ਨਵੀਂ ਦਿੱਲੀ - ਵਾਸਤੂ ਸ਼ਾਸਤਰ ਅਨੁਸਾਰ ਘਰ ਦੀ ਹਰ ਇਕ ਵਸਤੂ ਸਾਡੀ ਤਰੱਕੀ ਅਤੇ ਖੁਸ਼ਹਾਲੀ 'ਤੇ ਡੂੰਘਾ ਪ੍ਰਭਾਵ ਪਾਉਂਦੀ ਹੈ। ਅਕਸਰ ਅਸੀਂ ਘਰ ਦੀ ਸਜਾਵਟ ਵੇਲੇ ਛੋਟੀਆਂ ਚੀਜ਼ਾਂ ਨੂੰ ਨਜ਼ਰਅੰਦਾਜ਼ ਕਰ ਦਿੰਦੇ ਹਾਂ, ਪਰ ਕੰਧ 'ਤੇ ਟੰਗੀ ਘੜੀ ਸਿਰਫ ਸਮਾਂ ਦੱਸਣ ਵਾਲਾ ਯੰਤਰ ਨਹੀਂ ਹੈ, ਸਗੋਂ ਇਹ ਤੁਹਾਡੀ ਊਰਜਾ, ਸੋਚ ਅਤੇ ਤਰੱਕੀ ਦਾ ਪ੍ਰਤੀਕ ਹੈ। ਜੇਕਰ ਘੜੀ ਸਹੀ ਦਿਸ਼ਾ 'ਚ ਨਾ ਹੋਵੇ, ਤਾਂ ਇਹ ਮਾਨਸਿਕ ਤਣਾਅ ਅਤੇ ਆਰਥਿਕ ਨੁਕਸਾਨ ਦਾ ਕਾਰਨ ਵੀ ਬਣ ਸਕਦੀ ਹੈ।

ਤਰੱਕੀ ਲਈ ਸਹੀ ਦਿਸ਼ਾ ਦੀ ਚੋਣ
ਵਾਸਤੂ ਨਿਯਮਾਂ ਅਨੁਸਾਰ, ਉੱਤਰ ਅਤੇ ਪੂਰਬ ਦਿਸ਼ਾ ਨੂੰ ਵਾਧੇ ਦੀ ਦਿਸ਼ਾ ਮੰਨਿਆ ਗਿਆ ਹੈ। ਇਸ ਲਈ ਘਰ ਦੀ ਤਰੱਕੀ ਲਈ ਘੜੀ ਨੂੰ ਹਮੇਸ਼ਾ ਉੱਤਰ ਜਾਂ ਪੂਰਬ ਦੀ ਕੰਧ 'ਤੇ ਲਗਾਉਣਾ ਚਾਹੀਦਾ ਹੈ। ਇਸ ਦੇ ਉਲਟ, ਦੱਖਣ ਦਿਸ਼ਾ 'ਚ ਘੜੀ ਲਗਾਉਣ ਨਾਲ ਤਰੱਕੀ ਦੇ ਮੌਕਿਆਂ 'ਚ ਰੁਕਾਵਟ ਆਉਂਦੀ ਹੈ ਅਤੇ ਘਰ ਦੇ ਮੁਖੀ ਦੀ ਸਿਹਤ 'ਤੇ ਵੀ ਮਾੜਾ ਅਸਰ ਪੈ ਸਕਦਾ ਹੈ।

ਬੰਦ ਘੜੀ ਬਣ ਸਕਦੀ ਹੈ ਰੁਕਾਵਟ
ਘਰ 'ਚ ਕਦੇ ਵੀ ਬੰਦ ਘੜੀ ਨਹੀਂ ਰੱਖਣੀ ਚਾਹੀਦੀ। ਇਹ ਨਾ ਸਿਰਫ ਨਕਾਰਾਤਮਕ ਊਰਜਾ ਨੂੰ ਵਧਾਉਂਦੀ ਹੈ, ਸਗੋਂ ਵਿਅਕਤੀ ਦੀ ਤਰੱਕੀ 'ਚ ਵੀ ਰੁਕਾਵਟ ਪੈਦਾ ਕਰਦੀ ਹੈ। ਇਸ ਦੇ ਨਾਲ ਹੀ ਘੜੀ 'ਤੇ ਧੂੜ ਨਹੀਂ ਜੰਮਣੀ ਚਾਹੀਦੀ ਅਤੇ ਸਮਾਂ ਹਮੇਸ਼ਾ ਸਹੀ ਸੈੱਟ ਹੋਣਾ ਚਾਹੀਦਾ ਹੈ, ਕਿਉਂਕਿ ਸਮੇਂ ਤੋਂ ਅੱਗੇ ਜਾਂ ਪਿੱਛੇ ਚੱਲਣ ਵਾਲੀਆਂ ਘੜੀਆਂ ਨੁਕਸਾਨ ਦਾ ਕਾਰਨ ਬਣ ਸਕਦੀਆਂ ਹਨ।

ਘੜੀ ਦੀ ਸ਼ਕਲ ਅਤੇ ਸਥਾਨ ਦਾ ਰੱਖੋ ਧਿਆਨ

ਪੈਂਡੂਲਮ ਵਾਲੀ ਘੜੀ
- ਵਾਸਤੂ 'ਚ ਪੈਂਡੂਲਮ ਵਾਲੀ ਘੜੀ ਨੂੰ ਬਹੁਤ ਸ਼ੁਭ ਮੰਨਿਆ ਗਿਆ ਹੈ, ਜੋ ਜੀਵਨ 'ਚ ਨਿਰੰਤਰ ਤਰੱਕੀ ਦਾ ਸੰਕੇਤ ਦਿੰਦੀ ਹੈ।

ਆਕਾਰ
- ਘਰ ਦੇ ਹਾਲ 'ਚ ਚੌਰਸ ਅਤੇ ਸੌਣ ਵਾਲੇ ਕਮਰੇ (ਬੈੱਡਰੂਮ) 'ਚ ਗੋਲ ਘੜੀ ਲਗਾਉਣੀ ਚਾਹੀਦੀ ਹੈ, ਜਿਸ ਨਾਲ ਘਰ 'ਚ ਸ਼ਾਂਤੀ ਅਤੇ ਪਿਆਰ ਬਣਿਆ ਰਹਿੰਦਾ ਹੈ।

ਦਰਵਾਜ਼ੇ 'ਤੇ ਮਨਾਹੀ
- ਦਰਵਾਜ਼ੇ ਦੇ ਉੱਪਰ ਕਦੇ ਵੀ ਘੜੀ ਨਹੀਂ ਲਗਾਉਣੀ ਚਾਹੀਦੀ, ਕਿਉਂਕਿ ਇਸ ਨਾਲ ਘਰ 'ਚ ਆਉਣ-ਜਾਣ ਵਾਲੀ ਨਕਾਰਾਤਮਕ ਊਰਜਾ ਦਾ ਪ੍ਰਭਾਵ ਘੜੀ 'ਤੇ ਪੈਂਦਾ ਹੈ।

ਸਿਰਹਾਣੇ ਹੇਠਾਂ
- ਤਕੀਏ ਦੇ ਹੇਠਾਂ ਘੜੀ ਰੱਖਣਾ ਅਸ਼ੁਭ ਮੰਨਿਆ ਜਾਂਦਾ ਹੈ, ਜੋ ਵਿਅਕਤੀ ਦੀ ਸੋਚ 'ਤੇ ਨਕਾਰਾਤਮਕ ਪ੍ਰਭਾਵ ਪਾ ਸਕਦਾ ਹੈ।

ਰੰਗਾਂ ਦਾ ਚੋਣ
- ਘਰ 'ਚ ਕਦੇ ਵੀ ਹਰੇ ਅਤੇ ਸੰਤਰੀ ਰੰਗ ਦੀ ਘੜੀ ਨਹੀਂ ਲਗਾਉਣੀ ਚਾਹੀਦੀ। ਇਸੇ ਤਰ੍ਹਾਂ ਦੁਕਾਨ ਜਾਂ ਕਾਰੋਬਾਰੀ ਸਥਾਨ 'ਤੇ ਕਾਲੇ ਅਤੇ ਗੂੜ੍ਹੇ ਨੀਲੇ ਰੰਗ ਦੀ ਘੜੀ ਲਗਾਉਣ ਤੋਂ ਬਚਣਾ ਚਾਹੀਦਾ ਹੈ, ਕਿਉਂਕਿ ਇਹ ਨਕਾਰਾਤਮਕਤਾ ਪੈਦਾ ਕਰ ਸਕਦੇ ਹਨ। ਘਰ 'ਚ ਸਕਾਰਾਤਮਕ ਊਰਜਾ ਲਈ ਮਿੱਠਾ ਸੰਗੀਤ ਪੈਦਾ ਕਰਨ ਵਾਲੀ ਘੜੀ ਲਗਾਉਣਾ ਫਾਇਦੇਮੰਦ ਹੁੰਦਾ ਹੈ।