ਵੈੱਬ ਡੈਸਕ - ਵਾਸਤੂ ਸ਼ਾਸਤਰ ਅਨੁਸਾਰ ਘਰ ਦੀ ਹਰ ਇਕ ਦਿਸ਼ਾ ਆਪਣਾ ਇਕ ਖਾਸ ਮਹੱਤਵ ਰੱਖਦੀ ਹੈ। ਆਮ ਤੌਰ 'ਤੇ ਅਸੀਂ ਚਾਰ ਮੁੱਖ ਦਿਸ਼ਾਵਾਂ ਪੂਰਬ, ਪੱਛਮ, ਉੱਤਰ ਅਤੇ ਦੱਖਣ ਬਾਰੇ ਹੀ ਜਾਣਦੇ ਹਾਂ, ਪਰ ਇਨ੍ਹਾਂ ਦੇ ਵਿਚਕਾਰਲੀਆਂ ਦਿਸ਼ਾਵਾਂ ਵੀ ਬਹੁਤ ਮਹੱਤਵਪੂਰਨ ਹੁੰਦੀਆਂ ਹਨ। ਇਨ੍ਹਾਂ 'ਚੋਂ ਇਕ ਹੈ 'ਵਾਯਵ ਕੋਣ', ਜੋ ਘਰ 'ਚ ਸੁੱਖ-ਸ਼ਾਂਤੀ ਅਤੇ ਖੁਸ਼ਹਾਲੀ ਲਿਆਉਣ 'ਚ ਵੱਡੀ ਭੂਮਿਕਾ ਨਿਭਾਉਂਦਾ ਹੈ।

ਕੀ ਹੈ ਵਾਯਵ ਕੋਣ?

ਉੱਤਰ ਅਤੇ ਪੱਛਮ ਦਿਸ਼ਾ ਦੇ ਵਿਚਕਾਰਲੇ ਹਿੱਸੇ ਨੂੰ ਵਾਯਵ ਕੋਣ ਕਿਹਾ ਜਾਂਦਾ ਹੈ। ਇਸ ਨੂੰ ਵਾਯੂ (ਹਵਾ) ਦਾ ਪ੍ਰਤੀਕ ਮੰਨਿਆ ਜਾਂਦਾ ਹੈ ਅਤੇ ਚੰਦਰਮਾ ਇਸ ਦਿਸ਼ਾ ਦੇ ਦੇਵਤਾ ਕਹਾਉਂਦੇ ਹਨ। ਇਹ ਦਿਸ਼ਾ ਖਾਸ ਤੌਰ 'ਤੇ ਔਰਤਾਂ ਲਈ ਬਹੁਤ ਖਾਸ ਮੰਨੀ ਜਾਂਦੀ ਹੈ। ਜੇਕਰ ਇਸ ਦਿਸ਼ਾ 'ਚ ਵਾਸਤੂ ਅਨੁਸਾਰ ਕੁਝ ਬਦਲਾਅ ਕੀਤੇ ਜਾਣ ਤਾਂ ਬਹੁਤ ਫਾਇਦੇ ਮਿਲ ਸਕਦੇ ਹਨ।

ਖੁਸ਼ਹਾਲੀ ਲਈ ਅਪਣਾਓ ਇਹ ਉਪਾਅ :-

ਚਾਂਦੀ ਦੀਆਂ ਵਸਤੂਆਂ
- ਕਿਉਂਕਿ ਇਹ ਚੰਦਰਮਾ ਦੀ ਦਿਸ਼ਾ ਹੈ, ਇਸ ਲਈ ਇੱਥੇ ਚਾਂਦੀ ਦੀ ਕੋਈ ਵੀ ਵਸਤੂ ਰੱਖਣ ਨਾਲ ਘਰ ਦੇ ਮੈਂਬਰਾਂ ਨੂੰ ਬਹੁਤ ਲਾਭ ਮਿਲਦਾ ਹੈ। ਇਸ ਨਾਲ ਦੋਸਤਾਂ ਅਤੇ ਰਿਸ਼ਤੇਦਾਰਾਂ ਦਾ ਭਰਪੂਰ ਸਹਿਯੋਗ ਪ੍ਰਾਪਤ ਹੁੰਦਾ ਹੈ।

ਵਿੰਡ ਚਾਈਮ ਦਾ ਪ੍ਰਯੋਗ
- ਜੇਕਰ ਘਰ ਦੀ ਉੱਤਰ-ਪੱਛਮ ਦਿਸ਼ਾ 'ਚ ਕੋਈ ਦਰਵਾਜ਼ਾ ਜਾਂ ਖਿੜਕੀ ਹੈ, ਤਾਂ ਉੱਥੇ ਛੇ ਪਾਈਪਾਂ ਵਾਲੀ ਵਿੰਡ ਚਾਈਮ ਜ਼ਰੂਰ ਲਗਾਓ। ਇਹ ਘਰ 'ਚ ਨਕਾਰਾਤਮਕ ਊਰਜਾ ਨੂੰ ਆਉਣ ਤੋਂ ਰੋਕਦੀ ਹੈ।

ਖਾਸ ਪੌਦੇ
- ਵਾਯਵ ਕੋਣ 'ਚ ਚਿੱਟੇ ਰੰਗ ਦੇ ਫੁੱਲ ਜਿਵੇਂ ਚਮੇਲੀ, ਚੰਪਾ ਜਾਂ ਬੇਲਾ ਲਗਾਉਣਾ ਬਹੁਤ ਸ਼ੁਭ ਹੁੰਦਾ ਹੈ। ਇਹ ਪੌਦੇ ਘਰ 'ਚ ਸਕਾਰਾਤਮਕਤਾ ਦਾ ਸੰਚਾਰ ਕਰਦੇ ਹਨ।

ਜ਼ਰੂਰੀ ਦਸਤਾਵੇਜ਼
- ਜੇਕਰ ਤੁਸੀਂ ਕੋਈ ਪ੍ਰਾਪਰਟੀ ਜਲਦੀ ਵੇਚਣਾ ਚਾਹੁੰਦੇ ਹੋ, ਤਾਂ ਉਸ ਨਾਲ ਜੁੜੇ ਦਸਤਾਵੇਜ਼ ਇਸ ਦਿਸ਼ਾ 'ਚ ਰੱਖੋ। ਇਸ ਤੋਂ ਇਲਾਵਾ, ਕੋਰਟ-ਕਚਹਿਰੀ ਦੇ ਕੇਸਾਂ ਤੋਂ ਨਿਜਾਤ ਪਾਉਣ ਲਈ ਵੀ ਸਬੰਧਤ ਕਾਗਜ਼ਾਤ ਇੱਥੇ ਰੱਖਣੇ ਫਾਇਦੇਮੰਦ ਹੁੰਦੇ ਹਨ।

ਵਾਸਤੂ ਦੋਸ਼ ਦੇ ਨੁਕਸਾਨ :-

ਜੇਕਰ ਘਰ ਦੀ ਇਸ ਦਿਸ਼ਾ 'ਚ ਕੋਈ ਵਾਸਤੂ ਦੋਸ਼ ਹੁੰਦਾ ਹੈ, ਤਾਂ ਵਿਅਕਤੀ ਦੇ ਦੁਸ਼ਮਣਾਂ ਦੀ ਗਿਣਤੀ ਵਧਣ ਲੱਗਦੀ ਹੈ ਅਤੇ ਸਮਾਜ 'ਚ ਮਾਣ-ਸਨਮਾਨ 'ਚ ਕਮੀ ਆ ਸਕਦੀ ਹੈ। ਇਸ ਲਈ ਘਰ ਬਣਾਉਂਦੇ ਸਮੇਂ ਜਾਂ ਸਜਾਉਂਦੇ ਸਮੇਂ ਵਾਯਵ ਕੋਣ ਦਾ ਖਾਸ ਧਿਆਨ ਰੱਖਣਾ ਚਾਹੀਦਾ ਹੈ।