Facebook ਚਲਾਉਣ ਵਾਲੇ ਹੋ ਜਾਣ ਸਾਵਧਾਨ! ਹੋ ਸਕਦੈ ਵੱਡਾ ਨੁਕਸਾਨ

ਗੈਜੇਟ ਡੈਸਕ - ਫੇਸਬੁਕ ਯੂਜ਼ਰਸ ਲਈ ਇਕ ਹੈਰਾਨ ਕਰਨ ਵਾਲੀ ਖਬਰ ਸਾਹਮਣੇ ਆਈ ਹੈ। ਦੱਸ ਦਈਏ ਕਿ ਦੁਨੀਆ ਭਰ ਦੇ 1.2 ਅਰਬ ਲੋਕਾਂ ਦਾ ਫੇਸਬੁੱਕ ਡੇਟਾ ਚੋਰੀ ਹੋ ਗਿਆ ਹੈ। ਤੁਹਾਡੇ ਫੇਸਬੁੱਕ ਖਾਤੇ ਦੇ ਅੰਦਰ ਮੌਜੂਦ ਵੇਰਵੇ ਜਿਵੇਂ ਕਿ ਨਾਂ, ਮੋਬਾਈਲ ਨੰਬਰ, ਪਤਾ, ਜਨਮ ਮਿਤੀ, ਸ਼ਹਿਰ, ਰਾਜ ਅਤੇ ਦੇਸ਼ ਆਦਿ ਇੱਕ ਸਾਈਬਰ ਅਪਰਾਧੀ ਵੱਲੋ ਚੋਰੀ ਕੀਤੇ ਗਏ ਹਨ। ਇਕ ਰਿਪੋਰਟ ਅਨੁਸਾਰ, ਸਾਈਬਰ ਅਪਰਾਧੀ ਉਸ ਡੇਟਾ ਨੂੰ ਡਾਰਕ ਵੈੱਬ 'ਤੇ ਵੇਚ ਰਿਹਾ ਹੈ। ਅਪਰਾਧੀ ਦਾ ਨਾਮ ਬਾਈਟਬ੍ਰੇਕਰ ਹੈ। ਉਸ ਨੇ ਦਾਅਵਾ ਕੀਤਾ ਹੈ ਕਿ ਉਸ ਨੇ ਫੇਸਬੁੱਕ ਟੂਲ 'ਚ ਇਕ ਨੁਕਸ ਲੱਭ ਕੇ ਡੇਟਾ ਚੋਰੀ ਕੀਤਾ ਹੈ।

ਹਾਲਾਂਕਿ, ਕੁਝ ਸੁਰੱਖਿਆ ਮਾਹਰਾਂ ਨੂੰ ਸ਼ੱਕ ਹੈ ਕਿ ਬਾਈਟਬ੍ਰੇਕਰ ਕੋਲ ਇੰਨਾ ਡੇਟਾ ਨਹੀਂ ਹੋ ਸਕਦਾ। ਇਸ ਦੇ ਨਾਲ ਹੀ, ਮੈਟਾ ਨੇ ਇਸ ਮਾਮਲੇ 'ਚ ਕਿਹਾ ਹੈ ਕਿ ਡੇਟਾ ਸਾਲ 2021 ਦੇ ਪੁਰਾਣੇ ਚੋਰੀ ਕੀਤੇ ਡੇਟਾ ਤੋਂ ਲਿਆ ਗਿਆ ਹੈ, ਜਿਸ 'ਚ 50 ਕਰੋੜ ਤੋਂ ਵੱਧ ਲੋਕ ਪ੍ਰਭਾਵਿਤ ਹੋਏ ਸਨ। ਕੰਪਨੀ ਨੇ ਇਕ ਬਿਆਨ 'ਚ ਕਿਹਾ ਕਿ ਇਹ 2021 ਦਾ ਹੈ। ਕੋਈ ਨਵਾਂ ਦਾਅਵਾ ਨਹੀਂ ਹੈ। ਅਸੀਂ ਇਸ ਦਾ ਖੁਲਾਸਾ ਕਈ ਸਾਲ ਪਹਿਲਾਂ ਕੀਤਾ ਸੀ ਅਤੇ ਅਜਿਹੀਆਂ ਘਟਨਾਵਾਂ ਨੂੰ ਰੋਕਣ ਲਈ ਕਦਮ ਚੁੱਕੇ ਹਨ।

ਇਸ ਚੋਰੀ ਨੇ ਇਕ ਵਾਰ ਫਿਰ ਮੈਟਾ ਅਤੇ ਫੇਸਬੁੱਕ 'ਤੇ ਯੂਜ਼ਰਸ ਦੀ ਸੁਰੱਖਿਆ 'ਤੇ ਸਵਾਲ ਖੜ੍ਹੇ ਕਰ ਦਿੱਤੇ ਹਨ। ਕਿਹਾ ਜਾ ਰਿਹਾ ਹੈ ਕਿ ਵੈੱਬ ਸਕ੍ਰੈਪਿੰਗ ਰਾਹੀਂ ਡੇਟਾ ਕਾਪੀ ਅਤੇ ਪੇਸਟ ਕੀਤਾ ਗਿਆ ਹੈ। ਵੈੱਬ ਸਕ੍ਰੈਪਿੰਗ ਇਕ ਤਕਨੀਕ ਹੈ ਜਿਸ 'ਚ ਆਟੋਮੇਟਿਡ ਟੂਲਸ ਦੀ ਵਰਤੋਂ ਕਰਕੇ ਵੈਬਸਾਈਟਾਂ ਤੋਂ ਡੇਟਾ ਇਕੱਠਾ ਕੀਤਾ ਜਾਂਦਾ ਹੈ। ਜੇਕਰ ਇਸ ਨੂੰ ਆਸਾਨ ਤਰੀਕੇ ਨਾਲ ਸਮਝਿਆ ਜਾਵੇ, ਤਾਂ ਇਹ ਡੇਟਾ ਨੂੰ ਕਾਪੀ ਅਤੇ ਪੇਸਟ ਕਰਨ ਵਰਗਾ ਹੈ। ਰਿਪੋਰਟ ਦੇ ਅਨੁਸਾਰ, ਚੋਰੀ ਕੀਤੇ ਡੇਟਾ 'ਚ ਜਾਣਕਾਰੀ ਦੀ ਮਾਤਰਾ ਕਿਸੇ ਵੀ ਯੂਜ਼ਰ ਦੀ ਪਛਾਣ ਆਸਾਨੀ ਨਾਲ ਪ੍ਰਗਟ ਕਰ ਸਕਦੀ ਹੈ।

ਇਹ ਅਜੇ ਪਤਾ ਨਹੀਂ ਲੱਗ ਸਕਿਆ ਹੈ ਕਿ ਇਹ 1.2 ਅਰਬ ਯੂਜ਼ਰ ਕਿਹੜੇ ਦੇਸ਼ਾਂ ਨਾਲ ਸਬੰਧਤ ਹਨ ਕਿਉਂਕਿ ਦੁਨੀਆ ਭਰ ਦੇ ਫੇਸਬੁੱਕ ਯੂਜ਼ਰਸ ਦਾ ਡੇਟਾ ਚੋਰੀ ਹੋ ਗਿਆ ਹੈ, ਇਸ ਲਈ ਭਾਰਤੀ ਯੂਜ਼ਰ ਵੀ ਇਸ 'ਚ ਸ਼ਾਮਲ ਹੋ ਸਕਦੇ ਹਨ। ਮਾਹਿਰਾਂ ਦਾ ਕਹਿਣਾ ਹੈ ਕਿ ਲੋਕਾਂ ਨੂੰ ਆਪਣੇ ਫੇਸਬੁੱਕ ਖਾਤੇ ਦਾ ਪਾਸਵਰਡ ਬਦਲਣਾ ਚਾਹੀਦਾ ਹੈ। ਜੇਕਰ ਫੇਸਬੁੱਕ ਖਾਤੇ 'ਚ ਵੀ ਬੈਂਕ ਵੇਰਵੇ ਹਨ, ਤਾਂ ਬੈਂਕ ਖਾਤਾ ਨੰਬਰ 'ਤੇ ਧੋਖਾਧੜੀ ਦੀ ਚੇਤਾਵਨੀ ਸੈੱਟ ਕਰਨੀ ਚਾਹੀਦੀ ਹੈ ਜਾਂ ਤੁਹਾਡੇ ਬੈਂਕ ਖਾਤੇ ਨਾਲ ਸਬੰਧਤ ਸਾਰੇ ਪਾਸਵਰਡ ਬਦਲ ਦੇਣੇ ਚਾਹੀਦੇ ਹਨ।

ਫੇਸਬੁੱਕ ਡਾਟਾ ਚੋਰੀ 'ਤੇ, ਮੈਟਾ ਦਾ ਕਹਿਣਾ ਹੈ ਕਿ ਸਾਈਬਰ ਅਪਰਾਧੀ ਜਿਸ ਡੇਟਾ ਦਾ ਦਾਅਵਾ ਕਰਦਾ ਹੈ ਉਹ 2021 ਵਿਚ ਹੋਏ ਡੇਟਾ ਉਲੰਘਣਾ ਤੋਂ ਲਿਆ ਗਿਆ ਹੈ। ਉਸ ਸਾਲ, 50 ਕਰੋੜ ਫੇਸਬੁੱਕ ਯੂਜ਼ਰਸ ਦੀ ਜਾਣਕਾਰੀ ਚੋਰੀ ਹੋ ਗਈ ਸੀ। ਹਾਲਾਂਕਿ, ਮਾਹਿਰਾਂ ਨੇ ਲੋਕਾਂ ਨੂੰ ਸੁਚੇਤ ਰਹਿਣ ਦੀ ਸਲਾਹ ਦਿੱਤੀ ਹੈ। ਇਹ ਕਿਹਾ ਗਿਆ ਹੈ ਕਿ ਯੂਜ਼ਰਸ ਨੂੰ ਸਾਵਧਾਨੀ ਵਰਤਣੀ ਚਾਹੀਦੀ ਹੈ ਅਤੇ ਆਪਣਾ ਡੇਟਾ ਸੁਰੱਖਿਅਤ ਕਰਨਾ ਚਾਹੀਦਾ ਹੈ। ਇਹ ਵੀ ਕਿਹਾ ਗਿਆ ਹੈ ਕਿ ਜੇਕਰ ਬਾਈਟਬ੍ਰੇਕਰ ਦਾ ਦਾਅਵਾ ਸੱਚ ਸਾਬਤ ਹੁੰਦਾ ਹੈ, ਤਾਂ ਇਹ ਕਿਸੇ ਵੀ ਸੋਸ਼ਲ ਮੀਡੀਆ ਪਲੇਟਫਾਰਮ ਤੋਂ ਡੇਟਾ ਸਕ੍ਰੈਪਿੰਗ ਦੀ ਸਭ ਤੋਂ ਵੱਡੀ ਘਟਨਾ ਹੋਵੇਗੀ। ਇਸ ਦੇ ਨਾਲ ਹੀ, ਫੇਸਬੁੱਕ ਨੇ ਡੇਲੀ ਮੇਲ ਨੂੰ ਦੱਸਿਆ ਹੈ ਕਿ ਕੰਪਨੀ ਨੂੰ ਪੂਰਾ ਵਿਸ਼ਵਾਸ ਹੈ ਕਿ ਡੇਟਾ ਪੁਰਾਣਾ ਹੈ। ਕੋਈ ਨਵਾਂ ਡੇਟਾ ਨਹੀਂ ਲਿਆ ਗਿਆ ਹੈ।