ਜ਼ਰੀਨ ਖ਼ਾਨ ਤੇ ਬਿੰਨੂ ਢਿੱਲੋਂ ਨੇ ਕੀਤਾ ਨਵੀਂ ਫ਼ਿਲਮ ਦਾ ਐਲਾਨ, ਪਹਿਲੀ ਵਾਰ ਸਕ੍ਰੀਨ ਕਰਨਗੇ ਸਾਂਝੀ
11/12/2020 4:50:52 PM
ਜਲੰਧਰ (ਬਿਊਰੋ) : ਬਾਲੀਵੁੱਡ ਅਦਾਕਾਰਾ ਜ਼ਰੀਨ ਖ਼ਾਨ ਇਕ ਹੋਰ ਪੰਜਾਬੀ ਫ਼ਿਲਮ 'ਚ ਨਜ਼ਰ ਆਉਣ ਵਾਲੀ ਹੈ। ਜ਼ਰੀਨ ਖ਼ਾਨ ਨਾਲ ਇਸ ਫ਼ਿਲਮ 'ਚ ਬਿੰਨੂ ਢਿੱਲੋਂ ਲੀਡ ਕਿਰਦਾਰ 'ਚ ਨਜ਼ਰ ਆਉਣਗੇ। ਫ਼ਿਲਮ ਦਾ ਨਾਂ 'ਪਟਾਕੇ ਪੈਣਗੇ' ਰੱਖਿਆ ਗਿਆ ਹੈ। ਇਸ ਫ਼ਿਲਮ ਦਾ ਐਲਾਨ ਟੀਮ ਨੇ ਪੋਸਟਰ ਰਿਲੀਜ਼ ਕਰ ਕੇ ਕੀਤਾ ਹੈ। ਜਿੱਥੇ ਫ਼ਿਲਮ ਦੀ ਕਾਸਟ ਦੇ ਨਾਲ-ਨਾਲ ਨਿਰਦੇਸ਼ਕ ਦਾ ਵੀ ਖ਼ੁਲਾਸਾ ਕੀਤਾ ਗਿਆ ਹੈ। 'ਪਟਾਕੇ ਪੈਣਗੇ' ਫ਼ਿਲਮ ਨੂੰ ਨਿਰਦੇਸ਼ਕ ਸਮੀਪ ਕੰਗ ਡਾਇਰੈਕਟ ਕਰਨਗੇ, ਜਿਨ੍ਹਾਂ ਨੇ ਪੰਜਾਬੀ ਇੰਡਸਟਰੀ ਨੂੰ ਕਾਫ਼ੀ ਹਿੱਟ ਫ਼ਿਲਮ ਦਿੱਤੀਆਂ ਹਨ। ਨਿਰਦੇਸ਼ਕ ਸਮੀਪ ਕੰਗ ਦੇ ਹੋਰ ਵੀ ਕਈ ਸਾਰੇ ਪ੍ਰੋਜੈਕਟ ਆਉਣ ਵਾਲੇ ਹਨ, ਜਿਨ੍ਹਾਂ 'ਚ 'ਵੈਲਕਮ ਭੂਆ ਜੀ', 'ਭੂਤ ਜੀ', 'ਗੋਲ ਗੱਪੇ', 'ਕੈਰੀ ਓਨ ਜੱਟਾ 3', 'ਲਾਵਾਂ ਫੇਰੇ 2' ਤੇ 'ਰੌਣਕ ਮੇਲਾ' ਵਰਗੀਆਂ ਫ਼ਿਲਮਾਂ ਦੇ ਨਾਮ ਸ਼ਾਮਲ ਹਨ। ਇਨ੍ਹਾਂ 'ਚੋ ਕੁਝ ਫ਼ਿਲਮਾਂ ਦੀ ਸ਼ੂਟਿੰਗ ਹੋ ਚੁੱਕੀ ਹੈ ਤੇ ਕੁਝ ਅਗਲੇ ਸਾਲ ਤੱਕ ਫਲੋਰ 'ਤੇ ਆਉਣਗੀਆਂ।
ਦੱਸ ਦਈਏ ਕੁਝ ਫ਼ਿਲਮਾਂ ਅਜਿਹੀਆਂ ਵੀ ਹਨ, ਜੋ ਇਸ ਸਾਲ ਰਿਲੀਜ਼ ਹੋ ਜਾਣੀਆਂ ਸਨ ਪਰ ਕੋਰੋਨਾ ਆਫ਼ਤ ਕਾਰਨ ਸਭ ਫ਼ਿਲਮਾਂ ਪੋਸਟਪੋਨ ਹੋ ਗਈਆਂ ਹਨ, ਜੋ ਹੁਣ ਅਗਲੇ ਸਾਲ ਤੱਕ ਰਿਲੀਜ਼ ਹੋ ਜਾਣਗੀਆਂ। ਬਾਕੀ ਜ਼ਰੀਨ ਖਾਨ ਤੇ ਬਿੰਨੂ ਢਿੱਲੋਂ ਦੀ ਫ਼ਿਲਮ 'ਪਟਾਕੇ ਪੈਣਗੇ' ਕਦੋਂ ਰਿਲੀਜ਼ ਹੋਵੇਗੀ ਇਸ ਬਾਰੇ ਹਾਲੇ ਤੱਕ ਕੋਈ ਜਾਣਕਾਰੀ ਨਹੀਂ ਹੈ। ਇਸ ਫ਼ਿਲਮ ਨਾਲ ਬਿੰਨੂ ਢਿੱਲੋਂ ਤੇ ਜ਼ਰੀਨ ਖ਼ਾਨ ਪਹਿਲੀ ਵਾਰ ਕੰਮ ਕਰਨ ਜਾ ਰਹੇ ਹਨ।
