ਹੈਲਥ ਡੈਸਕ - ਪੁਰਾਣੇ ਸਮੇਂ 'ਚ ਸਾਡੇ ਬਜ਼ੁਰਗ ਲੰਬੀ ਅਤੇ ਤੰਦਰੁਸਤ ਉਮਰ ਭੋਗਦੇ ਸਨ, ਜਿਸ ਦਾ ਇਕ ਵੱਡਾ ਕਾਰਨ ਉਨ੍ਹਾਂ ਦਾ ਸ਼ੁੱਧ ਖਾਣ-ਪੀਣ ਸੀ। ਅੱਜ ਦੇ ਦੌਰ 'ਚ ਭਾਵੇਂ ਬਾਜ਼ਾਰ ਰਿਫਾਇੰਡ ਤੇਲਾਂ ਨਾਲ ਭਰਿਆ ਪਿਆ ਹੈ, ਪਰ ਆਧੁਨਿਕ ਵਿਗਿਆਨ ਅਤੇ ਆਯੁਰਵੈਦ ਮੁੜ ਤੋਂ 'ਸਰ੍ਹੋਂ ਦੇ ਤੇਲ' ਨੂੰ ਸਭ ਤੋਂ ਉੱਤਮ ਮੰਨ ਰਹੇ ਹਨ। ਕੀ ਤੁਸੀਂ ਜਾਣਦੇ ਹੋ ਕਿ ਸਰ੍ਹੋਂ ਦੇ ਤੇਲ 'ਚ ਬਣੀ ਸਬਜ਼ੀ ਸਿਰਫ਼ ਸੁਆਦੀ ਹੀ ਨਹੀਂ, ਸਗੋਂ ਤੁਹਾਡੇ ਸਰੀਰ ਲਈ ਇਕ 'ਕੁਦਰਤੀ ਕਵਚ' ਵਾਂਗ ਕੰਮ ਕਰਦੀ ਹੈ?

ਸਰੀਰ 'ਤੇ ਹੁੰਦੇ ਹਨ ਇਹ 5 ਚਮਤਕਾਰੀ ਅਸਰ :-

ਦਿਲ ਦੇ ਦੌਰੇ ਦਾ ਖ਼ਤਰਾ ਹੁੰਦਾ ਹੈ ਘੱਟ 
ਸਰ੍ਹੋਂ ਦੇ ਤੇਲ 'ਚ ਮੌਜੂਦ ਓਮੇਗਾ-3 ਅਤੇ ਓਮੇਗਾ-6 ਫੈਟੀ ਐਸਿਡ ਖੂਨ ਦੀਆਂ ਨਾੜੀਆਂ 'ਚੋਂ ਮਾੜੇ ਕੋਲੇਸਟ੍ਰੋਲ (LDL) ਨੂੰ ਸਾਫ਼ ਕਰਦੇ ਹਨ। ਇਸ ਨਾਲ ਦਿਲ ਦੀਆਂ ਬਿਮਾਰੀਆਂ ਅਤੇ ਹਾਰਟ ਅਟੈਕ ਦਾ ਖ਼ਤਰਾ ਕਾਫ਼ੀ ਹੱਦ ਤੱਕ ਘੱਟ ਜਾਂਦਾ ਹੈ।

ਪਾਚਨ ਤੰਤਰ ਲਈ ਵਰਦਾਨ
ਇਹ ਤੇਲ ਸਾਡੇ ਪੇਟ 'ਚ ਪਾਚਕ ਰਸ ਪੈਦਾ ਕਰਨ 'ਚ ਮਦਦ ਕਰਦਾ ਹੈ। ਜਦੋਂ ਅਸੀਂ ਇਸ 'ਚ ਬਣੀ ਸਬਜ਼ੀ ਖਾਂਦੇ ਹਾਂ, ਤਾਂ ਇਹ ਭੁੱਖ ਵਧਾਉਂਦਾ ਹੈ ਅਤੇ ਕਬਜ਼ ਵਰਗੀਆਂ ਸਮੱਸਿਆਵਾਂ ਨੂੰ ਜੜ੍ਹੋਂ ਖ਼ਤਮ ਕਰਨ 'ਚ ਮਦਦਗਾਰ ਹੁੰਦਾ ਹੈ।

ਕੁਦਰਤੀ ਐਂਟੀ-ਬੈਕਟੀਰੀਅਲ ਗੁਣ
ਸਰ੍ਹੋਂ ਦੇ ਤੇਲ 'ਚ 'ਗਲੂਕੋਸਿਨੋਲੇਟ' ਹੁੰਦਾ ਹੈ, ਜੋ ਸਰੀਰ ਨੂੰ ਇਨਫੈਕਸ਼ਨ ਨਾਲ ਲੜਨ ਦੀ ਤਾਕਤ ਦਿੰਦਾ ਹੈ। ਇਹ ਸਰੀਰ ਦੇ ਅੰਦਰੂਨੀ ਸਿਸਟਮ ਨੂੰ ਬੈਕਟੀਰੀਆ ਅਤੇ ਫੰਗਸ ਤੋਂ ਬਚਾ ਕੇ ਰੱਖਦਾ ਹੈ।

ਜੋੜਾਂ ਦੇ ਦਰਦ ਤੋਂ ਰਾਹਤ
ਸਰ੍ਹੋਂ ਦੇ ਤੇਲ ਦੀ ਤਾਸੀਰ ਗਰਮ ਹੁੰਦੀ ਹੈ। ਇਹ ਸਰੀਰ ਦੇ ਅੰਦਰੂਨੀ ਸੋਜ (Inflammation) ਨੂੰ ਘਟਾਉਂਦਾ ਹੈ, ਜਿਸ ਨਾਲ ਗਠੀਆ ਜਾਂ ਜੋੜਾਂ ਦੇ ਦਰਦ ਵਾਲੇ ਮਰੀਜ਼ਾਂ ਨੂੰ ਬਹੁਤ ਰਾਹਤ ਮਿਲਦੀ ਹੈ।

ਕੈਂਸਰ ਸੈੱਲਾਂ ਨੂੰ ਰੋਕਣ 'ਚ ਮਦਦਗਾਰ
ਕਈ ਤਾਜ਼ਾ ਖੋਜਾਂ ਮੁਤਾਬਕ, ਸਰ੍ਹੋਂ ਦੇ ਤੇਲ ਦਾ ਨਿਯਮਤ ਸੇਵਨ ਪੇਟ ਅਤੇ ਪਾਚਨ ਪ੍ਰਣਾਲੀ ਦੇ ਕੈਂਸਰ ਸੈੱਲਾਂ ਨੂੰ ਵਧਣ ਤੋਂ ਰੋਕਣ 'ਚ ਮਦਦਗਾਰ ਸਾਬਤ ਹੋ ਸਕਦਾ ਹੈ।

ਸਬਜ਼ੀ ਬਣਾਉਣ ਵੇਲੇ ਰੱਖੋ ਇਹ ਖਾਸ ਧਿਆਨ
ਮਾਹਿਰਾਂ ਅਨੁਸਾਰ, ਸਰ੍ਹੋਂ ਦੇ ਤੇਲ ਨੂੰ ਹਮੇਸ਼ਾ 'ਧੂੰਆਂ ਨਿਕਲਣ ਤੱਕ' ਗਰਮ ਕਰਨਾ ਚਾਹੀਦਾ ਹੈ। ਇਸ ਨਾਲ ਇਸ 'ਚ ਮੌਜੂਦ ਤਿੱਖਾਪਨ (ਕੌੜਾਪਣ) ਉੱਡ ਜਾਂਦਾ ਹੈ ਅਤੇ ਇਹ ਸਰੀਰ 'ਚ ਪਚਣ ਲਈ ਬਹੁਤ ਹਲਕਾ ਹੋ ਜਾਂਦਾ ਹੈ।