ਮੈਦਾਨ 'ਤੇ ਕੋਹਲੀ ਨੂੰ ਗੁੱਸਾ ਦਿਖਾਉਣਾ ਪਿਆ ਮਹਿੰਗਾ, ICC ਨੇ ਲਗਾਇਆ ਭਾਰੀ ਜੁਰਮਾਨਾ

ਸੈਂਚੁਰੀਅਨ (ਬਿਊਰੋ)— ਭਾਰਤੀ ਕਪਤਾਨ ਵਿਰਾਟ ਕੋਹਲੀ ਉੱਤੇ ਆਈ.ਸੀ.ਸੀ. ਦੀ ਅਚਾਰ ਸੰਹਿਤਾ (ਕੋਡ ਆਫ ਕੰਡਕਟ) ਦੀ ਉਲੰਘਣਾ ਕਰਨ ਉੱਤੇ ਜੁਰਮਾਨਾ ਲਗਾਇਆ ਗਿਆ ਹੈ। ਵਿਰਾਟ ਨੇ ਸਾਊਥ ਅਫਰੀਕਾ ਖਿਲਾਫ ਸੈਂਚੁਰੀਅਨ ਵਿਚ ਖੇਡੇ ਜਾ ਰਹੇ ਦੂਜੇ ਟੈਸਟ ਮੈਚ ਦੇ ਤੀਸਰੇ ਦਿਨ ਨਿਯਮਾਂ ਦੀ ਉਲੰਘਣਾ ਕੀਤੀ ਜਿਸਦੇ ਚੱਲਦੇ ਉਨ੍ਹਾਂ ਉੱਤੇ ਮੈਚ ਫੀਸ ਦਾ 25 ਫ਼ੀਸਦੀ ਜੁਰਮਾਨਾ ਲਗਾ ਹੈ। ਉਨ੍ਹਾਂ ਨੂੰ ਲੇਵਲ-1 ਦਾ ਦੋਸ਼ੀ ਪਾਇਆ ਗਿਆ ਹੈ ਅਤੇ ਇਸਦੇ ਲਈ ਉਨ੍ਹਾਂ ਨੂੰ 1 ਡੀ-ਮੈਰਿਟ ਅੰਕ ਵੀ ਮਿਲੇਗਾ।

ਸਿੱਧੇ ਮੈਚ ਰੈਫਰੀ ਦੇ ਰੂਮ ਵੱਲ ਗਏ ਵਿਰਾਟ
ਸੈਂਚੁਰੀਅਨ ਟੈਸਟ ਦੇ ਤੀਸਰੇ ਦਿਨ ਆਖਰੀ ਸੈਸ਼ਨ ਦਾ ਖੇਡ ਰੋਕੇ ਜਾਣ ਨੂੰ ਲੈ ਕੇ ਵਿਰਾਟ ਕਾਫ਼ੀ ਨਾਰਾਜ਼ ਨਜ਼ਰ ਆਏ ਸਨ। ਦਰਅਸਲ, ਮੈਚ ਦੌਰਾਨ ਪਹਿਲਾ ਮੀਂਹ ਨੇ ਰੁਕਾਵਟ ਪਾਈ ਪਰ ਜਦੋਂ ਮੀਂਹ ਦੇ ਬਾਅਦ ਖੇਡ ਫਿਰ ਸ਼ੁਰੂ ਹੋਇਆ ਤਾਂ 5 ਓਵਰਾਂ ਦੇ ਬਾਅਦ ਫਿਰ ਖੇਡ ਰੁਕਿਆ। ਇਸ ਵਾਰ ਖੇਡ ਮੀਂਹ ਦੀ ਬਜਾਇ ਫੀਲਡ ਅੰਪਾਇਰਾਂ ਨੇ ਖ਼ਰਾਬ ਰੌਸ਼ਨੀ ਦੇ ਚਲਦੇ ਰੋਕਿਆ। ਇਸ ਤੋਂ ਵਿਰਾਟ ਗ਼ੁੱਸੇ ਵਿਚ ਮੈਦਾਨ ਤੋਂ ਬਾਹਰ ਨਿਕਲੇ ਅਤੇ ਸਿੱਧੇ ਮੈਚ ਰੈਫਰੀ ਕ੍ਰਿਸ ਬਰਾਡ ਦੇ ਕਮਰੇ ਵਿਚ ਜਾ ਪੁੱਜੇ। ਵਿਰਾਟ ਨੇ ਮੈਚ ਰੈਫਰੀ ਸਾਹਮਣੇ ਖੇਡ ਰੋਕੇ ਜਾਣ ਉੱਤੇ ਆਪਣੀ ਨਰਾਜ਼ਗੀ ਜਿਤਾਈ।

ਗੁੱਸੇ 'ਚ ਜ਼ੋਰ ਨਾਲ ਮੈਦਾਨ 'ਤੇ ਸੁੱਟੀ ਗੇਂਦ
ਆਈ.ਸੀ.ਸੀ. ਦੀ ਵੈਬਸਾਈਟ ਉੱਤੇ ਜਾਰੀ ਬਿਆਨ ਮੁਤਾਬਕ, 'ਵਿਰਾਟ ਨੇ ਇਸ ਦੌਰਾਨ ਗ਼ੁੱਸੇ ਵਿਚ ਗੇਂਦ ਜ਼ੋਰ ਨਾਲ ਮੈਦਾਨ ਉੱਤੇ ਸੁੱਟੀ। ਦੂਜੇ ਟੈਸਟ ਦੀ ਪਹਿਲੀ ਪਾਰੀ ਵਿਚ 153 ਦੌੜਾਂ ਦੀ ਸ਼ਾਨਦਾਰ ਸੈਂਕੜੀਏ ਪਾਰੀ ਖੇਡਣ ਵਾਲੇ ਵਿਰਾਟ ਨੂੰ ਆਈ.ਸੀ.ਸੀ. ਕੋਡ ਆਫ ਕੰਡਕਟ (ਖਿਡਾਰੀ ਅਤੇ ਸਪੋਰਟ ਪਰਸਨਲ) ਦੇ ਆਰਟੀਕਲ 2.1.1 ਦੇ ਉਲੰਘਣਾ ਦਾ ਦੋਸ਼ੀ ਪਾਇਆ ਗਿਆ ਹੈ ਜੋ ਖੇਡ ਭਾਵਨਾ ਨਾਲ ਜੁੜਿਆ ਹੈ।

ਇੰਨਾ ਲੱਗਦਾ ਹੈ ਜੁਰਮਾਨਾ
ਦਿਨ ਦਾ ਖੇਡ ਖ਼ਤਮ ਹੋਣ ਦੇ ਬਾਅਦ, ਕੋਹਲੀ ਨੇ ਆਪਣੀ ਗਲਤੀ ਸਵੀਕਾਰ ਕਰ ਲਈ ਜਿਸਦੇ ਬਾਅਦ ਹੁਣ ਮਾਮਲੇ ਦੀ ਰਸਮੀ ਸੁਣਵਾਈ ਦੀ ਜ਼ਰੂਰਤ ਨਹੀਂ ਹੈ। ਆਈ.ਸੀ.ਸੀ. ਮੈਚ ਰੈਫਰੀ ਦੇ ਇਲੀਟ ਪੈਨਲ  ਦੇ ਕ੍ਰਿਸ ਬਰਾਡ ਨੇ ਪ੍ਰਸਤਾਵ ਭੇਜਿਆ ਸੀ। ਲੇਵਲ-1 ਦੀ ਉਲੰਘਣਾ ਕਰਨ ਉੱਤੇ ਖਿਡਾਰੀ ਨੂੰ ਪੈਨਲਟੀ ਦੇ ਤੌਰ ਉੱਤੇ ਜ਼ਿਆਦਾ ਤੋਂ ਜ਼ਿਆਦਾ 50 ਫ਼ੀਸਦੀ ਮੈਚ ਫੀਸ ਅਤੇ ਇਕ ਜਾਂ ਦੋ ਡੀ-ਮੈਰਿਟ ਅੰਕਾਂ ਦਾ ਜੁਰਮਾਨਾ ਲਗਾਇਆ ਜਾਂਦਾ ਹੈ।