ਅਭਿਆਸ ਮੈਚ ਤੋਂ ਪਹਿਲਾਂ ਜ਼ਖਮੀ ਹੋਏ ਸ਼ਿਖਰ ਧਵਨ, ਭਾਰਤ ਦੀ ਵਧੀ ਚਿੰਤਾ

ਸਪੋਰਟਸ ਡੈੱਕਸ— ਆਈ. ਸੀ. ਸੀ. ਕ੍ਰਿਕਟ ਵਿਸ਼ਵ ਕੱਪ 2019 ਦਾ ਆਗਾਜ 30 ਮਈ ਨੂੰ ਹੋਵੇਗਾ। ਵਿਸ਼ਵ ਕੱਪ ਦੀ ਸ਼ੁਰੂਆਤ ਤੋਂ ਪਹਿਲਾਂ ਭਾਰਤ ਤੇ ਨਿਊਜ਼ੀਲੈਂਡ ਵਿਚਾਲੇ 25 ਮਈ ਨੂੰ ਅਭਿਆਸ ਮੈਚ ਖੇਡਿਆ ਜਾਵੇਗਾ ਪਰ ਇਸ ਤੋਂ ਪਹਿਲਾਂ ਭਾਰਤੀ ਟੀਮ ਦੇ ਬੱਲੇਬਾਜ਼ ਸ਼ਿਖਰ ਧਵਨ ਦੇ ਸੱਟ ਲੱਗ ਗਈ ਹੈ। ਬੈਟਿੰਗ ਕੋਚ ਸੰਜੈ ਬਾਂਗੜ ਦੇ ਨਾਲ ਅਭਿਆਸ ਦੌਰਾਨ ਇਕ ਸ਼ਾਟ ਪਿੱਚ ਗੇਂਦ ਧਵਨ ਦੇ ਹੇਲਮੇਟ ਨਾਲ ਲੱਗੀ ਜਿਸ ਕਾਰਨ ਉਸ ਦੇ ਸੱਟ ਲੱਗ ਗਈ।

ਇਸ ਤੋਂ ਬਾਅਦ ਧਵਨ ਨੂੰ ਅਭਿਆਸ ਮੈਚ ਤੋਂ ਹਟਨਾ ਪਿਆ ਤੇ ਉਸ ਨੂੰ ਫਿਜ਼ੀਓ ਪੈਟ੍ਰਿਕ ਫਰਹਾਰਟ ਕੋਲ ਚੈੱਕਅਪ ਦੇ ਲਈ ਜਾਣਾ ਪਿਆ। ਇਕ ਰਿਪੋਰਟ 'ਚ ਧਵਨ ਦੇ ਮੂੰਹ 'ਚੋਂ ਖੂਨ ਨਿਕਲਣ ਦੀ ਗੱਲ ਵੀ ਸਾਹਮਣੇ ਆਈ ਹੈ। ਵਿਸ਼ਵ ਕੱਪ ਦੇ ਲਈ ਚੁਣੇ ਗਏ ਸਾਰੇ 15 ਖਿਡਾਰੀ ਕਰੀਬ 2 ਮਹੀਨੇ ਬਾਅਦ ਇਕੱਠੇ ਮੈਦਾਨ 'ਤੇ ਆਏ ਹਨ। ਇਸ ਦੌਰਾਨ ਭਾਰਤੀ ਟੀਮ ਦੇ ਕਪਤਾਨ ਵਿਰਾਟ ਕੋਹਲੀ ਤੇ ਸਾਬਕਾ ਕਪਤਾਨ ਮਹਿੰਦਰ ਸਿੰਘ ਧੋਨੀ ਵੀ ਅਭਿਆਸ ਕਰ ਰਹੇ ਸਨ।

ਜ਼ਿਕਰਯੋਗ ਹੈ ਕਿ ਭਾਰਤੀ ਟੀਮ 22 ਮਈ ਨੂੰ ਇੰਗਲੈਂਡ ਦੇ ਲਈ ਰਵਾਨਾ ਹੋਈ ਸੀ ਤੇ 5 ਜੂਨ ਨੂੰ ਦੱਖਣੀ ਅਫਰੀਕਾ ਵਿਰੁੱਧ ਉਹ ਪਹਿਲਾਂ ਮੈਚ ਖੇਡੇਗੀ।