"ਦਿ ਪਿਰਾਮਿਡ ਸਕੀਮ" 5 ਜੂਨ ਨੂੰ ਪ੍ਰਾਈਮ ਵੀਡੀਓ ''ਤੇ ਹੋਵੇਗੀ ਪ੍ਰੀਮੀਅਰ

ਮੁੰਬਈ (ਏਜੰਸੀ)- ਸੀਰੀਜ਼ "ਦਿ ਪਿਰਾਮਿਡ ਸਕੀਮ" 5 ਜੂਨ ਨੂੰ ਪ੍ਰਾਈਮ ਵੀਡੀਓ 'ਤੇ ਪ੍ਰੀਮੀਅਰ ਹੋਵੇਗੀ। ਪ੍ਰਾਈਮ ਵੀਡੀਓ ਨੇ ਅੱਜ ਆਪਣੀ ਆਉਣ ਵਾਲੀ ਪ੍ਰਾਈਮ ਓਰੀਜਨਲ ਸੀਰੀਜ਼, "ਦਿ ਪਿਰਾਮਿਡ ਸਕੀਮ" ਦੀ ਦੁਨੀਆ ਭਰ ਵਿੱਚ ਪ੍ਰੀਮੀਅਰ ਤਰੀਕ ਦਾ ਐਲਾਨ ਕਰ ਦਿੱਤਾ ਹੈ। ਦਿ ਵਾਇਰਲ ਫੀਵਰ ਦੁਆਰਾ ਨਿਰਮਿਤ, ਸ਼੍ਰੇਆਂਸ਼ ਪਾਂਡੇ ਦੁਆਰਾ ਬਣਾਈ ਗਈ, ਅਤੇ ਆਸ਼ੀਸ਼ ਆਰ. ਸ਼ੁਕਲਾ ਅਤੇ ਸ਼੍ਰੇਆਂਸ਼ ਪਾਂਡੇ ਦੁਆਰਾ ਨਿਰਦੇਸ਼ਤ, ਇਹ ਡਰਾਮਾ ਸੀਰੀਜ਼ ਪਿਰਾਮਿਡ ਸਕੀਮਾਂ ਦੀ ਦਿਲਚਸਪ ਪਰ ਗੁੰਝਲਦਾਰ ਦੁਨੀਆ ਅਤੇ ਜ਼ਲਦੀ ਪੈਸਾ ਕਮਾਉਣ ਦੇ ਖਤਰਨਾਕ ਲਾਲਚ ਦੀ ਪੜਚੋਲ ਕਰਦੀ ਹੈ।

ਅਕਸ਼ੇਂਦਰ ਮਿਸ਼ਰਾ ਦੁਆਰਾ ਲਿਖੀ ਗਈ, ਇਸ ਸੀਰੀਜ਼ ਵਿੱਚ ਪਰਮਵੀਰ ਸਿੰਘ ਚੀਮਾ, ਰਣਵੀਰ ਸ਼ੌਰੀ, ਸ਼ੇਖਰ ਸੁਮਨ, ਅੰਜਨ ਸ਼੍ਰੀਵਾਸਤਵ, ਅਲਫੀਆ ਜਾਫਰੀ ਅਤੇ ਆਸ਼ੀਸ਼ ਰਾਘਵ ਮੁੱਖ ਭੂਮਿਕਾਵਾਂ ਵਿੱਚ ਹਨ। ਅਖਿਲੇਂਦਰ ਮਿਸ਼ਰਾ, ਸਮਿਤਾ ਬਾਂਸਲ, ਵਿਜੇ ਕੁਮਾਰ, ਇੰਦਰੇਸ਼ ਮਲਿਕ, ਰਵੀ ਬਹਿਲ, ਸੁਸ਼ਾਂਤ ਸਿੰਘ, ਸੋਨਲ ਝਾਅ ਅਤੇ ਸਦਾਨੰਦ ਪਾਟਿਲ ਵਰਗੇ ਅਦਾਕਾਰ ਵੀ ਸਹਾਇਕ ਭੂਮਿਕਾਵਾਂ ਵਿੱਚ ਨਜ਼ਰ ਆਉਣਗੇ। ਇਹ ਸੀਰੀਜ਼ 5 ਜੂਨ ਨੂੰ ਭਾਰਤ ਅਤੇ ਦੁਨੀਆ ਭਰ ਦੇ 240 ਦੇਸ਼ਾਂ ਅਤੇ ਪ੍ਰਦੇਸ਼ਾਂ ਵਿੱਚ ਪ੍ਰਾਈਮ ਵੀਡੀਓ 'ਤੇ ਵਿਸ਼ੇਸ਼ ਤੌਰ 'ਤੇ ਹਿੰਦੀ ਵਿੱਚ ਪ੍ਰੀਮੀਅਰ ਹੋਵੇਗੀ।