ਸ਼ੱਕੀ ਹਾਲਾਤ 'ਚ ਡਾਕਟਰ ਦੀ ਮੌਤ, ਹਸਪਤਾਲ ਦੇ ਬਾਥਰੂਮ 'ਚੋਂ ਮਿਲੀ ਲਾਸ਼

ਜਲੰਧਰ (ਸੁਧੀਰ, ਕਮਲੇਸ਼)— ਸ਼ੱਕੀ ਹਾਲਾਤ 'ਚ 40 ਸਾਲਾ ਡਾਕਟਰ ਦੀ ਮੌਤ ਹੋਣ ਦੀ ਖਬਰ ਸਾਹਮਣੇ ਆਈ ਹੈ। ਮਿਲੀ ਜਾਣਕਾਰੀ ਮੁਤਾਬਕ ਉਕਤ ਡਾਕਟਰ ਦੀ ਲਾਸ਼ ਵਰਕਸ਼ਾਪ ਚੌਕ ਕੋਲ ਇਕ ਹਸਪਤਾਲ ਦੇ ਬਾਥਰੂਮ 'ਚੋਂ ਬਰਾਮਦ ਕੀਤੀ ਗਈ। ਮ੍ਰਿਤਕ ਡਾਕਟਰ ਦੀ ਪਛਾਣ ਲਲਿਤ ਕੁਮਾਰ ਵਾਸੀ 120 ਫੁੱਟੀ ਰੋਡ ਦੇ ਤੌਰ 'ਤੇ ਹੋਈ ਹੈ। ਲਲਿਤ ਸਰਵੋਦਿਆ ਹਸਪਤਾਲ 'ਚ ਮੈਡੀਕਲ ਅਫਸਰ (ਐੱਮ. ਓ) ਵਜੋਂ ਕੰਮ ਕਰ ਰਿਹਾ ਸੀ। ਹਾਲਾਂਕਿ ਇਸ ਤੋਂ ਪਹਿਲਾਂ ਉਹ ਕਿਸੇ ਹੋਰ ਨਿੱਜੀ ਹਸਪਤਾਲ 'ਚ ਕੰਮ ਕਰਦਾ ਸੀ, ਜਿੱਥੇ ਉਹ ਆਪਣੀ ਮੋਟਰਸਾਈਕਲ ਨੂੰ ਪਾਰਕ ਕਰਦਾ ਸੀ।

ਸ਼ੁੱਕਰਵਾਰ ਰਾਤ ਨੂੰ ਉਹ ਆਪਣੀ ਬਾਈਕ ਲੈਣ ਲਈ ਉੱਥੇ ਪੁੱਜਾ ਸੀ। ਬਾਈਕ ਲੈ ਜਾਣ ਤੋਂ ਪਹਿਲਾਂ ਉਹ ਹਸਪਤਾਲ ਦੇ ਬਾਥਰੂਮ ਗਿਆ ਸੀ। ਇਸ ਦਰਮਿਆਨ ਦੇਰ ਰਾਤ ਨੂੰ ਜਦੋਂ ਹਸਪਤਾਲ ਮੁਲਾਜ਼ਮ ਬਾਥਰੂਮ ਗਿਆ ਤਾਂ ਉਸ ਨੇ ਸ਼ੱਕੀ ਹਾਲਾਤ 'ਚ ਉਸ ਨੂੰ ਮ੍ਰਿਤ ਪਿਆ ਹੋਇਆ ਪਾਇਆ। ਇਹ ਵੀ ਪਤਾ ਲੱਗਾ ਕਿ ਉਕਤ ਡਾਕਟਰ ਨਸ਼ਾ ਕਰਨ ਦਾ ਆਦੀ ਸੀ। ਥਾਣਾ ਨੰਬਰ 2 ਦੀ ਪੁਲਸ ਨੇ ਪਰਿਵਾਰ ਦੇ ਬਿਆਨਾਂ ਦੇ ਆਧਾਰ 'ਤੇ ਧਾਰਾ 174 ਦੇ ਤਹਿਤ ਕਾਰਵਾਈ ਕੀਤੀ ਹੈ।