੈਂਸਰ ਹਰ ਸਾਲ ਦੁਨੀਆ ਭਰ ਵਿੱਚ ਲੱਖਾਂ ਔਰਤਾਂ ਦੀ ਜਾਨ ਲੈਂਦਾ ਹੈ, ਪਰ ਹੁਣ ਆਸਟ੍ਰੇਲੀਆ ਇਸ ਘਾਤਕ ਬਿਮਾਰੀ ਨੂੰ ਜੜ੍ਹੋਂ ਖ਼ਤਮ ਕਰਨ ਵਾਲਾ ਦੁਨੀਆ ਦਾ ਪਹਿਲਾ ਦੇਸ਼ ਬਣਨ ਦੀ ਦਹਿਲੀਜ਼ 'ਤੇ ਖੜ੍ਹਾ ਹੈ। ਆਸਟ੍ਰੇਲੀਆ ਦੀ ਇਸ ਇਤਿਹਾਸਕ ਸਫਲਤਾ ਦੇ ਪਿੱਛੇ Human Papillomavirus (HPV) ਵੈਕਸੀਨੇਸ਼ਨ ਅਤੇ ਨਵੀਂ ਟੈਸਟਿੰਗ ਤਕਨੀਕ ਦਾ ਬਹੁਤ ਵੱਡਾ ਹੱਥ ਹੈ। ਸਾਲ 2007 ਵਿੱਚ ਆਸਟ੍ਰੇਲੀਆ ਨੇ ਆਪਣਾ ਰਾਸ਼ਟਰੀ ਟੀਕਾਕਰਨ ਪ੍ਰੋਗਰਾਮ ਸ਼ੁਰੂ ਕੀਤਾ ਸੀ, ਜਿਸ ਦੇ ਤਹਿਤ ਸਕੂਲਾਂ ਵਿੱਚ ਪੜ੍ਹਨ ਵਾਲੇ 12-13 ਸਾਲ ਦੇ ਬੱਚਿਆਂ ਨੂੰ ਮੁਫ਼ਤ HPV Vaccine ਦਿੱਤੀ ਜਾਂਦੀ ਹੈ। ਇਸ ਮੁਹਿੰਮ ਦਾ ਅਸਰ ਇੰਨਾ ਸ਼ਾਨਦਾਰ ਰਿਹਾ ਕਿ 2021 ਵਿੱਚ ਪਹਿਲੀ ਵਾਰ 25 ਸਾਲ ਤੋਂ ਘੱਟ ਉਮਰ ਦੀਆਂ ਔਰਤਾਂ ਵਿੱਚ ਸਰਵਾਈਕਲ ਕੈਂਸਰ ਦਾ ਕੋਈ ਵੀ ਨਵਾਂ ਕੇਸ ਸਾਹਮਣੇ ਨਹੀਂ ਆਇਆ।
ਵਿਗਿਆਨਕ ਮਾਪਦੰਡਾਂ ਅਨੁਸਾਰ ਕਿਸੇ ਬਿਮਾਰੀ ਦੇ ਖ਼ਾਤਮੇ ਦਾ ਮਤਲਬ ਪ੍ਰਤੀ ਇੱਕ ਲੱਖ ਲੋਕਾਂ ਪਿੱਛੇ 4 ਤੋਂ ਘੱਟ ਕੇਸ ਹੋਣਾ ਹੈ ਅਤੇ ਆਸਟ੍ਰੇਲੀਆ 2035 ਤੱਕ ਜਾਂ ਉਸ ਤੋਂ ਵੀ ਪਹਿਲਾਂ ਇਸ ਟੀਚੇ ਨੂੰ ਹਾਸਲ ਕਰ ਸਕਦਾ ਹੈ। ਇਸ ਸਫਲਤਾ ਵਿੱਚ 2017 ਵਿੱਚ ਲਿਆਂਦੇ ਗਏ 'ਸੈਲਫ-ਕਲੈਕਸ਼ਨ' (Self-collection) ਟੈਸਟਿੰਗ ਵਿਕਲਪ ਨੇ ਵੀ ਅਹਿਮ ਭੂਮਿਕਾ ਨਿਭਾਈ ਹੈ, ਜਿਸ ਨੇ ਉਨ੍ਹਾਂ ਔਰਤਾਂ ਦੀ ਝਿਜਕ ਨੂੰ ਖ਼ਤਮ ਕਰ ਦਿੱਤਾ ਜੋ ਹਸਪਤਾਲ ਜਾ ਕੇ ਜਾਂਚ ਕਰਵਾਉਣ ਤੋਂ ਡਰਦੀਆਂ ਸਨ। ਹਾਲਾਂਕਿ, ਆਦਿਵਾਸੀ ਆਬਾਦੀ ਵਿੱਚ ਮੌਤ ਦਰ ਜ਼ਿਆਦਾ ਹੋਣਾ ਅਤੇ ਕੋਵਿਡ ਤੋਂ ਬਾਅਦ ਵੈਕਸੀਨ ਪ੍ਰਤੀ ਵਧ ਰਹੀ ਝਿਜਕ ਅਜੇ ਵੀ ਕੁਝ ਚੁਣੌਤੀਆਂ ਬਣੀਆਂ ਹੋਈਆਂ ਹਨ।
ਦੂਜੇ ਪਾਸੇ ਭਾਰਤ ਵਰਗੇ ਦੇਸ਼ਾਂ ਲਈ ਇਹ ਸਫਲਤਾ ਇੱਕ ਵੱਡੀ ਉਮੀਦ ਦੀ ਕਿਰਨ ਹੈ ਕਿਉਂਕਿ ਇੱਥੇ ਜਾਗਰੂਕਤਾ ਦੀ ਕਮੀ ਕਾਰਨ ਲੱਖਾਂ ਔਰਤਾਂ ਹਰ ਸਾਲ ਦਮ ਤੋੜ ਦਿੰਦੀਆਂ ਹਨ। ਭਾਰਤ ਨੇ ਵੀ ਹੁਣ ਆਪਣੀ ਸਵਦੇਸ਼ੀ ਵੈਕਸੀਨ 'Cervavac' (ਸਰਵਾਵੈਕ) ਲਾਂਚ ਕਰਕੇ ਇੱਕ ਵੱਡੀ Medical Revolution ਵੱਲ ਕਦਮ ਵਧਾਇਆ ਹੈ, ਜਿਸ ਨਾਲ 9 ਤੋਂ 14 ਸਾਲ ਦੀਆਂ ਲੜਕੀਆਂ ਦਾ ਟੀਕਾਕਰਨ ਕਿਫਾਇਤੀ ਅਤੇ ਆਸਾਨ ਹੋ ਜਾਵੇਗਾ। ਹਾਲਾਂਕਿ, ਅੰਤਰਰਾਸ਼ਟਰੀ ਪੱਧਰ 'ਤੇ ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ ਵੱਲੋਂ Gavi ਗੱਠਜੋੜ ਦੀ ਸਹਾਇਤਾ ਬੰਦ ਕਰਨ ਦੇ ਐਲਾਨ ਨੇ ਵਿਕਾਸਸ਼ੀਲ ਦੇਸ਼ਾਂ ਲਈ ਟੀਕਿਆਂ ਦੀ ਪਹੁੰਚ ਵਿੱਚ ਮੁਸ਼ਕਲਾਂ ਖੜ੍ਹੀਆਂ ਕਰ ਦਿੱਤੀਆਂ ਹਨ। ਮਾਹਿਰਾਂ ਦਾ ਮੰਨਣਾ ਹੈ ਕਿ ਜੇਕਰ ਭਾਰਤ ਵੀ ਆਸਟ੍ਰੇਲੀਆ ਵਾਂਗ ਸਖ਼ਤ ਸਕ੍ਰੀਨਿੰਗ ਅਤੇ ਵੈਕਸੀਨੇਸ਼ਨ ਨੀਤੀਆਂ ਅਪਣਾਵੇ, ਤਾਂ ਆਉਣ ਵਾਲੀਆਂ ਪੀੜ੍ਹੀਆਂ ਨੂੰ ਇਸ ਕੈਂਸਰ ਦੇ ਪਰਛਾਵੇਂ ਤੋਂ ਹਮੇਸ਼ਾ ਲਈ ਬਚਾਇਆ ਜਾ ਸਕਦਾ ਹੈ।
ਜਗ ਬਾਣੀ ਈ-ਪੇਪਰ ਨੂੰ ਪੜ੍ਹਨ ਅਤੇ ਐਪ ਨੂੰ ਡਾਊਨਲੋਡ ਕਰਨ ਲਈ ਇੱਥੇ ਕਲਿੱਕ ਕਰੋ
For Android:- https://play.google.com/store/apps/details?id=com.jagbani&hl=en
For IOS:- https://itunes.apple.com/in/app/id538323711?mt=8
ਨੋਟ- ਇਸ ਖ਼ਬਰ ਬਾਰੇ ਕੁਮੈਂਟ ਕਰ ਦਿਓ ਰਾਏ।
