ਬੀਐਲਐਫ ਦਾ ਵੱਡਾ ਦਾਅਵਾ, ਮਹਿਲਾ ਯੂਨਿਟ ਨੇ ਨੌਂ ਪਾਕਿਸਤਾਨੀ ਫੌਜੀ ਕੀਤੇ ਢੇਰ

ਕਵੇਟਾ (ਭਾਸ਼ਾ): ਪਾਕਿਸਤਾਨ ਦੇ ਅਸ਼ਾਂਤ ਸੂਬੇ ਬਲੋਚਿਸਤਾਨ ਵਿੱਚ ਬਲੋਚਿਸਤਾਨ ਲਿਬਰੇਸ਼ਨ ਫ੍ਰੰਟ (BLF) ਦੁਆਰਾ ਹਾਲ ਹੀ ਵਿੱਚ ਗਠਿਤ ਕੀਤੀ ਗਈ ਨਵੀਂ 'ਮਹਿਲਾ ਯੂਨਿਟ' ਕਰੀਮਾ ਆਰਮਡ ਅਸਾਲਟ ਡਿਵੀਜ਼ਨ (KAAD) ਨੇ ਵੱਖ-ਵੱਖ ਹਮਲਿਆਂ ਵਿੱਚ ਪਾਕਿਸਤਾਨੀ ਫ਼ੌਜ ਦੇ 9 ਜਵਾਨਾਂ ਨੂੰ ਮਾਰਨ ਦਾ ਦਾਅਵਾ ਕੀਤਾ ਹੈ। ਸਮੂਹ ਦੇ ਤਰਜਮਾਨ ਮੇਜਰ ਗਵਾਹਰਾਮ ਬਲੋਚ ਅਨੁਸਾਰ ਇਹ ਕਾਰਵਾਈਆਂ ਬਲੋਚਿਸਤਾਨ ਦੇ ਵੱਖ-ਵੱਖ ਖੇਤਰਾਂ ਵਿੱਚ ਅੰਜਾਮ ਦਿੱਤੀਆਂ ਗਈਆਂ ਹਨ।

BLF ਦੇ ਤਰਜਮਾਨ ਮੇਜਰ ਗਵਾਹਰਾਮ ਬਲੋਚ ਦੁਆਰਾ ਜਾਰੀ ਬਿਆਨ ਅਨੁਸਾਰ, 22 ਸਤੰਬਰ ਨੂੰ ਬਲੋਚਿਸਤਾਨ ਦੇ ਤੁਰਬਤ ਨੇੜੇ ਜੂਸਕ ਵਿੱਚ 'ਚੀਨ-ਪਾਕਿਸਤਾਨ ਆਰਥਿਕ ਲਾਂਘੇ' (CPEC) ਹਾਈਵੇਅ 'ਤੇ ਪਾਕਿਸਤਾਨੀ ਫ਼ੌਜ ਦੀ ਕਵਿੱਕ ਰਿਸਪੌਂਸ ਫੋਰਸ ਦੇ 3 ਵਾਹਨਾਂ ਦੇ ਕਾਫ਼ਲੇ 'ਤੇ KAAD ਦੀਆਂ ਮਹਿਲਾ ਲੜਾਕੂਆਂ ਨੇ ਹਮਲਾ ਕੀਤਾ। ਇਸ ਹਮਲੇ ਵਿੱਚ 6 ਫ਼ੌਜੀ ਮਾਰੇ ਗਏ ਅਤੇ ਕਈ ਹੋਰ ਜ਼ਖ਼ਮੀ ਹੋ ਗਏ। ਇਸ ਆਪ੍ਰੇਸ਼ਨ ਵਿੱਚ BLF ਦੀ 'ਕੁਰਬਾਨ ਯੂਨਿਟ' ਨੇ ਵੀ ਮਹਿਲਾ ਯੂਨਿਟ ਦੀ ਮਦਦ ਕੀਤੀ। ਪਾਕਿਸਤਾਨੀ ਫ਼ੌਜ ਵੱਲੋਂ ਘੇਰਾਬੰਦੀ ਦੀ ਕੀਤੀ ਗਈ ਕੋਸ਼ਿਸ਼ ਨੂੰ ਨਾਕਾਮ ਕਰਦਿਆਂ ਬਲੋਚ ਲੜਾਕੂ ਸੁਰੱਖਿਅਤ ਨਿਕਲਣ 'ਚ ਸਫ਼ਲ ਰਹੇ, ਹਾਲਾਂਕਿ ਮੁਕਾਬਲੇ ਦੌਰਾਨ ਕੁਰਬਾਨ ਯੂਨਿਟ ਦਾ ਇੱਕ ਲੜਾਕੂ ਚਾਕਰ ਮੁਰਾਦ ਉਰਫ਼ ਦਿਲੀਪ ਜਾਨ ਮਾਰਿਆ ਗਿਆ।

ਪੜ੍ਹੋ ਇਹ ਅਹਿਮ ਖ਼ਬਰ- ਪਾਕਿਸਤਾਨ 'ਚ ਵੀ ਲਾਗੂ ਹੋਵੇਗਾ 'ਸਿੱਖ ਮੈਰਿਜ ਐਕਟ' ! ਪ੍ਰਸਤਾਵਿਤ ਬਿੱਲ 'ਤੇ ਹੋਈ ਸਮੀਖਿਆ

BLF ਦੇ ਬਿਆਨ ਅਨੁਸਾਰ KAAD ਦੀਆਂ ਮਹਿਲਾ ਲੜਾਕੂਆਂ ਨੇ ਬਲੋਚਿਸਤਾਨ ਦੇ ਕਲਾਤ ਜ਼ਿਲ੍ਹੇ ਦੀ ਮੰਗੂਚਰ ਤਹਿਸੀਲ ਵਿੱਚ ਕੋਏਟਾ-ਕਰਾਚੀ ਹਾਈਵੇਅ 'ਤੇ 3 ਥਾਵਾਂ 'ਤੇ ਨਾਕੇਬੰਦੀ ਕੀਤੀ। ਮੰਗੂਚਰ ਬਾਜ਼ਾਰ ਵੱਲੋਂ ਇੱਕ ਬਖ਼ਤਰਬੰਦ ਵਾਹਨ ਅਤੇ 2 ਹੋਰ ਗੱਡੀਆਂ ਵਿੱਚ ਆ ਰਹੇ ਪਾਕਿਸਤਾਨੀ ਫ਼ੌਜੀਆਂ 'ਤੇ ਕੀਤੇ ਗਏ ਹਮਲੇ ਵਿੱਚ 2 ਜਵਾਨ ਮਾਰੇ ਗਏ। ਇਸ ਤੋਂ ਬਾਅਦ ਹੋਈ ਇੱਕ ਹੋਰ ਝੜਪ ਦੌਰਾਨ 1 ਹੋਰ ਪਾਕਿਸਤਾਨੀ ਫ਼ੌਜੀ ਮਾਰਿਆ ਗਿਆ ਅਤੇ ਕਈ ਹੋਰ ਜ਼ਖ਼ਮੀ ਹੋ ਗਏ।

ਇਸੇ ਦਰਮਿਆਨ ਇੱਕ ਹੋਰ ਬਲੋਚ ਸੰਗਠਨ 'ਬਲੋਚ ਰਿਪਬਲਿਕਨ ਆਰਮੀ' (BRA) ਨੇ ਡੇਰਾ ਬੁਗਟੀ ਦੇ ਬੇਹ ਲੋਟੀ ਇਲਾਕੇ ਵਿੱਚ 'ਮਾਰੀ ਐਨਰਜੀਜ਼ ਲਿਮਟਿਡ' ਦੀ ਸਾਈਟ 'ਤੇ ਰੋਕਟਾਂ ਅਤੇ ਭਾਰੀ ਹਥਿਆਰਾਂ ਨਾਲ ਹਮਲਾ ਕਰਨ ਦੀ ਜ਼ਿੰਮੇਵਾਰੀ ਲਈ ਹੈ। BRA ਦੇ ਤਰਜਮਾਨ ਸਰਬਾਜ਼ ਬਲੋਚ ਅਨੁਸਾਰ ਇਸ ਹਮਲੇ ਵਿੱਚ ਕੰਪਨੀ ਦੇ 3 ਕਰਮਚਾਰੀ ਮਾਰੇ ਗਏ। ਇਸ ਤੋਂ ਬਾਅਦ ਹੋਈਆਂ ਝੜਪਾਂ ਵਿੱਚ ਪਾਕਿਸਤਾਨੀ ਫ਼ੌਜ ਦੇ 9 ਜਵਾਨ ਅਤੇ 3 ਹੋਰ ਸਰਕਾਰ ਸਮਰਥਿਤ ਲੜਾਕੂ ਮਾਰੇ ਗਏ, ਜਦਕਿ BRA ਦੇ 6 ਲੜਾਕੂਆਂ ਦੀ ਵੀ ਜਾਨ ਚਲੀ ਗਈ। ਇਸੇ ਤਰ੍ਹਾਂ 'ਬਲੋਚ ਰਿਪਬਲਿਕਨ ਗਾਰਡਜ਼' (BRG) ਨੇ ਹਾਜੀ ਸ਼ਹਿਰ 'ਚ ਇੱਕ ਪੁਲਿਸ ਥਾਣੇ ਨੂੰ ਧਮਾਕੇ ਨਾਲ ਉਡਾਉਣ ਅਤੇ ਏਰੀ ਸ਼ਹਿਰ 'ਚ ਸਰਕਾਰੀ ਇਮਾਰਤਾਂ 'ਤੇ ਕਬਜ਼ਾ ਕਰਨ ਦਾ ਦਾਅਵਾ ਕੀਤਾ ਹੈ। ਬਲੋਚਿਸਤਾਨ ਵਿੱਚ ਪਾਕਿਸਤਾਨੀ ਫ਼ੌਜ ਅਤੇ ਪੁਲਿਸ ਬਲਾਂ ਨੂੰ ਨਿਸ਼ਾਨਾ ਬਣਾ ਕੇ ਕੀਤੇ ਜਾ ਰਹੇ ਇਨ੍ਹਾਂ ਹਮਲਿਆਂ ਨਾਲ ਇਲਾਕੇ ਵਿੱਚ ਤਣਾਅ ਕਾਫ਼ੀ ਵਧ ਗਿਆ ਹੈ।

ਜਗ ਬਾਣੀ ਈ-ਪੇਪਰ ਨੂੰ ਪੜ੍ਹਨ ਅਤੇ ਐਪ ਨੂੰ ਡਾਊਨਲੋਡ ਕਰਨ ਲਈ ਇੱਥੇ ਕਲਿੱਕ ਕਰੋ
For Android:- https://play.google.com/store/apps/details?id=com.jagbani&hl=en
For IOS:- https://itunes.apple.com/in/app/id538323711?mt=8

ਨੋਟ- ਇਸ ਖ਼ਬਰ ਬਾਰੇ ਕੁਮੈਂਟ ਕਰ ਦਿਓ ਰਾਏ।