ਲੰਡਨ ''''ਚ ਤਿੰਨ ਸਿੱਖਾਂ ਦੇ ਕਤਲ ਬਾਰੇ ਕੀ ਕਹਿ ਰਹੀ ਪੁਲਿਸ ਤੇ ਸਿੱਖ ਭਾਈਚਾਰਾ

Tuesday, Jan 21, 2020 - 08:25 PM (IST)

ਐਤਵਾਰ ਸ਼ਾਮ ਨੂੰ ਈਸਟ ਲੰਡਨ ਦੇ ਸੈਵਨ ਕਿੰਗ ਇਲਾਕੇ ''ਚ ਤਿੰਨ ਸਿੱਖ ਨੌਜਵਾਨਾਂ ਦੇ ਕਤਲ ਦਾ ਮਾਮਲਾ ਸਾਹਮਣੇ ਆਇਆ

ਲੰਡਨ ਦੇ ਸੈਵਨ ਕਿੰਗਜ਼ ਇਲਾਕੇ ਵਿਚ ਸਿੱਖ ਨੌਜਵਾਨਾਂ ਦੀ ਆਪਸੀ ਲੜਾਈ ਦੀ ਵਾਰਦਾਤ ਨੂੰ ਮੀਡੀਆ ਦੇ ਕੁਝ ਹਿੱਸੇ ਵਲੋਂ ''ਸਿੱਖ ਗੈਂਗਵਾਰ'' ਕਹੇ ਜਾਣ ਤੋਂ ਭਾਈਚਾਰਾ ਨਿਰਾਸ਼ ਨਜ਼ਰ ਆ ਰਿਹਾ ਹੈ।

ਸਿੱਖ ਭਾਈਚਾਰੇ ਦੇ ਸਥਾਨਕ ਆਗੂਆਂ ਨੇ ''ਸਿੱਖ ਗੈਂਗ'' ਸ਼ਬਦ ਦੀ ਵਰਤੋਂ ਅਤੇ ਲੜਾਈ ਦੌਰਾਨ ਕਿਰਪਾਨਾਂ ਚੱਲਣ ਦੀਆਂ ਖ਼ਬਰਾਂ ਨੂੰ ਰੱਦ ਕੀਤਾ ਹੈ।

ਐਤਵਾਰ ਸ਼ਾਮ ਨੂੰ ਵਾਪਰੀ ਇਸ ਘਟਨਾ ਦੌਰਾਨ ਤਿੰਨ ਜਣਿਆਂ ਦੀ ਮੌਤ ਹੋਈ ਸੀ। ਪੁਲਿਸ ਨੇ ਇਸ ਲੜਾਈ ਨੂੰ ਪਹਿਲਾਂ ਹੀ ਚੱਲ ਰਹੇ ਝਗੜੇ ਦਾ ਹਿੱਸਾ ਦੱਸਿਆ ਹੈ।

ਪੁਲਿਸ ਨੇ ਕਿਹਾ, '''' ਛੁਰੇਬਾਜ਼ੀ ਦੀ ਜਿਸ ਘਟਨਾ ਵਿਚ ਤਿੰਨ ਨੌਜਵਾਨਾਂ ਦੀ ਮੌਤ ਹੋਈ ਹੈ, ਉਹ ਇਨ੍ਹਾਂ ਵਿਚਾਲੇ ਪਹਿਲਾਂ ਹੀ ਚੱਲ ਰਹੇ ਵਿਵਾਦ ਦਾ ਨਤੀਜਾ ਸੀ''''। ਮਰਨ ਵਾਲਿਆਂ ਦੀ ਉਮਰ 20 ਤੋਂ 30 ਸਾਲਾਂ ਦਰਮਿਆਨ ਸੀ।

ਪੁਲਿਸ ਦਾ ਮੰਨਣਾ ਹੈ ਕਿ ਕ੍ਰਿਸਟੈੱਲ ਬੈਕੁਇੰਟਿੰਗ ਨੇੜੇ ਵਾਪਰੀ ਘਟਨਾ ਵਿਚ 5 ਜਣੇ ਸ਼ਾਮਲ ਸਨ ਅਤੇ ਉਹ ਸਾਰੇ ਇੱਕ ਦੂਜੇ ਨੂੰ ਜਾਣਦੇ ਸਨ। ਇਹ ਸਿੱਖ ਅਤੇ ਹਿੰਦੂ ਭਾਈਚਾਰੇ ਨਾਲ ਸਬੰਧਤ ਸਨ।

ਡੈਟ ਚ ਇੰਸਪੈਕਟਰ ਪੌਲ ਕੋਸੀਡਾਇਨ ਨੇ ਕਿਹਾ, '''' ਭਾਵੇਂ ਕਿ ਇਸ ਸਮੇਂ ਕੁਝ ਵੀ ਕਹਿਣਾ ਜਲਦਬਾਜ਼ੀ ਹੋਵੇਗੀ, ਪਰ ਮੈਂ ਸਮਝਦਾ ਹਾਂ ਕਿ ਇਹ ਗੈਂਗ ਜਾਂ ਨਸਲੀ ਮਾਮਲਾ ਨਹੀਂ ਹੈ। ਪਰ ਮੈਨੂੰ ਲਗਦਾ ਹੈ ਕਿ ਇਹ ਪਹਿਲਾਂ ਤੋਂ ਹੀ ਜਾਰੀ ਕਿਸੇ ਵਿਵਾਦ ਦਾ ਹਿੱਸਾ ਸੀ ਅਤੇ ਅਸੀਂ ਸਮਝਦੇ ਹਾਂ ਕਿ ਇਸ ਵਿਚ 5 ਜਣੇ ਸ਼ਾਮਲ ਹਨ।''''

ਇਸ ਵਾਰਦਾਤ ਬਾਰੇ ਲੰਡਨ ਵਿਚ ਬੀਬੀਸੀ ਪੰਜਾਬੀ ਦੀ ਸਹਿਯੋਗੀ ਕਮਲ ਪ੍ਰੀਤ ਕੌਰ ਨੇ ਕੁਝ ਸਥਾਨਕ ਸਿੱਖ ਆਗੂਆਂ ਨਾਲ ਗੱਲਬਾਤ ਕੀਤੀ।

ਲੰਡਨ ਦੀ ਸਿੱਖ ਸਟੱਡੀ ਫੋਰਮ ਦੇ ਚੇਅਰਮੇਨ ਬਲਦੇਵ ਸਿੰਘ ਬੈਂਸ ਨੇ ਬੀਬੀਸੀ ਨੂੰ ਦੱਸਿਆ , "ਮੀਡਿਆ ਨੇ ਗ਼ਲਤ ਤਰੀਕੇ ਨਾਲ ਰਿਪੋਰਟ ਕੀਤਾ ਹੈ ਕਿ ਇਹ ਗੈਂਗ ਨਾਲ ਸਬੰਧਤ ਘਟਨਾ ਹੈ। ਇਹ ਗੈਂਗਵਾਰ ਨਹੀਂ ਸੀ। ਇਹ ਸਾਰੇ ਆਪਸ ''ਚ ਇੱਕ-ਦੂਜੇ ਨੂੰ ਜਾਣਦੇ ਸੀ। ਪੈਸਿਆਂ ਦਾ ਕੋਈ ਮਸਲਾ ਸੀ, ਉਹ ਲੋਕਲ ਰੈਸਟੋਰੈਂਟ ''ਚ ਨਸ਼ਾ ਪੀਂਦੇ ਸੀ, ਜਿਸ ਕਰਕੇ ਸਾਰਾ ਕੰਮ ਹੱਥੋਂ ਨਿਕਲ ਗਿਆ।

ਉਨ੍ਹਾਂ ਅੱਗੇ ਕਿਹਾ, "ਜਿਸ ਤਰ੍ਹਾਂ ਦੀ ਰਿਪੋਰਟਿੰਗ ਕੀਤੀ ਜਾ ਰਹੀ ਹੈ ਕਿਧਰੇ ਉਸ ਨਾਲ ਇਹ ਰੂਲ ਨਾ ਪਾਸ ਹੋ ਜਾਵੇਂ ਕਿ ਅਮ੍ਰਿਤਧਾਰੀ ਸਿੱਖ ਕਿਰਪਾਨ ਨਹੀਂ ਪਾ ਸਕਦੇ। ਸਿੱਖ ਸ਼ਾਂਤੀਮਈ ਭਾਈਚਾਰਾ ਹੈ। ਅਸੀਂ ਅਜਿਹੇ ਕੰਮਾਂ ''ਚ ਨਹੀਂ ਪੈਂਦੇ। ਬਲਕਿ ਅਸੀਂ ਹੋਰਾਂ ਦੀ ਮਦਦ ਕਰਦੇ ਹਾਂ।"

ਸਿੱਖ ਆਗੂ ਸੁਖਬਿੰਦਰ ਸਿੰਘ ਜੰਡੂ ਨੇ ਕਿਹਾ, "ਅਸੀਂ ਇਸ ਦੁੱਖ ਭਰੇ ਸਮੇਂ ''ਚ ਸਿੱਖ ਭਾਈਚਾਰੇ ਅਤੇ ਪਰਿਵਾਰਾਂ ਨਾਲ ਸਾਂਝ ਕਰਦੇ ਹਾਂ। ਇਹ ਬੰਦੇ ਆਪਸ ਵਿੱਚ ਇੱਕ-ਦੂਜੇ ਨੂੰ ਜਾਣਦੇ ਸਨ। ਪਹਿਲਾਂ ਖਾਣਾ ਖਾ ਰਹੇ ਸਨ। ਫਿਰ ਕਿਸੀ ਗੱਲ ਨੂੰ ਲੈ ਕੇ ਝਗੜਾ ਹੋ ਗਿਆ ਅਤੇ ਫਿਰ ਚਾਕੂ ਤੇ ਹਥੌੜਾ ਵਰਤਿਆ ਗਿਆ।"

ਉਨ੍ਹਾਂ ਕਿਹਾ, "ਸਾਡੇ ''ਚ ਇਸ ਗੱਲ ਦਾ ਰੋਸ ਹੈ ਕਿ ਮੀਡਿਆ ਨੇ ''ਸਿੱਖ ਗੈਂਗ'' ਸ਼ਬਦ ਦੀ ਵਰਤੋਂ ਕੀਤੀ ਹੈ ਤੇ ਕਿਹਾ ਹੈ ਕਿ ਕਿਰਪਾਨ ਦੀ ਵਰਤੋਂ ਹੋਈ ਹੈ। ਅਸੀਂ ਇਸ ਗੱਲ ਦਾ ਸਪਸ਼ਟੀਕਰਨ ਕਰਦੇ ਹਾਂ ਕਿ ਕਿਰਪਾਨ ਦੀ ਵਰਤੋਂ ਨਹੀਂ ਹੋਈ ਅਤੇ ਨਾ ਹੀ ਕਿਸੇ ਸਿੱਖ ਗੈਂਗ ਦਾ ਆਪਸ ''ਚ ਕੋਈ ਝਗੜਾ ਸੀ।"

ਇਹ ਵੀ ਪੜ੍ਹੋ

ਕੀ ਹੈ ਪੂਰਾ ਮਾਮਲਾ?

ਐਤਵਾਰ ਨੂੰ ਪੂਰਬੀ ਲੰਡਨ ਵਿੱਚ ਇੱਕ ਝੜਪ ਦੇ ਦੌਰਾਨ ਤਿੰਨ ਸਿੱਖ ਨੌਜਵਾਨਾਂ ਦਾ ਚਾਕੂ ਮਾਰ ਕੇ ਕਤਲ ਕੀਤਾ ਗਿਆ।

ਝੜਪ ਦੀ ਇਹ ਘਟਨਾ ਐਤਵਾਰ ਰਾਤ ਨੂੰ ਸਾਢੇ ਸੱਤ ਵਜੇ ਦੇ ਕਰੀਬ ਪੂਰਬੀ ਲੰਡਨ ਦੇ ਇਲਫੋਰਡ ਵਿੱਚ ਰੈੱਡਬਰਿਜ ਦੇ ਸੈਵਨ ਕਿੰਗਜ਼ ਖੇਤਰ ''ਚ ਵਾਪਰੀ।

ਮਾਰੇ ਗਏ ਤਿੰਨ ਨੌਜਵਾਨਾਂ ਦੀ ਉਮਰ 20 ਤੋਂ 30 ਸਾਲ ਦੇ ਦਰਮਿਆਨ ਹੈ। ਤਿੰਨਾਂ ਨੇ ਮੌਕੇ ''ਤੇ ਹੀ ਦਮ ਤੋੜ ਦਿੱਤਾ।

ਪੁਲਿਸ ਨੇ ਕੀ ਕਿਹਾ?

ਮੈਟਰੋਪੋਲੀਟਨ ਪੁਲਿਸ ਨੇ ਦੱਸਿਆ ਕਿ ਇਸ ਘਟਨਾ ਨਾਲ ਸਬੰਧਤ ਨੌਜਵਾਨ ਇੱਕ-ਦੂਜੇ ਨੂੰ ਜਾਣਦੇ ਸਨ। ਪੁਲਿਸ ਦੇ ਮੁਤਾਬ਼ਕ, ਇਹ ਸਿੱਖ ਅਤੇ ਹਿੰਦੂ ਭਾਈਚਾਰੇ ਨਾਲ ਸਬੰਧ ਰੱਖਦੇ ਸਨ।

ਮੈਟਰੋਪਾਲਿਟਨ ਪੁਲਿਸ ਦੇ ਕਮਾਂਡਰ ਤੇ ਡਿਟੈਕਟਿਵ ਚੀਫ਼ ਸੁਪਰਡੈਂਟ ਸਟੀਵ ਕਲੇਮੈਨ ਨੇ ਕਿਹਾ, ''ਸਾਡਾ ਮੰਨਣਾ ਹੈ ਕਿ ਝੜਪ ਵਿੱਚ ਸ਼ਾਮਲ ਦੋਵੇਂ ਧਿਰਾਂ ਸਿੱਖ ਭਾਈਚਾਰੇ ਨਾਲ ਸਬੰਧਤ ਹਨ ਤੇ ਇਕ ਦੂਜੇ ਨੂੰ ਜਾਣਦੇ ਸਨ। ਦੋਵਾਂ ਧਿਰਾਂ ''ਚ ਕਿਸੇ ਗੱਲੋਂ ਤਲਖ਼ੀ ਹੋਈ, ਜੋ ਵਧ ਗਈ ਤੇ ਨਤੀਜੇ ਵਜੋਂ ਤਿੰਨ ਜਣਿਆਂ ''ਤੇ ਬੁਰੇ ਤਰੀਕੇ ਨਾਲ ਹਮਲਾ ਕੀਤਾ ਗਿਆ।"