60 ਦਿਨ ਜਾਂ ਫਿਰ ਦੇਸ਼ ਛੱਡੋ! ਅਮਰੀਕਾ 'ਚ ਭਾਰਤੀ ਟੈੱਕ ਮਾਹਿਰਾਂ 'ਤੇ ਲਟਕੀ ਤਲਵਾਰ

ਇੰਟਰਨੈਸ਼ਨਲ ਡੈਸਕ: ਅਮਰੀਕਾ ਵਿੱਚ ਰਹਿ ਰਹੇ ਹਜ਼ਾਰਾਂ ਭਾਰਤੀ ਆਈ.ਟੀ. (IT) ਪੇਸ਼ੇਵਰਾਂ ਲਈ ਆਉਣ ਵਾਲੇ ਕੁਝ ਮਹੀਨੇ ਬਹੁਤ ਹੀ ਚੁਣੌਤੀਪੂਰਨ ਸਾਬਤ ਹੋਣ ਵਾਲੇ ਹਨ। ਮੇਟਾ (Meta), ਐਮਾਜ਼ਾਨ (Amazon) ਅਤੇ ਓਰੇਕਲ (Oracle) ਵਰਗੀਆਂ ਵੱਡੀਆਂ ਟੈੱਕ ਕੰਪਨੀਆਂ ਵਿੱਚ ਚੱਲ ਰਹੀ ਛਾਂਟੀ ਕਾਰਨ H-1B ਵੀਜ਼ਾ 'ਤੇ ਰਹਿ ਰਹੇ ਭਾਰਤੀਆਂ ਦੇ ਸਿਰ 'ਤੇ ਦੇਸ਼ ਨਿਕਾਲੇ ਦੀ ਤਲਵਾਰ ਲਟਕ ਗਈ ਹੈ। ਅਮਰੀਕੀ ਇਮੀਗ੍ਰੇਸ਼ਨ ਨਿਯਮਾਂ ਅਨੁਸਾਰ ਨੌਕਰੀ ਜਾਣ ਤੋਂ ਬਾਅਦ ਇਹਨਾਂ ਕਰਮਚਾਰੀਆਂ ਕੋਲ ਨਵਾਂ ਸਪਾਂਸਰ ਲੱਭਣ ਲਈ ਸਿਰਫ਼ 60 ਦਿਨਾਂ ਦਾ ਸਮਾਂ ਹੁੰਦਾ ਹੈ, ਜਿਸ ਵਿੱਚ ਅਸਫਲ ਰਹਿਣ 'ਤੇ ਉਨ੍ਹਾਂ ਨੂੰ ਅਮਰੀਕਾ ਛੱਡਣਾ ਪਵੇਗਾ।

ਸਾਲ 2026 ਵਿੱਚ ਹੁਣ ਤੱਕ 144 ਟੈੱਕ ਕੰਪਨੀਆਂ ਨੇ 1,10,000 ਤੋਂ ਵੱਧ ਕਰਮਚਾਰੀਆਂ ਨੂੰ ਨੌਕਰੀਓਂ ਕੱਢ ਦਿੱਤਾ ਹੈ। ਇਹਨਾਂ ਵਿੱਚੋਂ ਹਜ਼ਾਰਾਂ ਭਾਰਤੀ H-1B ਵੀਜ਼ਾ ਧਾਰਕ ਹੋਣ ਦਾ ਅੰਦਾਜ਼ਾ ਹੈ। ਵਾਧੂ ਸਮਾਂ ਲੈਣ ਲਈ ਕਈ ਭਾਰਤੀ ਕਰਮਚਾਰੀ ਹੁਣ ਅਸਥਾਈ ਤੌਰ 'ਤੇ B-2 ਵਿਜ਼ਿਟਰ ਵੀਜ਼ਾ ਵਿੱਚ ਬਦਲਣ ਦੀ ਕੋਸ਼ਿਸ਼ ਕਰ ਰਹੇ ਹਨ, ਪਰ ਇਮੀਗ੍ਰੇਸ਼ਨ ਵਿਭਾਗ ਹੁਣ ਵਾਧੂ ਕਾਗਜ਼ੀ ਕਾਰਵਾਈ ਦੀ ਮੰਗ ਕਰ ਰਿਹਾ ਹੈ ਅਤੇ ਅਰਜ਼ੀਆਂ ਰੱਦ ਹੋਣ ਦੀ ਦਰ ਵੀ ਵਧ ਗਈ ਹੈ।

ਹਜ਼ਾਰਾਂ ਭਾਰਤੀ ਪਿਛਲੇ ਇੱਕ ਦਹਾਕੇ ਤੋਂ ਅਮਰੀਕਾ ਵਿੱਚ ਰਹਿ ਰਹੇ ਹਨ ਅਤੇ ਗ੍ਰੀਨ ਕਾਰਡ ਦੀ ਲੰਬੀ ਉਡੀਕ ਸੂਚੀ ਵਿੱਚ ਹਨ। ਛਾਂਟੀ ਕਾਰਨ ਹੁਣ ਉਨ੍ਹਾਂ ਦੇ ਪੱਕੇ ਹੋਣ ਦੇ ਸੁਪਨੇ ਨੂੰ ਵੱਡਾ ਝਟਕਾ ਲੱਗਾ ਹੈ।ਇਹ ਸੰਕਟ ਸਿਰਫ਼ ਨੌਕਰੀ ਖੁੱਸਣ ਤੱਕ ਸੀਮਤ ਨਹੀਂ ਹੈ। ਕਈ ਭਾਰਤੀ ਪੇਸ਼ੇਵਰਾਂ ਦੇ ਬੱਚੇ ਅਮਰੀਕਾ ਵਿੱਚ ਪੈਦਾ ਹੋਏ ਹਨ ਅਤੇ ਉਨ੍ਹਾਂ ਦੇ ਪਰਿਵਾਰ ਉੱਥੇ ਪੂਰੀ ਤਰ੍ਹਾਂ ਸੈਟਲ ਹਨ। ਮਾਹਿਰਾਂ ਅਨੁਸਾਰ ਭਾਰਤੀ H-1B ਧਾਰਕ ਇਸ ਸਥਿਤੀ ਨੂੰ ਸਭ ਤੋਂ ਵੱਧ ਮਹਿਸੂਸ ਕਰ ਰਹੇ ਹਨ ਕਿਉਂਕਿ ਉਨ੍ਹਾਂ ਕੋਲ ਅੱਗੇ ਜਾਣ ਲਈ ਰਸਤੇ ਬੰਦ ਹੁੰਦੇ ਜਾ ਰਹੇ ਹਨ।

ਮੌਜੂਦਾ ਹਾਲਾਤ ਨੂੰ ਦੇਖਦਿਆਂ ਹੁਣ ਕਈ ਭਾਰਤੀ ਅਮਰੀਕਾ ਛੱਡ ਕੇ ਕੈਨੇਡਾ ਜਾਂ ਯੂਰਪ ਜਾਣ ਬਾਰੇ ਗੰਭੀਰਤਾ ਨਾਲ ਸੋਚ ਰਹੇ ਹਨ। ਕੈਨੇਡਾ ਦੇ 'ਐਕਸਪ੍ਰੈਸ ਐਂਟਰੀ' ਅਤੇ 'ਗਲੋਬਲ ਟੈਲੇਂਟ ਸਟ੍ਰੀਮ' ਵਰਗੇ ਪ੍ਰੋਗਰਾਮ ਭਾਰਤੀਆਂ ਲਈ ਖਿੱਚ ਦਾ ਕੇਂਦਰ ਬਣ ਰਹੇ ਹਨ।ਮਾਰਕ ਜ਼ੁਕਰਬਰਗ ਦੀ ਕੰਪਨੀ ਮੇਟਾ ਹੁਣ ਆਰਟੀਫੀਸ਼ੀਅਲ ਇੰਟੈਲੀਜੈਂਸ (AI) 'ਤੇ ਧਿਆਨ ਕੇਂਦਰਿਤ ਕਰ ਰਹੀ ਹੈ, ਜਿਸ ਕਾਰਨ ਇੰਜੀਨੀਅਰਿੰਗ ਅਤੇ ਪ੍ਰੋਡਕਟ ਵਿਭਾਗਾਂ ਵਿੱਚ ਹੋਰ ਛਾਂਟੀ ਹੋਣ ਦੀ ਸੰਭਾਵਨਾ ਹੈ। ਇਸ ਕਾਰਨ H-1B ਵੀਜ਼ਾ ਧਾਰਕਾਂ ਵਿੱਚ ਚਿੰਤਾ ਹੋਰ ਵੀ ਵਧ ਗਈ ਹੈ।

ਜਗ ਬਾਣੀ ਈ-ਪੇਪਰ ਨੂੰ ਪੜ੍ਹਨ ਅਤੇ ਐਪ ਨੂੰ ਡਾਊਨਲੋਡ ਕਰਨ ਲਈ ਇੱਥੇ ਕਲਿੱਕ ਕਰੋ
For Android:- https://play.google.com/store/apps/details?id=com.jagbani&hl=en
For IOS:- https://itunes.apple.com/in/app/id538323711?mt=8

ਨੋਟ-  ਇਸ ਖ਼ਬਰ ਬਾਰੇ ਕੁਮੈਂਟ ਕਰ ਦਿਓ ਰਾਏ।