ਨਵੀਂ ਦਿੱਲੀ - ਅਸੀਂ ਸਾਰੇ ਰੋਜ਼ਾਨਾ ਘਰ ਦੀ ਸਾਫ਼-ਸਫ਼ਾਈ ਕਰਦੇ ਹਾਂ ਤਾਂ ਜੋ ਘਰ 'ਚ ਗੰਦਗੀ ਨਾ ਰਹੇ ਪਰ ਕੀ ਤੁਸੀਂ ਜਾਣਦੇ ਹੋ ਕਿ ਸਾਫ਼-ਸਫ਼ਾਈ ਦਾ ਸਿੱਧਾ ਸਬੰਧ ਸਾਡੀ ਕਿਸਮਤ ਅਤੇ ਮਾਨਸਿਕ ਸ਼ਾਂਤੀ ਨਾਲ ਵੀ ਹੈ? ਵਾਸਤੂ ਸ਼ਾਸਤਰ ਦੇ ਅਨੁਸਾਰ, ਘਰ ਦੀ ਗੰਦਗੀ ਨਕਾਰਾਤਮਕ ਊਰਜਾ ਦਾ ਪ੍ਰਤੀਕ ਹੁੰਦੀ ਹੈ। ਸਹੀ ਸਮੇਂ ਅਤੇ ਸਹੀ ਤਰੀਕੇ ਨਾਲ ਲਗਾਇਆ ਗਿਆ ਪੋਚਾ ਨਾ ਸਿਰਫ਼ ਫਰਸ਼ ਨੂੰ ਚਮਕਾਉਂਦਾ ਹੈ, ਸਗੋਂ ਘਰ ਦੇ ਵਾਸਤੂ ਦੋਸ਼ਾਂ ਨੂੰ ਵੀ ਦੂਰ ਕਰਦਾ ਹੈ। ਵਾਸਤੂ ਮਾਹਿਰਾਂ ਅਨੁਸਾਰ, ਘਰ 'ਚ ਪੋਚਾ ਲਗਾਉਂਦੇ ਸਮੇਂ ਕੁਝ ਵਿਸ਼ੇਸ਼ ਗੱਲਾਂ ਦਾ ਧਿਆਨ ਰੱਖਣਾ ਬਹੁਤ ਜ਼ਰੂਰੀ ਹੈ :-

ਮੁੱਖ ਦੁਆਰ ਤੋਂ ਕਰੋ ਸ਼ੁਰੂਆਤ

ਵਾਸਤੂ ਸ਼ਾਸਤਰ ਦੇ ਅਨੁਸਾਰ, ਘਰ 'ਚ ਪੋਚਾ ਲਗਾਉਣ ਦੀ ਸ਼ੁਰੂਆਤ ਹਮੇਸ਼ਾ ਮੁੱਖ ਦੁਆਰ (ਮੇਨ ਗੇਟ) ਤੋਂ ਕਰਨੀ ਚਾਹੀਦੀ ਹੈ। ਇਸ ਤੋਂ ਬਾਅਦ ਹੀ ਘਰ ਦੇ ਬਾਕੀ ਕਮਰਿਆਂ ਅਤੇ ਕੋਨਿਆਂ ਦੀ ਸਫਾਈ ਕਰਨੀ ਚਾਹੀਦੀ ਹੈ। ਪੋਚਾ ਲਗਾਉਂਦੇ ਸਮੇਂ ਇਸ ਨੂੰ ਹਮੇਸ਼ਾ ਕਲਾਕਵਾਈਜ਼ ਦਿਸ਼ਾ 'ਚ ਘੁਮਾਉਣਾ ਚਾਹੀਦਾ ਹੈ।

ਸਫਾਈ ਲਈ ਸਭ ਤੋਂ ਉੱਤਮ ਸਮਾਂ

ਅਕਸਰ ਲੋਕ ਆਪਣੀ ਸਹੂਲਤ ਅਨੁਸਾਰ ਕਦੇ ਵੀ ਪੋਚਾ ਲਗਾ ਲੈਂਦੇ ਹਨ, ਪਰ ਵਾਸਤੂ ਅਨੁਸਾਰ ਇਹ ਗਲਤ ਹੈ। ਪੋਚਾ ਲਗਾਉਣ ਦਾ ਸਭ ਤੋਂ ਉੱਤਮ ਸਮਾਂ ਬ੍ਰਹਮ ਮੁਹੂਰਤ (ਸਵੇਰੇ 4 ਤੋਂ 5:30 ਵਜੇ ਦੇ ਵਿਚਕਾਰ) ਮੰਨਿਆ ਜਾਂਦਾ ਹੈ। ਜੇਕਰ ਇਹ ਸੰਭਵ ਨਾ ਹੋਵੇ, ਤਾਂ ਸੂਰਜ ਚੜ੍ਹਨ ਤੋਂ ਤੁਰੰਤ ਬਾਅਦ ਸਫਾਈ ਕਰ ਲੈਣੀ ਚਾਹੀਦੀ ਹੈ।

ਨਕਾਰਾਤਮਕਤਾ ਦੂਰ ਕਰਨ ਦੇ ਉਪਾਅ

ਪੋਚਾ ਲਗਾਉਂਦੇ ਸਮੇਂ ਪਾਣੀ 'ਚ ਇਕ ਚੁਟਕੀ ਸੇਂਧਾ ਨਮਕ ਜਾਂ ਥੋੜ੍ਹਾ ਜਿਹਾ ਨਿੰਬੂ ਦਾ ਰਸ ਜ਼ਰੂਰ ਮਿਲਾਉਣਾ ਚਾਹੀਦਾ ਹੈ। ਮੰਨਿਆ ਜਾਂਦਾ ਹੈ ਕਿ ਨਮਕ ਨਕਾਰਾਤਮਕ ਊਰਜਾ ਨੂੰ ਸੋਖ ਲੈਂਦਾ ਹੈ। ਅਜਿਹਾ ਕਰਨ ਨਾਲ ਨਾ ਸਿਰਫ਼ ਘਰ ਦੇ ਕੀਟਾਣੂ ਖ਼ਤਮ ਹੁੰਦੇ ਹਨ, ਸਗੋਂ ਪਰਿਵਾਰ ਦੇ ਮੈਂਬਰਾਂ 'ਚ ਆਪਸੀ ਪਿਆਰ ਵੀ ਵਧਦਾ ਹੈ।

ਭੁੱਲ ਕੇ ਵੀ ਇਸ ਸਮੇਂ ਨਾ ਲਗਾਓ ਪੋਚਾ 

ਨਿਯਮਾਂ ਅਨੁਸਾਰ, ਦੁਪਹਿਰ ਦੇ ਸਮੇਂ ਜਾਂ ਸੂਰਜ ਡੁੱਬਣ ਤੋਂ ਬਾਅਦ ਘਰ 'ਚ ਪੋਚਾ ਨਹੀਂ ਲਗਾਉਣਾ ਚਾਹੀਦਾ। ਮਾਨਤਾ ਹੈ ਕਿ ਇਸ ਸਮੇਂ ਨਕਾਰਾਤਮਕ ਸ਼ਕਤੀਆਂ ਦਾ ਪ੍ਰਭਾਵ ਵੱਧ ਹੁੰਦਾ ਹੈ ਅਤੇ ਅਜਿਹੇ ਸਮੇਂ ਸਫਾਈ ਕਰਨ ਨਾਲ ਘਰ 'ਚ ਕਲੇਸ਼ ਹੋ ਸਕਦਾ ਹੈ।