ਆਸਟ੍ਰੇਲੀਆ : ਔਰਤਾਂ ਨੂੰ ਪਰੇਸ਼ਾਨ ਕਰਨ ਦੇ ਦੋਸ਼ 'ਚ ਪੁਲਸ ਅਧਿਕਾਰੀ ਨੂੰ ਜੇਲ੍ਹ

ਵਿਕਟੋਰੀਆ- ਆਸਟ੍ਰੇਲੀਆ ਵਿਖੇ ਵਿਕਟੋਰੀਆ ਸੂਬੇ ਵਿਚ ਇੱਕ ਪੁਲਸ ਅਧਿਕਾਰੀ, ਜਿਸ ਨੇ ਆਪਣੇ ਅਹੁਦੇ ਦੀ ਦੁਰਵਰਤੋਂ ਕਰਦੇ ਹੋਏ ਕਮਜ਼ੋਰ ਔਰਤਾਂ ਨਾਲ ਸਰੀਰਕ ਸਬੰਧ ਬਣਾਉਣ ਦੀ ਕੋਸ਼ਿਸ਼ ਕੀਤੀ, ਨੂੰ ਛੇ ਮਹੀਨੇ ਸਲਾਖਾਂ ਪਿੱਛੇ ਬਿਤਾਉਣਗੇ ਪੈਣਗੇ। 42 ਸਾਲਾ ਬ੍ਰੈਟ ਜਾਨਸਨ ਨੇ ਦਾਅਵਾ ਕੀਤਾ ਕਿ ਉਸ ਨੇ ਦੋ ਦਹਾਕੇ ਪਹਿਲਾਂ ਇੱਕ ਸਾਬਕਾ ਮੰਗੇਤਰ ਦੁਆਰਾ ਧੋਖਾ ਦਿੱਤੇ ਜਾਣ ਤੋਂ ਬਾਅਦ ਆਪਣੇ ਸਵੈ-ਮਾਣ ਨੂੰ ਵਧਾਉਣ ਲਈ ਵਿਕਟੋਰੀਆ ਪੁਲਸ ਅਧਿਕਾਰੀ ਵਜੋਂ ਆਪਣੇ ਕੰਮ ਰਾਹੀਂ ਮਿਲਣ ਵਾਲੀਆਂ ਔਰਤਾਂ ਦਾ ਪਿੱਛਾ ਕਰਨਾ ਸ਼ੁਰੂ ਕੀਤਾ ਸੀ। ਨੌਂ ਸਾਲਾਂ ਵਿੱਚ ਉਸਨੇ ਕਮਜ਼ੋਰ ਔਰਤਾਂ ਦੇ ਨਿੱਜੀ ਵੇਰਵਿਆਂ ਦਾ ਪਤਾ ਲਗਾਉਣ ਲਈ ਪ੍ਰਾਈਵੇਟ ਪੁਲਸ ਡੇਟਾਬੇਸ ਦੀ ਵਰਤੋਂ ਕੀਤੀ, ਜਿਹਨਾਂ ਨਾਲ ਉਹ ਸਬੰਧ ਬਣਾਉਣਾ ਚਾਹੁੰਦਾ ਸੀ।

ਇਨ੍ਹਾਂ 'ਚ ਅਪਰਾਧ ਦੀਆਂ ਸ਼ਿਕਾਰ ਅਤੇ ਦੋ ਹੋਰ ਔਰਤਾਂ ਸ਼ਾਮਲ ਸਨ ਜੋ ਪਰਿਵਾਰਕ ਹਿੰਸਾ ਕਾਰਨ ਪੁਲਸ ਦੀ ਮਦਦ ਮੰਗ ਰਹੀਆਂ ਸਨ। ਜਾਨਸਨ ਵਿਕਟੋਰੀਅਨ ਪੁਲਸ ਲਾਅ ਇਨਫੋਰਸਮੈਂਟ ਅਸਿਸਟੈਂਸ ਪ੍ਰੋਗਰਾਮ (LEAP) ਤੋਂ ਉਨ੍ਹਾਂ ਦੀ ਜਾਣਕਾਰੀ ਪ੍ਰਾਪਤ ਕਰਦਾ ਸੀ ਅਤੇ ਔਰਤਾਂ ਨੂੰ ਮਿਲਣ ਦੀ ਕੋਸ਼ਿਸ਼ ਕਰਦਾ। ਉਹ ਉਨ੍ਹਾਂ ਨੂੰ ਟੈਕਸਟ ਸੁਨੇਹੇ ਭੇਜਦਾ, ਕਾਲ ਕਰਦਾ ਜਾਂ ਉਨ੍ਹਾਂ ਦੇ ਘਰ ਜਾਂਦਾ ਸੀ। ਉਸਨੇ 2010 ਅਤੇ 2019 ਦਰਮਿਆਨ ਰਿਚਮੰਡ, ਫਾਕਨਰ, ਸਨਸ਼ਾਈਨ ਅਤੇ ਪਿਰਾਮਿਡ ਹਿੱਲ ਪੁਲਸ ਸਟੇਸ਼ਨਾਂ ਵਿੱਚ ਕੰਮ ਕਰਦੇ ਹੋਏ ਜਨਤਕ ਦਫਤਰ ਵਿੱਚ ਦੁਰਵਿਹਾਰ ਦੇ 10 ਦੋਸ਼ਾਂ ਨੂੰ ਸਵੀਕਾਰ ਕੀਤਾ। ਦੋਸ਼ ਲੱਗਣ ਤੋਂ ਬਾਅਦ ਉਸਨੇ 2021 ਵਿੱਚ ਵਿਕਟੋਰੀਆ ਪੁਲਸ ਤੋਂ ਅਸਤੀਫਾ ਦੇ ਦਿੱਤਾ।

ਪੜ੍ਹੋ ਇਹ ਅਹਿਮ ਖ਼ਬਰ-ਯੂਕੇ ਦੀਆਂ ਪਹਿਲੀਆਂ ਬਿਨਾਂ ਡਰਾਈਵਰ ਵਾਲੀਆਂ ਬੱਸਾਂ ਸਕਾਟਲੈਂਡ ਦੀ ਰਾਜਧਾਨੀ 'ਚ ਹੋਈਆਂ ਸ਼ੁਰੂ 

ਜੱਜ ਲਿਜ਼ ਗੈਨੋਰ ਨੇ ਜਾਨਸਨ ਨੂੰ ਕਿਹਾ ਕਿ “ਤੁਸੀਂ ਉਨ੍ਹਾਂ ਲੋਕਾਂ ਦਾ ਸ਼ਿਕਾਰ ਕੀਤਾ ਜਿਨ੍ਹਾਂ ਦੀ ਤੁਸੀਂ ਸੇਵਾ ਅਤੇ ਸੁਰੱਖਿਆ ਕਰਨ ਦੀ ਸਹੁੰ ਖਾਧੀ ਸੀ,”। ਜਾਨਸਨ ਇਸ ਦੌਰਾਨ ਚੁੱਪ ਰਹੇ। ਉਸਨੂੰ ਮੰਗਲਵਾਰ ਨੂੰ ਛੇ ਮਹੀਨਿਆਂ ਲਈ ਜੇਲ੍ਹ ਭੇਜ ਦਿੱਤਾ ਗਿਆ। ਸਜ਼ਾ ਮੁਤਾਬਕ ਫਿਰ ਉਸਨੂੰ 300 ਘੰਟੇ ਦਾ ਬਿਨਾਂ ਭੁਗਤਾਨ ਕੀਤੇ ਕਮਿਊਨਿਟੀ ਕੰਮ ਕਰਨਾ ਹੋਵੇਗਾ ਅਤੇ ਦੋ ਸਾਲਾਂ ਦੇ ਕਮਿਊਨਿਟੀ ਸੁਧਾਰ ਆਰਡਰ 'ਤੇ ਮਾਨਸਿਕ ਸਿਹਤ ਦਾ ਇਲਾਜ ਕਰਵਾਉਣਾ ਹੋਵੇਗਾ।

ਨੋਟ- ਇਸ ਖ਼ਬਰ ਬਾਰੇ ਕੁਮੈਂਟ ਕਰ ਦਿਓ ਰਾਏ।