ਸੇਵਾਮੁਕਤ ਹੋਣ ਨੂੰ ਢੁੱਕੇ ਮਾਨਸਾ ਦੇ 2 DSPs ਅੱਜ ਵੀ ਪਾਉਂਦੇ ਨੇ ਗੱਭਰੂਆਂ ਦਾ ਭੁਲੇਖ਼ਾ

ਮਾਨਸਾ/ਬੁਢਲਾਡਾ (ਸੰਦੀਪ ਮਿੱਤਲ/ਮਨਜੀਤ) : ਪੁਲਸ ਦੀ ਨੌਕਰੀ ਤੋਂ ਸੇਵਾਮੁਕਤ ਹੋਣ ਦੇ ਨੇੜੇ ਲੱਗੇ ਪੰਜਾਬ ਪੁਲਸ ਦੇ 58 ਸਾਲਾਂ ਦੇ 2 ਉੱਚੇ-ਲੰਮੇ ਗੱਭਰੂ ਹਾਲੇ ਵੀ ਗੁੰਦਵੇਂ ਸਰੀਰ, ਆਪਣੀਆਂ ਬੜ੍ਹਕਾਂ ਅਤੇ ਖੇਡਾਂ ਨਾਲ ਜੁੜੇ ਹੋਣ ਕਰਕੇ ਵੱਖਰੇ ਤੌਰ 'ਤੇ ਪਛਾਣੇ ਜਾਂਦੇ ਹਨ। ਬੇਸ਼ੱਕ ਉਹ ਉਮਰ ਦਾ ਵੱਡਾ ਪੜਾਅ ਪੂਰਾ ਕਰਕੇ ਨੌਕਰੀ ਤੋਂ ਸੇਵਾਮੁਕਤ ਹੋਣ ਜਾ ਰਹੇ ਹਨ ਪਰ ਉਨ੍ਹਾਂ ਦੇ ਗੁੰਦਵੇਂ ਸਰੀਰ ਦੀਆਂ ਜਵਾਨੀ ਵੇਲੇ ਦੀਆਂ ਵਜਦੀਆਂ ਬੜ੍ਹਕਾਂ ਅੱਜ ਵੀ ਕਾਇਮ ਹਨ। ਉਨ੍ਹਾਂ ਨੂੰ ਦੇਖ ਕੇ ਯਕੀਨ ਨਹੀਂ ਹੁੰਦਾ ਕਿ ਉਹ ਇੰਨੇ ਵੱਡੇ ਹੋ ਗਏ ਅਤੇ ਨੌਕਰੀ ਤੋਂ ਸੇਵਾਮੁਕਤ ਹੋ ਰਹੇ ਹਨ। 58 ਵਰ੍ਹਿਆਂ ਦੇ ਹੋ ਕੇ 38 ਸਾਲ ਦਾ ਭੁਲੇਖਾ ਪਾਉਂਦੇ ਮਾਨਸਾ ਦੇ 2 ਡੀ. ਐੱਸ. ਪੀ ਪਰਮਜੀਤ ਸਿੰਘ ਸੰਧੂ ਅਤੇ ਗਮਦੂਰ ਸਿੰਘ ਚਹਿਲ ਗੱਭਰੂਆਂ ਨੂੰ ਹੱਟ ਪਿੱਛੇ ਕਹਿਣ ਦੀ ਜ਼ੁੱਰਤ ਰੱਖਦੇ ਹਨ।

ਇਹ ਪੰਜਾਬ ਪੁਲਸ ਦੇ ਗੱਭਰੂ 31 ਮਾਰਚ 2025 ਨੂੰ ਆਪਣੀ ਡੀ. ਐੱਸ. ਪੀ ਦੀ ਨੌਕਰੀ ਤੋਂ ਸੇਵਾਮੁਕਤ ਹੋ ਜਾਣਗੇ। ਇੱਕ ਭਗਵਾਨਪੁਰ ਹੀਂਗਣੇ ਵਾਲਾ ਪਰਮਜੀਤ ਸਿੰਘ ਸੰਧੂ, ਦੂਜਾ ਖਨੌਰੀ ਵਾਲਾ ਗਮਦੂਰ ਸਿੰਘ ਚਹਿਲ ਡੀ. ਐੱਸ. ਪੀ ਬੁਢਲਾਡਾ। ਦੋਹਾਂ ਨੇ ਐਥਲੈਟਿਕਸ ਦੀ ਦੁਨੀਆਂ 'ਚ ਪੰਜਾਬ ਪੁਲਸ ਅਤੇ ਪੰਜਾਬ ਦਾ ਝੰਡਾ ਬੁਲੰਦ ਕੀਤਾ ਹੋਇਆ ਹੈ। ਪਰਮਜੀਤ ਸਿੰਘ ਉੱਚੀ ਛਾਲ 'ਚ ਪੰਜਾਬ ਦਾ ਰਿਕਾਰਡ ਹੋਲਡਰ ਬਣਿਆ ਅਤੇ ਗਮਦੂਰ ਸਿੰਘ 10 ਈਵੈਂਟਾਂ ਵਾਲੀ ਖੇਡ ਡਿਕੈਥਲਨ 'ਚ ਰਿਕਾਰਡ ਬਣਾ ਚੁੱਕਿਆ ਹੈ। ਇਹ ਦੋਵੇਂ ਇਸ ਖੇਡ 'ਚ ਕਿਸੇ ਨੂੰ ਨੇੜੇ-ਤੇੜੇ ਵੀ ਨਹੀਂ ਆਉਣ ਦਿੰਦੇ। ਪਰਮਜੀਤ ਸਿੰਘ ਅਤੇ ਗਮਦੂਰ ਸਿੰਘ ਨੇ ਆਪਣੇ ਖ਼ਰਚੇ 'ਤੇ ਅਮਰੀਕਾ ਦੇ ਸ਼ਹਿਰ ਲਾਸ ਏਂਜਲਸ 'ਚ ਹੋਈਆਂ ਖੇਡਾਂ 'ਚ ਹਿੱਸਾ ਲੈ ਕੇ ਭਾਰਤ ਲਈ 2 ਚਾਂਦੀ ਦੇ ਮੈਡਲ ਜਿੱਤੇ ਅਤੇ ਪੰਜਾਬ ਪੁਲਸ ਅਤੇ ਪੰਜਾਬ ਦਾ ਨਾਂ ਉੱਚਾ ਕੀਤਾ।

ਪਰਮਜੀਤ ਸਿੰਘ ਨੇ ਉੱਚੀ ਛਾਲ ਅਤੇ ਗਮਦੂਰ ਸਿੰਘ ਡਿਸਕਸ ਥਰੋ 'ਚ ਚਾਂਦੀ ਦੇ ਮੈਡਲ ਜਿੱਤ ਕੇ ਜਦੋਂ 2017 'ਚ ਪੰਜਾਬ ਵਾਪਸ ਆਏ ਸਨ ਤਾਂ ਉਨ੍ਹਾਂ ਨੂੰ ਰੈਂਕ ਦਾ ਅਹੁਦਾ ਦੇਣਾ ਪੰਜਾਬ ਸਰਕਾਰ ਅਤੇ ਪੰਜਾਬ ਪੁਲਸ ਦਾ ਹੱਕ ਬਣਦਾ ਸੀ ਪਰ ਹੋਇਆ ਕੁੱਝ ਨਹੀਂ। ਇਸ ਨੂੰ ਲੈ ਕੇ ਖੇਡ ਕਬੱਡੀ ਦੇ ਅੰਤਰ-ਰਾਸ਼ਟਰੀ ਰੈਫਰੀ ਅਜੈਬ ਸਿੰਘ ਕੈਲੇ, ਖੇਡ ਪ੍ਰੇਮੀ ਅਤੇ ਉੱਘੇ ਲੇਖਕ ਮੈਨੇਜਰ ਕੁਲਵੰਤ ਸਿੰਘ, ਨੌਜਵਾਨ ਗੁਰਜੰਟ ਸਿੰਘ ਚਹਿਲ ਅਹਿਮਦਪੁਰ, ਐਡਵੋਕੇਟ ਗੁਰਵਿੰਦਰ ਸਿੰਘ ਬੀਰੋਕੇ ਨੇ ਕਿਹਾ ਕਿ ਅੱਜ ਪੰਜਾਬ ਵਿੱਚ ਸਰਕਾਰ ਅਤੇ ਪੁਲਸ ਨਸ਼ਿਆਂ ਦੇ ਖ਼ਿਲਾਫ਼ 'ਯੁੱਧ ਨਸ਼ਿਆਂ ਵਿਰੁੱਧ' ਤਹਿਤ ਲੜਾਈ ਲੜ ਰਹੀ ਹੈ। ਅਜਿਹੇ ਸਮੇਂ ਅਜਿਹੇ ਗੱਭਰੂ ਡੀ. ਐੱਸ. ਪੀਜ਼ ਨੂੰ ਰੋਲ-ਮਾਡਲ ਬਣਾ ਕੇ ਪੇਸ਼ ਕਰਨਾ ਲਾਹੇਵੰਦ ਸਾਬਿਤ ਹੋ ਸਕਦਾ ਹੈ। ਇਹ ਦੋਵੇਂ ਗੱਭਰੂ ਜਵਾਨੀ ਨੂੰ ਸਾਂਭਣ ਅਤੇ ਹੰਢਾਉਣ ਦਾ ਬਲ ਜਾਣਦੇ ਹਨ, ਜਿਨ੍ਹਾਂ ਤੋਂ ਨਵੀਂ ਪੀੜ੍ਹੀ, ਨਵੇਂ ਖਿਡਾਰੀ ਵੀ ਪ੍ਰੇਰਣਾ ਲੈ ਸਕਦੇ ਹਨ।

ਪੰਜਾਬ ਸਰਕਾਰ ਨੂੰ ਚਾਹੀਦਾ ਹੈ ਕਿ ਇਨ੍ਹਾਂ ਦੋਹਾਂ ਸੱਜਣਾਂ ਨੂੰ ਇਨ੍ਹਾਂ ਦੀ ਕਾਰਗੁਜ਼ਾਰੀ, ਖੇਡ ਪ੍ਰਤਿਭਾ ਨੂੰ ਦੇਖਦੇ ਹੋਏ ਉਨ੍ਹਾਂ ਦੀ ਸੇਵਾਮੁਕਤੀ ਸਮਾਂ ਅਤੇ ਉਨ੍ਹਾਂ ਦਾ ਰੈਂਕ ਵਧਾ ਕੇ ਬਤੌਰ ਕੋਚ ਪਿੰਡਾਂ ਦੀ ਜਵਾਨੀ ਨੂੰ ਖੇਡ ਮੈਦਾਨਾਂ ਨਾਲ ਜੋੜਣ ਦਾ ਮੌਕਾ ਦੇਵੇ। ਜਵਾਨੀ ਖੇਡਾਂ ਨਾਲ ਜੁੜੇਗੀ ਤਾਂ ਨਸ਼ਿਆਂ ਅਤੇ ਅਲਾਮਤਾਂ ਤੋਂ ਬਚੀ ਰਹੇਗੀ। ਇਹ ਦੋਵੇਂ ਗੱਭਰੂ ਵਿਹਲੜਾਂ ਨੂੰ ਵੀ ਖੇਡ ਮੈਦਾਨਾਂ ਦੇ ਹੀਰੇ ਬਣਾ ਸਕਦੇ ਹਨ। ਉਨ੍ਹਾਂ ਇਹ ਵੀ ਕਿਹਾ ਕਿ ਇਹ ਦੋਵੇਂ ਡੀ. ਐੱਸ. ਪੀਜ਼. ਪੰਜਾਬ ਦੇ ਨੌਜਵਾਨਾਂ ਨੂੰ ਵੱਡੀ ਸੇਧ ਦੇ ਸਕਦੇ ਹਨ ਅਤੇ ਨੌਜਵਾਨ ਇਨ੍ਹਾਂ ਦੀ ਫਿਟਨੈੱਸ ਦੇਖ ਕੇ ਖ਼ੁਦ ਖੇਡ ਮੈਦਾਨਾਂ ਦਾ ਹਿੱਸਾ ਬਣਨਗੇ। ਉਨ੍ਹਾਂ ਕਿਹਾ ਕਿ ਪੰਜਾਬ ਸਰਕਾਰ ਸਾਡੀ ਬੇਨਤੀ ਨੂੰ ਪ੍ਰਵਾਨ ਕਰਦੇ ਹੋਏ ਇਨ੍ਹਾਂ ਅਧਿਕਾਰੀ ਗੱਭਰੂਆਂ ਨੂੰ ਵਾਧਾ ਦੇਵੇ ਤਾਂ ਜੋ ਇਨ੍ਹਾਂ ਨੂੰ ਖੇਡਾਂ ਨਾਲ ਜੋੜਿਆ ਜਾਵੇ ਅਤੇ ਪੰਜਾਬ ਦੀ ਨੌਜਵਾਨੀ ਮਾੜੇ ਰਸਤੇ 'ਤੇ ਪੈਣ ਦੀ ਬਜਾਏ ਸਿੱਧੇ ਰਸਤੇ ਪੈ ਸਕੇ।