ਵੈੱਬ ਡੈਸਕ - ਵਾਸਤੂ ਸ਼ਾਸਤਰ 'ਚ ਰਸੋਈ ਨੂੰ ਘਰ ਦਾ ਸਭ ਤੋਂ ਮਹੱਤਵਪੂਰਨ ਹਿੱਸਾ ਮੰਨਿਆ ਜਾਂਦਾ ਹੈ, ਕਿਉਂਕਿ ਇਸ ਨੂੰ ਘਰ ਦਾ ਊਰਜਾ ਕੇਂਦਰ ਕਿਹਾ ਜਾਂਦਾ ਹੈ। ਇੱਥੋਂ ਹੀ ਪੂਰੇ ਪਰਿਵਾਰ ਦੀ ਸਿਹਤ ਅਤੇ ਕਿਸਮਤ ਜੁੜੀ ਹੁੰਦੀ ਹੈ। ਰਸੋਈ 'ਚ ਅਗਨੀ ਅਤੇ ਜਲ, ਦੋ ਵਿਪਰੀਤ ਤੱਤਾਂ ਦਾ ਮੇਲ ਹੁੰਦਾ ਹੈ ਅਤੇ ਜੇਕਰ ਇਨ੍ਹਾਂ ਦਾ ਤਾਲਮੇਲ ਸਹੀ ਹੋਵੇ, ਤਾਂ ਘਰ 'ਚ ਸੁੱਖ-ਸਮ੍ਰਿਧੀ ਬਣੀ ਰਹਿੰਦੀ ਹੈ। ਵਾਸਤੂ ਅਨੁਸਾਰ, ਰਸੋਈ 'ਚ ਪਾਣੀ ਰੱਖਣ ਦੀ ਦਿਸ਼ਾ ਤੁਹਾਡੀ ਆਰਥਿਕ ਸਥਿਤੀ 'ਤੇ ਡੂੰਘਾ ਪ੍ਰਭਾਵ ਪਾਉਂਦੀ ਹੈ।

ਪਾਣੀ ਰੱਖਣ ਲਈ ਸਭ ਤੋਂ ਸ਼ੁਭ ਦਿਸ਼ਾ
ਵਾਸਤੂ ਮਾਹਿਰਾਂ ਅਨੁਸਾਰ, ਰਸੋਈ 'ਚ ਪਾਣੀ ਦਾ ਗਲਾਸ, ਜੱਗ ਜਾਂ ਮਟਕਾ ਰੱਖਣ ਲਈ ਉੱਤਰ-ਪੂਰਬ (ਈਸ਼ਾਨ ਕੋਣ) ਦਿਸ਼ਾ ਸਭ ਤੋਂ ਉੱਤਮ ਮੰਨੀ ਜਾਂਦੀ ਹੈ। ਇਸ ਦਿਸ਼ਾ 'ਚੋਂ ਸਵੇਰ ਦੀਆਂ ਸਕਾਰਾਤਮਕ ਕਿਰਨਾਂ ਪ੍ਰਵੇਸ਼ ਕਰਦੀਆਂ ਹਨ, ਜੋ ਪਾਣੀ ਨੂੰ ਸ਼ੁੱਧ ਅਤੇ ਊਰਜਾਵਾਨ ਬਣਾਉਂਦੀਆਂ ਹਨ। ਈਸ਼ਾਨ ਕੋਣ ਨੂੰ ਦੇਵਤਿਆਂ ਦਾ ਸਥਾਨ ਮੰਨਿਆ ਜਾਂਦਾ ਹੈ, ਜਿੱਥੇ ਜਲ ਰੱਖਣ ਨਾਲ ਘਰ 'ਚ ਸ਼ਾਂਤੀ ਰਹਿੰਦੀ ਹੈ ਅਤੇ ਮਾਂ ਲਕਸ਼ਮੀ ਪ੍ਰਸੰਨ ਹੁੰਦੀ ਹੈ। ਜੇਕਰ ਉੱਤਰ-ਪੂਰਬ 'ਚ ਜਗ੍ਹਾ ਨਾ ਹੋਵੇ, ਤਾਂ ਤੁਸੀਂ ਪਾਣੀ ਉੱਤਰ ਦਿਸ਼ਾ 'ਚ ਵੀ ਰੱਖ ਸਕਦੇ ਹੋ। ਉੱਤਰ ਦਿਸ਼ਾ ਦੇ ਸੁਆਮੀ ਕੁਬੇਰ ਦੇਵ ਹਨ ਅਤੇ ਇਸ ਦਿਸ਼ਾ 'ਚ ਸਾਫ਼ ਪਾਣੀ ਰੱਖਣ ਨਾਲ ਆਮਦਨ ਦੇ ਨਵੇਂ ਸਰੋਤ ਖੁੱਲ੍ਹਦੇ ਹਨ।

ਮਾਂ ਲਕਸ਼ਮੀ ਦੀ ਕਿਰਪਾ ਲਈ ਵਿਸ਼ੇਸ਼ ਉਪਾਅ :-

ਰਾਤ ਨੂੰ ਭਰ ਕੇ ਰੱਖੋ ਪਾਣੀ
ਸੌਣ ਤੋਂ ਪਹਿਲਾਂ ਰਸੋਈ 'ਚ ਇਕ ਤਾਜ਼ੇ ਪਾਣੀ ਦਾ ਗਲਾਸ ਜਾਂ ਲੋਟਾ ਭਰ ਕੇ ਜ਼ਰੂਰ ਰੱਖੋ। ਮੰਨਿਆ ਜਾਂਦਾ ਹੈ ਕਿ ਖਾਲੀ ਬਰਤਨ ਨਕਾਰਾਤਮਕਤਾ ਲਿਆਉਂਦੇ ਹਨ। ਸਵੇਰੇ ਇਸ ਪਾਣੀ ਨੂੰ ਪੌਦਿਆਂ 'ਚ ਪਾ ਦਿਓ, ਇਹ ਉਪਾਅ ਘਰ ਦੀ ਦਰਿਦਰਤਾ ਦੂਰ ਕਰਨ 'ਚ ਸਹਾਇਕ ਹੁੰਦਾ ਹੈ।

ਤਾਂਬੇ ਦੇ ਬਰਤਨ ਦੀ ਵਰਤੋਂ
ਪਾਣੀ ਲਈ ਤਾਂਬੇ ਦੇ ਲੋਟੇ ਜਾਂ ਗਲਾਸ ਦੀ ਵਰਤੋਂ ਕਰਨਾ ਬਹੁਤ ਸ਼ੁਭ ਹੈ। ਤਾਂਬਾ ਸੂਰਜ ਅਤੇ ਮੰਗਲ ਦਾ ਕਾਰਕ ਹੈ, ਜੋ ਰਸੋਈ ਦੀ ਅਗਨੀ ਊਰਜਾ ਨਾਲ ਤਾਲਮੇਲ ਬਿਠਾਉਂਦਾ ਹੈ।

ਸ਼ਾਮ ਨੂੰ ਦੀਵਾ ਜਗਾਓ
ਸ਼ਾਮ ਦੇ ਸਮੇਂ ਰਸੋਈ 'ਚ ਜਿੱਥੇ ਪਾਣੀ ਰੱਖਿਆ ਹੋਵੇ, ਉੱਥੇ ਇਕ ਛੋਟਾ ਜਿਹਾ ਘਿਓ ਦਾ ਦੀਵਾ ਜਾਂ ਮੋਮਬੱਤੀ ਜਗਾਉਣ ਨਾਲ ਮਾਂ ਲਕਸ਼ਮੀ ਦੇ ਆਗਮਨ ਦਾ ਮਾਰਗ ਪੱਧਰਾ ਹੁੰਦਾ ਹੈ।

ਵਾਸਤੂ ਦੇ ਇਨ੍ਹਾਂ ਨਿਯਮਾਂ ਦੀ ਪਾਲਣਾ ਕਰਕੇ ਤੁਸੀਂ ਆਪਣੇ ਘਰ ਵਿੱਚ ਸਕਾਰਾਤਮਕ ਊਰਜਾ ਅਤੇ ਖੁਸ਼ਹਾਲੀ ਲਿਆ ਸਕਦੇ ਹੋ।