'ਚਾਲੀ ਦਿਨ' ਨੇ ਛੇੜੀਆਂ ਮਨ ਦੀਆਂ ਤਾਰਾਂ! ਰੂਹਾਨੀਅਤ ਤੇ ਪਰਿਵਾਰਕ ਸਾਂਝ ਦੀ ਅਨੋਖੀ ਮਿਸਾਲ

ਜਲੰਧਰ (ਅਰੁਣ) : ਪੰਜਾਬੀ ਸਿਨੇਮਾ ਅਤੇ ਸਾਹਿਤ ਦੇ ਖੇਤਰ ਵਿਚ ਇੱਕ ਅਜਿਹੀ ਰਚਨਾ ਸਾਹਮਣੇ ਆਈ ਹੈ ਜੋ ਨਾ ਸਿਰਫ ਰੂਹਾਨੀਅਤ ਨਾਲ ਭਰਪੂਰ ਹੈ, ਸਗੋਂ ਸਮਾਜਿਕ ਸਾਂਝ ਅਤੇ ਧਰਮ ਨਿਰਪੱਖਤਾ ਦੀ ਵੀ ਵਧੀਆ ਮਿਸਾਲ ਪੇਸ਼ ਕਰਦੀ ਹੈ। 'ਚਾਲੀ ਦਿਨਾਂ ਦਾ ਸਫ਼ਰ' ਨਾਮ ਦੀ ਇਹ ਕਹਾਣੀ ਇੱਕ ਅਜਿਹੀ ਫਿਲਮ ਵਜੋਂ ਉੱਭਰੀ ਹੈ, ਜਿਸ ਬਾਰੇ ਦਾਅਵਾ ਕੀਤਾ ਜਾ ਰਿਹਾ ਹੈ ਕਿ ਪੰਜਾਬੀ ਇੰਡਸਟਰੀ ਵਿੱਚ ਇਸ ਤੋਂ ਪਹਿਲਾਂ ਅਜਿਹੀ ਫਿਲਮ ਨਹੀਂ ਬਣੀ।

ਵੰਡ ਦਾ ਦਰਦ ਅਤੇ ਵਿਛੜੇ ਰਿਸ਼ਤਿਆਂ ਦੀ ਤਲਾਸ਼
ਕਹਾਣੀ ਦੀ ਸ਼ੁਰੂਆਤ ਦੇਸ਼ ਦੀ ਵੰਡ ਦੇ ਪਿਛੋਕੜ ਤੋਂ ਹੁੰਦੀ ਹੈ, ਜਿੱਥੇ ਇੱਕ ਹੱਸਦਾ-ਖੇਡਦਾ ਪਰਿਵਾਰ ਬਿਖਰ ਜਾਂਦਾ ਹੈ। ਪਰਿਵਾਰ ਦੀ ਧੀ ਨੂੰ ਗੁੰਡੇ ਚੁੱਕ ਕੇ ਲੈ ਜਾਂਦੇ ਹਨ, ਜਿਸ ਦੇ ਸਦਮੇ ਵਿੱਚ ਮਾਂ ਦੀ ਮੌਤ ਹੋ ਜਾਂਦੀ ਹੈ। ਪਿਤਾ ਆਪਣੀ ਧੀ ਅਤੇ ਆਪਣੀ ਜ਼ਮੀਨ ਦੀ ਭਾਲ ਵਿੱਚ ਰਾਜਸਥਾਨ ਦੇ ਬੀਕਾਨੇਰ ਚਲਾ ਜਾਂਦਾ ਹੈ। ਕਹਾਣੀ ਦਾ ਮੁੱਖ ਪਾਤਰ 'ਸੁੱਖਨ' (ਕੇਸਰ), ਜੋ ਉਸ ਸਮੇਂ ਬੱਚਾ ਸੀ, ਵੱਡਾ ਹੋ ਕੇ ਆਪਣੇ ਪਿਤਾ ਅਤੇ ਭੈਣ ਦੀ ਭਾਲ ਵਿੱਚ ਨਿਕਲਦਾ ਹੈ।

40 ਦਿਨਾਂ ਦਾ ਅਧਿਆਤਮਿਕ ਸਫ਼ਰ
ਸੁੱਖਨ ਆਪਣੇ ਗੁਰੂ (ਗੁਰਪ੍ਰੀਤ ਸਿੰਘ ਘੁੱਗੀ) ਦੀ ਅਗਵਾਈ ਹੇਠ ਇੱਕ ਫ਼ਕੀਰ ਨਾਲ 40 ਦਿਨਾਂ ਦੇ ਸਫ਼ਰ 'ਤੇ ਨਿਕਲਦਾ ਹੈ। ਇਸ ਯਾਤਰਾ ਦੌਰਾਨ ਫ਼ਕੀਰ ਉਸ ਨੂੰ ਜ਼ਿੰਦਗੀ ਦੇ ਡੂੰਘੇ ਅਰਥ ਅਤੇ ਕਹਾਣੀਆਂ ਰਾਹੀਂ ਮਨੁੱਖੀ ਕਦਰਾਂ-ਕੀਮਤਾਂ ਸਮਝਾਉਂਦਾ ਹੈ। ਮਾਹਿਰਾਂ ਅਨੁਸਾਰ, 'ਚਾਲੀ ਦਿਨਾਂ' ਦਾ ਸਮਾਂ ਕਿਸੇ ਵੀ ਚੰਗੀ ਆਦਤ ਨੂੰ ਅਪਣਾਉਣ ਅਤੇ ਸਰੀਰਕ ਤੇ ਮਾਨਸਿਕ ਸ਼ੁੱਧੀ ਲਈ ਸਭ ਤੋਂ ਉੱਤਮ ਮੰਨਿਆ ਗਿਆ ਹੈ।

ਭਾਵੁਕ ਮੋੜ ਅਤੇ ਪਰਿਵਾਰਕ ਮੋਹ
ਬੀਕਾਨੇਰ ਪਹੁੰਚ ਕੇ ਸੁੱਖਨ ਨੂੰ ਪਤਾ ਲੱਗਦਾ ਹੈ ਕਿ ਉਸ ਦੇ ਪਿਤਾ ਦੀ ਮੌਤ ਹੋ ਚੁੱਕੀ ਹੈ, ਪਰ ਉਸ ਨੂੰ ਆਪਣੀ ਭੈਣ ਮਿਲ ਜਾਂਦੀ ਹੈ। ਹਾਲਾਂਕਿ, ਉਸ ਦੀ ਭੈਣ ਹੁਣ ਮੁਸਲਮਾਨ ਬਣ ਚੁੱਕੀ ਹੈ ਅਤੇ ਸਮਾਜਿਕ ਪ੍ਰਵਾਨਗੀ ਨਾ ਮਿਲਣ ਦੇ ਡਰ ਕਾਰਨ ਵਾਪਸ ਜਾਣ ਤੋਂ ਇਨਕਾਰ ਕਰ ਦਿੰਦੀ ਹੈ। ਇਹ ਦ੍ਰਿਸ਼ ਸਮਾਜਿਕ ਵਲਗਣਾਂ ਅਤੇ ਇਨਸਾਨੀ ਜਜ਼ਬਾਤਾਂ ਦੇ ਟਕਰਾਅ ਨੂੰ ਬੜੀ ਖੂਬਸੂਰਤੀ ਨਾਲ ਪੇਸ਼ ਕਰਦਾ ਹੈ।

ਇਹ ਫਿਲਮ ਇੱਕ ਸੰਪੂਰਨ 'ਫੈਮਿਲੀ ਪੈਕੇਜ' ਹੈ, ਦੋਸਤੀ ਦੇ ਮੋਹ ਅਤੇ ਅਧੂਰੇ ਪਿਆਰ ਵਰਗੇ ਕਈ ਭਾਵੁਕ ਪਹਿਲੂਆਂ ਨੂੰ ਸਮੇਟੀ ਬੈਠੀ ਹੈ। ਖਾਸ ਗੱਲ ਇਹ ਹੈ ਕਿ ਇਸ ਵਿੱਚ ਕਿਸੇ ਵੀ ਧਰਮ ਨੂੰ ਨੀਵਾਂ ਨਹੀਂ ਦਿਖਾਇਆ ਗਿਆ, ਸਗੋਂ ਹਰ ਧਰਮ ਅਤੇ ਰਿਸ਼ਤੇ ਨੂੰ ਬਰਾਬਰ ਸਤਿਕਾਰ ਦਿੱਤਾ ਗਿਆ ਹੈ। ਇਹ ਕਹਾਣੀ ਸਾਨੂੰ ਸਿਖਾਉਂਦੀ ਹੈ ਕਿ ਅੰਤ ਵਿੱਚ ਮਨੁੱਖ ਦੀ ਅਸਲ ਮੰਜ਼ਿਲ ਆਪਣੇ ਪਰਿਵਾਰ ਨੂੰ ਸੰਭਾਲਣਾ ਅਤੇ ਰਿਸ਼ਤਿਆਂ ਦੀ ਕਦਰ ਕਰਨਾ ਹੀ ਹੈ। 

ਦੱਸ ਦਈਏ ਕਿ 'ਚਾਲੀ ਦਿਨ' ਫਿਲਮ ਨੂੰ ਭਰਵਾਂ ਹੁੰਗਾਰਾ ਮਿਲ ਰਿਹਾ ਹੈ। ਇਹ ਫਿਲਮ ਕਾਮੇਡੀ ਤੇ ਰੋਮਾਂਸ ਤੋਂ ਹਟ ਕੇ ਜ਼ਿੰਦਗੀ ਦੇ ਸਬਕ ਸਿਖਾਉਂਦੀ ਹੈ। ਪਿਆਰ ਤੇ ਜਜ਼ਬਾਤਾਂ ਦਾ ਸ਼ਾਨਦਾਰ ਸੁਮੇਲ ਹੈ ਚਾਲੀ ਦਿਨ। ਫਿਲਮ ਵਿਚ ਹਰੇਕ ਕਲਾਕਾਰ ਨੇ ਬਾਕਮਾਲ ਕੰਮ ਕੀਤਾ ਹੈ। ਭਾਵੇਂ ਉਹ ਦੇਬੀ ਮਖਸੂਸਪੁਰੀ ਹੋਣ ਜਾਂ ਗੁਰਪ੍ਰੀਤ ਘੁੱਗੀ। ਨਵੇਂ ਉਭਰਦੇ ਕਲਾਕਾਰ ਸੁੱਖਣ ਵੜੈਚ ਤੇ ਦ੍ਰਿਸ਼ਟੀ ਤਲਵਾੜ ਦੀ ਐਕਟਿੰਗ ਵੀ ਜ਼ਬਰਦਸਤ ਹੈ।

ਜਗ ਬਾਣੀ ਈ-ਪੇਪਰ ਨੂੰ ਪੜ੍ਹਨ ਅਤੇ ਐਪ ਨੂੰ ਡਾਊਨਲੋਡ ਕਰਨ ਲਈ ਇੱਥੇ ਕਲਿੱਕ ਕਰੋ

For Android:- https://play.google.com/store/apps/details?id=com.jagbani&hl=en

For IOS:- https://itunes.apple.com/in/app/id538323711?mt=8

For Whatsapp:- https://whatsapp.com/channel/0029Va94hsaHAdNVur4L170e